1 E kua tuatua iora au, te Atu ra ko te Atua, kia Mose, i te na ko anga atu e: Ko Satani oki taku i akaue atu na roto i te ingoa o taku Tama Anau Tai, koia rai teia mei te kapuaanga mai, tei aere mai ki mua iaku, i te na ko anga mai e—I na, teia au, e tono iaku, ko au oki taau tamaiti, e naku e akaora i te au tangata ravarai, e kare rava tetai vaerua e ngaro, kua papu tikai e ka rave au i te reira; no reira e oronga mai kiaku i toou ngateitei.

2 E, i na, ko taku Tamaiti Akaperepere, tei Akaperepereia e tei Ikiia mei te kapuaanga, kua tuatua mai kiaku—E taku Metua, kia tupu toou anoano, e kia vai rai te kakā kia koe e tuatau uatu.

3 E no te mea oki e, kua kai tamaki mai a Satani kiaku, e kua kimi i te ravenga kia akakore i te tikaanga iki o te tangata taku, ta te Atu ra ko te Atua, i oronga kiaia, e tera oki tetai, kia oronga atu au i toku mana kiaia; te mana o taku Tama Anau Tai, no reira e tau iaku kia uri atu iaia ki raro;

4 E kua riro mai aia ko Satani, ae, ko te diabolo, te metua o te au pikikaa ravarai, kia akavare e kia ta matapo i te au tangata, e kia arataki tuikaa ia ratou kia tau ki tona manako, ko ratou ravarai te ka kore e akarongo mai i toku reo.

5 E teianei, e pakari maata to te ovi i to te au manu katoa o te enua, i taku, i ta te Atu ra ko te Atua i anga ra.

6 Na Satani oki i tuku ki roto i te ngakau o te ovi; (e manganui oki tei arataki ke ia e ïa) e kua kimi katoa kia akavare ia Eva, kare oki aia i kite i te anoano o te Atua, no reira aia i tautaʼi kia takore i te ao.

7 Kua tuatua maira aia ki te vaine: Koia ïa, kua tuatua mai te Atua e—Auraka korua e kai i to te au rakau katoa o te kainga nei? (I tuatua aia na roto i te vaa o te ovi.)

8 E kua karanga maira te vaine ki taua ovi ra: E kai maua i te ua o te au rakau o te kainga nei;

9 Mari ra o to taua rakau taau e kite ra i rotopu i te kainga nei, kua tuatua mai ïa te Atua e—Auraka korua e kai i to reira, auraka oki korua e arapaki atu, ka mate aea korua.

10 E kua tuatua maira taua ovi ra ki te vaine: Kare rava korua e mate;

11 Kua kite oki te Atua e, i te rā e kai ei korua i to reira, ka puera ïa to korua mata, e ka riro korua mei te au atua ra te tu, i te kite i te meitaki e te kino.

12 E kite akera te vaine, e rakau meitaki ei kai, e te tau rekareka no te mata, e te rakau anoanoia kia pakari aia, kua rave iora aia i te kai no rungaʼo ra, kai iora, apai atura oki ki tana tane, e kua kai katoa iora oki aia.

13 Puera akera to raua mata, kite akera raua e, te vai taaka ua ra raua. E kua tuitui iora raua i te rau suke, ei pareu no raua.

14 Akarongo akera raua i te reo o te Atu ra ko te Atua, ia raua i aaere i roto i te kainga i te maru aiai ra; e kua aere iora a Adamu raua ko tana vaine ei pipini mei mua i te aroaro o te Atu ra o te Atua, i roto i te vao rakau o te kainga ra.

15 Kua kapiki iora au, te Atu ra ko te Atua, kia Adamu, na ko atura kiaia: E aere ra koe kiea?

16 Kua karanga maira aia: Akarongo akera au i to reo i roto i te kainga nei, e mataku akera au, no te mea, kua kite oki au e, ko au i vai taaka ua, kua pipini akenei au.

17 E kua tuatua iora au, te Atu ra ko te Atua, kia Adamu: Naai koe i akakite e, te vai taaka ua ra koe? Kua kai aina koe i to te rakau, taku i karanga atu kia koe e, auraka e kai, me kua rave koe, ka mate tikai koe?

18 E kua karanga maira te tangata: Na te vaine taau i oronga mai naku, e kua akaue mai koe kia noo takiri mai kiaku, nana i oronga mai i te ua o taua rakau kiaku ra, kai iora au.

19 E kua tuatua akera au, te Atu ra ko te Atua, ki te vaine: Eaa teia taau i rave? E kua tuatua maira te vaine: Kua pikikaaia au e te ovi, e kai iora au.

20 E kua tuatua iora au, te Atu ra ko te Atua, ki te ovi: No te mea oki e naau i rave i teia, ka taumaaia koe i rungaʼo i te au puaka o te kainga, e ki rungaʼo i te au manu tatakitai; ei runga koe i toou kopu totoro ei, e one pueu taau kai i te au rā katoa o toou na oraanga;

21 E tuku oki au i te ke i rotopu ia koe e te vaine, i rotopu i taau uanga e tana uanga; nana e akaparuparu i toou mimiti, e naau e akaparuparu i tona poo vaevae.

22 Kua tuatua iora au, te Atu ra ko te Atua, ki te vaine: E akamaata au i toou mamae e te anauanga tamariki. E ka anau mai taau tamariki ma te mamae, e ka kauraro koe ki taau tane, e ei runga ake aia ia koe.

23 E kua tuatua iora au, te Atu ra ko te Atua, kia Adamu: No te mea kua akarongo koe ki te reo o taau vaine na, e kua kai i to te rakau, i taku i karanga atu kia koe, i te na ko anga e—Auraka koe e kai i to reira, kia taumaaia te enua nei noou; e kai koe i to reira ma te aue, e ope rava ake toou puke rā i te oraanga.

24 E ka tupuia ïa e te rakau taratara e te tataramoa, e ka kai koe i te rakau rikiriki o te enua nei.

25 Na roto i te pata ou o toou rae e kai ei koe i taau kai, e oki uatu koe ki raro i te one—no te mea ka mate tikai oki koe—no reira mai oki koe i te ngai i raveia mai ei: e one pueu oki koe, e ka riro akaou rai koe ei one pueu.

26 E kua topa iora Adamu i to tana vaine ra ingoa, ko Eva, no te mea, ko te metua vaine aia no te au tangata ravarai; ko taku oki teia, ta te Atu ra ko te Atua, i kapiki atu i te vaine mua o te au vaine katoatoa, e kua manganui ïa.

27 E kua anga iora au, te Atu ra ko te Atua, i te kakau kiri no Adamu ma tana vaine, e kua akakakau atura ia raua.

28 E kua tuatua iora au, te Atu ra ko te Atua, ki taku Tama Anau Tai: I na, te tangata nei, kua riro aia mei tetai o tatou nei, i te kite i te meitaki e te kino; e tenana, ko te akatika aea aia i tona rima, e rave katoa i te kai i runga i te rakau o te ora ra, kai iora, kia ora aia e tuatau uatu,

29 No reira, kua tuaru atura au, te Atu ra ko te Atua, iaia ki vao i taua kainga ra i Edene ei tanu i te one no reira maira aia;

30 Te ora nei au, te Atu ra ko te Atua, kare toku reo e oki puapinga kore me aere te reira ki vao mei roto atu i toku vaa ka tupu pouroa te reira e tikaʼi.

31 No reira, kua tuaru atu au i te tangata ki vao, e kua akanoo au i te itinga o te kainga i Edene, i te kerubi ma te koke mura i te koraparapa ua anga, ei tiaki i te ara ki te rakau o te ora ra.

32 (Ko teia oki te au reo taku i tuatua atu ki taku tavini kia Mose, e mea tika anake, mei iaku atu nei; e kua tuatua atu au i te reira kia koe. E akara auraka kia akaariia ki tetai uatu tangata; kia akaue roa atu au, mari ua ki te aronga tei irinaki. Amene.)