Tuanga 68
Te eeuanga tei orongaia mai na roto ia Iosepha Timeti te Peroveta, i Hiram, Ohio, Noema 1831, i te patianga a Orson Hyde, Luke S. Johnson, Lyman E. Johnson, e William E. McLellin (History of the Church, 1:227–229). Noatu oki e kua orongaia mai teia eeuanga i roto ei pauanga ki te patianga kia akakiteia mai te manako o te Atu ki teia au ereta i taikuia nei, e maata rai te apinga o roto te ka tano ki te katoaanga o te Akonoanga.
1–5, Ko te au tuatua a te au ereta me akanauruia e te Vaerua Tapu, e irava tapu ïa; 6–12; Kia ako e kia bapetizo te au ereta, e ka aru mai te au akairo i tei akarongo tika; 13–24, Te tama mua i rotopu i te au tamaroa a Aarona e tika tona kia tavini ei Episekopo Akaaere (koia oki, kia mou i te au taviri o te ruru peresideni ei episekopo) i raro ake i te akatereanga a te Ruru Peresideni Mua; 25–28, Kua akaueia te au metua kia apii i te evangelia ki ta ratou au tamariki; 29–35, Ko te aronga tapu, kia akono ratou i te Sabati, angaanga meitaki, e te pure.
1 Kua kapikiia oki taku tavini, ko Orson Hyde, na roto i tona akataongaangaia kia akakite atu i te evangelia mutukore, na roto i te Vaerua o te Atua ora, mei tetai au tangata ki tetai au tangata, e mei tetai enua ki tetai enua, ki roto i te au putuputuanga o te aronga kino, ki roto i to ratou au sunago, i te tuatuaanga ma te akakite katoa anga i te au irava tapu kia ratou.
2 E, i na, e akaraanga teia ki te aronga katoatoa tei akataongaia ki teia kautaunga, e tei ikiia ta ratou angaanga kia aere ki mua—
3 E ko teia oki te akaraanga no ratou, ka tuatua ratou mei tei akakeuia e te Vaerua Tapu.
4 E noatu eaa ta ratou ka tuatua me akakeuia ake e te Vaerua Tapu, ka riroia ei irava tapu, ka riroia ei anoano no te Atu, ko te manako ïa o te Atu, ka riro ïa e ko te tuatua a te Atu, e te mana katoa o te Atua ki te akaoraanga.
5 I na, ko te taputou teia a te Atu kia kotou, e taku au tavini.
6 No reira, kia mataora kotou, e auraka e mataku, ei vaitata oki au ko te Atu ia kotou; e ka tu oki au ki te pae ia kotou; e ka akakite oki kotou i te tuatua noku, ko Iesu Mesia oki, e ko au te Tamaiti a te Atua ora, e i vai ana au, e te vai nei au, e ka tae mai au.
7 Ko te tuatua teia a te Atu kia koe, e taku tavini e Orson Hyde, e pera katoa ki taku tavini ko Luke Johnson, e pera katoa ki taku tavini ko Lyman Johnson, e pera katoa ki taku tavini ko William E. McLellin, e pera katoa, ki te au ereta akarongo katoatoa o taku akonoanga—
8 E aere kotou ki te pa enua katoa, e tutu atu i te evangelia ki to te ao katoa nei, na roto i te mana taku i oronga atu kia kotou, ma te bapetizo atu ia ratou na roto i te ingoa o te Metua, e no te Tamaiti, e no te Vaerua Tapu.
9 Ko tei irinaki e kua bapetizoia e ora ïa, ko tei kore ra i irinaki, ka akaapaia ïa.
10 E ko tei irinaki ra, ka akameitakiia aia ki te au akairo te ka aru mai, mei tei tataia oki.
11 E ka akakiteia atu oki kia kotou kia kite i te au akairo o te au tuatau, e te au akairo no te okianga mai o te Tamaiti a te Tangata;
12 E no ratou ravarai ta te Metua ka akakite atu, ka orongaia atu te mana kia kotou kia topiri ia ratou ki te ora mutukore. Amene.
13 E teianei, no runga i te au mea tei kapitiia atu ki te au koreromotu e te au akaueanga, ko teia ïa—
14 Te vai nei i te au tuatau ki mua i tei tau i te Atu, tetai au episekopo te ka akamanaia ki te akonoanga, kia angaanga kia tau ki to mua ana;
15 No reira ei au taunga teitei e te tiamā ratou e tikaʼi, e ka ikiia ratou e te Ruru Peresideni Mua no te Kautaunga o Melekizedeka, mari ua me e uanga tikai ratou na Aarona.
16 E mei te mea e e uanga tikai ratou no Aarona, e tikaanga tika tikai to ratou ki te taonga episekopo, mei te mea oki e ko ratou tetai o te au tama mua i roto i te au tamaroa a Aarona;
17 Ko te tama mua oki, tei aia te tikaanga kia mou i te ruru peresideni i rungaʼo i teia kautaunga nei, e pera katoa ki te au taviri me kore ra te tikaanga o reira.
18 Kare rava e tikaanga tika tikai o tetai tangata kia mou i teia taonga nei, e kia mou i te au taviri o teia kautaunga nei, mari ua e uanga tikai aia e te tama mua katoa na Aarona.
19 I na ra, ko te taunga teitei i roto i te Kautaunga o Melekizedeka, e tikaanga tona kia akaaere i te angaanga a te au taonga i raro ake, ka akatikaia aia kia akaaere i te taonga o te episekopo, me kare e kitea mai tetai o te uanga tikai o Aarona, mei te mea e kua kapikiia aia, kua akatakaia e kua akataonga katoa ia ki teia mana nei i raro ake i te rima o te Ruru Peresideni Mua o te Kautaunga o Melekizedeka.
20 E ko te uanga tikai o Aarona, kia ikiia aia e teia Ruru Peresideni e tikaʼi, e kia kitea e kua tiamā aia, e ka akatainuia ma te akataongaia i raro ake i te rima o teia Ruru Peresideni nei, me kore ra, kare ratou e tikaia kia rave i te angaanga i roto i to ratou kautaunga.
21 I na ra, na roto i teia akaue no runga i to ratou tikaanga ki te kautaunga mei te metua ki te tamaiti, ka rauka ia ratou to ratou akatainuangaia mei te mea e ka rauka ia ratou i te akapapu e koia to ratou ai tupuna, e me kore ra ka akapapu na roto i te eeuanga mei ko mai i te Atu i raro ake i te rima o te Ruru Peresideni tei taikuia i runga ake.
22 E pera katoa, auraka rava tetai episekopo, me kore ra tetai taunga teitei te ka akatakaia ki teia taonga nei e akaapaia ki tetai uatu rai ara, mari ra kia tukuia aia ki mua ki te Ruru Peresideni Mua o te akonoanga;
23 E me kiteaia aia e kua apa i mua i te aroaro o teia Ruru Peresideni, na roto i te kite te ka kore rava e rauka kia akatukeia, ka akaapaia aia;
24 E me tataraara aia, ka akakoreia tana ara, kia tau ki te au koreromotu e te au akaueanga a te akonoanga.
25 E pera katoa, me e tamariki ta te au metua i Ziona, e me kore ra i roto i tetai uatu titi tei akatumuia, tei kore i apii ia ratou kia mārama i te apiianga o te tataraara, te akarongo i roto i te Mesia te Tamaiti a te Atua ora, e te bapetizoanga e te orongaanga i te Vaerua Tapu na roto i te tukuanga rima, me tae ki te varu mataiti, ka iri te ara ki runga i te upoko o nga metua.
26 Ka riro oki teia ei ture ki te au tangata o Ziona, e me kore ra, ki tetai uatu o tona au titi tei akatumuia.
27 E ka bapetizoia oki ta ratou au tamariki ki te bapetizoanga no te akakoreanga i ta ratou au ara me tae ki te varu mataiti, e te arikianga mai o te tukuanga rima.
28 E ka apii katoa oki ratou i ta ratou au tamariki ki te pure, e te aere tiratiratū ki mua i te Atu.
29 E ka akono katoa oki te au tangata o Ziona i te rā Sabati ei rā tapu.
30 E ka akamaara katoa oki te au tangata o Ziona i ta ratou au angaanga, i te mea e kua ikiia ratou kia angaanga, ma te akarongo tikai; no te mea ko te tangata noonoo ua, ka akamaaraia rai aia ki mua i te Atu.
31 I teianei, kare oki au, ko te Atu, e rekareka rava ana i te au tangata o Ziona, no te mea tei rotopu ia ratou tetai aronga noonoo ua; e te tupu mai nei oki ta ratou au tamariki ki roto i te kino; kare oki ratou i kimi pu tikai i te au mea e apinganui ei e mutukore uatu, i na ra, kua kī to ratou mata i te noinoi.
32 Kare teia au mea e inangaroia ana kia tupu, e ka takoreia mei rotopu atu ia ratou e tikaʼi; e no reira, ka tika i taku tavini ko Oliver Cowdery kia apai atu i teia au tuatua ki te enua ko Ziona.
33 E te oronga atu nei au i tetai akaueanga kia ratou—ko tei kore i akono i tana au pure ki mua i te Atu i te tuatau tikai, ka akamaaraia atu aia ki mua i te akavanui o toku iti tangata.
34 Kua tika rava teia au tuatuaanga e te akarongo tikai; e no reira, auraka e aati atu i te reira, e auraka katoa e rave ke atu.
35 I na, ko au te Alepha e te Omega, e te aere viviki mai nei au. Amene.