Tuanga 117
Te eeuanga tei orongaia mai na roto ia Iosepha Timeti te Peroveta, i Far West, Missouri, i te rā 8 o Tiurai, 1838, no runga i te au angaanga rapurapu a William Marks, Newel K. Whitney, e Oliver Granger (History of the Church, 3:45–46).
1–9, Auraka te au tavini o te Atu e morimori i te au apinga o te pae kopapa nei, e “eaa oki te apinga nei ki te Atu?”; 10–16, Kia akaruke ratou i te tu vaerua meangiti e ka tapu i reira ta ratou au atinga ki mua i te Atu.
1 Tika tikai te tuatua maira te Atu ki taku tavini ko William Marks, e ki taku tavini katoa ko Newel K. Whitney, kia akaviviki raua i te akatikatika i ta raua au angaanga pouroa e kia aere atu mei te enua ko Kirtland, i mua ake ka tuku akaou atu ei au, ko te Atu, i te kiona ki runga i te enua nei.
2 Kia ara mai ratou, ma te tu ki runga, e kia aere mai ki mua, auraka e tiaki, naku oki, na te Atu, i akaue atu.
3 No reira, me ka tiaki ratou kare e riro ei meitaki kia ratou.
4 Kia tataraara ratou i ta ratou au ara katoatoa, e to ratou au manako morimori, kia mua iaku, te tuatua maira te Atu; eaa oki te apinga nei kiaku? te tuatua maira te Atu.
5 Kia tukuia atu te au puapinga o Kirtland no te kaiou, te tuatua maira te Atu. Kia tuku i te reira, te tuatua maira te Atu, e ko te ka toe mai, kia vai rai te reira ki roto i to kotou au rima, te tuatua maira te Atu.
6 Kare ainei tei aku te au manu o te reva, e pera te au ika o te moana, e te au manu vaevae ā o te maunga? Kare ainei e naku i anga i te enua nei? Kare ainei tei roto i toku rima e ora o te au nuku vaeau o te au pa enua o te enua nei?
7 No reira, kare ainei au e akaue i te au ngai tangata kore kia matapuku e kia puera mai, e kia uua mai? te tuatua maira te Atu.
8 Kare ainei e rava te ngai i runga i te maunga ko Adamu-Onidi-Amana, e i runga katoa oki i te au ngai mania o Olaa Sinea, te ngai i noo ei a Adamu, i morimori ei koe i teia manga topata nei, e kua akangaropoina i te au mea puapinga tikai?
9 No reira, e aere mai ki te enua o taku iti tangata, koia a Ziona.
10 Kia tu akarongo meitaki taku tavini ko William Marks i te au apinga meangiti, e ka riro aia i reira ei tutara ki rungaʼo i te au mea e manganui. E tuku iaia kia akaaere i rotopu i toku iti tangata i roto i te oire ko Far West, e kia akameitakiia aia ki te akameitakianga o taku nei iti tangata.
11 E kia akama oki taku tavini ko Newel K. Whitney i te au pipi a Nikolao e ta ratou au ravenga muna kikino, e tona au tu vaerua meangiti ki mua iaku, te tuatua maira te Atu, e kia aere mai ki te enua o Adamu-Onidi-Amana, ei episekopo no taku iti tangata, te tuatua maira te Atu, auraka oki e ko te ingoa ua, ko te angaanga katoa ra, te tuatua maira te Atu.
12 E pera katoa, te karanga atu nei au kia koe, te maara nei iaku taku tavini ko Oliver Granger; i na, tika tikai taku e karanga atu kiaia e ka vai oki tona ingoa ki roto i te akamaaraanga tapu mei tetai uki ki tetai uki, e tuatau e tuatau uatu, te tuatua maira te Atu.
13 No reira, kia taumaro taakaaka atu aia no te akaoraanga o te Ruru Peresideni Mua o taku Akonoanga, te tuatua maira te Atu; e me inga aia ka tu akaou mai aia ki runga, e tapu atu tana atinga ki mua iaku i tana ka rauka mai, te tuatua maira te Atu.
14 No reira, kia aere viviki mai aia, ki te enua ko Ziona; e kia tae te tuatau ka akariroia aia ei tangata okooko no toku nei ingoa, te tuatua maira te Atu, ei meitaki no toku nei iti tangata.
15 No reira auraka rava e tangata e makitakita atu i taku tavini ia Oliver Granger, mari ua ra kia vai te akameitakianga o taku nei iti tangata ki rungaʼo iaia e tuatau e tuatau uatu.
16 E pera katoa, tika tikai taku e karanga atu kia koe, kia akamaara taku au tavini pouroa i te enua ko Kirtland i to ratou Atu ko te Atua, e taku are katoa, kia vai tapu ua rai te reira, e kia akatauri atu i te aronga taui moni i te tuatau e tae atu ei au te tuatua maira te Atu. Koia ïa. Amene.