1 I na, te tuatua maira te Atu, to kotou Atua kia kotou, e te au ereta o taku nei akonoanga, e ariu mai e e akarongo, ma te ariki mai i toku anoano no runga ia kotou.

2 E tika tikai taku e karanga atu kia kotou, te anoano nei au kia autu kotou ki rungaʼo i te ao nei; e no reira, ka aroa au ia kotou.

3 Te vai ra tetai aronga i rotopu ia kotou e kua ara; i na ra, tika tikai taku e karanga atu, ko teia atianga anake, no toku ïa kakā, e no te akaoraanga o te au vaerua, kua akakore oki au i ta kotou au ara.

4 Ka aroa au ia kotou, no te mea kua oronga atu au i te basileia kia kotou.

5 E kare oki te au taviri o te au mea muna o te basileia e apaina ke ia mei taku tavini ko Iosepha Timeti, Tamaiti, na roto i te ravenga taku i akataka, iaia e ora nei, mei te mea e ka akono aia i taku au angaanga oroa tapu.

6 Te vai ra oki tetai aronga tei kimi i tetai au akakoroanga ei patoi atu iaia ma te kore e tumu tikai;

7 Kareka ra, e kua ara aia; i na ra, tika tikai taku e karanga atu kia kotou, ka akakore au, ko te Atu, i te ara a te aronga tei aaki mai i ta ratou ara ki mua iaku e tei pati mai no tetai akakoreanga, tei kore oki i ara ki te mate.

8 E taku au pipi, i te au rā i taito, kua kimi ratou i tetai au mea ei patoi atu tetai ki tetai e kare oki i akakore atu tetai ki tetai i roto i to ratou ngakau; e no teia tu kino nei, kua mamae ratou e kua takamuraia ma te mamae tikai.

9 No reira, te karanga atu nei au kia kotou, ko te tikaanga tikai, ka akakore kotou tetai ki tetai; ko tei kore i akakore i te ara a tona taeake, ka tu aia ma te akaapaia i mua i te Atu; tei roto oki iaia te ara maata.

10 Ka akakore au, ko te Atu, i taku i manako e ka akakore au, i na ra, ko kotou, ka anoanoia kotou kia akakore i te ara a te au tangata katoatoa.

11 E tau kia karanga kotou i roto i to kotou au ngakau e—na te Atua e akava mai i rotopu iaku e koe katoa, e tutaki mai ia koe kia tau i taau i rave.

12 E ko tei kore i tataraara i tana au ara, e tei kore katoa i aaki atu, ka apainaia mai aia ki mua i te akonoanga e ka raveia atu kiaia mei ta te irava tapu i akakite mai kia kotou, na roto i te akaueanga, me kore ra na roto i te eeuanga.

13 E ka rave kotou i teia kia akakakāia oki te Atua—Kare no te mea e kare kotou e akakore mai, e kare o kotou aroa, e i na ra, kia tika oki kotou i roto i te mata o te ture, kia kore oki kotou e akaapa atu i tei oronga mai i te ture—

14 Tika tikai taku e karanga atu, no teia tumu nei ka rave ei kotou i teia au mea nei.

15 I na, kua riri au, ko te Atu, ki taku tavini ko Ezra Booth, e pera katoa ki taku tavini ko Isaac Morley, no te mea kare oki raua i akono i te ture, e pera katoa i te akaueanga.

16 Kua kimi raua i te kino i roto i to raua uaorai ngakau, e kua tapū oki au, ko te Atu, i toku Vaerua. Kua akaapa oki raua i te mea e kare takiri e kino o roto; kareka ra kua akakore au i taku tavini ia Isaac Morley.

17 E pera katoa ki taku tavini ko Edward Partridge, i na, kua ara aia, e te kimi nei a Satani i te takore i tona vaerua; i na ra, ki te akakiteangaia o teia au mea nei kia ratou, e kia tataraara ratou i te kino, ka akakoreia mai oki ta ratou.

18 E teianei, tika tikai taku e karanga atu, kua tau rava i roto iaku kia oki atu taku tavini a Sidney Gilbert i tetai nga epetoma i muri mai ki tana angaanga, e ki tana ngai angaanga i te enua ko Ziona;

19 E ko tana i kite ana e tana katoa i akarongo, ka akakite atea ia mai te reira ki taku au pipi, kia kore oki ratou e mate. E no teia tumu nei i tuatua atu ei au i teia au mea nei.

20 E pera katoa, te karanga akaou atu nei au kia kotou, kia kore taku tavini a Isaac Morley e timataia i rungaʼo i tana ka rauka i te apai, e ma te akaapa pikikaa ei kino noou, kua oronga atu au i tetai akaueanga kia okoia atu tana pāma tanu kai.

21 E kare oki e tika iaku kia oko atu a Frederick G. Williams i tana pāma tanu kai, no te mea ka anoano au, ko te Atu, kia vai rai tetai punanga ketaketa ki runga i te enua ko Kirtland, mei te rima mataiti te roa, e kare oki au e akaorureau i te aronga kino i roto i taua taime, kia akapera au i te akaora rai i tetai pae.

22 E i muri ake i taua rā ra, kare au, ko te Atu, e tapā akaou i tetai tarevakē te ka aere mai ma te ngakau maoraora ki te enua ko Ziona; no te mea te inangaro nei au i te ngakau o te tamariki a te tangata nei.

23 I na, kua karangaia oki i teia rā nei e tae ua atu ki te aereanga mai o te Tamaiti a te Tangata, e tika tikai, e rā te reira no te akaatinga, e te rā no te akatuanga ngauru anga i toku iti tangata; e koia oki tei tuanga ngauru ia ra, kare aia e tungiaia ki te aʼi me tae ki tona okianga mai.

24 E i muri ake i teia rā nei, ka tae mai te muraanga—te tuatua atu nei i teia kia tau ki ta te Atu—tika tikai taku e karanga atu, apopo ko te aronga ngakau parau ravarai e te aronga katoa i rave i te kino ra, e riro ïa ei teita, e ka tutungi oki au ia ratou ki te aʼi, ko au oki te Atu Sabaota; e kare oki au e akatoe i tetai i roto ia Babulonia nei.

25 No reira, me irinaki mai kotou iaku, ka angaanga i reira kotou koia i rā ei.

26 E kare oki e tau i taku nga tavini ko Newel K. Whitney e Sidney Gilbert kia oko i to raua toa e ta raua au apinga i konei; kare oki teia i te mea meitaki, kia aere roa te toenga o te akonoanga, tei noo ki teia ngai nei, ki runga i te enua ko Ziona.

27 I na, kua karangaia i roto i taku au ture e, me kore ra kua araiia, auraka kotou e kaiou atu ki to kotou au enemi;

28 E i na, kare oki i karangaia i tetai uatu taime e auraka te Atu e rave i tei tau iaia, e ma te tutaki atu i tei tau iaia.

29 No reira, e au mata kotou, e aronga rave angaanga na te Atu; e noatu eaa ta kotou ka rave kia tau ki te anoano o te Atu, e angaanga ïa na te Atu.

30 E kua tuku mai oki aia ia kotou ei tauturu i tona aronga tapu i teia au rā openga nei, kia rauka oki ia ratou tetai ipukarea i runga i te enua ko Ziona.

31 E i na, te akakite atu nei au, ko te Atu, kia kotou, e tika oki taku au tuatua e kare e ngaro, ka rauka oki ia ratou te reira.

32 I na ra, ka tae mai te au mea katoatoa i to ratou tuatau e tikaʼi.

33 No reira, auraka e taitaia me te rave meitaki ra kotou, te akamou ra oki kotou i te tango o tetai angaanga maata tikai. E ka rauka mai oki no roto i te au mea rikiriki te mea mamaata.

34 I na, te anoano mai nei oki te Atu i te ngakau e te manako inangaro tikai; e ko tei inangaro tikai ma te kauraro i te meitaki ka kai i te meitaki o te enua ko Ziona i teia au rā openga nei.

35 E ka tipu ke ia oki tei marokiakia mei te enua ko Ziona, e ka tuaruia, e kare oki e riro ia ratou te enua.

36 E, tika tikai taku e karanga atu e kare te aronga marokiakia e no te toto o Epharaima, e no reira ka koitiia ratou ki vao.

37 I na, kua akariro oki au, ko te Atu, i taku akonoanga i teia au rā openga nei mei tetai akavanui te tu i te nooanga ki runga i tetai tuaivi, me kore ra ki runga i tetai ngai teitei, no te akavaanga mai i te au basileia.

38 E ka tae akera e na te au tangata o Ziona e akava i te au mea katoatoa tei tau ki Ziona.

39 E ko te aronga pikikaa e te tapepe pikikaa ka kiteaia mai rai ratou, e ko tei kore oki i te au aposetolo e te au peroveta ka kiteaia mai rai.

40 E pera katoa ki te episekopo, tei riro ei akava, e tona nga konitara katoa, me kare ratou i tu akarongo tikai i roto i ta ratou au angaanga, ka akaapaia ratou, e ka tukuia atu tetai ei mono i to ratou ngai.

41 E, i na, te karanga atu nei au kia kotou e ka tupu ruperupe a Ziona, e ka vai te kakā o te Atu ki rungaʼo iaia;

42 E ka riro oki aia ei reva ki te au tangata, e i reira ka aere mai ei kiaia mei roto i te au iti tangata ravarai i raro ake i te rangi nei.

43 E ka tae mai te rā e ruketekete ei te au basileia o te ao nei nona, e ka mataku oki tona au tangata. Na te Atu i tuatua mai i teia. Amene.