1 E eeuanga na Iesu Mesia ki tona tavini ko Iosepha Timeti, Tamaiti, e nga ereta e ono, i to ratou taokotaianga i to ratou ngakau e ma te akateitei i to ratou au reo ki runga.

2 Ae, te tuatua a te Atu no runga i tana akonoanga, tei akatumuia i teia au rā openga nei no te akaokianga mai i tona iti tangata, mei tana oki i tuatua mai na roto i te vaa o tona au peroveta, e no te akaputuputuanga o tona aronga tapu kia tu ki runga i te Maunga ko Ziona, e ka riro oki ïa te oire Ierusalema Ou.

3 E ka akatuia oki taua oire ra, e ka akamata oki ki te enua iero, tei ikiia e te maikao rima o te Atu, i roto i te kotinga opunga o te enua ko Missouri, e na te rima o Iosepha Timeti e akatapu atu i te reira, e tetai atu aronga ke ta te Atu i mataora meitaki.

4 Tika tikai ko teia oki te tuatua a te Atu, e ka akatuia oki te oire ko Ierusalema Ou na roto i te akaputuputuanga o te aronga tapu, e ka akamata ki teia ngai nei, koia te ngai o te iero, koia oki ko te iero te ka akatuia atu i teia uki nei.

5 E tika tikai kare teia uki e pou takiri i te ngaro e oti ei teia are i te akatuia ki te Atu, e ka noo tamou oki tetai tiao ki rungaʼo i te reira, e ko taua tiao ra ko te kakā ïa o te Atu, e ka kī rava oki te are i taua kakā ra.

6 E kia tau ki teia Kautaunga Tapu nei, ko te au tamaroa a Mose, kua rauka mai ia ratou teia mana nei i raro ake i te rima o to ratou metua ongai ko Ietero;

7 E kua rauka mai ia Ietero i raro ake i te rima o Kaleba;

8 E kua rauka mai ia Kaleba i raro ake i te rima o Eliu;

9 E Eliu i raro ake i te rima o Ieremia;

10 E Ieremia i raro ake i te rima o Gada;

11 E Gada i raro ake i te rima o Esaia;

12 E kua rauka ia Esaia i raro ake i te rima o te Atua.

13 Te noo katoa ra a Esaia i te tuatau o Aberahama, e nana aia i akameitaki—

14 E kua rauka mai oki ia Aberahama teia kautaunga mei ko mai ia Melekizedeka, e kua rauka mai oki iaia na roto mai i tona au metua tane, e tae uatu kia Noa;

15 E mei ia Noa e tae uatu kia Enoka, na roto tika mai i to raua ai metua;

16 E mei ia Enoka kia Abela, ko tei tāiaia na roto i te akakoro kino a tona tuakana, ko tei rauka mai te kautaunga na roto i te au akaueanga a te Atua, na roto i te rima o tona metua tane ko Adamu, koia oki te tangata mua—

17 E te vai nei rai taua kautaunga ki roto i te akonoanga a te Atua i roto i te au uki ravarai, e kare oki e akamataanga o te au rā, kare katoa e openga o te au mataiti.

18 E kua akatinamou katoa oki te Atu i tetai kautaunga ki rungaʼo ia Aarona e tana uanga, i roto i to ratou uki katoatoa, e ka tupu uatu rai taua kautaunga ra e ka vai e tuatau uatu, e ko taua kautaunga ra tei raro ake ïa i te akanooanga tapu roatu a te Atua.

19 E ko teia kautaunga teitei, nana e taangaanga i te evangelia e e mou katoa i te taviri o te au mea muna o te basileia, koia te taviri o te kite o te Atua.

20 No reira, i roto ïa i te au angaanga oroa tapu ka akaariia mai ei te mana tu atua.

21 E me kare oki e angaanga oroa tapu, e ma te kare katoa oki e tikaanga o te kautaunga, kare te mana o te tu atua e akaariia mai ki te tangata i te kopapa nei;

22 E naringa oki e kare teia, kare rava e tangata e ora me kite i te mata o te Atua, ko te Metua.

23 I teia nei, kua apii mārama atu a Mose i teia ki te tamariki a Iseraela i roto i te medebara, e kua tamata pakari tikai kia akatapu i tona iti tangata kia rauka oki ia ratou kia akara i te mata o te Atua;

24 I na ra, kua akaketaketa atu rai ratou i to ratou ngakau e kare ratou i akatikaia ki mua i tona aroaro; e no reira, no te riri o te Atu, e kua maata rava oki tona riri ia ratou, kua akakite iora aia e auraka rava ratou kia tomo ki roto i tona akangaroianga ia ratou e noo ra i roto i te medebara, e ko taua akangaroianga ra, koia tona kakā.

25 No reira, kua apai ke aia ia Mose mei rotopu atu ia ratou, e pera katoa te Kautaunga Tapu;

26 E kua vai mai rai te kautaunga akaaka, e ko taua kautaunga ra tei aia te taviri o te matuapuruanga angela e te evangelia akateateamamao;

27 E ko te reira oki te evangelia o te tataraara, e o te bapetizoanga, e te akakoreanga o te au ara, e te ture katoa o te au akaueanga kopapa, ta te Atu i tuku mai no tona riri kia vai uatu rai ki runga i te ngutuare o Aarona e ki runga katoa i te tamariki a Iseraela e tae ua mai a Ioane, ta te Atua i akatu mai, tei kī i te Vaerua Tapu mei roto mai i te kopu o tona metua vaine.

28 E kua bapetizoia oki aia i tona ouanga, e kua akataongaia aia e te angela a te Atua ki teia mana i te tuatau e varu ona rā, kia akaorureau i te basileia o Iuda, e kia akatika i te arataa o te Atu ki mua i te mata o tona iti tangata, ei akateateamamao ia ratou no te aerenga mai o te Atu, tei orongaia te au mana katoatoa ki tona rima.

29 E pera katoa, ka anoanoia te nga taonga ereta e te episekopo ei tuanga no te kautaunga teitei.

30 E pera katoa, ka anoanoia te nga taonga puapii e te diakono ei tuanga no te kautaunga akaaka, koia oki te kautaunga tei akatinamouia ki runga ia Aarona e tana au tamaroa.

31 No reira, mei taku i karanga atu no runga i te au tamaroa a Mose—ka oronga oki te au tamaroa a Mose e pera katoa te au tamaroa a Aarona i tetai orongaanga tau e te atinga ki roto i te are o te Atu, koia te are te ka akatuia ki te Atu i roto i teia uki nei ki rungaʼo i te ngai akatapuia tei akatakaia e au—

32 E ka akakīia oki te au tamaroa a Mose e Aarona ki te kakā o te Atu, ki runga i te Maunga ko Ziona i roto i te are o te Atu, e ko kotou oki taua au tamaroa ra; e manganui katoa oki taku i kapiki e kua tono atu kia akatupu i taku akonoanga.

33 E ko tei tu akarongo tikai i te raukaanga mai o teia nga kautaunga nei taku oki i tuatua atu ana, e te akamaataanga i to ratou kapikianga, ka akatapuia ïa e te Vaerua ki te akaouanga o to ratou au kopapa.

34 Ka riro mai oki ratou ei au tamaroa na Mose e na Aarona e te uanga katoa na Aberahama, e te akonoanga ma te basileia, e ko ratou tei ikiia e te Atua ra.

35 E pera katoa ko te katoatoa rava tei ariki mai i teia kautaunga, kua ariki katoa mai iaku nei, te tuatua maira te Atu;

36 Ko tei ariki mai i toku ra au tavini, kua ariki katoa mai ïa iaku nei;

37 E ko tei ariki mai iaku ra, kua ariki katoa mai ïa i taku Metua;

38 E ko tei ariki mai i taku Metua ra, kua ariki katoa mai ïa i te basileia o taku Metua; e no reira ko te au mea katoatoa o taku Metua ra, ka orongaia atu ïa kiaia.

39 E ka raveia oki teia kia tau ki te taputou e te koreromotu a te kautaunga.

40 No reira, ko ratou katoatoa tei ariki mai i te kautaunga, kua ariki katoa ïa i te taputou e te koreromotu a taku Metua, e kare e rauka iaia kia aati; e kare katoa e rauka i te akatakake.

41 I na ra, ko te ka aati i teia koreromotu nei i muri ake i tona arikianga i te reira, e kua uri ke atu mei te reira, kare rava tana ara e akakoreia i teia ao e pera katoa ki te ao a muri ake.

42 E aue oki ratou katoatoa tei kore i ariu mai ki teia kautaunga nei ta kotou i ariki ake nei, e taku oki e akatinamou atu nei kia kotou tei tae mai i teia rā nei, na roto i toku uaorai reo mei te rangi atu nei; e kua tuku atu oki au i te urupu angela o te rangi e taku au angela katoa ei tiaki ia kotou.

43 E teianei te oronga atu nei au i tetai akaueanga kia kotou kia matakite ia kotou uaorai, kia akarongo meitaki mai i te au tuatua no te ora mutukore.

44 E ka ora oki kotou mei te au tuatua katoatoa te ka mama mai mei roto mai i te vaa o te Atua.

45 E tuatua-mou te tuatua a te Atua, e noatu eaa tei tuatuamou e mārama ïa, e noatu eaa tei mārama e Vaerua ïa, koia te Vaerua o Iesu Mesia.

46 Na te Vaerua oki e oronga mai i te mārama ki te au tangata katoatoa te ka aere mai ki te ao nei; e na te Vaerua oki e akamārama mai i te au tangata ravarai i roto i te ao nei, te ka akarongo ki te reo o te Vaerua.

47 E ko te au tangata katoatoa te ka akarongo atu ki te reo o te Vaerua, ka ariu aia ki te Atua, koia te Metua.

48 E ka apii mai oki te Metua iaia no te koreromotu tana i akaou e i akatinamou ki runga ia kotou, e tei akatinamouia ki runga ia kotou ei meitaki no kotou, kare oki ei meitaki no kotou anake ua, mari ra ei meitaki no te ao katoa nei.

49 Tei roto oki te ao katoa nei i te ara, e ma te ngunguruanga i raro ake i te poiri e i raro ake i te tapekaanga o te ara.

50 E na teia oki e kite ei kotou e, tei raro ratou i te tapekaanga o te ara, no te mea kare ratou e aere mai kiaku nei.

51 Ko tei kore e aere mai kiaku ra, tei raro aia i te tapekaanga o te ara.

52 E ko tei kore e ariki mai i toku reo kare rai aia i matau i toku reo, e kare oki e noku.

53 E na teia e kite ei kotou i te aronga tika mei te aronga kino e te ngurunguru nei te ao katoa i raro ake i te tapekaanga o te ara e te poiri katoa e teia noaʼi.

54 E kua akapoiriia na to kotou au manako i te au tuatau i topa ake nei no te irinaki kore, e no te mea kua apai mama ua kotou i te au mea tei rauka ia kotou—

55 E no te parau e te irinaki kore i tupu ei te akaapaanga o te katoaanga o te akonoanga.

56 E ka vai rai teia akaapaanga ki rungaʼo i te tamariki a Ziona, ko te katoatoa rava.

57 E ka noo rai ratou ki raro ake i teia akaapaanga e tae uatu ki te tuatau e tataraaraʼi ratou ma te akamaara i te koreromotu ou, koia te Puka a Momoni e te au akaueanga i mua na taku i oronga atu kia ratou, kare ei tuatua ua, mari ra, kia rave katoa kia tau ki taku i tata—

58 Kia apai mai oki ratou i te ua tei tau no te basileia o to ratou Metua; me kore oki te vai ra te akautungaanga e te akavaanga te ka riringiia mai ki rungaʼo i te tamariki a Ziona.

59 E ka riro ainei te au tamariki o te basileia i te akaviivii i toku enua tapu? Tika tikai taku e karanga atu kia kotou, Kare.

60 Tika, tika tikai, taku e karanga atu kia kotou e akarongo mai nei i taku au tuatua, koia toku reo, kia akameitaki rava ia kotou mei te mea e ka ariki kotou i teia au mea nei;

61 Ka akakore oki au i ta kotou au ara ki teia akaueanga nei—kia akamou i to kotou manako na roto i te tu rangatira e te vaerua o te pure, i te akakiteanga atu ki to te ao katoatoa no te au mea tei akaariia atu kia kotou.

62 No reira, e aere kotou ki roto i te ao katoa nei; e ki te au ngai kare e rauka kia aere kotou e tono atu i tetai, kia aere te kite papu mei ia kotou atu ki roto i te ao katoa e ki te au mea ora ravarai.

63 E mei taku oki i tuatua atu ki taku au aposetolo, e kua pera katoa au i te tuatuaanga kia kotou, ko kotou oki taku au aposetolo, koia katoa te au taunga teitei a te Atua; ko kotou oki taua aronga ra ta taku Metua i oronga mai kiaku ra; e ko kotou oki toku au oa;

64 No reira, mei taku oki i tuatua atu ki taku ra au aposetolo, te tuatua akaou atu nei kia kotou, e ko te au tangata te ka irinaki atu ki ta kotou au tuatua, e ka bapetizoia ki te vai no te akakoreanga i te ara, ka rauka ia ratou te Vaerua Tapu.

65 E ka aru oki teia au akairo nei ia ratou tei irinaki—

66 E ka rave oki ratou i te au angaanga umere e manganui na roto i toku nei ingoa;

67 E ka tuaru oki ratou i te demoni na roto i toku nei ingoa;

68 E ka akaora oki ratou i te maki na roto i toku nei ingoa;

69 E ka akapuera oki ratou i te mata o te matapo na roto i toku nei ingoa, e ka akarongo te taringa o te taringa turi;

70 E ka tuatua akaou te arero o te tangata murare;

71 E me ka oronga atu tetai tangata i te poitini kia ratou, kare rava te reira e riro ei kino no ratou;

72 E kare e mana o te poitini o te ovi kia takino atu ia ratou.

73 I na ra, e akaueanga taku e oronga atu nei kia ratou, e auraka oki ratou e akapaapaa ua ia ratou no teia au mea nei, auraka oki e tuatua atu i te reira ki to te ao nei; kua orongaia atu oki teia au mea nei kia kotou ei meitaki e ei akaoraanga ra.

74 Tika, tika tikai, taku e karanga atu kia kotou, ko ratou ko tei irinaki kore ki ta kotou au tuatua, e kare oki i bapetizoia ki roto i te vai na roto i toku nei ingoa, no te akakoreanga i ta ratou au ara, kia rauka oki ia ratou te Vaerua Tapu, ka akaapaia ïa, e kare oki e tae ki te basileia o taku Metua te ngai e nooia ra e taku Metua e au katoa.

75 E ko teia eeuanga kia kotou, e te akaueanga, te taangaanga iatu nei te reira mei teia ora tikai ki to te ao katoa nei, e te evangelia ki te katoatoa rava ïa tei kore i ariki ake i te reira.

76 I na ra, tika tikai taku e tuatua atu nei ki te katoatoa rava tei orongaia atu te basileia—e mei ia kotou atu oki te tutuangaia atu kia ratou, kia tataraara oki ratou i ta ratou au angaanga kino i rave ana; no te mea e ka akaapaia no to ratou au ngakau kikino e te irinaki kore, e pera katoa oki ki to kotou au taeake i Ziona no to ratou tu patoitoi kia kotou i te tuatau i tono atu ei au ia kotou.

77 E te karanga akaou atu nei au kia kotou, e taku au oa, mei teianei atu ka kapiki au ia kotou e au oa, e mea tau rava kia oronga atu au i teia akaueanga kia kotou, kia riro mai oki kotou mei toku au oa tikai i te au rā tei o ratou au, i te aereanga i te tutu i te evangelia na roto i toku nei mana;

78 Kare oki au e akatika ia ratou kia apai i tetai pute moni me kore ra te pute manga, auraka katoa kia rua pereue.

79 I na, te tono nei au ia kotou ei timataanga ki to te ao nei, e kua tau te rave angaanga ki tana tutaki.

80 E ko tetai uatu tangata te ka aere e tutu i teia evangelia o te basileia, e kare e akamutu i te rave ua rai ma te tu akarongo tikai i roto i te au mea katoatoa, kare rava e roiroi i roto i tona manako, kare katoa oki e akapoiriia, kare katoa i roto i tona kopapa, kare katoa te au paupauanga; e kare rava tetai kata rauru o tona upoko e topa ki te one ma te kore rava e kiteaia. E kare oki ratou e pongi, e kare katoa oki e kaki vai.

81 No reira, auraka e manako atu i to apopo, no ta kotou ka kai, e me kore ra ko ta kotou ka inu, e me kore ra to kotou kakau.

82 No te mea, ka maara na i te au lili o te enua, te peea nei to ratou tupu; kare ratou i angaanga, kare oki i iro; e ko te au basileia o te ao nei, i roto i to ratou au kakā, kare rava te reira i arite i tetai o ratou nei.

83 Ko to kotou Metua oki i te rangi tei kite e kia rauka taua au mea katoa ra ia kotou e tikaʼi.

84 No reira, na apopo rai e akamanako atu i tana uaorai.

85 Eiaa kotou e manako na mua ake e eaa ta kotou ka tuatua; i na ra, e akaputuputu ki roto i to kotou au manako i te au taime ravarai i te tuatua o te ora, e ka orongaia atu kia kotou i taua ora tikai te tuanga tei tau no te au tangata tatakitai.

86 No reira, auraka rava atu tetai tangata i rotopu ia kotou, ko teia akaueanga nei oki no te au tangata akarongo katoatoa tei kapikiia e te Atua i roto i te akonoanga kia rave i te angaanga tapu, mei teia ora tikai e apai i tetai moni e te pute manga, te ka aere atu i te akakite i teia evangelia o te basileia nei.

87 I na, te tono nei au ia kotou ki vao kia ako atu i to te ao nei no ta ratou au angaanga tika kore, e ma te apii atu kia ratou i tetai akavaanga te ka tae mai.

88 E ko te ka ariki mai ia kotou ra, ka tae katoa atu au ki reira, e ka aere oki au na mua ia kotou. Ka noo oki au ki to kotou rima katau e ki te kaui katoa, e ka noo toku Vaerua ki roto i to kotou ngakau, e ka koropini taku au angela ia kotou, no te akamaroiroi ia kotou.

89 Ko tei ariki mai ia kotou na kua ariki mai ïa iaku, e ko ratou oki te ka angai ia kotou, e ka akakakau ia kotou, e ka oake moni atu na kotou.

90 E ko te ka angai atu ia kotou, me kore ra ka akakakau ia kotou, me kore ra ka oake moni atu na kotou, kare rava aia e ngere i tona tutaki.

91 E ko tei kore e rave i teia au mea nei, kare aia i te pipi naku; na teia oki e kite ei kotou i taku pipi tikai.

92 Ko tei kore i ariki mai ia kotou na, e aere ke atu kotou mei iaia ko kotou anake, e ma te tamā atu i to kotou vaevae ki te vai, ei vai mā tikai, me e vera e me e anu, e ma te akakite i toou kite ki to kotou Metua i te ao ra, e auraka e oki akaou atu ki taua tangata ra.

93 E noatu e koai te tapere e te oire ta kotou ka tomo, e rave pera rai kotou.

94 Kareka ra, e kimi meitaki tikai, e auraka e akaperepere; e aue oki ki tera are, me kore ra ki tera tapere me kore ko te oire tei patoi mai ia kotou, me kore ra ta kotou ra au tuatua, e me kore ra ko to kotou kite no runga iaku.

95 Aue, te tuatua akaou atu nei au, ki tera are, me kore ra ki tera tapere me kore te oire tei patoi ia kotou, me kore ko ta kotou tuatua, e me kore ko to kotou kite no runga iaku;

96 Kua tuku oki au, ko te Mana Katoatoa, i toku nga rima ki rungaʼo i te au iti tangata, kia ta mamae ia ratou no to ratou kino.

97 E ka tae te au maki mate, e kare te reira e akaateaia atu mei runga i te enua e oti rava taku angaanga, ko te ka akapotoia atu na roto i te tuatua-tika—

98 E kite uatu te katoatoa iaku nei, e vai nei, mei te mea meangiti e tae uatu ki tei maata rava, e ka akakīia ki te kite o te Atu, e ka kite oki te mata e te mata, e ka akateitei i to ratou reo, e ka imene oki ratou ma te reo okotai i teia imene ou i te na ko anga e:

99 Kua akaoki akaou mai te Atu ia Ziona;Kua akaora te Atu i tona iti tangata, ko Iseraela,Kia tau ki te ikianga o te aroa ua,Ko tei akaokiia mai na roto i te akarongoE te koreromotu a to ratou au metua.

100 Kua akaora te Atu i tona iti tangata;E kua tapekaia a Satani e kare e tuatau akaou.Kua akaputuputu mai te Atu i te au mea katoatoa ki te ngai okotai.Kua akaoki mai te Atu ia Ziona ki raro nei mei runga mai.Kua akatu akaou mai te Atu ia Ziona mei raro mai.

101 Kua angaanga pakari tikai te enua e kua akaari mai i tona maroiroi;E kua akatumuia te tuatuamou ki roto i tona ngakau;E kua katakata mai te rangi ki rungaʼo iaia;E kua kakauia aia ki te kakā o tona Atua;E te tu ra aia ki rotopu i tona ra iti tangata.

102 Te kakā, e te ngateitei, e te mana, e te ririnui,No to tatou Atua oki ïa; no te mea kua kī aia i te aroa ua,Te tika, te aroa ua e te tuatuamou, e te au,E tuatau e tuatau uatu, Amene.

103 E pera katoa, tika, tika tikai, taku e karanga atu kia kotou, e mea tau rava i te au tangata katoatoa te ka aere atu ka akakite aere atu i taku evangelia mutukore, e mei te mea e e kopu tangata to ratou, e te rauka maira te moni mei te apinga aroa, kia tuku atu oki ratou i te reira kia ratou, e me kore ra kia taangaanga ei puapinga no ratou, mei ta te Atu ka akaaere ia ratou, e kua tau oki te reira iaku.

104 E ko te aronga kare o ratou kopu tangata e e moni ta ratou e rauka mai nei, e tuku atu i te reira ki te episekopo i Ziona, e me kore ra ki te episekopo i Ohio, kia akatapuia oki te reira no te apaianga mai i te au eeuanga e te nenei katoa anga oki i te reira, e no te akatumuanga ia Ziona.

105 E me ka oronga atu tetai tangata i tetai pereue kia kotou, me kore ra e tuuti, e apai i to kotou mea takere e oronga atu no te putaua, e ka aere atu ei ma te mataora i to kotou tere.

106 E me e tangata tetai i rotopu ia kotou tei maroiroi i te Vaerua, kia apai atu aia i tei apikepike kiaia, kia akameitakiia atu aia ma te tu maru tikai, e kia rauka katoa iaia te maroiroi.

107 No reira, e apai atu kotou ia ratou tei akataongaia ki te kautaunga akaaka, e ka tono atu ei ia ratou na mua ake ia kotou kia akapapa i te au araveianga, e kia akateateamamao katoa i te arataa, e kia akatupu i te au angaanga tei kore i rauka ia kotou i te rave.

108 I na, ko teia oki te mataara ta taku au aposetolo, i te tuatau taito, i te akatupuanga i taku akonoanga kiaku.

109 No reira, kia noo te au tangata tatakitai ki tona uaorai taonga, e rave i tana angaanga i kapikiiaʼi; e auraka oki te upoko e karanga atu ki te vaevae e kare ona inangaro i nga vaevae; me kare oki e nga vaevae ka akapeea i reira te kopapa e tu ei?

110 Pera katoa te kopapa i te anoanoanga i te au mero katoatoa, kia meitaki kapipiti oki ratou, e kia vai apakore tikai te au mea katoatoa.

111 E i na, kia tere atu katoa te au taunga teitei, e pera katoa te au ereta, e te au taunga akaaka katoa; i na ra, ko te au diakono e te au puapii ka ikiia ratou ei tiaki i te akonoanga, ei au aronga matuapuru no te akonoanga.

112 E ko te episekopo ko Newel K. Whitney, ka aere katoa oki aia ki te au ngai e ki rotopu i te au akonoanga, i te kimianga i tei putaua e kia tauturuia atu to ratou au ngai e ngere nei na roto i te taakaakaanga i te aronga apinganui e te ngakau parau.

113 Kia tutaki katoa oki aia i tetai mata kia akaaere e kia rave i tana angaanga kimi moni mei tana ka akaaere atu.

114 Kareka ra, kia aere atu oki te episekopo ki te oire ko New York, e ki te oire katoa ko Albany, e ki te oire katoa ko Boston, kia ako atu i te tangata o taua nga oire ra ki te tangi o te evangelia, ma te reo maata, no te akataneaanga maata e te takoreanga e tiaki ua mai nei ia ratou mei te mea e ka patoi ratou i teia au mea nei.

115 No te mea me ka patoi ratou i teia au mea nei, kua vaitata oki te ora no to ratou akavaanga, e ka akarukeia mai to ratou au are ma te tanea kia ratou.

116 Kia irinaki mai oki aia kiaku kia kore oki aia e taekokoia; e kare rava oki tetai kata rauru ona e ngaro me topa ki runga i te one.

117 E tika tikai taku e karanga atu nei kia kotou, ko te toenga o taku au tavini, e aere kotou i te tuatau tau ia kotou, i roto i to kotou au kapikianga, ki taua au oire e te au tapere rongonui, i te akoanga atu i to te ao nei na roto i te tuatua-tika no to ratou au tu tika kore e te angaanga kino, ma te akamāramarama meitaki i te takoreanga atu o te kino i te au rā openga nei.

118 E no kotou oki, te tuatua maira te Atu Mana Katoatoa, ka aae ei au i to ratou au basileia; e kare oki au e ruru ua i te enua nei, i na ra, ka ngaueue oki te au rangi katoa.

119 No te mea, kua tuku oki au, ko te Atu, i toku rima kia tatara i te au mana o te rangi; kare kotou e kite i teianei, a tetai taime ra ka kite ei kotou, e ka kite oki e ko au tikai teia, e ka aere mai au ka tutara ma toku iti tangata.

120 Ko au te Alepha e te Omega, te momua e te akaopenga. Amene.