Tuanga 71
Te eeuanga tei orongaia mai kia Iosepha Timeti te Peroveta, e Sidney Rigdon, i Hiram, Ohio, i te rā 1 o Titema, 1831 (History of the Church, 1:238–239). I rave ua rai ana te peroveta i te akaurianga i te Bibilia Tapu ma Sidney Rigdon ei tata tua nana, e tae ua mai ki te arikianga i teia eeuanga nei, e i taua taime rai, kua akapaeia atu te reira angaanga no tetai tuatau poto e raukaʼi ia raua i te akatupu i te akoanga tei orongaia mai i roto i teia eeuanga nei. Kia aere te au taeake kia ako atu ei ariu ke i te manako kino tei tupu mai ki te Akonoanga na roto i te neneianga o tetai au tuatua i roto i te nuti pepa tei tataia e Ezra Booth, ko tei akaruke i te akonoanga.
1–4, Kua tonoia a Iosepha Timeti e Sidney Rigdon kia tutu i te evangelia; 5–11, Ka taakamaia te au enemi o te aronga tapu.
1 I na, te tuatua maira te Atu kia korua e taku nga tavini e Iosepha Timeti, Tamaiti, e Sidney Rigdon, e kua tae mai nei oki te tuatau, kua tau rava oki i roto iaku kia amama korua i to korua vaa ma te akakite aere atu i taku evangelia, te au mea o te basileia, e te akakiteanga i te au mea muna i roto i te au irava tapu, kia tau ki ta te Vaerua e te mana te ka orongaia mai kia korua, mei taku i anoano.
2 Tika tikai taku e karanga atu kia korua, e akakite atu ki to te ao nei e ki te au oire e pini uake, e ki roto katoa i te akonoanga, no tetai tuatau, e tae uatu ki te tuatau e akakiteia atu ei kia korua.
3 Tika tikai, e angaanga teia no tetai tuatau, taku e oronga atu nei kia korua.
4 No reira, e angaanga korua ki roto i taku kainga vine. E kapiki atu ki te au tangata o te enua nei, e ma te akakite atu i te tuatua, e ma te akateateamamao i te mataara no te au akaueanga e te au eeuanga te ka tae mai.
5 I teianei, i na, e pakari teia; e ko te ka tatau, kia mārama aia e kia ariki katoa oki;
6 E ko tei ariki ra ka orongaia atu tana kia maata, e pera katoa te mana.
7 No reira, e taakama i to korua au enemi; e kapiki atu ia ratou kia aravei mai ia korua i roto i te ngai atea e i te ngaro; e me vai akarongo tikai korua ka akakiteia mai to ratou akama.
8 No reira, kia apai mai oki ratou i to ratou akakoroanga pakari no te patoi atu i te Atu.
9 Tika tikai, te tuatua maira te Atu kia korua—kare rava e apinga tamaki tei akakoroia no korua te ka autu;
10 E me akateitei tetai tangata i tona reo ei patoi ia korua, ka kiteaia tona akama i te tuatau e manako mai ei au.
11 No reira, e akono i taku au akaueanga; e mea tika oki te reira e te akarongo tikai. Koia ïa. Amene.