Tuanga 21
Te eeuanga tei orongaia mai kia Iosepha Timeti te Peroveta, i Fayette, New York, i te rā 6 o Aperira, 1830 (History of the Church, 1:74–79). Kua orongaia mai teia eeuanga nei i te akatumuangaia o te Akonoanga, i te rā tei akakiteia mai, i roto i te ngutuare o Peter Whitmer, Metua. E ono oki tangata tei piri mai, e kua bapetizo takere ia oki ratou. Na roto i te voutianga kua akakite pouroa mai ratou i to ratou au manako no te akatumuanga kia tau ki te akaueanga a te Atua (akara ki te Tuanga 20). Kua vouti katoa oki ratou ma te akatinamou ia Iosepha Timeti, Tamaiti, e Oliver Cowdery ei nga tangata akaaere no te Akonoanga. Na roto i te tukuanga rima kua akataonga atu a Iosepha ia Oliver ei ereta no te Akonoanga; e na Oliver oki i akataonga ia Iosepha. I muri ake i te kaianga i te oroa, kua tuku atu a Iosepha e Oliver i to raua nga rima ki rungaʼo i te au tangata tatakitai, no te orongaanga i te Vaerua Tapu, e no te akatinamouanga ia ratou tatakitai ei mema no te Akonoanga.
1–3, Kua kapikiia a Iosepha Timeti ei akara, ei akauri reo, ei peroveta, ei aposetolo, e ei ereta; 4–8, Na tona reo e arataki i te akakoroanga o Ziona; 9–12, Ka irinaki te aronga tapu i tana au tuatua iaia e tuatua ra na roto i te Akapumaana.
1 I na, ka akonoia tetai akapapaanga tuatua i rotopu ia kotou; e i roto i reira ka kapikiia koe e e akara, e tangata akauri reo, e peroveta, e aposetolo na Iesu Mesia, e ereta no te akonoanga na roto i te tika a te Metua Atua, e te aroa ua a toou Atu ko Iesu Mesia,
2 Ko tei akauruia mai e te Vaerua Tapu kia akamouia te tango, e kia akatuia oki ki te akarongo mou tikai.
3 Ko te akonoanga tei akatumuia e tei akatinamouia i te mataiti o to kotou Atu, e tai ngauru ma varu anere e toru ngauru, i te ā o te marama, e i te rā ono o te marama tei karangaia ko Aperira.
4 No reira, ko te akonoanga, e akarongo atu kotou ki tana au tuatua katoatoa ma te au akaueanga tana ka oronga mai kia kotou kia tae mai te reira kiaia, i te aerenga tapu mai ki mua iaku;
5 E ko tana tuatua taau ka ariki, mei te mea e no roto mai i toku uaorai vaa, ma te akakoromaki e te akarongo.
6 E me raveia teia au mea nei, kare i reira te au ngutupa o ade e autu ki rungaʼo ia koe; ae, e ka apai ke oki te Atu ko te Atua i te mana o te poiri mei mua atu ia koe, e ka akakeu i te rangi kia ngaueue no toou ra meitaki, e no te kakā o tona ra ingoa.
7 Te tuatua maira oki te Atu ko te Atua: Koia, ko taku i akanauru ei akatupu i te akakoroanga o Ziona na roto i te mana ririnui ei meitaki, e ko tona maroiroi kua kite oki au, e ko tana au pure kua akarongo au.
8 Ae, ko tana aueanga no Ziona kua kite oki au, e ka akaue au iaia kia kore e mii akaou nona; no te mea kua tae mai oki te au rā mataora ki te akakoreanga o tana au ara, e te akairianga mai o taku au akameitakianga ki runga i tana au angaanga.
9 E, i na, ka akameitaki au i te au tangata angaanga pouroa i roto i taku kainga vine, ki tetai akameitakianga ririnui tikai, e ka irinaki oki ratou ki tana au tuatua, ko tei orongaia kiaia na roto iaku e te Akapumaana, ko tei akakite mai e kua akasatauroia a Iesu e te au tangata rave ara no te au ara a to teianei ao, ae, no te akakoreanga ara o te atingakau.
10 No reira, kua tika iaku kia akataongaia aia e koe, ko taku aposetolo ko Oliver Cowdery;
11 E angaanga oroa teia kia koe, kia riro koe ei ereta i raro ake i tona rima, e koia te mua ia koe, e kia riro oki koe ei ereta no teia akonoanga a te Mesia, ko tei tapaia ki toku ingoa—
12 E ko te tangata ako mua koe o teia akonoanga no te akonoanga, e ki mua katoa i te ao nei, e ki mua katoa i te au Etene; e te tuatua mai nei te Atu ko te Atua, Ae oki! ki te ngati Iuda katoa. Amene.