1 E akarongo mai, e te au tangata o taku akonoanga, ki tei orongaia atu te basileia; e akarongo mai kotou ma te oronga mai i to kotou taringa kiaia tei akamou i te tango o te enua nei, tei anga i te rangi e te au urupu o reira, e tei anga i te au mea katoatoa e ora nei, e oriori nei, e e vai nei.

2 E te karanga akaou atu nei au, e akarongo mai ki toku reo, ko te mate aea kotou; i te ora manako kore ia e kotou kua ope te tuatau akaū, e kua oti te angaanga kokoti, e kare to kotou au vaerua i akaoraia.

3 E akarongo atu kiaia tei riro ei vaa tuatua atu ki te Metua, tei pati akatenga no to kotou akaoraanga ki mua iaia—

4 I te na ko anga e: E te Metua, e akara mai i te au mamae e te mate o tei kore i rave i te ara, ko taau i mareka rava; i na, ko te toto o taau Tamaiti tei maringi mai, ko te toto nona koia taau i oronga kia akakakāia koe;

5 No reira, e te Metua, e akaora mai i teia au taeake tei irinaki i toku nei ingoa, kia rauka ia ratou kia aere mai kiaku nei e kia rauka te ora mutukore.

6 E akarongo mai, e te au tangata o taku akonoanga, e te au ereta katoa e akarongo pouroa mai, e akarongo mai ki toku reo, koia i rā ei, e auraka e akaketaketa i to kotou ngakau;

7 E tika tikai taku e karanga atu kia kotou e ko au te Alepha e te Omega, te momua e te akaopenga, te mārama e te ora o te ao nei—te mārama tei kakā mai ana ki te poiri e kare oki te poiri i mārama mai.

8 Kua aere mai au ki oku tikai, kare ra oku tikai i ariki mai iaku; i na ra, ko ratou ravarai tei ariki mai iaku ra, kua oronga atu au i te mana kia rave i te au semeio e manganui, e kia riro mai ei au tamaroa na te Atua; e ki te aronga katoa tei irinaki mai ki toku ingoa kua oronga katoa au i te mana kia ratou kia rauka te ora mutukore.

9 E kua tono katoa au i taku koreromotu mutukore ki roto i te ao nei, kia riro ei turama i te ao nei, e ei akaraanga katoa ki toku iti tangata, e kia kimi katoa te au Etene i te reira, e kia riro ei karere ki mua i toku mata kia akateateamamao i te mataara i mua iaku.

10 No reira, e aere mai kotou ki reira, e ko te aere mai ka akatikatika tuatua atu au, mei te tu rai o te au tangata i te au rā i taito, e ka akakite atu au i te pakarianga o taku tuatua.

11 No reira, e akarongo kapiti mai kotou e kia akaari atu au kia kotou i toku pakari—te pakari nona ta kotou e karanga nei e ko te Atua o Enoka, e tona ai taeake,

12 Ko tei akatakakeia mei te enua nei, e kua arikiia mai e au—te oire tei akonoia no te rā e tae mai ei te tuatua-tika—e rā tei kimikimiia e te au tangata tapu katoa, e kare i kiteaia e ratou no te kino e te au mea rikarika tei tupu;

13 E kua aaki mai e e au tangata ke ke ratou e te tuitarere i te enua nei;

14 I na ra, kua rauka ia ratou tetai taputouanga e ka kiteaia e ratou e ka akara ratou i te reira i te kopapa nei.

15 No reira, e akarongo mai, e ka akatikatika atu au kia kotou, e ka tuatua atu au kia kotou ma te totou katoa, mei tei tupu ki te au tangata i te au rā i taito.

16 E ka akaari atea uatu au mei taku rai i akaari ana ki taku au pipi i toku tuanga ki mua ia ratou i te kopapa nei, e kua tuatua atu kia ratou, i te na ko anga e: Mei ta kotou oki i pati mai kiaku no te au akairo o toku aereanga mai, i te rā e aere mai ei au i roto i toku kakā na roto i te au tiao o te rangi, kia akatupu i te au taputou taku i papau ki to kotou au ui tupuna,

17 Mei ia kotou i manako ana e ko te roa o te ateaanga o to kotou au vaerua mei to kotou au kopapa, e tuikaanga ïa, ka akaari atu au kia kotou e ka akapeea te rā o te akaoraanga e tae mai ei, e pera katoa te akaokianga mai o Iseraela tei pueu aere.

18 E teianei, te kite nei kotou i teia iero i Ierusalema, ta kotou i karanga e ko te are o te Atua, e te karanga nei oki to kotou au enemi e kare rava teia are e inga.

19 I na ra, tika tikai taku e karanga atu kia kotou, ka tae mai te akataneaanga ki teia uki mei te keia i te po, e ka takoreia teia iti tangata e ka purara ki te au iti tangata katoatoa.

20 E ko teia iero ta kotou e kite nei i teianei, ka tiriaia atu te reira ki raro, e kare e okotai toka e toe ki rungaʼo i tetai.

21 E ka tae akera, e kare rava oki teia uki o te ngati Iuda e mate, mari ra kia tupu rava te au akataneaanga tatakitai taku i akakite atu kia kotou no ratou.

22 Te karanga nei kotou e kua kite kotou e te vaitata mai nei te openga o te ao nei; kua karanga katoa mai kotou e kua kite kotou e ka kore te rangi e te enua nei;

23 E kua tano ta kotou e tuatua nei, ko te tika ïa; i na ra, kare teia au mea taku i akakite atu kia kotou e kore, kia tupu uatu teia au mea katoatoa.

24 E kua akakite atu au i teia kia kotou no runga ia Ierusalema; e kia tae mai taua rā ra, ka akapueurikirikiia tetai toenga ki to te au pa enua katoa;

25 I na ra, ka akaputuputu akaou ia mai ratou; i na ra, ka noo ke uatu rai ratou e kia tupu roa te tuatau o te au Etene tei tuatuaia.

26 E i taua rā ra, ka akarongoia te au tamaki e te au rongo tamaki, e ka kī te ao katoa nei i te manamanata, e taravai oki te ngakau o te au tangata, e ka karanga ratou e kua tavarevare te Mesia i tona aereanga mai kia tae ki te openga o te enua nei.

27 E ka anu te inangaro o te tangata, e ka tupu mai oki te ara ki te maata.

28 E kia tae mai te tuatau o te au Etene, ka puroro mai tetai mārama ki rotopu ia ratou tei noo i te poiri, e ko te kīanga oki te reira o taku nei evangelia;

29 I na ra, kare ratou e ariki mai; kare oki ratou e kite mai i te mārama, e kua ariu ke to ratou ngakau iaku no te au apiianga a te tangata.

30 E ka tae te kīanga o te tuatau o te au Etene i roto i taua uki ra.

31 E ka vai rai oki tetai au tangata i roto i taua uki ra, e kare ratou e mate kia kite rava ratou i tetai maki mate; e kako rava te enua i te maki akapouanga.

32 I na ra, ka tu taku au pipi ki te au ngai tapu, e kare rava e akatekeia; i na ra, i rotopu i te aronga kino, ka akateitei te au tangata i to ratou reo e ka akakino i te Atua e mate atu ra.

33 E ka tupu oki te au ngaruerue enua i roto i te au ngai ke ke, e manganui te au tu mate; noatu ra, ka akaketaketa atu rai te tangata i to ratou ngakau iaku nei, e ka rave oki ratou i te koke e ka tamaki atu tetai e tetai, e ka tamate oki ratou ia ratou uaorai.

34 I teianei, kia oti iaku i te Atu i te tuatua i teia au tuatua nei ki taku au pipi, kua manamanata ratou.

35 E kua karanga atura au kia ratou: Auraka e taitaia, no te mea kia tae akera teia au mea katoatoa, ka kite kotou i reira e ko te au taputou katoatoa tei orongaia atu ana kia kotou, ka tupu pouroa te reira.

36 E me akamata te mārama i te kakā mai, ka aite tikai oki te reira ki tetai parabole taku ka akaari atu kia kotou—

37 Me kite kotou ma te akara i te au pu suke, e te kite nei kotou i te reira ki to kotou uaorai mata, e ka karanga kotou me akamata ratou i te nionio mai, e te paruparu ua ra oki tona rau e, te vaitata maira te tuatau akaū;

38 Ka pera katoa oki i taua au rā ra, kia kite ratou i teia au mea katoatoa, ei reira ratou e kite ei e te vaitata mai nei te ora.

39 E ka tae akera e ko te aronga e mataku iaku ra, te akara atura ïa ratou ki te rā maata o te Atu te ka tae mai, e ki te au akairo oki o te aereanga mai o te Tamaiti a te Tangata.

40 E ka kite oki ratou i te au akairo e te au mea umere, e ka akaariia mai mei te au rangi i runga, e i roto i te enua i raro nei.

41 E ka kite oki ratou i te toto, e te aʼi, e te au koukou o te auaʼi.

42 E i mua ake ka tae mai ei te rā o te Atu, ka poiri te rā, e ka riro te marama mei te toto te tu, e ka pururu mai te au etu mei te rangi mai.

43 E ka akaputuputuia mai te toenga ki teia ngai;

44 E ka kimi oki ratou iaku, e, i na, ka aere mai au; e ka kite mai ratou iaku i roto i te au tiao o te rangi, kakauia ki te mana e te kakā maata; e ma te au angela tapu katoatoa; e koia te kare e akara mai iaku ra, ka tipu ke ia ïa.

45 I na ra, i mua ake ka topa mai ei te rima o te Atu ka akatangi mai tetai angela i tana pu, e ko te aronga tapu tei moe ka tu akaou mai ratou e ka aravei mai iaku i roto i te tiao rangi.

46 No reira, me kua moe kotou na roto i te au, kia akameitakiia kotou; mei ta kotou oki e kite mai nei iaku, e kua kite e ko au teia, ka aere mai ïa kotou kiaku, e ka ora to kotou au vaerua i reira, e ka apakore oki to kotou akaoraanga; e ka aere mai te aronga tapu mei nga pore mai e ā o te enua nei.

47 Ei reira te rima o te Atu e topa mai ei ki runga i te au iti tangata.

48 Ei reira te Atu e tuku ei i tona vaevae ki runga i teia maunga, e ka ngaa te reira i rotopu, e ka ruketekete te enua, e ka tauriuri mei tetai tua ki tetai tua, e ka ru katoa oki te au rangi.

49 E ka tuatua mai oki te Atu i tona reo, e ka rongo oki te au openga o te ao nei i te reira; e ka eva oki te au iti tangata o te ao nei, e ko tei kata ra, ka kite ratou i to ratou maromaroa.

50 E taitaia maata te ka tupu ki te aronga tei aviri mai, e ka takoreia tei akakino mai; e ko ratou tei kimi atu i te rave i te ara, ka tipuia ratou e ka tiriaia ki roto i te aʼi.

51 Ei reira te ngati Iuda e akara mai ei kiaku e ka karanga mai e: Eaa oki terao au puta i roto i toou nga rima e toou nga vaevae?

52 Ei reira ratou e kite ei e ko au te Atu; e ka karanga atu oki au kia ratou e: Ko teia au putaputa nei, ko nga puta ïa i putaʼi au i te are o taku au oa ra. Ko au oki te reira tei takinaia ki runga. Ko au oki teia ko Iesu tei akasatauroia. Ko au oki te Tamaiti a te Atua.

53 Ei reira ratou ka aue ei no ta ratou au ara; ei reira ratou e mii ei, no te mea e ko ratou i takingakino i to ratou ariki.

54 Ei reira te iti tangata etene e akaoraiaʼi, e ko te aronga tei kore takiri i kite i tetai ture, e tuanga to ratou i roto i te tuakaouanga mua; e ka tau oki te reira no ratou.

55 E ka tapekaia oki a Satani, e kare oki ona ngai i roto i te au ngakau o te tamariki a te tangata nei.

56 E kia tae ki taua rā ra, me aere mai au i roto i toku kakā, e tupu ei te parabole taku i tuatua atu no runga i te au paretenia tino ngauru.

57 E ko tei kite e tei ariki i te tuatua-mou, e kua rave i te Vaerua Tapu ei arataki no ratou, e kare oki i vavare—tika tikai taku e karanga atu kia kotou, kare ratou e tipuia ki raro e tiriaia atu ki roto i te aʼi, i na ra ka akaoraia ratou i taua rā ra.

58 E ka orongaia atu te enua nei no ratou ei ipukarea no ratou; e ka uanga ratou e ka maroiroi tikai, e ka tupu oki ta ratou au tamariki ma te kore e ara i te akaoraanga.

59 Ei rotopu oki te Atu ia ratou, e ka vai tona kakā ki rungaʼo ia ratou, e koia to ratou ariki e to ratou tuku ture.

60 E teianei, i na, te karanga atu nei au kia kotou, e kare e orongaia mai kia kotou kia kite i tetai au mea ke atu no runga i teia pene, e tae uatu ki te taime e oti ei te Koreromotu Ou i te akauriia, e ka akakiteia mai teia au mea katoatoa i reira;

61 No reira, te oronga atu nei au kia kotou i teianei kia akauri i te reira, e kia akapapa atu kotou no te au mea te ka tae mai.

62 Tika tikai taku e karanga atu kia kotou, e au mea puapinga te ka tupu no kotou;

63 Te rongo nei kotou i te au tamaki i roto i te au enua mamao; i na ra, te karanga atu nei au kia kotou, tei to kotou ngutupa are ra, e kare e roa atu ana te au mataiti ka rongo kotou i te tamaki i roto i to kotou uaorai enua.

64 No reira, i tuatua atu ei au, ko te Atu, e akaputuputu mai ia kotou mei te au enua i te pae itinga, e uipa mai ia kotou ki te ngai okotai e te au ereta o taku akonoanga; e aere atu kotou ki te au enua i te pae opunga, e kapiki atu ki te au tangata kia tataraara, e me tataraara ratou, e akatupu kotou i tetai au akonoanga naku.

65 E na roto i te ngakau okotai e te manako okotai, e akaputuputu i ta kotou au apinga nui ei oko mai i tetai ipukarea te ka orongaia atu kia kotou a muri ake.

66 E ka karangaia oki te reira e ko te Ierusalema Ou, te enua o te au, te oire o te akapuanga, te ngai o te ora no te aronga tapu o te Atua Teitei Roa;

67 E ka vai te kakā o te Atua ki reira, e te mataku katoa o te Atua ki reira, kia kore oki te aronga kino e tae mai ki reira, e ka tuatuaia oki e ko Ziona.

68 E ka tae akera ki rotopu i te aronga kino, e ko te au tangata katoatoa te kare e rave i tana koke e tā atu i tona tangata tupu, ka oro atu aia i reira ki Ziona kia ora e tikaʼi.

69 E ka akaputuputu mai oki ki reira mei roto mai i te au iti tangata ravarai i raro ake i te rangi; e ko te iti tangata anake ïa te ka kore e o ki te tamakianga tetai ki tetai.

70 E ka tuatuaia oki ki roto i te aronga kino e: Auraka tatou e aere atu e tamaki kia Ziona, no te mea e rikarika tikai oki te au tangata o Ziona; e no reira kare tatou e autu.

71 E ka tae akera e ka akaputuputuia mai te aronga tuatua-tika mei roto mai i te au iti tangata katoatoa, e ka aere atu ki Ziona ma te imeneanga i te au imene o te mataora mutukore.

72 E teianei te karanga atu nei au kia kotou, e akono i teia au mea nei auraka kia purara atu ki to te ao nei, kia tae rava te tuatau tei tau iaku, kia rauka oki ia kotou kia rave i teia angaanga ki mua i te mata o te au tangata, e ki mua katoa i te mata o to kotou ra au enemi, kia kore oki ratou e kite i ta kotou au angaanga e oti rava atu ia kotou i te rave i te angaanga taku i akaue atu ia kotou kia rave;

73 E kia kite ake ratou i te reira, ka manako ratou i reira i teia au mea.

74 E kia tae mai ake te Atu, ka rikarika aia kia ratou, ei akamataku ia ratou, e ka tu mamao uatu oki ratou ma te ruketekete.

75 E ka mataku oki te au iti tangata ravarai i te riri o te Atu, e te mana o tona ririnui. Koia ïa. Amene.