1 Tika tikai taku e karanga atu kia kotou, e toku au taeake, te oronga atu nei au i tetai apiianga kia kotou, e te akaueanga, no runga i te au puapinga a te akanooanga tei akaueia e au kia akatupuia e kia akamouia, ei akanooanga taokotai, e ei ruruanga mutukore ei puapinga no taku akonoanga, e no te akaoraanga o te au tangata e tae ua mai au—

2 E ma te taputou tuku kore e te akatuke kore ia, e ko te aronga oki tei akaueia e au e kua vai akarongo tikai, ka akameitakiia ratou ki te au akameitakianga e manganui;

3 Me kare ra ratou i vai akarongo, ka o ratou ki te taumaa.

4 No reira, ko taku au tavini tei kore i akono i te akaueanga, i na ra, kua aati ra i te koreromotu na roto i te noinoi, e te au tuatua tapiki, kua taumaa au ia ratou ki te taumaa mamae tikai.

5 Kua akaue oki au, te Atua, i roto i toku ngakau, e kia kiteaia ake tetai tangata no roto i teia akanooanga ei tangata aati ture, me kore ra, ka aati i te papauanga i tapekaiaʼi kotou, ka taumaaia aia i roto i tona oraanga, e ka takatakaiia ki raro e taku i manako;

6 Kare au, te Atu, e akatika kia akavaavaaia au no teia au mea nei—

7 E ko te aronga apakore i roto ia kotou, kia kare ratou e akaapaia mei te aronga tuatua-tika kore; e ko tei apa i rotopu ia kotou, kia kare rava ïa e ora; no te mea kua taputou au ko te Atu kia kotou i te korona kakā i taku rima katau.

8 No reira, me kiteaia kotou e aronga aati ture, kare rava kotou e ora atu i toku riri otooto i roto i to kotou oraanga.

9 Me tipuia kotou ki vao no ta kotou au aatianga ture, kare rava kotou e ora i te pāpāanga a Satani e tae uatu ki te rā o te akaoraanga.

10 E teianei, te oronga atu nei au i te mana kia kotou mei teia ora atu, me e tangata tetai i rotopu ia kotou, no te akanooanga, e kua rave ara e kare i tataraara i tona kino, kia tuku atu kotou iaia ki te pāpāanga a Satani; e kare i reira ona mana kia apai mai i te kino ki runga ia kotou.

11 Tei iaku oki te pakari; no reira, te oronga atu nei au i tetai akaueanga kia kotou, kia akaputuputu kotou ia kotou uaorai, ma te akataka ki te au tangata tatakitai i tona tuanga angaanga;

12 Kia raukaʼi i te au tangata kia akakite mai kiaku i te angaanga a te tuanga tei orongaia kiaia.

13 E mea tau oki iaku, i te Atu, kia akataka au i te au tangata ravarai, ei akaaere ki rungaʼo i te au akameitakianga enua, tei angaia e kua akateateamamaoia e au no taku au mea ora i angaia.

14 Kua oora oki au, te Atu, i te au rangi, e kua akamou i te enua, na toku rima te reira i rave; e naku oki te au mea katoa i roto ra.

15 Ko toku akakoroanga ïa kia akono meitaki i toku aronga tapu, no te mea naku te au mea katoa.

16 I na ra, kia raveia teia angaanga i taku uaorai ravenga i manako; e i na, teia te mataara taku, ta te Atu, i akaue, no te akono i toku aronga tapu, kia akangateiteiia te putaua, e kia taakaakaia te aronga apinganui.

17 Kua kī oki te enua, e ka rava no te katoatoa; ae, kua akapapa au i te au apinga katoatoa, e kua oronga oki au ki te au tamariki a te tangata nei kia riro ei pu kia ratou uaorai.

18 No reira, me rave tetai tangata i te puapinga taku i anga, e kare i tua i tana tuanga, kia tau ki te ture o taku evangelia, no te putaua e tei ngere, ka nana aia i tona mata ki runga, ma te aronga kino, i ade no te mamae maata.

19 E teianei, tika tikai taku e karanga atu kia kotou, no runga i te au puapinga o te akanooanga—

20 Kia ikiia no taku tavini ko Sidney Rigdon te ngai e noo nei nona, e ko te enua o te ngai maanianga pakiri manu no tona tuanga, ei tauturu iaia e rave ra i taku angaanga i roto i toku kainga vine, mei taku i anoano, me akaue au iaia.

21 Kia raveia te au mea katoa kia tau ki te tuatua o te akanooanga, ma te manako okotai, me kore ra te reo o te akanooanga, tei noo ki te enua ko Kirtland.

22 Ko teia tuanga angaanga e te akameitakianga, naku, na te Atu, i tuku ki rungaʼo i taku tavini ko Sidney Rigdon ei akameitakianga nona, e no tana uanga i muri ake iaia;

23 E akamaata oki au i te akameitakianga ki rungaʼo iaia, me ka akamoraro mai aia iaku.

24 E pera katoa, kia akatakaia mai no taku tavini a Martin Harris, no tona tuanga, te tuanga enua ta taku tavini ta John Johnson i rauka mai i te tauianga i tona ipukarea mua, nona e no tana uanga i muri ake iaia;

25 E me ka tu akarongo aia, ka akamaata au i te au akameitakianga ki rungaʼo iaia e tana uanga i muri ake iaia.

26 E kia akataka taku tavini ko Martin Harris i tana moni katoa no te tutuanga i taku tuatua, kia tau ki ta taku tavini ko Iosepha Timeti, Tamaiti, ka akaaere.

27 E pera katoa, kia orongaia atu nona te ngai e noo ra taku tavini ko Frederick G. Williams.

28 E kia orongaia ki taku tavini ko Oliver Cowdery te tuanga enua piri mai ki te are, te ka riro ei are neneianga pepa, ko te tuanga numero tai te reira, e te tuanga katoa ta tona metua e noo ra.

29 E kia orongaia ki taku nga tavini ko Frederick G. Williams e Oliver Cowdery te are neneianga pepa e te au mea katoa no te reira are.

30 E ko teia to raua tuanga angaanga te ka orongaia kia raua.

31 E me ka tu akarongo raua, i na, ka akameitaki au, e ka akamaata au i te akameitakianga ki rungaʼo ia raua.

32 Ko te akamataanga teia o te tuanga angaanga taku i iki ia ratou, no ratou e ta ratou uanga i muri ia ratou.

33 E me ka tu akarongo ratou, ka akamaata au i te akameitakianga ki rungaʼo ia ratou e ta ratou uanga a muri atu, koia te au akameitakianga e manganui.

34 E pera katoa, kia noo rai taku tavini ko John Johnson ki te are i noo ei aia, e te ipukarea, mari ua ra ko te enua tei akonoia no te akatuanga o toku au are, no roto mai i te reira ipukarea, e taua au tuanga tei taikuia no taku tavini no Oliver Cowdery.

35 E me tu akarongo aia, ka akamaata au i te akameitakianga ki rungaʼo iaia.

36 E te anoano nei au kia oko atu aia i te au tuanga enua tei vaioia no te akatuanga i te oire o toku aronga tapu, me ka akakiteia kiaia e te reo o te Vaerua, e kia tau ki te tuatua o te akanooanga, e te reo o te akanooanga.

37 E ko te akamataanga teia o te tuanga taku i iki nona, ei akameitakianga nona e no tana uanga a muri atu.

38 E me tu akarongo aia, ka akamaata au i te au akameitakianga e manganui ki rungaʼo iaia.

39 E pera katoa, kia akatakaia mai no taku tavini ko Newel K. Whitney nona te au are e te enua tana e noo ra, te enua e te are e vai ra te are toa, e te enua i te akoko ki tonga o te are toa, e pera katoa te enua tei runga te ngai vairangaanga reu.

40 Ko teia au mea taku i iki no taku tavini ko Newel K. Whitney no tona tuanga, ei akameitakianga nona e no tana uanga a muri atu, ei akameitaki no te are okookoanga no taku akanooanga tei akamouia e au no taku titi i te enua ko Kirtland.

41 Ae, tika tikai, ko te tuanga teia taku i iki no taku tavini ko N. K. Whitney, ko teia ngai okookoanga katoatoa, kiaia e tona mata, e tana uanga a muri atu.

42 E me ka tu akarongo aia i te akono i taku au akaueanga, tei orongaia atu e au kiaia, ka akamaata au i te au akameitakianga ki runga iaia e tana uanga a muri mai, koia te au akameitakianga e manganui.

43 E pera katoa, kia riro rai oki e na taku tavini na Iosepha Timeti, Tamaiti, e iki i te ngai nona tei akonoia no te akatuanga i toku are, e 220 iati i te roa e 66 iati i te atea, e te ipukarea katoa e nooia ra e tona metua;

44 Ko te akamataanga teia i te tuanga angaanga tei orongaia e au kiaia, ei akameitakianga nona, e no tona metua.

45 E i na, kua akono au i tetai ipukarea no tona metua, ei tauturu iaia; no reira kia akara meitaki ia mai aia i te are o taku tavini ko Iosepha Timeti, Tamaiti.

46 E akamaata oki au i te au akameitakianga ki runga i te ngutuare o taku tavini ko Iosepha Timeti, Tamaiti, me ka tu akarongo aia, e ka manganui te au akameitakianga.

47 E teianei, e oronga atu au kia koe i tetai akaueanga no runga ia Ziona, kia kore kotou e tapeka akaou ia ei akanooanga taokotai ki to kotou au taeake i Ziona, mari ua ko teia—

48 Kia oti kotou i te akamouia, ka kapikiia kotou e ko te Akanooanga Taokotai o te Titi o Ziona, i te oire ko Kirtland. E toou au taeake, i muri ake i to ratou akamouangaia, ka tuatuaia e te Akanooanga Taokotai o te Oire o Ziona.

49 Kia akatumuia ratou ki to ratou uaorai au ingoa, e i roto oki i to ratou uaorai ingoa, e ka rave ratou i ta ratou angaanga i to ratou uaorai ingoa;

50 E ka rave kotou i ta kotou angaanga i to kotou uaorai ingoa, e i roto i to kotou au ingoa.

51 Ko taku akaueanga teia ei ora no kotou, e ei ora katoa no ratou, no to ratou tuaruangaia ki vao e pera te ka aru mai.

52 Kua akaatikauia te au koreromotu na roto i te aatianga ture, te manako noinoi e te au tuatua pikipikikaa—

53 No reira te akaotiia nei kotou mei te akanooanga taokotai ma to kotou taeake, kare oki kotou i tapekaia mari ua no teia ora anake ua kia ratou, mari ra teia te tumu, mei taku i tuatua atu, na roto i te kaiou me kua akatika teia akanooanga i roto i te pupu konitara, me kare o kotou manamanata e na te reo o te pupu konitara e akaaere.

54 E pera katoa, e oronga atu au i tetai akaueanga kia kotou no runga i to kotou tuanga angaanga taku i iki no kotou.

55 I na, ko teia au apinga katoa nei noku ïa, me kore ra e puapinga kore to kotou akarongo, ka riro ïa kotou ei aronga pikikaa, e ko te au koreromotu ta kotou i papau kiaku kua ati te reira;

56 Me noku oki teia au apinga, e aronga rave angaanga ua kotou i reira; me kore ra kare ïa kotou i te aronga rave angaanga.

57 I na ra, tika tikai taku e karanga atu kia kotou, kua iki au ia kotou ei au tiaki i toku ngutuare, e ei rave angaanga oki.

58 Ko te tumu oki teia i karanga atu ei au kia kotou e e akatumu ia kotou, kia nenei i taku au tuatua, te kīanga o taku au irava tapu, e te au eeuanga taku i oronga atu kia kotou, e taku oki ka oronga atu kia kotou i tera tuatau i tera tuatau—

59 No te akakoroanga o te akatuanga i taku akonoanga e te basileia ki te ao nei, e kia akateateamamao i toku iti tangata no te tuatau e noo ei au kia ratou, te vaitata mai nei oki ïa.

60 E kia akateateamamao kotou i tetai ngai ei vairanga moni, e akatapu oki ki toku ingoa.

61 E iki i tetai ia kotou ei tiaki i te vairanga moni, e kia akataongaia aia no teia akameitakianga.

62 Ei akairo tetai ki runga i teia vairanga moni, e kia tukuia te au mea tapu katoatoa ki roto i teia vairanga; auraka oki tetai tangata e tuatua e nana, me kore ra tetai tuanga o te reira, no te mea na kotou katoatoa oki teia ma te okotai tikai.

63 Te oronga atu nei au kia kotou mei teianei ora atu, i na kia akara mai, ka aere ra kotou ka taangaanga i te tuanga taku i akataka atu no kotou, e auraka te au mea tapu, no te akakoroanga o te neneianga o teia au mea tapu nei mei taku i tuatua atu.

64 E ko te puapinga o teia au mea tapu, ei roto ïa i te vairanga apinga; ei topirianga rai to rungaʼo; auraka rava atu tetai uatu e rave mai e taangaanga i to roto i te reira, auraka oki te topirianga e mataratara, mari ua ra na roto i te reo o te akanooanga, me kore ra me akaueia mai.

65 E akono oki kotou kia vai meitaki te puapinga o te au mea tapu i roto i te vairanga, no te au akakoroanga tapu.

66 Ka tuatuaia oki te reira e ko te vairanga moni tapu a te Atu; kia vai rai te topirianga ki rungaʼo e kia vai tapu e te akatapuia ki te Atu.

67 E pera katoa, kia akapapaia tetai vairanga moni ke, e kia ikiia tetai tangata ei tiaki i te vairanga moni, ei topirianga katoa tetai e tukuia ki rungaʼo;

68 E ko te au moni katoatoa ta kotou ka rauka mai i roto i to kotou au tuanga angaanga, na roto i te akapuapingaanga i te au puapinga taku i oronga atu kia kotou, mei te au are, me kore ra te au enua, te au puakatoro, me kore ra i te au mea katoatoa, mari ua ko te au tataanga tapu, taku i vaio naku no te au akakoroanga tapu, kia tuku vivikiia atu te reira ki te vairanga i te taime e rauka mai ei ia kotou te au moni, i te au anere, te au rima ngauru, te au rua ngauru, te au tai ngauru, e te au rima.

69 Me kore ra ka tuatuaia e, me rauka i tetai tangata i rotopu ia kotou e rima tara kia titiri aia i te reira ki roto i te vairanga moni; me e tai ngauru tei rauka iaia, me kore ra e rua ngauru, me kore ra e rima ngauru, me e tai anere, kia pera katoa aia;

70 Auraka rava tetai i rotopu ia kotou e tuatua e nana te reira; kare oki te reira e tuatuaia e nana, me kore ra tetai tuanga o te reira.

71 Auraka rava tetai tuanga iti e taangaangaia, me kore ra e raveia mai ki vao i te vairanga, mari ua kia akatikaia e te reo e te katoatoa o te akanooanga.

72 E ko teia i reira te reo e te akatikaanga o te katoatoa o te akanooanga—kia tuatua atu tetai ia kotou ki te tiaki moni: ka inangaro au i teia ei tauturu iaku i taku tuanga angaanga—

73 Mei te mea e rima tara, me e tai ngauru tara, me e rua ngauru, me e rima ngauru, me kore ra e tai anere, ka oronga te mou moni kiaia i te tuanga tana i inangaro mai no te tauturu atu iaia i roto i tana angaanga.

74 Kia kitea roa kua aati ture ra aia, e kua akakiteia ki te pupu konitara o te akanooanga ma te mārama meitaki e e tangata mako kore aia e te kaimoumou.

75 I na ra mei te mea ra e e mema maroiroi aia, e me ka tu akarongo ma te kite i te rave i tana tuanga angaanga, ko tona tokene teia ki mua i te mou moni e kare te mou moni e tapū i tana i inangaro.

76 I na ra, me aati ture aia, tei raro te mou moni i te pupu konitara e te reo o te akanooanga.

77 Me kua kitea mai e kua mako kore e kua kaimoumou te tangata mou moni, tei raro aia i reira i te tikaanga a te pupu konitara e te reo o te akanooanga, e ka akaateaia aia mei tona ngai, e ka ikiia mai tetai tangata ki tona ngai.

78 E pera katoa, tika tikai taku e karanga atu kia kotou, no runga i ta kotou au kaiou—te anoano nei au e kia tutaki kotou i ta kotou au kaiou katoatoa.

79 E ko toku anoano kia taakaaka mai kotou kiaku, kia raukaʼi ia kotou teia akameitakianga na roto i to kotou tu maru e te akaaka, e te pure o te akarongo.

80 E me e tu maroiroi to kotou e te akaaka, ma te taangaanga i te pure o te akarongo, e i na, ka akaparuparu au i te au ngakau o te aronga tei reira ta kotou kaiou, e tae uatu ki toku tukuanga atu i te ravenga kia tatara mai ia kotou.

81 No reira e tata viviki ki New York e tata oki mei ta toku Vaerua e tuatua atu; e ka akaparuparu au i te au ngakau o te aronga e kaiou ta kotou i reira, e kia apai ke ia atu to ratou au manako kino ia kotou.

82 E me akaaka kotou ma te tu akarongo mou ma te kapiki i toku ingoa, e i na, e oronga atu au i te re na kotou.

83 Ka oronga atu au i te taputou kia kotou, e ka akaoraia mai mei roto mai i teia tapekaanga no teia taime ua.

84 Me rauka ake to kotou tikaanga kia akakaiou moni mai, mei te au anere, me e au tauatini, e tae uatu ki te ravaanga o ta kotou akakaiouanga mai no te tatara ia kotou mei roto i teia tapekaanga, e tikaanga teia no kotou.

85 Ma te tuku i te au apinga taku i oronga ki roto i to kotou au rima, no teia taime ua, i te orongaanga i to kotou au ingoa no te akatikaanga a te katoatoa me kore ra i tetai ravenga ke, me kua tau ia kotou.

86 Te oronga atu nei au i teia tikaanga kia kotou, no teia taime okotai; e i na, me akamata kotou i te rave i te au mea taku i tuku atu ki mua ia kotou, kia tau ki taku au akaueanga, naku pouroa oki teia au mea nei, e au tavini kotou noku, kare oki te pu e akatika i tona are kia vavaiia. Koia ïa. Amene.