1 E te au rā katoa o Enoka i te oraanga, e ā ïa anere e toru ngauru mataiti.

2 E i na, kare a Metusela, te tamaiti a Enoka, i apaiia, kia tupu ei te koreromotu ta te Atu i papau kia Enoka; kua koreromotu tikai aia kia Enoka e ko Noa e uanga tikai aia no roto i tona kopu.

3 E i na, kua totou akera a Metusela, e na roto mai i tona uanga e tupu mai ei te au basileia o te ao nei (na roto ia Noa) e kua akakakā iora iaia uaorai.

4 Kua tae maira te onge ki runga i te enua, e kua taumaa iora te Atu i te enua i tetai taumaa kino, e manganui akera te aronga e noo i te enua tei mate.

5 E i na, kua noo akera a Metusela e okotai anere e varu ngauru e itu ara mataiti i te oraanga, anau akera tana ko Lameka;

6 E noo iora a Metusela i muri ake i tona anauanga ia Lameka ra, e itu akera anere e varu ngauru e rua ara mataiti, e anau akera oki te au tamariki tamaroa e te au tamariki tamaine;

7 E to Metusela au rā katoa, e iva ïa anere e ono ngauru e iva ara te mataiti, e mate iora aia.

8 E okotai akera anere e varu ngauru e rua ara to Lameka mataiti i te oraanga, anau akera tana e tamaiti,

9 E tapa iora aia i tona ingoa ko Noa, na ko akera: Ka riro teia nei tamaiti ei akapumaana ia tatou i te raveanga i ta tatou angaanga, i te kenuanga a to tatou rima, no te mea, kua taumaaia te enua e te Atu.

10 E noo iora a Lameka i muri ake i tona anauanga ia Noa ra, e rima akera anere e iva ngauru e rima ara te mataiti, e anau akera i te au tamariki tamaroa e te au tamariki tamaine;

11 E to Lameka au rā katoa, e itu ïa anere e itu ngauru e itu ara te mataiti, e mate iora aia.

12 E ā anere e rima ngauru o Noa mataiti, anau akera tana ko Iapheta; e ā ngauru mataiti i muri ake, kua anau mai ia Sema i tona mama koia te metua vaine o Iapheta, e kia tae akera tona mataiti ki te rima anere i te pakari, anau akera tana ko Hama.

13 E kua akarongo akera a Noa e tana au tamaroa i te tuatua a te Atu, e kua ariki meitaki, e kua tuatuaia akera ratou e e tamariki na te Atua.

14 Kia manganui rava akera te tangata ki runga i te enua nei, e ta ratou au tamaine i te anauanga, kua akara mai te au tamariki tamaroa a te Atua ra i teia au tamariki tamaine nei i te purotu ra, e kua rave ake tetai i tana e tana ei vaine na ratou.

15 E kua tuatua maira te Atu kia Noa: Kua oko te au tamaine a taau au tamariki tamaroa ia ratou uaorai; e no te reira kua riri au ki te au tamariki a te tangata, no tei kore ratou i akarongo mai ki toku reo.

16 E i na, kua totou iora a Noa, e kua apii i te au mea a te Atua, mei tei muatanga na ra.

17 E kua na ko maira te Atu kia Noa: Kare rava toku Vaerua e noo tamou ki te tangata, ka kite oki aia e ka mate pouroa te au kopapa; noatu oki e e tai anere e rua ngauru tona mataiti; e me kore te tangata e tataraara, ka tono mai au i te vai diluvi ki rungaʼo ia ratou.

18 E i taua au rā ra, te noo ra te au tuputupua i runga i te enua, e kua kimi iora ratou ia Noa kia tamate; i na ra, tei ia Noa te Atu, e tei runga te mana o te Atu ia Noa.

19 E kua akataonga iora te Atu ia Noa ki tona rai akanooanga, e akaue atura iaia kia aere kia tutu i tana Evangelia ki te tamariki a te tangata, mei tei orongaia kia Enoka.

20 E i na, kua kapiki iora a Noa ki te tamariki a te tangata kia tataraara ratou; kare ra ratou i akarongo mai ki tana au tuatua;

21 E pera katoa, i muri ake i to ratou rongo anga iaia, kua aere mai ratou ki mua iaia, kua na ko maira: I na, e au tamariki tamaroa matou na te Atua; kare aina matou i apai i te tamaine a te tangata na matou uaorai? Kare ainei matou e kaikai ana, e inu ana, e akaipoipo ana, e oronga ana kia akaipoipoia? E te anau nei ta matou vaine i te tamariki na matou, e au tangata maroiroi ratou, mei te tu rai o te au tangata o te tuatau taito, e au tangata rongonui ratou. E kare ratou i akarongo mai ki te au tuatua a Noa.

22 E kite akera te Atua i te kino maata o te tangata i te enua nei; kua riro ke te au tangata i te tu viivii o te manako i roto i to ratou ngakau, e mea kikino ua ana rai ïa.

23 E i na, kua rave tamou atu rai a Noa i tana akoanga i te au tangata, i te na ko anga e: E akarongo mai, e e akono mai i taku au tuatua;

24 E akarongo e e tataraara i ta kotou ara, e kia bapetizoia i roto i te ingoa o Iesu Mesia, te Tamaiti a te Atua, mei to tatou au metua, e ka rauka ia kotou te Vaerua Tapu, ei reira te au mea katoa e akakiteia mai ei; e kia kore kotou e rave i teia, ka tae mai te vai diluvi ki runga ia kotou; kareka ra, kare ratou i akarongo mai.

25 E kua tataraara iora a Noa, i roto i tona ngakau kua mamae tikai, no tei anga te Atu i te tangata ki runga i te enua, e kua ongoongo rava akera tona ngakau.

26 E kua tuatua akera te Atu: E akapou au i te tangata i angaia e au, mei runga i te enua nei, ko te tangata e te manu vaevae ā katoa, e te au mea totoro ra, e te au manu o te reva; kua tataraara iora a Noa, no tei anga ia ratou, naku oki i anga ia ratou, kua kapiki mai oki aia kiaku, e kua kimi iora ratou i tona ora.

27 E kite aroa ia mai oki a Noa i te mata o te Atu; e tangata tuatua-tika a Noa ra, e te apakore i tona uki; e kua aaere a Noa raua ko te Atua, mei te reira rai tana nga tamariki toko toru, ko Sema, Hama, e Iapheta.

28 Kua viivii roa ra te enua i mua i te aroaro o te Atua, e kua kī i te kino.

29 E kua akara iora te Atua i te enua nei, e i na, kua viivii roa, kua viivii te aerenga o te au kopapa ravarai i rungaʼo i te enua.

30 E kua tuatua maira te Atua kia Noa: Kua vaitata roa te openga o te au mea ora katoatoa ra ki mua iaku, kua kī oki te enua i te au tu takinga kino, e i na, ka akapou au i te au kopapa mei te enua nei.