Tuanga 41
Te eeuanga tei orongaia mai na roto ia Iosepha Timeti te Peroveta, ki te Akonoanga i Kirtland, Ohio, i te ra 4 o Peperuare, 1831 (History of the Church, 1:146–147). Kua tupu viviki ana rai te numero o te au mema i roto i te manga o te Akonoanga i Kirtland i taua taime ra. I te akatomoanga mai o teia eeuanga, kua tata te Peroveta i reira e: “Kua tauta pakari rai te au mema i te rave i te inangaro o te Atua, kia tau oki ki ta ratou i kite, noatu e kua tauru mai tetai au manako tuke rava e te vaerua tarevakē ki rotopu ia ratou … e no te reira, kua oronga mai te Atu ki te Akonoanga i teia te ka aru mai” (History of the Church, 1:146–147).
1–3, Kia akaaere te au ereta i te Akonoanga na roto i te vaerua o te eeuanga; 4–6, Ko te au pipi tuatua-tika, ka ariki ratou e ka akono i te ture a te Atu; 7–12, Kua akatinamouia a Eward Partridge ei episekopo no te Akonoanga.
1 E ariu e akarongo mai, e taku iti tangata, te tuatua maira te Atu to kotou Atua, kua rekareka tikai au kia akameitaki atu ia kotou ki te au akameitakianga maata roa atu, kia kotou tei akarongo mai iaku ra; e kia kotou tei kore e akarongo mai iaku ra ka taumaa au, ko tei akakite pikikaa i toku ingoa, ki te taumaaanga teimaa roa atu.
2 E akarongo mai, e te au ereta o taku akonoanga taku i kapiki, i na, te oronga atu nei au i tetai akaueanga kia kotou, kia akaputuputu mai kotou ia kotou uaorai ki te ngai okotai e kia akatikatika i taku nei tuatua;
3 E na roto i ta kotou pure akarongo e raukaʼi ia kotou taku ture, ei reira kotou e kite ei e ka naea te akaaereanga i taku akonoanga, e kia tika oki te au mea katoatoa ki mua iaku.
4 Ka riro au ei akaaere no kotou me aere mai au; e i na, ka aere vave mai au, e ka akapapu kia kotou kia akonoia taku ture.
5 Ko tei ariki i taku ture e kua taangaanga i te reira, koia tikai taku pipi; e ko tei karanga e kua rauka iaia e kare i taangaanga, kare ra aia i te pipi naku, e ka tuaru ke ia mei rotopu ia kotou;
6 Kare oki e tikaia te au mea tei tau no te tamariki o te basileia kia orongaia atu kia ratou e kare ratou e tiamā ana, me kore ra ki te puakaoa, e me kore ra kia tiriaia te au poe na te puaka.
7 E pera katoa, kua tika oki kia akatuia tetai are no taku tavini ko Iosepha Timeti, Tamaiti, ei ngai nooanga nona e te ngai akaurianga katoa.
8 E pera katoa, kua tika oki kia noo taku tavini ko Sidney Rigdon tei tau iaia, mei te mea oki e ka akono aia i taku au akaueanga.
9 E pera katoa, kua kapiki oki au i taku tavini ia Edward Partridge; e ka oronga au i tetai akaueanga, kia ikiia oki aia e te reo o te akonoanga, e ka akataongaia ei episekopo no te akonoanga, kia akaruke i tana au apinga oko e kia akapou i tona taime ki te angaanga a te akonoanga;
10 Kia kite oki e kua tau te au mea katoatoa te ka orongaia kiaia i roto i taku au ture i te rā e oronga atu ei au i te reira.
11 E teia no te mea e kua tiamā tona ngakau ki mua iaku, e kua aite tikai oki aia kia Natanaela i taito, e kare ua e pikikaa i roto iaia.
12 Kua orongaia atu teia au tuatua kia kotou, e kua tiamā oki te reira ki mua iaku; e no reira kia matakite i te mouanga i te reira, no te mea e na ratou e akava i to kotou vaerua i te rā o te akavaanga. Koia ïa. Amene.