Tuanga 134
Te akakiteanga o te irinaki no runga i te au kavamani e te au ture katoatoa, tei arikiia e te katoatoa i te uipaanga maata a te Akonoanga tei raveia i Kirtland, Ohio, i te rā 17 o Aukete, 1835 (History of the Church, 2:247–249). Ko te uipaanga oki teia na te au akaaere o te Akonoanga, tei taokotai mai kia akarakara i te au tuanga tei tamanakoia no te neneianga mua o te Apiianga e te Au Koreromotu. I teia taime ka orongaia mai ei teia akakiteanga, kua akamataia te reira na roto i teia au tuatua: “E ko to matou irinakianga no runga i te au kavamani o te enua nei e te au ture katoatoa auraka oki kia manako tarevakē ia e ma te kore e māramarma meitaki, kua manako matou e kua tau kia orongaia atu ki roto i te openga o teia puka nei i ta matou au akamāramaramaanga no runga i teia” (History of the Church, 2:247).
1–4, Kia akono te au kavamani i te tikaanga kia iki e kia akamori; 5–8, Kia turu te au tangata katoatoa i ta ratou au kavamani, e kia kauraro e kia akangateitei i te ture; 9–10, Auraka te au putuputuanga evangelia e taangaanga i te au mana o te enua; 11–12, E tika to te au tangata no te paruruanga ia ratou uaorai e to ratou kainga.
1 Te irinaki nei matou e na te Atua i akatupu i te au kavamani ei meitaki no te tangata; e ka akava aia i te au tangata no ta ratou ka rave ei aru i te reira, i te papauanga i te au ture e te akaaereanga i te reira, ei meitaki e ei ora no te katoatoa.
2 Te irinaki nei matou e kare rava e kavamani e tupu ua na roto i te au, mari ua kia akapapaia e kia akamouia te au ture ei akapapu i te tikaanga o te tangata tatakitai kia taangaanga i tona manako, te tika e te akaaereanga i tona au apinga, e te paruruanga o te oraanga tangata.
3 Te irinaki nei matou e ka inangaro te au kavamani i tetai au akava oire, e te au akavanui ei akamana i teia au ture nei; e ko te ka akaaere i te ture ma te tika e te aiteite kia kimiia mai e kia akatikaia ïa e te reo o te tangata, me e enua voutianga ïa, me kore ra e te anoano o te ariki.
4 Te irinaki nei matou e na te Atua i akatupu i te akonoanga; e kia kauraro te tangata kiaia, e kiaia anake, no te akamorianga, mari ua me ka riro ta ratou ka manako ei akatupu i te kino ki rungaʼo i te au tikaanga e te ikianga o te au tangata; i na ra, kare matou e irinaki ana e e tikaanga to te ture tangata kia tamanamanata no runga i te akaaereanga i te tu akamori ei tapeka i te au manako o te tangata, auraka katoa e akaue no te ravenga o te akamorianga me e aronga maata, me e tangata okotai; kia takore ra te kavamani i te kino, e auraka e akaaere i te manako tangata; e akautunga ra i tei tarevakē, auraka e arai i te rangatiraanga o te vaerua tangata.
5 Te irinaki nei matou e kia turu te au tangata katoatoa i te kavamani i te ngai e noo ra ratou, e e paruruia ra to ratou au tikaanga tangata e te au ture o te reira au kavamani; e ko te akakokoanga e te kaitamakianga kare ïa e tau ki te au tangata e paruruia nei, e kia akautungaia ma te tau; e e tikaanga to te au kavamani katoatoa kia taangaanga i te au ture me kua tau ia ratou, ei meitaki no te tangata; i na ra kia vai tapu rai te tu rangatira o te manakonakoanga tangata.
6 Te irinaki nei matou e kia akangateiteiia te tangata ravarai i tona uaorai turanga; koia oki te au tutara e te au akaaere ture, tei tukuia no te paruruanga o te aronga ara kore e no te akautunga ia ratou tei akaapaia; e pera katoa ki te au ture kia akangateitei e kia ariki i te au tangata ravarai, me kare te reira ka monoia te au e te nooanga mataora ki te mataku e te takingakino; kua akatupuia te au ture o te oraanga tangata no tetai akakoroanga meitaki, no te akaaereanga i to tatou meitaki, to te tangata tatakitai e to te au pa enua katoa, i rotopu i te tangata e te au iti tangata; e kua orongaia mai teia au ture tapu mei te rangi mai, i te tataanga i te au ture no runga i te au mea vaerua, no te akarongo e te akamorianga, te ka pauia e te tangata ki Tei Anga iaia.
7 Te irinaki nei matou e e tikaanga to te au tutara, te au oire mamaata, e te au kavamani, kia akamou ratou i te au ture ei paruru i te au tangata o reira kia akatikaia ratou kia akamori i ta ratou i irinaki; i na ra, kare matou e irinaki e e tikaanga tika to ratou kia rave ke i te tikaanga o te au tangata, me kore ra kia arai i to ratou au manako, mei te mea e kua akangateiteiia e kua akatapuia taua au ture e kare oki to ratou manako akonoanga i akatupu i te kino e te kauraro kore.
8 Te irinaki nei matou e ko te tu o te raveanga o te kino kia akautungaia rai kia tau ki tei raveia; e ko te tamate tangata, te pikikaa aati kavamani, te keia na roto i te takingakino, te keia na roto i te ngaro, e te akatupu pekapeka, i tetai uatu tu, kia akautungaia kia tau ki ta ratou angaanga kino rava rai i rave ana i te au tangata, na roto i te au ture a te reira kavamani i te ngai i raveiaʼi te ara; pera no te raukaanga mai te au e te pereperekavana no te katoatoa ka tu mai te tangata katoatoa e rave i ta ratou ka rauka kia apaina te aronga tei aati i teia au ture meitaki nei kia akautungaia.
9 Kare matou e irinaki ana e e tika kia kairo te akonoanga e te kavamani, e kia tauturu ua ia e tai akonoanga, e ko tetai pae ra ka araiia to ratou au tikaanga vaerua, e ko te tikaanga tatakitai o te au mema, ei au tangata i raro ake i te ture, kia patoiia.
10 Te irinaki nei matou e e tikaanga to te au aronga akonoanga kia akatikatika i to ratou uaorai au mema no runga i tetai au tu mako kore, kia tau ki te ture e te au akaaereanga a te reira au aronga; mei te mea e ka riro te reira ei akaruruanga e ei turanga meitaki; i na ra kare matou e irinaki e e mana to tetai aronga akonoanga kia akava i tetai tangata no runga i tona enua me kore ra no tona oraanga, kia rave mai i to ratou au puapinga o teianei ao, me kore ra kia akaue i te rave ke anga i to ratou oraanga e to ratou au kopapa, me kare kia tamamae atu i to ratou kopapa. Ka rauka ra ia ratou kia tipu atu ia ratou ki vao mei roto mai i ta ratou akonoanga, ma te akaatea i ta ratou au arikianga ia ratou.
11 Te irinaki nei matou e e tikaanga to te au tangata kia oro ki te ture o te enua kia akatikaia te au tarevakē katoatoa e te au takingakinoanga, tei tupu kia ratou uaorai, me kore ra ko to ratou tikaanga ki to ratou au apinga, me kore ra me akakinoia to ratou ingoa, me te vai ra te ture ei paruru i te reira; i na ra te irinaki nei matou e e tikaanga to te tangata kia paruru ia ratou uaorai, to ratou au taeake, e ta ratou au apinga, e te kavamani, mei te au mea taukore e te angaanga aati ture te ka raveia e tetai uatu tangata i te au tuatau manamanata, e kare e tae vave te patianga ki te au ture, e kare katoa e rauka viviki mai te tauturu.
12 Te irinaki nei matou e kua tau kia tutuia atu te evangelia ki to te au pa enua o te ao nei, e ma te ako atu i te aronga tuatua-tika kia akaora ia ratou uaorai mei roto mai i te viivii o teianei ao; i na ra kare matou e irinaki ana e e mea tau kia aere ki rotopu i te au tavini tuikaa, e kia tutuia te evangelia kia ratou, me kore ra kia bapetizoia ratou ma te tika kore i to ratou au pu, me kore ra kia tomo atu ki roto i te tamanamanata e te tuatuaanga atu kia mareka kore ratou i to ratou turanga i teia oraanga, na roto i teia e tupu mai ei te kino ki te oraanga tangata; e ko teia tu, te irinaki nei matou e kare te reira i tika i te ture, kare katoa oki i te mea tika, e ka riro te reira ei takore i te au o te au kavamani tei akatika i te oraanga tangata kia akatuikaaia.