1 E akarongo mai, kotou e te au ereta o taku akonoanga, ko tei akaputuputu mai ia kotou katoa ki te ngai okotai i roto i toku ingoa, koia a Iesu Mesia te Tamaiti a te Atua ora, te Akaora o to te ao; mei te mea e kua irinaki kotou ki runga i toku ingoa ma te akono i taku au akaueanga.

2 E te tuatua akaou atu nei au kia kotou, e akarongo mai ma te rongo e te kauraro i te ture ko taku ka oronga atu kia kotou.

3 E tika tikai taku e tuatua atu nei, mei ia kotou i akaputuputu mai ia kotou i te ngai okotai kia tau ki te akaueanga i akaue ei au ia kotou, i te turuanga mai no runga i teia mea okotai nei, e kua pati atu ki te Metua na roto i toku ingoa, e reira e raukaʼi ia kotou.

4 I na, e tika tikai taku e tuatua atu nei kia kotou, te oronga atu nei au kia kotou i teia akaueanga mua, e ka aere kotou ki mua ma toku ingoa, kotou tatakitai, mari ua ko toku nga tavini ko Iosepha Timeti, Tamaiti, e Sidney Rigdon.

5 E te oronga atu nei au kia ratou i tetai akaueanga e kia aere atu ratou ki mua no tetai tuatau poto, e ka orongaiaʼtu na roto i te mana o te Vaerua e aea ratou e oki mai ei.

6 E ka aere atu kotou na roto i te mana o toku Vaerua, i te tutuanga atu i taku evangelia, tatakirua, na roto i toku ingoa, i te akamaataanga i to kotou au reo mei te tangi o te pu, i te akakite atu anga i taku tuatua mei te au angela a te Atua.

7 E ka aere atu kotou ma te bapetizoanga ki te vai, i te na ko anga e: E tataraara kotou, e tataraara kotou, te vaitata mai nei te basileia o te rangi.

8 E ka aere atu kotou mei teia ngai ki roto i te au ngai i te tuanga opunga; e kia kitea mai ia ratou te ka ariki mai ia kotou e akatu kotou i taku akonoanga ki roto i te au tuanga ravarai—

9 E kia tae ki te tuatau e eeuia mai ei te reira kia kotou mei runga mai, e me akateateamamaoia te oire o te Ierusalema Ou, kia akaputuputuia mai kotou ei okotai, kia riro kotou ei iti tangata noku e kia riro au ei Atua no kotou.

10 E te tuatua akaou atu nei kia kotou, e kia tu rai taku tavini ko Edward Partridge ki roto i te taonga taku i akataka iaia. E ka tae akera, me ka aati ture aia ka akataonga akaou ia tetai ki roto i tona taonga. Koia ïa. Amene.

11 Te tuatua akaou atu nei au kia kotou, e kare e orongaiaʼtu ki tetai uatu kia aere atu kia tutu i taku evangelia, me kore ra kia akatupu i taku akonoanga, mari ua ra kia akataongaia aia e tetai tei aia te tikaanga, e kua kite oki te akonoanga e e tikaanga tona e kua akataongaia ana e te au upoko o te akonoanga.

12 Koia katoa, ko te au ereta, te au taunga, e te au puapii o teia akonoanga, ka apii i te au apiianga o taku nei evangelia, koia i roto i te Bibilia e te Puka a Momoni, tei roto oki i te reira te kīanga o te evangelia.

13 E ka akono ratou ma te rave i te au koreromotu e te au ture a te akonoanga, e ko teia oki i reira ta ratou au apiianga, mei te ka akaaereia ratou e te Vaerua.

14 E ka orongaia atu te Vaerua kia kotou na roto i te pure o te akarongo; e me kare e rauka ia kotou te Vaerua auraka kotou e apii.

15 E ko teia au mea katoatoa kia rave meitaki kotou mei taku i akaue atu no runga i ta kotou apiianga, e tae rava atu ki te orongaanga atu i te kīanga o taku au irava tapu.

16 E ia kotou e akateitei ra i to kotou au reo ki runga na roto i te Akapumaana, ka tuatua kotou e ka totou mei tei tau iaku;

17 E, i na, kua kite te Akapumaana i te au mea katoatoa, e ka akakite atu no te Metua e no te Tamaiti.

18 E, i na, ka tuatua atu au ki te akonoanga. Auraka rava kotou e tā ua; e koia te ka tā atu kare rava e akakoreia tana ara i roto i teia ao, kare katoa i roto i te ao te ka aru mai.

19 E te tuatua akaou atu nei au, auraka rava kotou e tā ua; koia ra te ka tā atu ka mate aia.

20 Auraka rava kotou e keia; e koia te ka keia e kare e tataraara ka tuaruia atu ki vao.

21 Auraka rava kotou e pikikaa; e koia te ka pikikaa atu e kare e tataraara ka tuaruia atu ki vao.

22 E inangaro atu kotou i taau vaine ma toou ngakau katoa, e ka piri atu kiaia e auraka ki tetai ke.

23 E koia te ka akara atu ki runga i tetai vaine e kua akatupu i te inangaro kiaia, te patoi ra i te akarongo, e kare te Vaerua e noo kiaia; e me kare aia e tataraara ka tuaruia atu aia ki vao.

24 Auraka rava kotou e akaturi; e koia te ka rave i te akaturi, e kare e tataraara, ka tuaruia atu ki vao.

25 I na ra koia tei akaturi e kua tataraara ma tona ngakau katoa, e ma te akaruke atu i te reira, e kare e rave akaou i te reira, e akakore atu koe i tana ara;

26 Me ka rave akaou ra aia i te reira, kare rava tana ara e akakoreia, i na ra ka tuaruia atu aia ki vao.

27 Auraka rava kotou e tuatua akakino atu i toou tangata tupu, auraka katoa e takingakino atu iaia.

28 Kua kite oki kotou i taku au ture no runga i teia au mea nei tei orongaia atu i roto i taku au irava tapu; koia tei rave ara e kare e tataraara ka tuaruia atu ki vao.

29 Me kua inangaro kotou iaku, e tavini iaku ma te akono i taku au akaueanga katoatoa.

30 E i na, e akamanako kotou i te aronga putaua, ma te akatapu i ta kotou au apinga no te tauturu ia ratou ta kotou ka oronga no ratou, ma te koreromotu e te angaanga te kare rava e rauka kia aatiia.

31 E mei te mea ra e oronga atu kotou i ta kotou au apinga na te aronga putaua, te pera katoa mai ra kotou kiaku nei; e ka tukuia atu te reira ki mua i te aroaro o te episekopo o taku akonoanga e tona nga konitara, e nga ereta tokorua, me kore e nga taunga teitei, mei tana ka iki, me kore ra me tana i iki e kua akataka no te reira akakoroanga.

32 E ka tae akera, e kia oti teia au mea i te tuku ki mua i te aroaro o te episekopo o taku akonoanga, e i muri ake i tona arikianga i teia au kite papu nei no runga i teia akatapuanga i te au apinga o taku akonoanga, kare ratou i reira e rauka kia apai ke ia atu mei taku akonoanga, kia tau ki taku au akaueanga, e ka akatakaia kia paukia mai te au tangata katoatoa kiaku nei, e akaaere i rungaʼo i tona uaorai kainga, me kore ra tei rauka iaia na roto i te akatapuanga, pouroa kia rava nona uaorai e no tona kopu tangata.

33 E pera katoa, me e au apinga tetai i roto i te au rima o te akonoanga, me kore ra i te rima o te au mema, kia maata atu i tei anoanoia ei tauturu ia ratou i muri ake i te akatapuanga mua, koia oki te toenga kia akatapuia ki te episekopo, ka akonoia teia no te oronga atu kia ratou me kare a ratou, mei tera tuatau ki tera tuatau, e ko te tangata katoatoa tei ngere ka rauka kia tauturuia kia tau ki tona anoano.

34 No reira, ko te toenga ka akarukeia ki roto i taku are vairanga, kia oronga na te aronga putaua e te ngere veve, mei te ka akatakaia e te pupu konitara teitei o te akonoanga, e te episekopo e tana pupu konitara;

35 E no te akakoroanga o te okoanga mai i tetai au enua ei meitaki no te katoatoa o te akonoanga, e te akatuanga i te au are no te akamori, e no te akatuangaia o te Ierusalema Ou te ka eeuia mai i muri ake—

36 Kia akaputuputuia mai toku au iti tangata koreromotu ei okotai i taua rā e aere mai ei au ki taku iero. E ka rave au i teia no te akaoraanga i taku iti tangata.

37 E ka tae akera, e koia te ka rave ara e kare e tataraara ka tuaruia atu aia ki vao mei te akonoanga, e kare e rauka akaou iaia tana i akatapu no te aronga putaua e te aronga ngere o taku akonoanga, koia oki kiaku nei—

38 E mei te mea e ka rave atu kotou i teia ki te mea iti rava atu, kua rave katoa ïa kotou i te reira kiaku.

39 E ka tae akera, e ko taku i tuatua atu na roto i te au vaa o taku au peroveta ka tupu te reira; e ka akatapu au i te au apinga nui o ratou te ka mou i taku evangelia i roto i te au Etene ki te aronga putaua o taku iti tangata koia oki o te ngutuare o Iseraela.

40 Koia katoa, auraka rava kotou e parau i roto i to kotou ngakau; eiaa e peu i to kotou au kakau, e ko to ratou manea ei manea o te angaanga o to kotou nga rima;

41 E kia raveia te au mea katoatoa ma te mā i mua iaku.

42 Auraka rava kotou e noonoo ua; koia te ka noonoo ua kare ïa e kai i te varaoa e kare katoa e aao i te au kakau o te rave angaanga.

43 E ko ratou tei rokoia e te maki i rotopu ia kotou, e kare o ratou akarongo kia akaoraia, i na ra e irinaki ratou, ka utuutuia te reira ma te tu maru tikai, ki te au rakau rikiriki ra e te kai tuitui kore, e auraka oki i te rima o tetai enemi.

44 E ko te au ereta o te akonoanga, ka kapikiia atu e tokorua me kore ra kia maata atu, e ka pure atu no ratou ma te tuku atu i to ratou au rima ki rungaʼo ia ratou na roto i toku ingoa; e me mate ratou ka mate ratou kiaku nei, e me ora ratou ka ora ratou kiaku nei.

45 Kia noo kapiti kotou na roto i te inangaro tikai, e no teia tu nei ka aue kotou no ratou me mate, e no ratou tikai e kare o ratou manakoanga no te tuakaouanga kakā.

46 E ka tae akera e ko ratou te ka mate ki roto iaku nei, kare rava e tongi i te mate, no te mea e mea vene ïa kia ratou;

47 E ko ratou ra te kare e mate ki roto iaku, aue oki ratou, no te mea e mea kavangu to ratou mate.

48 E ka tae katoa e, koia e akarongo tona ki roto iaku kia akaoraia, e kare aia i akatakaia no te mate, ka akaoraia aia.

49 Koia e e akarongo tona kia kite, ka kite aia.

50 Koia e e akarongo tona kia rongo, ka rongo aia.

51 Ko te pirikoki e e akarongo tona kia rere, ka rere.

52 E ko ratou e kare e akarongo kia rave i teia au mea nei, e irinaki ra ki roto iaku nei, e mana ïa to ratou kia riro mai ei au tamaiti naku; e me kare ratou e aati i taku au ture ka rauka ia kotou i te akakoromaki i to ratou au paruparu.

53 Kia tu kotou ki roto i te ngai o ta kotou tuanga angaanga.

54 Auraka rava kotou e rave atu i te kakau o to taeake; e tutaki atu kotou i ta kotou i rauka mai mei to taeake.

55 E me ka maata atu ta kotou ka rauka mai no te tauturu ia kotou, e oronga atu kotou i te reira ki roto i taku are vairanga, kia tau te raveanga i te au mea katoatoa mei taku i tuatua atu.

56 E pati mai kotou, e ka orongaia atu taku au irava tapu mei taku i akataka atu, e ka akonoia ratou ki tetai ngai meitaki;

57 E e mea meitaki kia muteki kotou no runga ia ratou, e auraka e apii atu ia ratou kia rauka rava ia kotou te katoatoa.

58 E te oronga atu nei au kia kotou i tetai akaueanga, e reira e apii atu ei kotou i teia au mea ki te au tangata katoatoa; e ka apiiia atu teia au mea nei ki te au pa enua katoa, te au kopu katoatoa, te au reo katoatoa e te au tangata katoatoa.

59 Kia rave mai kotou i te au mea tei rauka mai ia kotou, ko tei orongaia atu ana kia kotou i roto i taku au irava tapu no te ture, kia riro ei ture naku ei akatere i taku akonoanga;

60 E koia te ka rave kia tau ki teia au mea nei ka ora ïa, e koia te kare e rave i te reira ka akaapaia me ka akapera uatu rai aia.

61 Me ka pati mai kotou, ka rauka ia kotou te eeuanga rungaʼo i te eeuanga, te kite rungaʼo i te kite, e kia kite kotou i te au mea muna e te au mea au tikai—ko te ka apai mai i te rekareka, ko te ka apai mai i te oraanga mutukore.

62 E kia pati kotou, e ka eeuia mai kia kotou i roto i toku uaorai tuatau i te ngai ka akatuiaʼi te Ierusalema Ou.

63 E i na, ka tae te tuatau e tonoia atu ei taku au tavini ki te itinga e ki te opunga, ki te tokerau e ki te tonga.

64 E mei teianei, koia te ka aere atu ki te itinga kia apii ia ratou te ka ariu mai kia oro atu ki te opunga, e ko teia no te au mea kino te ka aere mai ki runga i te enua nei, e no te au ravenga muna.

65 I na, kia akono kotou i teia au mea katoatoa nei, e e manganui uatu taau tutaki; no te mea kua orongaia atu kia kotou kia kite i te au mea muna o te basileia, i na ra e kare oki i orongaia ki to te ao nei kia kite i te reira.

66 Kia akono kotou i te au ture tei rauka ia kotou e kia tu akarongo uatu rai.

67 E ka rauka ia kotou te au koreromotu o te akonoanga, kia rava te reira ei akamou ia kotou, i konei e i roto i te Ierusalema Ou.

68 No reira, ko tei ngere i te pakari, e pati mai aia kiaku, e ka oronga uatu au kiaia ma te patoi kore atu.

69 E akateitei i to kotou au ngakau ma te rekareka, tei a kotou oki te basileia, me kore ra, kua orongaia atu te au taviri o te akonoanga. Koia ïa. Amene.

70 Ka orongaia atu ki te au taunga e te au puapii ta ratou au tuanga angaanga, mei te au mema rai.

71 E ko te au ereta me kore ra te au taunga teitei, ko tei ikiia atu kia tauturu i te episekopo ei nga konitara i roto i te au mea katoatoa, kia tauturuia atu to ratou kopu tangata mei roto atu i te au apinga tei akatapuia ki te episekopo, ei meitaki no te putaua, e no tetai au akakoroanga keke atu, mei tei taikuia atu i mua ana;

72 Me kore ra kia rauka ia ratou te tutaki tau tikai no ta ratou au angaanga katoatoa, mei te tuanga angaanga me kore ra tetai uatu, me kua tau ki te manako me kore ra te tika a te nga konitara e te episekopo.

73 E ka rauka katoa i te episekopo tona tauturu, me kore te tutaki tau no tana au angaanga katoatoa i roto i te akonoanga.

74 I na, tika tikai taku e tuatua atu nei kia kotou, e ko tetai uatu au tangata i rotopu ia kotou, e kua akaatea ke atu i to ratou au tokorua no te moe ana, me kore ra ka tuatuaia e, me ka akapapu mai ratou ki mua i to kotou aroaro ma te ngakau akaaka tikai e ko te tumu teia, auraka kotou e tuaru atu ia ratou ki vao mei rotopu ia kotou;

75 I na ra me kitea mai e kotou e ko tetai uatu o te au tangata tei akaruke atu i to ratou au tokorua no te rave i te akaturi, e ko ratou tikai tei apa, e te ora nei to ratou au tokorua, kia tuaruia atu ratou mei rotopu ia kotou.

76 E te tuatua akaou atu nei au kia kotou, kia akara meitaki e kia matakite tikai kotou, ma te uiui tikai, e auraka kotou e ariki i tetai ki rotopu ia kotou me kua oti i te akaipoipo;

77 Me kare ra ratou i akaipoipo, kia tataraara ratou i ta ratou au ara katoatoa me kore ra kare kotou e ariki ia ratou.

78 E pera katoa, ko te au tangata katoatoa o te akonoanga a te Mesia, ka akono ratou i te au akaueanga katoatoa e te au koreromotu katoatoa o te akonoanga.

79 E ka tae akera, e, ko tetai uatu tangata i rotopu ia kotou te ka tā tangata, ka apaiia atu aia e ka akautungaia kia tau ki te au ture o te enua; e akamaara e kare ona akakoreanga ara; e ka akapapuia oki teia kia tau ki te au ture o te enua.

80 E kia akaturi tetai uatu tane me kore ra vaine, ka akavaia atu aia ki mua e rua nga ereta o te akonoanga, me kore ra e maata atu, e ko te au tuatua katoatoa ka akatinamouia ei patoi atu iaia na roto e rua nga kite o te akonoanga, e auraka no te enemi; i na ra me ka maata atu i te rua nga kite e meitaki atu ïa.

81 E ka akaapaia atu te tane me kore ra te vaine na roto i te vaa o nga kite e rua; e ka tuku te au ereta i taua manamanata ki mua i te ekalesia, e ka taki te ekalesia i to ratou au rima ki runga no te patoi atu i te tane me kore ra te vaine, e kia tau to raua utunga ki te ture a te Atua.

82 E me ka rauka, e mea tau tikai e tei reira katoa te episekopo.

83 E kia pera katoa kotou i te au manamanata katoatoa te ka tae mai ki mua ia kotou.

84 E me ka keia tetai tane me kore ra tetai vaine, ka apaiia atu te tane me kore ra te vaine ki mua i te ture o te enua.

85 E me ka keia aia, ka apaiia atu aia ki mua i te ture o te enua.

86 E me ka pikikaa aia, ka apaiia atu aia ki te ture o te enua.

87 E me ka rave aia i tetai uatu kino, ka apaiia atu aia ki mua i te ture, koia oki ta te Atua.

88 E me kua akaapa to tungane me kore ra to tuaine ia koe, e apai koe i to tungane me kore ra to tuaine i tetai ngai ko korua ua, e me ka aaki mai aia kia akaau akaou korua.

89 Me kare ra aia e aaki mai ka apai atu kotou iaia ki mua i te akonoanga, auraka ki te au mema, ki te au ereta ra. E ka raveia teia i roto i tetai uipaanga, e kare oki i mua i to te ao katoa.

90 Me e maata ta to tungane me kore ra ta to tuaine i akaapa, ka akoia atu aia ki mua i te maataanga.

91 E ko tetai uatu te ka akaapa atea ua mai, ka ako atea ia atu aia kia akama aia. Me kare ra aia e aaki atu, ka apaiia atu aia ki mua i te ture a te Atua.

92 E ko tetai te ka akaapa atu na roto i te ngaro, ka akoia atu aia na roto i te ngaro, kia rauka iaia te tikaanga kia aaki atu na roto i te ngaro kiaia tana i akaapa atu, e ki te Atua katoa, kia kore te akonoanga e tuatua akakino atu iaia.

93 E kia akapera kotou i roto i te au mea katoatoa.