1 Te Reo o te Pakari, ei meitaki no te pupu konitara o te au taunga teitei, tei uipa mai ki Kirtland, e no te akonoanga, e pera katoa ki te aronga tapu i Ziona—

2 Kua tonoia mai ei aroaanga; kare ei akaueanga me kore ra maroanga, mari ra na roto i te eeuanga e te reo o te pakari, i te akaarianga mai i te akanooanga e te anoano o te Atua na roto i te akaoraanga kopapa o te katoatoa ravaanga o te aronga tapu i te au rā openga nei—

3 Tei orongaia mai ei apiianga ma te taputou, i akapapaia mai kia rauka i te apikepike, e te paruparu rava atu o te aronga tapu katoatoa, ko tei riro me kore ra ko tei karangaia e aronga tapu.

4 I na, tika tikai, te tuatua maira te Atu kia kotou: No te au kino e te akakoroanga e tupu nei e te ka rauka mai i roto i te ngakau o te au tangata rave angaanga kino i te au rā openga, kua ako ana au ia kotou, e kua ako na mua ia kotou, na roto i te orongaanga atu i teia reo o te pakari na roto i te eeuanga—

5 E me inu tetai tangata i te uaina me kore ra te kava i rotopu ia kotou, i na, kare oki te reira e meitaki, e kare oki e tau ki mua i te aroaro o to kotou Metua, mari ra ko te akaputuputuanga ia kotou ki te ngai okotai ma te rave i ta kotou kaianga oroa ki mua iaia.

6 E, i na, ei uaina tikai, ae, ei uaina ou no roto mai i te ua o te vine ta kotou uaorai i maani.

7 E, pera katoa, kare oki te au kava e tau no te kopu; mari ra ka tau no te oreianga i to kotou au kopapa.

8 E pera katoa, kare te avaava e tau no te kopapa, e kare katoa oki e no te kopu, e kare oki e meitaki no te tangata nei, i na ra, e vairakau no te motu e no te au puakatoro maki katoatoa, kia raveia ma te akara meitaki tikai e te kite tikai.

9 E pera katoa, kare te vai vera e tau no te kopapa me kore ra no te kopu.

10 E pera katoa, tika tikai taku e karanga atu kia kotou, kua akataka te Atua i te au rau rakau meitaki ei akamatutuanga no te tangata nei, kia taangaangaia e ïa—

11 Te au rau rakau pouroa i to ratou ra tuatau, e te au ua rakau i to ratou ra tuatau; kia kaiia teia ma te pakari e te akameitakianga.

12 Ae, ko te kiko katoa o te au manu vaevae ā o te enua, e to te au manu o te reva, kua akataka anake au, ko te Atu, i te reira ei kai na te tangata nei ma te akameitaki; kareka ra, kia raveia ma te kore e kai maata rava;

13 E ka riro te reira ei marekaanga noku mei te mea e kare kotou e kai i te reira, mari ua ra i te tuatau paroro, me kore ra te tuatau anu, me kore ra i te tuatau onge.

14 Ko te au ua kai katoatoa e kai te reira na te tangata nei e na te au manu vaevae ā katoa, ei kai no te oraanga, kare oki e na te tangata ua nei mari ra na te au manu vaevae ā katoa o te kainga, e na te au manu o te rangi, e te au manu taetaevao e orooro ra ma te totoro aere i te enua nei;

15 Kua anga oki te Atua i teia ei meitaki no te tangata nei i te tuatau onge ua e te matepongi tikai.

16 Ka meitaki oki te au tu uā kai katoatoa no te tangata nei, e pera katoa te au ua rakau; tei ua mai i te kai, noatu i raro i te enua e to runga ake i te enua—

17 Kareka ra, te sitona na te tangata ïa, e ko te kōni na te puakatoro ïa, e te outi na te oroenua ïa, e ko te au ua kai ngangaere na te manu reva ïa e te puaka, e no te au tu manu vaevae ā o te kainga, e ko te to na te au manu puapinga ïa, e ei inu māmā katoa, e pera katoa tetai au tu ua ke atu.

18 E ko te aronga tapu katoatoa tei akamaara i te akono e te rave i teia au tuatua nei, te aere ra ïa ma te kauraro i te au akaueanga, ka rauka ia ratou te maroiroi ki to ratou pito e te roro katoa ki to ratou au ivi;

19 E ka kite oki ratou i te pakari e te kite maata uatu rai tei akaputuputuia, e pera katoa te kite tei unaia;

20 E ka oro ratou ma te kore e roiroi, e ka aere ma te kare e matapoiriia.

21 E te oronga atu nei au ko te Atu i tetai taputou kia ratou, e ka na te pae mai te angela takore ia ratou, mei tei tupu ki te tamariki a Iseraela, e kare e tamate uatu ia ratou. Amene.