1 E i na, te rave nei rai a Enoka i tona akoanga, i te na ko anga atu e: I na, kua apii ana to tatou metua ko Adamu i teianei au mea, e e manganui te aronga tei irinaki, e kua riro mai ei tamaroa na te Atua, e manganui katoa tei kore i irinaki, e kua mate iora ki roto i ta ratou uaorai ara, e te akara atu nei ratou ki mua ma te matakutaku, i te mamae ngakau, no te riri otooto o te Atua te ka maringi mai ki runga ia ratou.

2 E mei taua taime rai e aere uatu ki mua, kua akamata iora a Enoka i te totou, i te na ko anga atu ki te au tangata, koia oki: i toku aaereanga, e kia tu akera oki ki runga i tetai ngai ko Mauta, e kapiki iora au ki te Atu, kua tae maira te reo mei te rangi mai, i te na ko anga mai e—E uri, e kake atu i te Maunga ko Simeona.

3 E uri akera au, kake atura ki te maunga; i toku tuanga i runga i te maunga, kite iora au i te rangi i te tueraanga, e kua kakauia iora au e te kakā;

4 E kite iora au i te Atu; i te tuanga i muaʼo i toku mata, e kua tuatua maira kiaku mei te tangata e tuatua ra ki tetai, te mata e te mata, e kua tuatua maira kiaku: Akara, e akaari atu au kia koe i te ao, no te au uki e manganui.

5 E i na kua akara iora au ki raro i te ō o Suma, e i na, e au tangata maata te noo ra i roto i te puakapa, ko te au tangata oki ïa o Suma.

6 E kua tuatua akaou maira te Atu kiaku: Akara; e akara iora au ki tokerau, kite atura au i te tangata Kanaana, te noo ra i roto i te puakapa.

7 E kua karanga maira te Atu kiaku: E totou; e kua totou iora au, na ko atura: Ka akara i te au tangata o Kanaana, e manganui uatu, e aere ra e tamaki i te au tangata o Suma, e ka tāia ratou, e ka pou takiri; e ka ngaangaa te au tangata o Kanaana ki runga i te au enua, e ka vai tanea ua te enua, kare e kai, e kare atu e iti tangata ke e noo ki reira, mari ra ko Kanaana anake;

8 E i na, ka taumaa te Atu i te enua ki te vera maata, e te tanea ka aere uatu rai e tuatau uatu; e kua tae mai te kerekere ki rungaʼo i te au tamariki a Kanaana, e kua akavaavaaia ratou i rotopu i te au tangata.

9 E i na, kua tuatua mai te Atu kiaku: Akara; kua akara oki au, E kite atura au i te enua o Tarona, e te enua o Enoka, e te enua o Omena, e te enua o Eni, e te enua o Sema, e te enua o Ana, e te enua o Anania, e te aronga katoa e noo ra i rungaʼo;

10 E kua karanga maira te Atu kiaku: E aere koe ki teianei au tangata e karanga atu kia ratou—E tataraara, ko te aere mai aea au e tā ia ratou ki te taumaa, e kia mate ratou.

11 E kua oronga mai aia kiaku i te akaueanga, kia bapetizo na roto i te ingoa o te Metua, e to te Tamaiti tei kī i te aroa ua e te tuatua-mou, e to te Vaerua Tapu, tei akapapu mai i te tuatua o te Metua e te Tamaiti.

12 E i na, kua aere atu rai a Enoka, i te kapiki i te au tangata katoatoa, mari ua ko te au tangata Kanaana, kia tataraara;

13 E pakari tikai te akarongo o Enoka tana i arataki i te au tangata o te Atua, e kua aere mai to ratou au enemi kia tamaki ia ratou; e kia tuatua aia i te reo o te Atu, kua ru te enua e kua rere ke te au maunga, kia tau ki tana i tuatua; kua taruri ke ia te au kauvai, e kua rongoia te ngunguru o te liona mei roto mai i te medebara, e maata atura te mataku o te au iti tangata, e ririnui oki te reo o Enoka, e ririnui katoa te mana o te reo ta te Atua i oronga atu kiaia.

14 E kua aranga katoa mai tetai enua no raro mai i te tai. E mataku rikarika akera te au enemi o te au tangata o te Atua, e kua rere ke atura ratou ki te atea ke, e kua oro atura ratou ki runga i te enua tei aranga mai no raro i te tai.

15 E kua tu katoa mai te au tuputupua o te enua i te atea ke ra; e kua tae katoa mai te taumaa ki rungaʼo i te tangata katoatoa tei tamaki mai ki te Atua;

16 E mei taua atianga rai, e aere ua mai ki mua, kua tupu te kai tamakianga e te akamaringi toto i rotopu ia ratou; kareka te Atu kua aere mai aia kua noo ki tona au tangata, e e nooanga tuatuatika to ratou.

17 Ko te mataku i te Atu tei runga ïa i te au iti tangata katoatoa, e ririnui tikai te kakā o te Atu i runga i tona au tangata. E kua akameitaki iora te Atu i te enua, e kua akameitakiia ratou ki runga i te au maunga, e ki runga i te au ngai teitei e kua pararauare.

18 E kua topa iora te Atu i tona au tangata ko Ziona, no te mea e okotai o ratou ngakau, ko tai manako, e kua noo ma te tuatuatika; kare rava e putaua i roto ia ratou.

19 Kua rave tamou rai a Enoka i te apii i te au tangata o te Atua ma te tuatua-tika. E tae akera i tona au rā, kua akatu iora aia i tetai oire tei tuatuaia e te Oire Tapu, koia a Ziona.

20 E i na kua tuatua a Enoka ki te Atu; e karanga iora aia ki te Atu: E tika rai e ka noo a Ziona ma te au e tuatau uatu. I na ra teia ta te Atu i tuatua atu kia Enoka: Kua akameitaki au ia Ziona, kua taumaa ra au i te au aronga ke.

21 E i na kua akaari iora te Atu kia Enoka i te aronga e noo ra i te ao nei, e akara iora aia, e i na, ko Ziona, ka apai ke ia ki te rangi. E kua tuatua maira te Atu kia Enoka: Ka kite koe i toku nooanga e tuatau uatu.

22 E kite katoa iora a Enoka i te toeanga o te au tangata, koia oki te au tamaroa a Adamu; kua kairo puua te au uanga a Adamu, mari ua te uanga a Kaina, e kerekere oki te uanga a Kaina, e kare o ratou ngai i rotopu ia ratou.

23 E i muri ake i to Ziona riro ke anga atu ki te rangi, kite akera a Enoka i te au basileia o te ao nei ki mua iaia;

24 E te aere maira ïa uki na runga maira ia uki; e teitei oki a Enoka e te takinaia atura ki runga, ki mua i te umauma o te Metua, e te Tamaiti a te Tangata; e i na, tei runga te mana o Satani i te aro o te enua katoa.

25 E kite akera aia i te au angela i te ekeanga ki vao i te rangi; e rongo akera aia i tetai reo maata i te na ko anga e: Aue, aue kotou te aronga e noo i te enua na.

26 E kite atura aia ia Satani; e vivi maata tana i roto i tona rima, e kua tapoki iora ïa i te ao katoa ki te poiri tangotango; e akara akera aia ki runga e kua kata, e kua rere ua iora tana au angela i te rekareka.

27 E kite akera a Enoka i te au angela i te ekeanga ki vao i te rangi, i te akakiteanga i to ratou kite papu i te Metua e te Tamaiti; E kua topa mai te Vaerua Tapu ki runga i tetai pae e manganui, e kua apainaia mai ratou ki runga e te mana o te rangi ki roto ia Ziona.

28 E i na, kua akara iora te Atua o te rangi ki te toenga o te tangata, aue iora; kua kite mata tikai a Enoka i te reira, na ko atura, Eaa to te rangi i aue ei, e i maringi ei to ratou roi mata mei te ua e topa ki rungaʼo i te au maunga?

29 Kua tuatua atura a Enoka ki te Atu: Eaa koe i aue ei, te akaraanga e tapu koe e mei te au mutukore ki te au mutukore?

30 E tika aina, ka rauka i te tangata i te tatau i te au toka rikiriki o te enua nei, i na e mirioni uatu te enua mei teia, kare i reira e tano e ko te akamataanga o te numero o taau ua kapuaanga; e te maora ua nei taau tapoki; e i na tei reira koe, e tei reira toou umauma; e tuatua-tika koe, e aroa ua koe, e meitaki toou e tuatau uatu;

31 E kua apai oki koe ia Ziona ki runga i toou umauma, mei taau au mea i anga, mei te au mutukore ki te au mutukore; e kare atu, mari ra te au, te tuatuatika, e te tuatua-mou te nooia i to terono; e aere te aroa ua na mua i to aro kare e openga; eaa i reira koe i aue ei?

32 Kua tuatua maira te Atu kia Enoka: Te akara ra koe e au taeake teia noou, ko te angaanga ïa a toku nei rima, kua oronga au kia ratou i te kite i te rā i angaʼi au ia ratou; i te Kainga i Edene, i orongaʼi au ki te tangata nei i tona tikaanga iki;

33 Teia taku i akakite atu ki toou au taeake, e kua oronga katoa au i te akaueanga, kia aroa ratou ia ratou uaorai, e kia iki oki ratou iaku, to ratou Metua; i na ra kare ratou e inangaro, e kua makitakita ratou i to ratou uaorai toto;

34 Tupu iora te aʼi kakai i roto iaku ki rungaʼo ia ratou, e no te vera o toku mataora kore ia ratou ka tono maira au i te vai diluvi ki runga ia ratou, kua otooto oki taku riri kia ratou.

35 I na, ko au te Atua; ko Tangata o te Tapu Nui toku ingoa, ko Tangata o te Apii toku ingoa, e ko Openga Kore e Mutukore toku ingoa katoa.

36 No reira, ka rauka iaku te totoa i toku rima kia mou mai i tei angaia e au e tei raveia e au; e ka puta oki ratou i toku nei mata, e i rotopu ia ratou katoa i te angaanga a toku nei maikao rima, kare rava atu e aronga kikino taku i kite mei to roto i toou ai taeake.

37 E i na ra, ka vai ta ratou ara ki runga i te upoko o to ratou au metua; ko Satani oki to ratou metua, e ko te taitaia to ratou akavaanga; e ka aue katoatoa to te rangi ia ratou, koia te angaanga katoa a toku maikao rima; no reira kare aina to te rangi e aue, i te mea oki e ka mamae teia aronga?

38 E i na, ko ta to mata e kite ra, ka mate ratou i te diluvi; e no reira ka topiri au ia ratou, kua oti oki to ratou are tapekaanga iaku i te maani.

39 E ko taku i iki kua pati akatenga mai ki mua i toku aroaro. No reira, ka mamae aia no ta ratou au ara; me ka tataraara ra ratou i te rā e oki mai ei tei Ikiia e au kiaku, kareka kia tae ki taua rā ra, ka mamae ratou;

40 No reira, ko te tumu teia ka aue ei to te rangi, ae, e ratou katoatoa tei angaia e taku rima.

41 E i na kua tuatua maira te Atu kia Enoka, ma te akakite atu kia Enoka i te au angaanga tei raveia e te tamariki a te tangata nei; i reira to Enoka kite anga, e kua akara iora aia i to ratou tu kino tikai, e to ratou taitaia, aue iora aia ma te akatoro atura i ona nga rima, e kua akaeta atura i tona ngakau kia atea ki te mutukore, e kua mamae iora tona kopu, e kua ngaueue iora to te mutukore.

42 E kua kite katoa a Enoka ia Noa e tana anau; e te uanga katoa a te au tamariki tamaroa a Noa, e ka ora ratou i te akaoraanga kopapa nei;

43 No reira kua kite a Enoka i te maanianga a Noa i te araka; e kua mareka te Atu i te reira, e kua mou oki aia ki tona uaorai rima; kareka ra i runga i te toenga o te aronga kino, kua apukuia ratou e te vai diluvi.

44 I to Enoka kiteanga i teia, kua kavangu rava tona ngakau, e aue akera no tona au taeake, e kua tuatua atura ki to te rangi: Te patoi nei au auraka kia akapumaanaia; i na ra kua karanga atura te Atu kia Enoka: E akateitei i to ngakau, e kia mataora; e akara.

45 E kua tae akera e, kua akara atura a Enoka; e mei ia Noa, kite atura aia i te au kopu tangata o te ao nei; na ko iora aia ki te Atu: Aea te rā o te Atu e tae mai ei? Aea te toto o Tei Tuatua-tika e maringi ei, e ratou katoatoa e taitaia ra e akatapuia, e rauka ai te ora mutukore?

46 Kua tuatua maira te Atu: Ei te tuatau i rotopu tikai i te au tuatau, i te au rā o te aronga kikino e akautungaiaʼi.

47 E i na, kua akara akera a Enoka i te rā e aere mai ei te Tamaiti a te Tangata, i roto i te kopapa; e kua rere ua ra tona vaerua i te rekareka, na ko iora: Ka apaiia Tei Tuatua-tika ki runga, e kua tāia te Punua Mamoe mei te tango mai o teianei ao; e na roto i te akarongo, tei roto au i te umauma o te Metua e i na, tei aku nei a Ziona.

48 E i na, kua akara a Enoka ki runga i te enua; e rongo akera aia i te reo mei roto mai i te reira i te na ko anga mai e: Aue, aue oki au, ko te metua vaine o te au tangata; kua mamae au, kua apikepike au, no te tu kino o taku au tamariki. Aea ra au e akangaroi ei, e ma te tamāia te viivii tei rere atu mei roto atu iaku nei? Aea Tei Anga iaku e akatapu mai ei iaku, kia akangaroi ake au, e kia noo te tuatua-tika no tetai tuatau ki rungaʼo iaku?

49 E kia akarongo ake a Enoka i te aue a te enua, aue akera aia, e kua kapiki atura ki te Atu, na ko iora: E te Atu, kare ainei oou akaroa ki te enua nei? Kare aina koe e akameitaki i te au tamariki a Noa?

50 E i na, kua kapiki uatu rai a Enoka ki te Atu, na ko iora: Te pati atu nei au kia koe, e te Atu, na roto i te ingoa o taau Tama Anau Tai, koia a Iesu Mesia, kia noo mai toou aroa ua ki runga ia Noa e tana uanga kia kore te diluvi e tapoki akaou i te enua.

51 Kare atura e rauka i te Atu i te tapū; e kua koreromotu iora aia kia Enoka e kua tautopa iora kiaia ma te taputou, e ka tapū aia i te diluvi; e ka tuatua aia ki te au tamariki a Noa;

52 E kua tuku akera aia i tetai akaue, te ka kore e akatukeia, e ko te toenga o tana uanga ka kitea te reira ki roto i te au basileia, i te roaanga o te enua e vai nei;

53 E kua tuatua maira te Atu: Kia akameitakiia aia tei na roto mai te Mesia i tona ra uanga; kua na ko mai oki aia e—Ko au te Mesia, te Ariki o Ziona, te Papa o te Rangi tei atea ki te mutukore; ko tei aere mai na te ngutupa ra, e tei kake na runga ake i taku tika kare aia e inga; no reira kia akameitakiia ratou taku e tuatua nei ka aere mai ratou ki mua ma te imene o te rekareka openga kore.

54 E i na, kua kapiki atu a Enoka ki te Atu, na ko atura: Kia tae mai te Tamaiti a te Tangata i te kopapa nei, ka akangaroi ainei te enua? Te pati atu nei kia koe, e akaari mai i teia au mea kiaku.

55 E kua karanga maira te Atu kia Enoka: Akara, e kua akara akera aia, kite atura i te Tamaiti a te Tangata i te takinaanga ki runga i te satauro, i te tutu tikai o te tangata nei;

56 E akarongo akera aia i tetai reo maata; e kua tapokiia iora te rangi e kua aue iora te au mea angaia e te Atua; e kua ngunguru iora te enua, e ngaangaa iora te au toka; e kua tu maira te aronga tapu, e kua akakoronaia ki te rima katau o te Tamaiti a te Tangata, ki te au korona kakā;

57 E manganui oki te au vaerua e noo i roto i te are tapekaanga tei tu mai ki te rima katau o te Atua; e te toenga tei roto rai ïa i te vivi o te poiri, e kia tae rava ki te akavaanga o te rā maata.

58 Kua aue iora a Enoka, e kua kapiki atura ki te Atu, i te na ko anga: Aea te enua e akangaroi ei?

59 E akara atura a Enoka i te Tamaiti a te Tangata i te kakeanga atu ki te Metua; e kua kapiki iora aia ki te Atu, i te na ko anga: Kare ainei koe e oki akaou ki runga i te enua nei? E mei te mea oki e e Atua koe, te kite nei au ia koe, kua taputou mai oki koe kiaku, e kua akaue mai koe kiaku kia pati atu au na roto i te ingoa o te Tama Anau Tai; naau i anga iaku, e kua oronga mai kiaku i te tika ki te terono noou kare oki e noku, na roto ra i te aroa ua noou; no reira, te ui nei kia koe e me ka oki akaou mai koe ki te enua nei.

60 E kua tuatua iora te Atu kia Enoka: E ora ei au nei ka oki mai au i te au rā openga, i te au rā o te kino maata e te utunga ei akatupu i te koreromotu taku i papau kia koe no runga i te au tamariki a Noa;

61 Te tae maira te rā e akangaroi ei te enua, i na ra, i muake i taua rā ra, ka poiri te au rangi, e ka tapokiia te ao nei ki te kakau kerekere e te poiri e ka ruruia te au rangi, pera katoa te enua, e mutamutaanga maata to roto i te tamariki a te tangata nei, kareka toku au tangata ko taku ïa ka akono;

62 E tono mai oki au i te tuatuatika mei te rangi mai; e te tuatuamou naku ïa e tono mai mei raro i te one, ei akapapu i to ratou kite i taku Tama Anau Tai; i tona tuakaouanga mai mei te mate; ae, pera katoa te tuakaouanga o te au tangata ravarai; e na te tuatua-tika e te tuatua-mou e purumu i te enua mei ta te diluvi rai, i te akaputuputuangaia tei ikiia e au, mei nga ope e ā o te enua nei ki te ngai taku i akono, ei Oire Tapu, kia raukaʼi i toku au tangata kia tatua i to ratou taukupu, e te akaraanga atu ki mua i te tuatau e aere mai ei au; Tei reira oki toku puakapa; e tuatuaia oki e ko Ziona, ko Ierusalema Ou.

63 E kua tuatua iora te Atu kia Enoka: Ei reira koe e toou oire katoa e aravei ei ia ratou ki reira, e ka ariki oki tatou ia ratou ki roto i to tatou umauma, ka kite oki ratou ia tatou, e ka takave tatou i to ratou kaki, e ka takave ratou ia tatou, ma te ongi ia tatou tatakitai;

64 E tei reira oki toku nooanga, ka riro oki e ko Ziona te ka aere mai ki vao te katoatoaanga tei angaia e au; mei te okotai tauatini mataiti ka akangaroi ei te enua.

65 E i na, kite iora a Enoka i te rā e aere mai ei te Tamaiti a te Tangata, i te au rā openga, kia noo ki runga i te enua ma te tuatua-tika i te tuatau ko tai tauatini mataiti;

66 I na ra, i mua ake i te reira rā, kua kite atu aia i te oripuua o roto i te aronga kino, e kua kite katoa atu aia i te tai, i te atuatu anga, e te ngakau tangata i te paruparuanga ia ratou i te akaraanga atu ma te mataku no te akavaanga a te Atua Mana Katoatoa, te ka tae mai ki runga i te aronga kino.

67 E kua akaari akera te Atua kia Enoka i te au mea ravarai e tae uatu ki te openga o te ao nei; kite atura aia i te rā o te aronga tuatua-tika, te ora o to ratou akaoraangaia, e kua rauka te kīanga o te rekarekaanga;

68 E te au rā katoa o Ziona, i roto i te au rā o Enoka; e toru ïa anere e ono ngauru e rima ara i te mataiti.

69 E kua aaere iora a Enoka e tona au tangata ma te Atua katoa, e tei rotopu aia i te nooanga i Ziona; e i na, kare ua a Ziona, kua apai oki te Atua ia Ziona kiaia ra; e mei reira mai kua aere te tuatua e, kua Rave ke ia a Ziona.