1 E akarongo mai, e i na, e reo no tetai mei te mea ra e e tangata tei tonoia mai no runga mai, e ririnui e te mana maata, ko te aere nei ki te openga o te enua nei, e ko tona reo, tei te tangata nei ïa—E akateateamamao kotou i te arataa o te Atu, e akatika ua i tona ra aerenga.

2 Kua orongaia mai te au taviri o te basileia o te Atua ki te tangata i te enua nei, e ka taka atu te evangelia mei reira atu e tae uatu ki te openga o te enua nei, e kua aite oki ki te toka tei kokoti ua ia mai no roto i te maunga kare e rima, e ka taka oki ïa e kako rava ake te enua nei.

3 Ae, e reo tetai i te na ko anga e,—E akateateamamao i te arataa o te Atu, e akateateamamao i te kaingakai a te Punua Mamoe, e akapapa no te Tane Akaipoipo Ou.

4 E pure ki te Atu, e kapiki atu i tona ra ingoa tapu, e akakite atu i tana au angaanga manea ki rotopu i te tangata nei.

5 E kapiki atu ki te Atu, kia tupu oki tona basileia ki mua i runga i te enua nei, e kia ariki mai oki te au iti tangata o te enua nei, ma te akateateamamao atu no te au rā ki mua, me tae mai oki te Tamaiti a te Tangata ki raro mei te rangi mai, tei kakauia ki te mārama o tona ra kakā, no te aravei atu anga i te basileia o te Atua tei akamouia ki te enua nei.

6 No reira, kia aere atu te basileia o te Atua ki mua, e kia tae mai ei te basileia o te ao ra, e kia akakakāia oki koe, e te Atua, i te rangi ra e i te enua katoa, e kia tupou oki toou au enemi ki raro; noou oki te ngateitei, te mana e te kakā, e tuatau e tuatau uatu. Amene.