1 E i na kua tuatua maira te Atu kia Mose, na ko maira: I na, ka eeu atu au kia koe no runga i teia rangi e teia enua; e tata koe i taku ka tuatua atu. Ko au te Momua e te Akaopenga, te Atua Mana Katoatoa; na taku Tama Anau Tai i angaʼi au i teia au mea; ae, i te kapuaanga i angaʼi au i te rangi e te enua taau e tu na.

2 Te vai utunga kore ua ra te enua, kare e marikoanga; e kua akatupu au i te poiri ki rungaʼo i te moana; e kua akakoukou iora toku Vaerua ki rungaʼo i te kiriātai; ko au oki te Atua.

3 Kua tuatua iora au, ko te Atua: Ei mārama; kua mārama iora.

4 E kua akara akera au, ko te Atua, i te mārama; e te meitaki ra te mārama. E kua akataka iora au, ko te Atua, i te mārama e te poiri.

5 E tapa iora au, ko te Atua, i te mārama, e Ao; e tapa iora au i te poiri, e Po; e ko taku oki teia i rave na roto i te tuatua o toku mana, e kua oti rai mei taku i tuatua; e aiai iora e ao akera ko te rā tai ïa.

6 E pera katoa, kua tuatua iora au, ko te Atua: Ei reva i rotopu i te vai, e koia tika atura, mei taku i tuatua; e kua tuatua iora au: Na te reira ei vee i te au vai mei te au vai; e kua oti rai;

7 E kua anga iora oki au, ko te Atua, i taua reva ra e vee atura i te vai, ae, te au vai maata i raro ake i taua reva ra mei te au vai i rungaʼo i taua reva ra, e koia tika atura mei taku i tuatua.

8 E kua tapa iora au, ko te Atua, i te reva, e Rangi; e aiai iora e ao akera, ko te rā rua ïa.

9 E kua tuatua iora au, ko te Atua: Kia uipa te vai i raro ake i te rangi ki te ngai okotai, e koia tika atura; e kua tuatua iora au, ko te Atua: Kia kitea te one marō; e koia tika atura.

10 E kua tapa iora au, ko te Atua, i te one marō e Enua; e taua vai i uipa ra kua tapa iora au, e Tai; e akara akera au, ko te Atua, i te au mea katoatoa tei angaia e au ra te meitaki ra.

11 E kua tuatua iora au, ko te Atua: Kia akatupu mai te enua i te ngangaere, e te rakau rikiriki e ua, e te rakau mamaata e ua ra, ei roto ia ratou uaorai to ratou ua e to ratou tu, ki runga i te enua nei, e koia tika atura mei taku i tuatua.

12 E kua akatupu akera oki te enua i te ngangaere, e te rakau rikiriki ravarai e ua, i to ratou tu e te rakau mamaata e ua, ei roto ia ratou uaorai to ratou ua, i to ratou tu; e akara akera au, ko te Atua, i te au mea katoatoa tei angaia e au ra te meitaki ra;

13 E aiai iora e ao akera, ko te rā toru ïa.

14 E kua tuatua iora au, ko te Atua: Ei turama to roto i te reva i te rangi ra, ei akataka i te ao e te po, e ei akairo oki, e no te au tuatau, e no te au rā, e no te au mataiti;

15 E ei turama to roto i te reva i te rangi ra, ei akamārama i te enua nei; e koia tika atura.

16 E kua anga iora au, ko te Atua, i nga turama mamaata e rua ra; ko te turama maata ra ei tutara i te ao, e te turama iti, ei tutara i te po; e ko te turama maata ra ko te rā ïa, e ko te turama iti ra ko te marama ïa; e kua angaia oki te au etu mei taku i tuatua.

17 E kua tuku iora au, ko te Atua, i te reira ki roto i te reva i te rangi ra, ei akamārama i te enua nei,

18 E te rā ei tutara i te ao, e te marama ei tutara i te po, e ei akataka i te mārama e te poiri; e akara akera au, ko te Atua, i te au mea katoatoa tei angaia e au ra te meitaki ra;

19 E aiai iora e ao akera ko te rā ā ïa.

20 E kua tuatua iora au, ko te Atua: Kia maata te au mea ora totoro aere ua ki raro i te moana, e te au manu kia rere ki runga ake i te enua, ki roto i te reva i te rangi nei.

21 E kua anga iora oki au, ko te Atua, i te au ika mamaata ra, e te au mea ora katoa o te moana e totoro aere ua e manganui, i to ratou tu; e te au manu peau katoa i to ratou tu; e akara akera au, ko te Atua, i te au mea katoatoa tei angaia e au ra te meitaki ra.

22 E kua akameitaki atura au, ko te Atua, ia ratou, na ko atura: Kia anau, e kia maata, e kia kī te moana ra o te tai ia kotou; e kia maata oki te manu ki rungaʼo i te enua nei;

23 E aiai iora e ao akera ko te rā rima ïa.

24 E kua tuatua iora au, ko te Atua: Kia akatupu mai te enua i te au mea ora i to ratou tu, te au puakatoro, e te au mea totoro, e te au manu vaevae ā o te enua i to ratou tu, e koia tika atura;

25 E kua anga iora au, ko te Atua, i te au manu vaevae ā o te enua i to ratou tu, e te au puakatoro i to ratou tu, e te au mea totoro katoa ki raro i te one i to ratou tu; e akara akera au, ko te Atua, i teia au mea katoatoa te meitaki ra.

26 E kua tuatua akera au, te Atua, ki taku Tama Anau Tai tei noo kiaku mei muatangana mai: E anga taua i te tangata ki to taua uaorai tu, kia aite ki to taua uaorai tu; e koia tika atura. E kua tuatua akera au, ko te Atua: Kia mana ratou ki rungaʼo i te ika o te tai, e ki rungaʼo i te au manu o te reva, e ki rungaʼo i te au puakatoro, e ki rungaʼo i te enua katoa nei, e ki rungaʼo i te au mea totoro katoa ra, e totoro aere ua i te enua nei.

27 Kua anga iora oki au, ko te Atua, i te tangata ki toku uaorai tu; i te tu o taku Tama Anau Tai i anga ei au iaia; kua anga au ia raua ko te tane e te vaine.

28 E kua akameitaki atura au, ko te Atua, ia raua e kua tuatua atura kia raua: Kia anau korua, e kia maata roa, e e akakī i te enua nei, e e akavi; e kia mana korua ki rungaʼo i te au ika o te tai, e ki rungaʼo i te au manu o te reva, e ki rungaʼo i te au mea ora katoa e totoro aere ua i rungaʼo i te enua nei.

29 E kua tuatua iora au, ko te Atua, i te tangata: I na, kua oronga atu au na kotou i te au rakau rikiriki katoa e ua ki runga i te enua katoa nei, e te au rakau mamaata ravarai e ua ra, tei roto iaia uaorai tona ua; ei kai ïa na kotou.

30 E na te au manu vaevae ā katoa o te te enua nei, e na te au manu kaotoa o te reva, e na te au mea ora katoa e totoro aere ua ki runga i te enua nei, taku i oronga i te ora, na ratou te au rakau rikiriki mata ravarai ei kai; e koia tika atura, mei taku i tuatua.

31 E akara akera au, ko te Atua, i te au mea katoa taku i anga, e i na, te meitaki roa ra te au mea katoatoa tei angaia e au ra; e aiai iora e ao akera ko te rā ono ïa.