1 E oti roa akera te rangi, e te enua, e te au mea ravarai o ratou.

2 E tae akera ki te itu o te rā, kua akaoti akera au, ko te Atua, i taku angaanga e te au mea katoatoa taku i anga ra; e kua akangaroi akera au i te itu o te rā, mei te au angaanga tei raveia e au, e kua oti te au mea tei angaia e au, e kua kite akera au, ko te Atua, i te reira te meitaki ra;

3 E kua akameitaki iora au, ko te Atua, i te rā itu, e akatapu atura i te reira; no te mea, ko te rā te reira i akangaroi ei au, mei te au angaanga katoatoa tei raveia e au, ko te Atua ra.

4 E teianei, i na, te karanga atu nei au kia koe, ko teia te au uki o te rangi e to te enua, i to ratou angaia anga, i te rā i angaʼi au, te Atu ra ko te Atua, i te rangi e te enua,

5 E te au rakau tatakitai o te kainga nei, i mua ake ka tanuia ai ki roto i te one, e te au ngangaere o te kainga i mua ake ka tupu ei. E kua anga oki au, te Atu ra ko te Atua, i te au mea katoa taku e tuatua ake nei, i te vaerua, i mua ake ka riro mai ei ei kopapa ki runga i te aro o te enua. E kare oki au, ko te Atu ra ko te Atua i akatopa mai i te ua ki runga i te aro o te enua. E naku oki, na te Atu ra ko te Atua, i anga i te au tamariki a te tangata; kare oki e tangata ei tanu i te one; i te rangi oki au i angaʼi ia ratou; kare ake rai e kopapa kiko i te enua nei i reira, kare oki i roto i te vai, kare oki o te reva;

6 I na ra, kua tuatua iora au, te Atu ra ko te Atua, kua pupu maira te kou no roto i te enua e akamauu katoatoa ia iora te enua.

7 E kua anga iora au, te Atu ra ko te Atua, i te tangata, mei roto mai i te one pueu o te enua, e kua akaea iora aia i te aʼo ora ki roto i tona putāngio; e kua riro akera te tangata ei tangata ora, ko te kopapa kiko mua teia ki runga i te ao nei, e ko te tangata mua katoa; kareka ra, kua angaia teia au mea nei i mua ake, e kua angaia ratou i roto i te tu vaerua kia tau ki taku tuatua.

8 E kua tanu akera au, te Atu ra ko te Atua, i te kainga i te pae i te itinga o te rā i Edene ra, e kua tuku iora au i te tangata i taku i anga ra ki reira.

9 E no roto mai i te one kua akatupu oki au, ko te Atu ra ko te Atua, i te au rakau taurekareka katoa ki te akaraanga a te mata tangata; e kua kite oki te tangata i te reira. E kua riro mai oki ei kopapa ora. E vaerua oki i te taime i angaiaʼi e au; e ka noo rai ki te oraanga i angaʼi au, ko te Atua, ia ratou, ae, kua teateamamao au i teia au mea katoatoa ei kai na te tangata; e kua akara iora te tangata i te reira kua meitaki ei kai. E kua tanu akera au, te Atu ra ko te Atua, i te rakau o te ora i rotopu rai i taua kainga ra, e te rakau katoa e kite ei i te meitaki e te kino.

10 E kua akaaere akera au, te Atu ra ko te Atua, i tetai vai kia tae mai mei roto mai i Edene, ei akamauu i taua kainga ra; e mei reira atura te mangaanga, e ā atura manga.

11 E kua tapa iora au, te Atu ra ko te Atua, i te ingoa o te mea mua ko Pisona, ko tei akapini i te enua katoa o Havila, e auro maata to reira taku, ta te Atu ra ko te Atua, i anga;

12 E auro meitaki to te reira enua, e poe oki to reira, e te toka sema.

13 E te ingoa o te rua o te vai ko Gihona ïa; ko tei akapini i te enua katoa o Etiopia.

14 E te ingoa o te toru o te vai ko Tigeriti ïa ko tei tae tika ki te pae i te itinga o te rā i Asura ra. E te ā o te vai ko Eupharati ïa.

15 E kua rave iora au, te Atu ra ko te Atua, i te tangata, tuku iora iaia ki roto i te Kainga i Edene ra, ei tanu e ei tiaki.

16 E kua tuatua atura au, te Atu ra ko te Atua, ki te tangata na ko atura: E kai ua koe i to te au rakau katoa o te kainga nei,

17 Kareka i to te rakau e kite ei i te meitaki e te kino, auraka koe e kai i te reira; kareka ra, naau rai e iki, kua orongaia mai kia koe, e akamaara ra, kua arai au, i te rā e kai ei koe i to reira, ka mate tikai koe.

18 E kua tuatua iora au, te Atu ra ko te Atua, ki taku Tama Anau Tai, kare ïa e meitaki kia noo ua te tangata koia anake ra; no reira, e anga au i tetai tauturu tau nona ra.

19 E mei roto mai i te one, kua anga au, te Atu ra ko te Atua, i te au manu vaevae ā katoatoa o te enua nei, e te au manu katoa o te reva; e kua akaue atu kia ratou kia aere atu kia Adamu ra, kia kitea tana ingoa e tapa no ratou; e au kopapa ora katoa oki ratou; e kua akaea atu oki au ko te Atua i te aʼo ora ki roto ia ratou, e kua akaue atu e ko ta Adamu ingoa ka tapa i taua au mea ora katoa ra, ko to ratou ingoa rai te reira.

20 E kua tapa a Adamu i te au ingoa no te au puakatoro katoa, e to te au manu katoa o te reva, e to te au manu vaevae ā katoa o te enua nei; kare roa ra o Adamu tauturu tau i kitea.

21 E kua akatopa iora au, te Atu ra ko te Atua, i te moe tinainai ki runga ia Adamu, moe iora aia, e kua rave iora au i tetai ivi kaokao nona e tuakapi iora i taua ngai ra ki te kiko;

22 E taua ivi kaokao taku, ta te Atu ra ko te Atua, i rave mei te tangata, kua anga iora au ei vaine, e kua arataki maira iaia ki taua tangata ra.

23 E kua karanga iora Adamu: Kua kite au i teianei e ivi teia no toku nei ivi, e kiko oki no toku nei kiko; ka tuatuaia aia e, e Vaine, no te mea no roto aia i te tane i te raukaanga mai.

24 No reira e akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai.

25 Te vai taaka ua ra raua katoa, ko te tane e te vaine, kare ra raua i akama.