1 Te tuatua maira te Atu, to kotou Atua, koia a Iesu Mesia, ko Te Vai Nei Au Maata, ko au te Alepha e te Omega, te momua e te akaopenga, koia rai tei akara mai ki te au ngai atea o te mutukore, e te au urupu seraphi katoa o te rangi, i mua ake ka angaiaʼi te ao nei;

2 Koia rai tei kite i te au mea katoatoa, no te mea te vai nei rai te au mea katoatoa ki mua i toku mata;

3 Ko au rai teia tei tuatua, e kua angaia te ao nei, e noku oki i rauka mai ei te au mea katoatoa.

4 E ko au rai oki tei apai ana i te Ziona o Enoka ki toku uaorai umauma; e tika tikai taku e karanga atu nei, e ko ratou ravarai tei irinaki mai ki toku nei ingoa, no te mea ko au oki te Mesia, e na roto i toku uaorai ingoa, e te tu tiamā o te toto ara kore taku i maringi, i pati akatengaʼi au ki mua i te Metua no ratou.

5 E i na, ko te toenga o te aronga kino kua tapeka au ia ratou ki roto i te vivi o te poiri e tae uatu ki te akavaanga o te rā maata, ko te ka tae mai a te openga o te ao nei;

6 E ka akapera au i te tapekaanga i te aronga kino, koia te aronga kare e akarongo mai i toku reo e kua akaketaketa ra i to ratou ngakau, e aue, aue, aue, oki to ratou akavaanga.

7 E i na, tika, tika tikai taku e karanga atu kia kotou, tei runga toku nga mata ia kotou. Tei rotopu au ia kotou e kare ra kotou e kite mai iaku;

8 I na ra, te vaitata mai nei te rā e kite ei kotou iaku, e ka kite kotou e te vai nei au; no te mea kua vaitata kia veveteia te arai o te poiri, e ko tei kore i tamāia, kare aia e ora i taua rā ra.

9 No reira, e tatua i to kotou taukupu ma te teateamamao. I na, no kotou te basileia, e kare oki te au enemi e autu.

10 Tika tikai taku e karanga atu kia kotou, kua mā kotou, i na ra, kare e ko te katoatoa; e kare atu e tangata ke e mataoraʼi au;

11 Kua viivii oki te au kopapa katoatoa nei i mua iaku nei; e kua vai oki te mana o te poiri ki runga i te enua nei, ki rotopu i te tamariki a te tangata nei, i mua i te aroaro o te au urupu o te rangi—

12 Na te reira e tutaraʼi te muteki, e kua mamae pouroa to te mutukore, e te tiaki maira te au angela i te akaueanga maata kia eke mai ki raro kia koikoi i te enua nei, kia akaputuputu i te zizania no te aʼi; e, i na, kua taokotai te enemi.

13 I teianei te akaari atu nei au kia kotou i tetai mea muna, e tupuanga tei roto i te ngai muna, te ka apai mai oki i to kotou takoreangaia i te tuatau ki mua, e kare rava kotou i kite;

14 I na ra, te akakite atu nei au kia kotou i te reira, e kua akameitakiia kotou, kare e no to kotou kino, e kare katoa e no to kotou ngakau irinaki kore; no te mea kua apa tetai pae ia kotou i mua iaku, i na ra, ka aroa ua au i to kotou tu paruparu.

15 No reira, kia maroiroi kotou mei teianei; auraka e mataku, no te mea no kotou te basileia.

16 E no to kotou akaoraanga te oronga atu nei au i tetai akaueanga, kua akarongo oki au i ta kotou au pure, e kua koumuumu mai oki te putaua ki mua iaku, e kua anga au i te aronga apinganui, e noku oki te au kopapa katoatoa, e kare oki au e akono i te tu o te tangata nei.

17 E naku oki i akariro i te enua nei kia apinganui, e i na, ko toku takainga vaevae oki ïa, e no reira, ka tu akaou rai au ki runga i reira.

18 E te o atu nei au e te inangaro nei kia oronga atu kia kotou i tetai apinga nui maata atu, koia oki tetai enua taputou, ei enua tae a vai ua te u e te meli, e auraka e taumaa me aere mai te Atu;

19 E ka oronga atu au i te reira kia kotou ei enua ipukarea no kotou, mei te mea e ka kimi kotou i te reira ma to kotou ngakau katoa.

20 E ko teia taku koreromotu kia kotou, ka riro oki teia enua ei ipukarea no kotou, e ei ipukarea no ta kotou au tamariki e tuatau uatu, ka vai ei te enua nei, e ka rauka akaou mai rai te reira ia kotou i te ao mutukore, e kare e akakore akaou ia.

21 I na ra, tika tikai taku e karanga atu kia kotou, te vaitata mai nei te tuatau kare o kotou ariki e kare katoa o kotou tutara, no te mea e ko au to kotou ariki, e ko au te ka tiaki ia kotou.

22 No reira, e akarongo mai i toku reo ma te aru mai iaku, e ka riro kotou ei aronga au, e kare a kotou ture, mari ra ko taku au ture me aere mai au, e ko au to kotou tuku ture, e na te aa e tapū mai i toku rima?

23 I na ra, tika tikai taku e karanga atu kia kotou, e apii tetai ki tetai kia tau ki te taonga taku i akataka ia kotou;

24 E aroa te au tangata katoatoa i tona au taeake mei ia ratou uaorai, e ma te rave i te tu tiamā e te tapu ki mua iaku.

25 E te karanga akaou atu nei au kia kotou, e aroa te au tangata katoatoa i tona taeake mei ia ratou uaorai.

26 Koai ïa tangata i rotopu ia kotou na, e tai ngauru ma rua ana tamaroa, e kare oki aia e akono ia ratou, e te kauraro nei oki ratou kiaia ma te tika tikai, e kua karanga atura aia ki tetai: E kakauia koe ki te kakau pu e ka noo mai ki konei; e ki tetai atu: E kakau i te kakau veruveru e ka noo atu ki ko—e akara iora ki tana au tamaroa ma te na ko atu e e tika au?

27 I na, kua oronga atu au i teia ei parabole kia kotou, e mei te reira rai au. Te karanga atu nei au kia kotou, kia okotai; e me kare kotou e okotai, kare kotou e naku.

28 E te karanga akaou atu nei au, te kimi ra te enemi i te ngai muna i te tā ia kotou.

29 Te rongo nei kotou i te au tamaki i te ngai mamao, e te karanga nei oki kotou e ka tupu mai te tamakianga mamaata i te au enua mamao, i na ra, kare oki kotou e kite i te manako o te au tangata i roto i to kotou uaorai enua.

30 Te akakite atu nei au i teia au mea nei kia kotou no ta kotou au pure; e no reira, e akaputuputu i te pakari ki roto i to kotou umauma, ko te eeuia mai aea e te kino o teia au tangata te au mea kino na roto i to ratou tu kino, e na roto i tetai ravenga te ka tuatua mai ki roto i to kotou au taringa ma te reo maata atu i to te ngaruerue enua; i na ra, me kua teateamamao kotou kare kotou e mataku.

31 E no te akakoroanga kia ora mai kotou mei te mana o te enemi, e kia akaputuputuia mai kotou ei au tangata tuatua-tika kiaku, kare rava e topata e te akaapaanga—

32 No reira, no teia tumu nei i oronga atu ei au i te akaueanga kia aere kotou ki te Ohio; e i reira au e oronga atu ei kia kotou i taku ture; ei reira oki kotou e orongaia mai ei te mana no runga mai;

33 E mei reira, noatu e koai taku e anoano, ka aere ratou ki rotopu i te au pa enua katoa, e ka akakiteia ta ratou ka rave; no te mea e angaanga maata taku e vai nei, e ka akaoraia a Iseraela, e naku e arataki ia ratou ki te ngai tei anoanoia e au, e kare e mana ke atu e tapū i toku rima.

34 I teianei, te oronga atu nei au ki te akonoanga i roto i teia au tuanga nei i tetai akaueanga, e ka ikiia oki tetai au tangata i rotopu ia ratou, e na te reo o te akonoanga e iki ia ratou;

35 E ka akara atu ratou ki tei putaua e tei ngere, e ma te tauturu atu ia ratou kia kore ratou e mamae akaou; e ma te tono atu ia ratou ki te ngai taku i akaue atu ia ratou;

36 E ko teia oki ta ratou angaanga, kia akaaere i te au angaanga no runga i te au tuanga apinga o te akonoanga.

37 E ko te aronga e au pāma ta ratou e kare e rauka kia okonaia atu, e akaruke ua ratou, me kore ra e tarau atu i te reira mei tei tau ia ratou.

38 E akara kia akonoia ra te au mea katoatoa; e me kakauia te tangata nei e te mana no runga mai e kia tonoia atu, ka akaputuputuia mai teia au mea katoatoa ki raro ake i te akaaereanga o te akonoanga.

39 E me kimi kotou i te apinga nui koia oki ta te Metua i anoano kia oronga mai kia kotou, ka riro e ko kotou te au tangata apinganui rava atu i te au tangata ravarai, no te mea ka rauka ia kotou te apinganui o te mutukore; e ko te apinganui o te enua nei naku te reira e oronga atu; kia matakite ra i te ngakau parau, ko te aite aea kotou ki te ngati Niphai i taito.

40 E te karanga akaou atu nei au kia kotou, te oronga atu nei au i tetai akaueanga kia kotou, te au tane katoatoa, te au ereta katoa, te taunga, te puapii, e pera katoa te au mema, e aere aia ma tona maroiroi, ki te angaanga a tona nga rima, kia akateateamamao ma te rave i te au mea taku i akaue atu.

41 E kia riro ta kotou akoanga ei reo akamatakiteanga, koia oki ko te au tangata katoatoa ki tona tangata tupu, na roto i te maru e te akaaka.

42 E akaatea ia kotou ki vao mei rotopu atu i te aronga kino. E akaora ia kotou uaorai. Kia mā kotou, e tei apai i te au ariki a te Atu. Koia ïa. Amene.