Tuanga 125
Te eeuanga tei orongaia mai na roto ia Iosepha Timeti te Peroveta, i Nauvoo, Illinois, Mati 1841, no runga i te aronga tapu i te enua ko Iowa (History of the Church, 4:311–312).
1–4, Kia akatu te aronga tapu i te au oire e kia taokotai mai ki te au titi o Ziona.
1 Eaa te anoano o te Atu no runga i te aronga tapu i te enua ko Iowa?
2 Tika tikai, te tuatua maira te Atu, te karanga atu nei au kia kotou, ko te aronga te ka kapiki ia ratou uaorai ki toku nei ingoa e kua anoano kia riro ratou ei aronga tapu naku, e me ka rave ratou i toku anoano ma te akono i taku au akaueanga no runga ia ratou, kia akaputuputu ratou ia ratou ki te ngai okotai ki tetai ngai taku ka iki no ratou na roto i taku tavini ko Iosepha, e kia akatu i tetai au oire ki toku nei ingoa, kia teateamamao oki ratou no te au mea e vai nei i te tuatau e tae mai ei.
3 Kia akatu ratou i tetai oire ki toku nei ingoa ki runga i te enua i tetai tua mai o te oire ko Nauvoo, e kia topaia te ingoa o Zarahemela ki runga iaia.
4 E ko te aronga pouroa te ka aere mai no te itinga, e te opunga, e te apatonga, e te apatokerau, tei anoano kia noo ki roto, kia noo oki ratou ki reira ei ipukarea no ratou, e pera katoa ki te oire ko Nashville, e me kore ra ki te oire ko Nauvoo, e ki roto i te au titi ravarai taku i iki, te tuatua maira te Atu.