E Nga Koikoianga Teia No Roto Mai I Te Puka A Mose

1 Te au tuatua a te Atua, tana i tuatua atu kia Mose i te taime i apaiia atu ei a Mose ki runga i tetai maunga teitei rava,

2 E kua kite akera aia i te Atua te mata e te mata, e kua tuatua iora aia kiaia, e tei rungaʼo te kakā o te Atua ia Mose; no reira i raukaʼi ia Mose kia tu ki mua i tona aroaro.

3 Kua tuatua maira te Atua kia Mose, na ko maira: I na, ko au te Atu ra ko te Atua Mana Katoatoa, e Openga Kore toku ingoa; kare oku akamataanga au rā, me kore ra opengaanga mataiti; e kare aina teia i te openga kore?

4 E, i na, e tamaiti koe naku; no reira e akara, ka akaari au kia koe i te angaanga a toku maikao rima; kare ra e ko te katoatoa, kare e opengaanga o taku nei angaanga pera katoa taku nei tuatua, kare rava e akamutu.

5 No reira, kare rava e tangata e kite i taku au angaanga katoatoa, mari ra kia kite rava aia i toku kakā; e kare rava oki e tangata e kite pouroa i toku kakā, e muri akera ka noo ei kopapa ki te enua nei.

6 E angaanga oki taku naau, e taku tamaiti e Mose, e tutu tikai oki koe no taku Tama Anau Tai; e ko taku Tama Anau Tai, koia oki e ka riro te Akaora, kua kī oki aia i te aroa ua e te tuatua-mou; i na ra, kare atu e Atua iaku nei, tei mua katoatoa te au mea iaku, kua kite pouroa au i te reira.

7 E teianei, i na, ko teia mea okotai taku ka akaari atu kia koe, taku tamaiti e Mose, no te mea tei roto oki koe i teianei ao, e ka akaari atu au kia koe.

8 E i na, kua akara akera a Mose, e kite atura aia i te ao i angaiaʼi aia; e akara atura a Mose i te ao e tona openga, e te au tamariki katoatoa a te tangata nei e angaia nei, e tei angaia ra; no reira kua maata rava tona umere e te vavaria.

9 Kua akaatea iora te aroaro o te Atua mei ia Mose, E kare atura tona kakā i rungaʼo ia Mose; e kua akaruke ua ia mai a Mose koia anake. E iaia e noo ua ra, kua topa iora aia ki rungaʼo i te one.

10 E manganui akera te au ora i topa ki muri, i rauka akaou mai ei ia Mose tona tu maroiroi tangata; e kua na ko iora aia kiaia anake: E teianei, ko toku kiteanga teia e e puapinga kore ua rai te tangata, mei tei kore rava au i manakonako ana.

11 I na ra, kua kite ake nei toku nga mata i te Atua; auraka toku mata kopapa, mari ra toku nga mata vaerua, kare oki e rauka i toku mata kopapa kia kite; ka mae oki au e ka mate ki mua i tona aroaro, i na ra, kua noo rai tona kakā ki runga iaku; e kua kite rai au i tona mata, no te mea kua akatukeia au ki mua iaia.

12 E i na, i muri ake i to Mose tuatuaanga i teia au tuatua, e i na, kua aere maira a Satani i te timata iaia, na ko maira: E te tamaiti a te tangata nei e Mose, e akamori mai koe iaku.

13 E, kua akara akera a Mose ia Satani, na ko atura; Koai koe? E akara mai koe, ko au te tamaiti a te Atua, i te tutu o tana Tama Anau Tai; e teiea toou kakā kia akamori atu ei au ia koe?

14 E i na, kare e rauka iaku te akara ki te Atua, mari ua kia noo mai tona kakā ki runga iaku, e kia akatukeia au ki mua iaia. I na ra, te rauka nei iaku kia akara atu ki runga ia koe i te kopapa ua nei. Me kare ainei e papu meitaki tera?

15 Kia akameitakiia te ingoa o taku Atua, no tei kore tona Vaerua katoatoa i akaruke takiri mai iaku, tera tetai, teiea toou kakā, e poiri oki ïa kiaku? Te rauka nei iaku i te kite i rotopu ia koe e te Atua; kua tuatua mai te Atua kiaku: E akamori i te Atua, koia anake taau e kauraro.

16 E aere ke atu koe e Satani auraka e pikikaa mai iaku; kua na ko mai te Atua kiaku: Ko koe tikai te tutu o taku Tama Anau Tai.

17 E pera katoa kua oronga mai aia i te au akaueanga kiaku, i tona kapikianga mai iaku i roto i te pu ngangaere e kā ra i te aʼi, na ko maira: E kapiki atu ki te Atua na roto i te ingoa o taku Tama Anau Tai, e akamori mai iaku.

18 Kua tuatua akaou atura a Mose: Kare rava au e akamutu i te kapiki i te Atua, e au apinga ke atu rai tetai taku ka ui kiaia: i noo ana tona kakā ki rungaʼo iaku, no reira i raukaʼi iaku te akava i rotopu iaia e ia koe. Aere ke atu koe e Satani.

19 E teianei, i to Mose tuatuaanga atu i teia au tuatua, kua kapiki uatu a Satani ma te reo maata, e te riri ki runga i te enua, e kua akaue atu, i te na ko anga e: Ko au te Tama Anau Tai, e akamori mai iaku.

20 E, kua akamata akera a Mose i te mataku maata; e i tona matakutakuanga, kite akera aia i te kavangu o ade. Kareka ra, i te kapikianga aia i te Atua, rauka iora tona maroiroi, akaue atura aia, na ko atura: E akaatea atu koe e Satani mei iaku nei, ko te Atua anake taku ka akamori, koia te Atua o te kakā.

21 E teianei kua akamata a Satani i te ruketekete, e kua ngaue katoa te enua; rauka iora to Mose maroiroi, kua kapiki aia i te Atua, na ko atura; Na roto i te ingoa o te Tama Anau Tai, aere ke atu e Satani.

22 E i na, kua kapiki atu a Satani ma te reo maata, ma te aue, e te eva kaku, ma te pakatianga i tona nio; takake atura mei mua i te aroaro o Mose, kare atura aia i kitea akaou iaia.

23 E no teia tei tupu, kua riro a Mose ei kite tata i te reira; I na ra, no te tuatua-tika kore, kare ïa i kiteaia i rotopu i te tamariki a te tangata nei.

24 E i na, i muri ake i to Satani takakeanga mei mua i te aroaro o Mose, kua nana akera Mose i tona mata ki runga i te rangi, kī iora aia i te Vaerua Tapu, ko tei akakite i te Metua e te Tamaiti;

25 E tona kapikianga i te ingoa o te Atua, kite akaou akera aia i tona kakā, tei runga akaou iaia; e akarongo iora aia i tetai reo, i te na ko anga mai e: Kia akameitakiia koe e Mose, kua iki oki au, tei Mana Katoatoa, ia koe, e ka akamaroiroiia koe mei te au vai e manganui; ka kauraro ratou i taau akaueanga mei te mea ra e ko koe te Atua.

26 E i na, ei vaitata au ia koe, e tae uatu ki te openga o toou au ra; naau oki e akaora i toku iti tangata mei roto i te tuikaa, koia a Iseraela taku i iki.

27 E i na, te tuatua ua ra te reo, kua nana akera Mose i tona mata e kite atura i te enua nei, ae, te katoatoa; kare rava tetai iti ake tei kore aia i kite; i te akaraanga na roto i te vaerua o te Atua.

28 E kite atura aia i te aronga e noo ra ki rungaʼo, e kare rava tetai kopapa tei kore i kiteaia e ïa; kua akara aia ia ratou i te Vaerua o te Atua; e to ratou tatauanga e manganui, kua aite te reira ki te one i taatai.

29 Kua kite aia i te au enua e manganui; e kua karangaia te au enua tatakitai e one, e au tangata tei rungaʼo i te reira.

30 E i na kua kapiki iora a Mose i te Atua na ko atura: Te pati nei au kia koe, kia akakite mai koe kiaku, eaa teia au mea i peraʼi? i akapeea koe i toou anga anga ia ratou?

31 E i na, tei runga maira te kakā o te Atua ia Mose, e raukaʼi ia Mose kia tu ki mua i te aroaro o te Atua, i te tuatuaanga te mata e te mata. E kua tuatua maira te Atu ra ko te Atua kia Mose: I toku uaorai akakoroanga i rave ei au i teianei au mea. Teia te pakari tei aku uaorai te reira.

32 E na roto i te tuatua o toku mana, toku anga anga ia ratou, koia oki taku Tamaiti Anau Tai, tei kī i te aroa ua e te tuatua-mou.

33 E kua anga au i te ao nei kare e rauka i te tatau; e pera katoa kua anga au ia ratou no toku uaorai akakoroanga; e no te Tamaiti i angaʼi au ia ratou koia oki taku Tama Anau Tai.

34 E te tangata mua o te au tangata ravarai kua tapa au e ko Adamu, koia oki e manganui.

35 I na ra, ko tetai tua ua o teia enua, e te aronga e noo i rungaʼo, taku ïa e akakite atu kia koe. I na, e manganui te au ao tei topa ki muri i te tuatua a toku mana. E i na, e manganui oki te tu nei, e mea numero kore ia e te tangata; i na ra, iaku kua kite pouroa au i te reira, naku oki ratou e kua kite au ia ratou.

36 E i na kua tuatua atu a Mose ki te Atu, na ko atura: E te Atua e, e aroa mai koe i to tavini nei, e akakite mai koe kiaku, i teia enua e te aronga e noo nei ki runga, e pera katoa te au rangi, ei reira to tavini e maru ei.

37 E kua tuatua maira te Atu ra ko te Atua kia Mose na ko maira: E manganui te au rangi, kare e rauka i te tatauia e te tangata; ka rauka ra iaku i te tatau, no te mea naku oki ratou.

38 E mei tetai enua e takake atu, e te au rangi ona ra, ka aere katoa mai tetai; kare e openga o taku au angaanga, pera katoa taku tuatua.

39 E i na, teia taku angaanga e toku kakā—kia apai mai i te kopapa mate kore e te ora mutukore o te tangata.

40 E teianei, e taku tamaiti e Mose, ka tuatua au kia koe no runga i teia enua taau e tu nei; e tata koe i te au mea taku ka tuatua atu.

41 E kia tae ki te rā e akariro ei te tamariki a te tangata nei i taku tuatua ei mea puapinga kore, e kua rave ke i te manganuianga o te reira mei roto i te puka taau ka tata, i na, Ka akatu mai au i tetai mei ia koe rai te tu; e ka rauka akaou mai rai ïa ki rotopu i te tamariki a te tangata nei—ki rotopu ia ratou ravarai te ka akarongo.

42 (Kua tuatuaia teia au tuatua kia Mose i runga i te maunga, e ko te ingoa kare rava e tangata e kite i te reira i roto i te tamariki a te tangata nei. E teianei, te tuatuaia mai nei kia koe. Auraka kia akaariia atu ki tetai, mari ua kia ratou tei akarongo. Koia ïa. Amene.)