Tuanga 94
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 6 o Me, 1833 (History of the Church, 1:346–347). Kua ikiia a Hyrum Smith, Reynolds Cahoon, e Jared Carter ei kumiti no te akatuanga are o te Akonoanga.
1–9, Kua oronga mai te Atu i tetai akaueanga no runga i te akatuanga o tetai are no te angaanga a te Ruru Peresideni; 10–12, Kia akatuia tetai are neneianga; 13–17, Kua akatuangaia tetai au ipukarea.
1 E teianei, tika tikai taku e karanga atu kia kotou, e taku au taeake, e akaueanga taku ka oronga atu kia kotou, kia akamata kotou i tetai angaanga koia te tukuanga e te akateateamamaoanga i tetai akamataanga e te tango katoa o te oire o te titi ko Ziona, i konei i te enua ko Kirtland, akamata atu mei toku ngutuare.
2 E i na, kia raveia rai kia tau ki te akaraanga taku i oronga atu kia kotou.
3 E ko te tuanga mua i te tonga, kia akatapuia te reira kiaku no te akatuanga i te are no te ruru peresideni, e no te angaanga katoa a te ruru peresideni, i te arikianga mai i te au eeuanga; e no te angaanga orometua katoa a te ruru peresideni i roto i te au mea katoatoa tei tau ki te akonoanga e te basileia.
4 Tika tikai taku e karanga atu kia kotou, kia akatuia oki e rima ngauru ma rima ki te ono ngauru ma rua tapuae te atea e te roa, i rotopu tikai.
5 E taʼua akaaka oki tetai e te taʼua teitei katoa, kia tau ki te akaraanga te ka orongaia atu kia kotou a muri ake.
6 E ka akatapuia oki ki te Atu mei te tango rava mai, kia tau ki te akanooanga a te kautaunga, kia tau ki te akaraanga te ka orongaia atu kia kotou a muri ake.
7 E ka akatapuia oki ki te Atu no te angaanga a te ruru peresideni.
8 E auraka rava e akatika i tetai uatu mea viivii kia tomo ki roto i reira; e ka vai toku kakā ki reira, e ka noo oki toku tu ki reira.
9 I na ra, me tomo tetai mea viivii ki roto i reira, kare toku kakā e vai ki reira; e kare katoa oki toku tu e noo ki reira.
10 E teianei, tika tikai taku e karanga atu kia kotou, e ko te rua o te tuanga enua i te tonga ka akatapuia te reira kiaku no te akatuanga o tetai are noku, no te angaanga o te neneianga i taku au irava tapu tei akauriia, e te au mea katoatoa taku ka akaue atu ia kotou.
11 E rima ngauru ma rima oki ki te ono ngauru ma rima tapuae te atea e te roa katoa, i roto tikai, e taʼua akaaka tetai e e taʼua teitei tetai.
12 E ka akatapu takiri ia oki teia are nei ki te Atu mei te tango atu, no te angaanga neneianga, i te au mea katoatoa taku ka akaue atu, kia tapu, e te tanoanoa kore ia, kia tau oki ki te au akaraanga katoatoa te ka orongaia atu kia kotou.
13 E i te toru oki o te tuanga enua ra e raukaʼi i taku tavini ko Hyrum Smith tona ipukarea.
14 E i te tuanga enua mua e te rua i te tua tokerau e raukaʼi i taku nga tavini ko Reynolds Cahoon e Jared Carter to raua ipukarea—
15 Kia rave oki raua i te angaanga taku i iki ia raua, ei kumiti kia akatu i toku au are, kia tau oki ki te au akaueanga taku, ta te Atu ko te Atua, i oronga atu kia kotou.
16 Kare teia nga are nei e akatu vave ia mari ra kia oronga rava atu au i tetai akaueanga kia korua no runga i te reira.
17 E teianei kare aku e oronga akaou atu kia kotou i teianei. Amene.