Tuanga 73
Te eeuanga tei orongaia mai kia Iosepha Timeti te Peroveta, e Sidney Rigdon, i Hiram, Ohio, i te rā 10 o Tianuare, 1832 (History of the Church, 1:241–242). Mei te tuanga mua o Titema i topa ake nei, kua rave atu te Peroveta e Sidney i te tutu aere, e na roto i teia tu nei e maata tikai tei oti i te raveia i te akameangitianga i te manako manamanata tei tupu mai i te arai i te Akonoanga (akara i te upoko o te Tuanga 71).
1–2, Kia ako ua rai a Iosepha Timeti e Sidney Rigdon; 3–6, Kia akauri ua rai raua i te Bibilia tapu e tae uatu ki tona openga.
1 E tika tikai, te tuatua maira te Atu, kua tau oki iaku kia tutu uatu rai ratou i te evangelia, e kia ako atu i te au akonoanga i roto i te au oire e pini uake, e tae uatu ki te uipaanga maata;
2 E reira, i na, ka akakiteia atu kia ratou, na roto i te reo a te uipaanga, ta ratou au ngai ka aere ei.
3 Teianei, tika tikai taku e karanga atu kia korua, e taku nga tavini e Iosepha Timeti, Tamaiti, e Sidney Rigdon, kua tau rava, i na te Atu ei, kia akauri akaou ia te puka;
4 E mei te mea oki e, ka rauka kia raveia te tutu aere ki roto i te au oire e pini uake, e tae uatu ki te tuatau o te uipaanga; e i muri ake i te reira, e mea tau rava kia rave akaou atu rai i te angaanga akaurianga e oti ua atu.
5 E kia riro teia ei akaraanga ki te au ereta e rauka uatu tetai kite ou, mei tei tataia.
6 E teianei, kare aku e oronga akaou atu kia kotou i teia taime nei. E tatua i to kotou taukupu ma te akono meitaki. Koia ïa. Amene.