1 E akarongo mai ki te reo o Iesu Mesia, to kotou Akaora, ko Te Vai Nei Au Maata, e kua riro toku rima aroa ei taranga no ta kotou au ara;

2 Ko te ka akaputuputu mai i toku au tangata, mei te tinana moa e akakoukou i tana au punupunua ki raro i tona peau, e pera katoa kia ratou ravarai te ka akarongo mai ki toku reo e te ka taakaaka mai ia ratou ki mua iaku, e ma te kapiki mai iaku na roto i te pure maroiroi.

3 I na, tika, tika tikai taku e karanga atu kia kotou, i teia taime nei, kua akakoreia mai ta kotou au ara, e no reira e ariki mai ei kotou i teia au mea nei; i na ra, e akamaara e auraka e ara akaou, ko te tae mai aea te kino kia kotou.

4 Tika tikai, taku e karanga atu kia kotou e, kua ikiia kotou mei te ao nei kia akakite i taku evangelia ma te reo mataora, e mei te reo o te pu ra.

5 E akateitei i toou ngakau e kia mataora, no te mea tei rotopu oki au ia kotou, e ko au to kotou vaa tuatua ki te Metua; e nana oki teia tikaanga meitaki kia oronga atu kia kotou i te basileia.

6 E mei tei tataia oki e—Ko ta kotou e pati ma te akarongo, ma te taokotaiia i roto i te pure kia tau ki taku i akaue atu, ka rauka ia kotou.

7 E kua kapikiia kotou kia akaputuputu mai i taku tangata ikiia; no te mea ka akarongo mai taku tangata ikiia i toku uaorai reo, e kare e akaketaketa i to ratou ngakau;

8 No reira kua aere te akaue mei ko mai i te Metua kia akaputuputuia ratou ki te ngai okotai, ki runga i te tua o teia enua nei, kia akateateamamao i to ratou ngakau e kia teateamamao katoa i te au mea katoatoa no te rā e tae mai ei te tumatetenga e te akataneaanga ki rungaʼo i te aronga kino.

9 Te vaitata mai nei te ora, e te vaitata mai ra te rā e paraʼi te ao nei; e ko te aronga ngakau parau katoatoa e ratou tei rave i te kino ka aite mei te teita; e ka tutungi au ia ratou, te tuatua maira te Atu Sabaota, kia kore oki te kino e vai akaou ki te enua nei;

10 E te vaitata mai nei te ora, e ka akatupuia oki tei tuatuaia e taku au aposetolo; e mei ta ratou i tuatua ka tae akera te reira;

11 E, ka eeu mai oki au iaku mei te rangi mai ma te mana e te kakā maata, e te urupu katoa i reira ra, e ka noo ma te tuatuatika ki te au tangata o te enua nei e tai tauatini mataiti, e kare oki te aronga kino e ora.

12 E pera katoa, tika, tika tikai taku e tuatua atu nei kia kotou, e kua aere atu oki te reira ma te akaue ririnui, na roto i te anoano o te Metua, e ko taku au aposetolo, koia te Tino Ngauru Ma Rua, tei aru katoa iaku i taku angaanga i Ierusalema, ka tu ki toku rima katau a te rā o toku okianga mai na roto i te pou aʼi, tei akakakauia ki te au kakau o te tuatua-tika, ma te au korona i runga i to ratou au upoko, i roto oki i te kakā mei iaku rai, kia akava i te ngutuare katoatoa o Iseraela, ko ratou ravarai tei inangaro mai iaku e tei akono i taku au akaueanga, e kare atu tetai ke.

13 Ka maata e ka roa katoa oki te tangianga o tetai pu, mei tei te Maunga ko Sinai, e ka ru oki te enua katoatoa nei, e ka aere mai oki ratou ki vao—ae, ko tei mate i roto iaku, e ka rauka ia ratou te korona o te tuatua-tika, e ka akakakauia ratou, mei iaku te tu, kia noo mai kiaku, e kia okotai oki matou.

14 E, i na, te karanga atu nei au kia kotou, i mua ake ka tae mai ei taua rā maata ra, ka akapoiriia te rā, e ka riro te marama mei te toto te tu, e ka pururu mai te au etu mei te rangi mai, e ka maata atu oki te au akairo i te ao ra i runga e i roto katoa i te enua i raro ake;

15 Ka tupu oki te aue e te iriea i rotopu i te au urupu tangata;

16 E ka tukuia mai tetai ua toka maata ei takore i te au apinga tanu o te enua nei.

17 E ka tae akera, no te kino o te ao nei, ka akaoko ei au ki rungaʼo i te aronga kino, no te mea kare oki ratou e tataraara; no te mea kua kī oki taku kapu i te riri; e i na, kare oki toku toto e tamā ia ratou me kare ratou e akarongo mai iaku.

18 No reira, ka tono atu au ko te Atu te Atua i tetai au rango ki runga i te tua o te enua, te ka noo ki runga i te au tangata i reira, e ka kai i to ratou au kiko, e na te reira e apai mai i te iro ki rungaʼo ia ratou.

19 E ka mou oki to ratou arero e kare oki e rauka ia ratou kia tuatua patoi mai iaku; e ka pururu mai to ratou kiko mei runga mai i to ratou ivi, e pera katoa to ratou mata mei to ratou kapu mata mai;

20 E ka tupu akera e, na te au manu vaevae ā o te vao rakau e te au manu o te reva e kai ia ratou.

21 E ko te akonoanga maata e te viivii, koia te vaine akaturi o te ao katoa nei, ka tiriaia ki te aʼi akapouanga, kia tau ki tei tuatuaia e te vaa o Ezekiela te peroveta, nana oki i tuatua i teia au mea nei, kare i tupu ake, i na ra, mei te ora nei au ka tupu e tikaʼi, e kare oki te au mea viivii e tutara.

22 E i na, tika, tika tikai taku e karanga atu kia koe, me pou te tauatini mataiti, e akamata akaou te tangata nei i te patoi i to ratou Atua, ka akaora au i te enua nei, no tetai tuatau poto ua ra;

23 E ka tae mai oki te openga, e ka takoreia e ka ngaro ke oki te rangi e te enua nei, e ka tupu mai oki te rangi ou e te enua ou katoa.

24 Ka ngaro ke oki te au mea takere, e ka akaouia te au mea katoatoa, koia te rangi e te enua nei, e te au mea katoatoa i roto ra, te au tangata nei e te au manu vaevae ā katoa, te au manu rere o te reva, e te au ika o te moana;

25 E kare rava tetai kata rauru me kore ra tetai uatu mea meangiti e ngaro, e angaanga oki teia na toku nei rima.

26 E, i na, tika tikai taku e karanga atu kia kotou, i mua ake ka ngaro ke ei te enua nei, ka akatangi taku angela ko Mikaela i tana pu, e ka ara pouroa mai te aronga i mate, no te mea ka tuera oki to ratou au vaarua, e ka tu akaou mai ratou—ae, te katoatoa rava.

27 E ka noo oki te aronga tuatua-tika ki toku rima katau no te ora mutukore; e ko te aronga kino, ka noo ratou ki toku rima kaui, e ka akama oki au i te akaari atu ia ratou ki mua i te Metua;

28 No reira, ka karanga atu au kia ratou—E aere ke atu kotou, ko tei taumaaia, mei konei atu iaku ki roto i te aʼi mutukore, tei akateateamamaoia no te diabolo e tana au angela.

29 I teianei, i na, te karanga atu nei au kia kotou, kare rava e taime i tuatua ana au mei toku vaa e ka oki mai ratou, i na, ko te ngai e nooia e au ra, kare ratou e tae mai ki reira, no te mea kare oki o ratou mana.

30 I na ra, e akamaara, kare taku au akavaanga i oronga pouroa ia mai ki te tangata nei; e mei te tuatua oki tei aere atu ki vao mei roto atu i toku vaa, ka tupu katoa oki te reira, e ko te mea mua ra, e openga ïa, e ko te openga ra no mua ïa i te au mea katoatoa taku i anga ra na roto i te tuatua o taku mana, koia te mana o toku Vaerua.

31 Na roto oki i te mana o toku Vaerua i angaʼi au ia ratou; ae, ko te au mea katoatoa i te pae vaerua e te pae kopapa katoa oki—

32 Te mua ko te pae vaerua, e ko te rua ko te pae kopapa, ko te akamataanga ïa o taku angaanga; e teia akaou, ko te mua ko te pae kopapa, e ko te rua ko te pae vaerua, ko te mea openga oki ïa o taku angaanga—

33 Te tuatua atu nei au kia kotou kia rauka ngoie ua ia kotou te mārama; kareka iaku nei, kare rava e openga o taku au angaanga, e kare katoa oki e akamataanga; i na ra, kua orongaia atu kia kotou kia rauka ia kotou te mārama, no te mea na kotou i pati mai kiaku, e kua akatikaia.

34 No reira, tika tikai taku e karanga atu kia kotou, ko te au mea pouroa iaku nei e mea vaerua ïa, e kare oki e taime i orongaia atu ana e au tetai ture no te pae kopapa ua nei; kare ki tetai tangata, e kare ki te tamariki a te tangata nei; kare katoa kia Adamu, to kotou metua, taku i anga.

35 I na, kua oronga atu au kiaia kia riro aia ei pu kiaia uaorai; e kua oronga katoa atu au kiaia i tetai akaueanga, i na ra, kare i te akaueanga no te kopapa nei taku i oronga atu, e akaueanga pae vaerua oki; kare te reira i te mea no te natura me kore ra no te pae kopapa, kare katoa oki i te mea no teia ao nei anake me kore ra no te anoano ua o te tangata nei.

36 E kua tae akera e, kua timataia a Adamu e te diabolo—e, i na, ko te diabolo oki to mua ake ia Adamu, e kua patoi oki aia iaku, i te na ko anga e, E oronga mai kiaku i toou ngateitei, koia oki toku mana; e pera katoa ki tetai tuanga toru o te urupu o te rangi, kua akauri ke aia mei iaku no to ratou tikaanga kia iki;

37 E kua tiriaia mai ratou ki raro nei, e kua riro mai e ko te diabolo e tona au angela;

38 E, i na, e ngai oki tetai tei akateateamamaoia no ratou mei muatangana ra, e ko taua ngai ra ko ade.

39 E mea tau oki kia timata te diabolo i te tamariki a te tangata nei, me kore ra kare ratou i reira e riro mai ei pu kia ratou uaorai; no te mea me kare oki ratou e kite i te mea kava, kare katoa ratou e kite i te mea vene—

40 No reira, kua tae akera e kua timata te diabolo ia Adamu, e kua kai aia i te rakau tei rauiia e kua aati i te akaueanga, e kua peke i reira aia ki te anoano o te diabolo, no te mea kua inga aia i te timataanga.

41 No reira, kua akaue au, ko te Atu te Atua, kia tuaruia aia ki vao i te Kainga o Edene, mei mua atu i toku aroaro, no tona aati ture oki, e kua rauka i reira iaia te mate vaerua, ko te mate mua oki ïa, koia katoa oki taua mate rai ko te mate openga, koia te mate vaerua, ko te ka tuatuaia ki te aronga kino me tuatua atu au: E aere ke atu kotou tei taumaaia.

42 E, i na, te karanga atu nei au kia kotou e kua oronga atu au, ko te Atu te Atua, i teia kia Adamu e tana uanga, koia oki kare ratou e mate i te mate kopapa nei, mari ua kia tae rava te tuatau e tono atu ei au, ko te Atu te Atua, i tetai au angela kia akakite kia ratou i te tataraara e te akaoraanga katoa, na roto i te akarongo ki roto i te ingoa o taku Tamaiti Anau Tai.

43 No reira, kua akataka au, te Atu te Atua, i te au rā o te oraanga tangata—e me mate aia i te mate kopapa, ka akatuia mai aia ei kopapa mate kore ki te ora mutukore, ka pera katoa ïa ratou ravarai te ka irinaki;

44 E ko tei kore e akarongo, tei te akaapaanga mutukore ïa, kare e rauka kia akaoraia ratou mei to ratou mate vaerua, no te mea kare oki ratou i tataraara;

45 No te mea e inangaro atu oki ratou i te poiri auraka te mārama, e ko ta ratou au angaanga e kino ïa, e ka rauka ta ratou tutakianga kia tau ki ta ratou i tavini.

46 E i na, te karanga atu nei au kia kotou, kua akaoraia te au tamariki rikiriki mei te akamouangaia mai te tango o te ao nei na roto i taku Tamaiti Anau Tai;

47 No reira, kare e rauka ia ratou kia ara, no te mea kare te mana i orongaia kia Satani kia timata i te tamariki mearikiriki, kia akamata roa ratou kia kite i te kino e te meitaki ki mua iaku;

48 Kua orongaia atu oki kia ratou mei taku i anoano, kia tau ki taku i manako, e e au mea mamaata te ka inangaroia mei te rima mai o to ratou au metua tane.

49 E te karanga akaou atu nei au kia kotou, ko tei rauka te kite ra, kare ainei au i akaue kia tataraara?

50 E ko tei kore i rauka iaia te mārama, ka vai rai ïa ki roto iaku kia rave kia tau ki tei tataia. E teianei, kare au e tuatua akaou atu kia kotou i teia taime. Amene.