Mau tufa’a nō roto mai i te
Buka a Mose

1 Te mau parau a te Atua, tāna i parau ia Mose i te taime i hōpoihia atu ai Mose i ni’a i te hō’ē mou’a teitei roa,

2 ’E ’ua ’ite atu ’oia i te Atua te mata ’e te mata, ’e ’ua paraparau iāna, ’e tei ni’a iho ia Mose te hanahana o te Atua ; nō reira i tia’i ia Mose ’ia ti’a noa i mua i tōna ra aro.

3 ’E ’ua parau mai ra te Atua ia Mose, i te nā-’ō-ra’a mai ē : Inaha, ’o vau te Fatu te Atua Manahope, ’e ’o Hope’a ’Ore tō’u nei i’oa ; nō te mea ’aore tō’u e mahana ha’amatara’a ’e ’aore ho’i e matahiti hope’a ; e ’ere ānei ïa i te mea hope’a ’ore ?

4 ’E, inaha, e tamaiti ’oe nā’u ; nō reira ’a hi’o, ’e e fa’a’ite atu vau ia ’oe i te mau ’ohipa i ravehia e tō’u nei nā rima ; ’eiaha rā te tā’āto’ara’a, nō te mea ’aore e hope’a tō tā’u mau ’ohipa ’e tā’u ato’a mau parau, ’e e ’ore ho’i ïa e hope.

5 Nō reira, ’aore roa e ta’ata e ’ite i tā’u mau ’ohipa ato’a, maori rā ’ia ’ite ato’a ’oia i te tā’āto’ara’a o tō’u ra hanahana ; ’e ’aore e ta’ata e ’ite i te tā’āto’ara’a o tō’u ra hanahana, ’e i muri iho ’a vai noa ai i te tino nei i ni’a i te fenua nei.

6 ’E e ’ohipa tā’u nā ’oe, e Mose, tā’u tamaiti ; ’e tō ’oe hōho’a, mai tō tā’u Fānau tahi ïa ; ’e tā’u Fānau tahi, ’o te Fa’aora ïa, nō te mea ’ua ’ī ’oia i te aroha ’e te parau mau ; ’e ’aita atu e Atua ’ē atu iā’u nei, ’e tei pīha’i iho te mau mea ato’a iā’u nei, nō te mea ’ua ’ite au i taua mau mea ato’a ra.

7 ’E i teienei, inaha, teie te hō’ē mea tā’u e fa’a’ite atu ia ’oe, e Mose, tā’u tamaiti, tei roto ho’i ’oe i te ao nei, ’e i teienei e fa’a’ite atu vau i te reira ia ’oe na.

8 ’E i muri a’era, ’ua hi’o a’era Mose, ’e ’ite atu ra i te ao i reira ’oia i hāmanihia ai ; ’e ’ua ’ite atu ra Mose i te ao nei ’e tōna ra mau hope’a, ’e i te mau tamari’i ato’a a te ta’ata e ora ra, ’e tei hāmanihia na ; ’e ’ua ’ūmere roa ’e ’ua māere roa ’oia i te reira.

9 E ta’a ’ē atu ra te aro o te Atua ia Mose, ’e ’ore atu ra tōna hanahana i ni’a ia Mose ; ’e ’ua vai noa Mose ’o ’oia ana’e ra. ’E ’a vaiihohia ai ’oia ’o ’oia ana’e ra, ’ua ma’iri ihora ’oia i ni’a i te fenua.

10 ’E i muri a’era e rave rahi hora i ma’iri nā mua i roa’a fa’ahou mai ai tō Mose pūai mai tō te ta’ata ra ; ’e ’ua parau ihora ’oia iāna iho ē : I teienei, nō reira vau i ’ite ai ē, e mea faufa’a ’ore te ta’ata nei, ’e ’aita roa ho’i au i mana’o na mai te reira.

11 ’Āre’a rā i teienei ’ua ’ite tō’u iho nei mata i te Atua ; ’eiaha rā i tō te pae tino nei, tō’u rā mata vārua ; nō te mea ’aore i ti’a i tō’u mata pae tino nei ’ia hi’o iāna ; ’o te ’ōriorio ho’i au ’e ’a pohe atu ai i mua iāna ; tei ni’a iho rā tōna hanahana iā’u ; ’e ’ua ’ite au i tōna mata, nō te mea ’ua fa’ahuru-’ē-hia vau i mua iāna ra.

12 ’E i muri a’era i tō Mose paraura’a i teie mau parau, inaha, ’ua haere mai ra Sātane ma te fa’ahema iāna, i te nā-’ō-ra’a mai ē : E Mose, te tamaiti a te ta’ata nei, ’a ha’amori mai iā’u.

13 ’E i muri a’era ’ua hi’o atu ra Mose ia Sātane, e parau atu ra : ’O vai ’oe ? Inaha ho’i, e tamaiti ho’i au nā te Atua, ’e tō’u nei hōho’a, mai tō tāna Fānau tahi ïa ; ’e tei hea ho’i tō ’oe na hanahana, e ti’a ai iā’u ’ia ha’amori ia ’oe ?

14 Inaha ho’i, ’aore i ti’a iā’u ’ia hi’o i te Atua, maori rā tei ni’a iā’u tōna hanahana, ’e ’ua fa’ahuru-’ē-hia vau i mua iāna. Terā rā ’ua ti’a iā’u ’ia hi’o ia ’oe i te mata pae tino nei. ’Aita ānei, ’oia mau roa ?

15 ’Ia ha’amaita’ihia te i’oa o tō’u ra Atua, ’aore ho’i tōna Vārua i fa’aru’e roa mai iā’u, ’e nō reira, tei hea roa tō ’oe na hanahana, e mea pōiri ho’i te reira iā’u nei ? ’E ’ua ti’a iā’u ’ia fa’ata’a ’o vai ’oe ’e ’o vai te Atua ; ’e ’ua parau mai ho’i te Atua iā’u nei ē : ’A ha’amori i te Atua, ’e ’o ’oia ana’e tā ’oe e tāvini.

16 ’A haere ’ē atu ’oe, e Sātane ; ’eiaha e ha’avare mai iā’u ; ’ua parau mai ho’i te Atua iā’u nei ē : Tō ’oe hōho’a, mai tō tā’u Fānau tahi ïa.

17 ’E ’ua hōro’a ato’a mai ’oia i te mau fa’auera’a iā’u nei ’a pi’i mai ai ’oia iā’u nā roto mai i te pū ’aihere ’ama ra, i te nā-’ō-ra’a mai ē : ’A ti’aoro i te Atua nā roto i te i’oa o tā’u ra Fānau tahi, ’e ’a ha’amori iā’u.

18 ’E ’ua parau fa’ahou a’era Mose : E ’ore au e fa’aea i te ti’aoro atu i te Atua, tē vai ra ho’i te tahi atu mau mea tā’u i hina’aro i te ani atu iāna : e i vai na ho’i tōna hanahana i ni’a iho iā’u, nō reira, ’ua ti’a iā’u ’ia fa’ata’a ’o vai ’o vai ’oia ’e ’o vai ’oe. ’A haere ’ē atu ’oe, e Sātane.

19 ’E i teienei, ’ia oti tā Mose paraura’a i teie mau parau, ’ua tuō ihora Sātane ma te reo pūai, ’e ’ua parau ’iriā ihora i ni’a i te fenua, ’e ’ua fa’aue ihora i te nā-’ō-ra’a ē : ’O vau te Fānau tahi, ’a ha’amori mai iā’u.

20 ’E i muri a’era ’ua tupu ihora tō Mose mata’u rahi ; ’e ’a tupu ai tōna ra mata’u, ’ua ’ite a’era ’oia i te māuiui ri’ari’a o hade ra. Terā rā, ’a ti’aoro ai ’oia i te Atua, ’ua roa’a ihora tōna pūai, ’e ’ua fa’aue atu ra ’oia i te nā-’ō-ra’a ē : ’A haere ’ē atu iā’u nei, e Sātane, nō te mea ’o teie Atua hō’ē roa tā’u e ha’amori, ’oia ho’i te Atua hanahana.

21 ’E i teienei ’ua ha’amata ihora Sātane i te rurutaina, ’e ’ua ’āueue ihora te fenua ; ’e ’ua roa’a mai ra ia Mose te pūai, ’e ’ua ti’aoro atu ra ’oia i te Atua, i te nā-’ō-ra’a ē : I te i’oa o te Fānau tahi, ’a haere ’ē atu ’oe, e Sātane.

22 ’E i muri a’era ’ua tuō ihora Sātane ma te reo pūai, ma te ’oto, ’e te ’auē, ’e te ’au’aura’a niho ; ’e ’ua haere ’ē atu ra ’oia, mai mua atu i te aro o Mose, ’e ’aore atu ra ’oia i ’ite atu iāna ra.

23 ’E i teienei ’ua fa’a’ite pāpū Mose nō ni’a i taua mau mea ra ; terā rā nō te mau ’ohipa ’ī’ino, ’aore atu ra te reira i vai mai i rotopū i te mau tamari’i a te ta’ata nei.

24 ’E i muri a’era i tō Sātane revara’a atu mai mua atu i te aro o Mose, ’ua nānā a’era Mose i tōna mata i ni’a i te ra’i, ’ua ’ī ho’i ’oia i te Vārua Maita’i, ’o tei fa’a’ite pāpū mai nō ni’a i te Metua ’e te Tamaiti ;

25 ’E ’a ti’aoro atu ai ’oia i te i’oa o te Atua, ’ua ’ite fa’ahou atu ra ’oia i tōna hanahana, ’e tei ni’a iho ho’i te reira iāna ; ’e ’ua fa’aro’o ihora ’oia i te hō’ē reo, i te nā-’ō-ra’a mai ē : E ao tō ’oe, e Mose, ’e nā’u, nā te Manahope, i mā’iti ia ’oe, ’e e fa’arahihia atu tō ’oe pūai i tō te mau pape e rave rahi ra ; e ha’apa’o ho’i rātou i tā ’oe parau mai te huru ra ē ’o te Atua ’oe.

26 ’E inaha, tei pīha’i iho vau ia ’oe, ē tae noa atu ho’i i te hope’a o tō ’oe ra pu’e mahana ; ’e nā ’oe ho’i e fa’aora i tō’u ra mau ta’ata mai roto mai i te fa’atītīra’a, ’oia ho’i ia ’Īserā’ela ’o tā’u i mā’iti.

27 ’E i muri a’era, ’a parau noa mai ai te reo, ’ua nānā a’era Mose i tōna nā mata ’e ’ua ’ite atu ra ’oia i te fenua, ’oia ïa, i te tā’āto’ara’a o te reira ; ’e ’aita roa te hō’ē a’e mea tei ’ore i ’itehia e ana, ’e ’ua ’ite ’oia i te reira nā roto i te Vārua o te Atua.

28 ’E ’ua ’ite ato’a atu ’oia i te mau ta’ata pā’āto’a i reira, ’e ’aita roa te hō’ē a’e ta’ata tei ’ore i ’itehia e ana ; ’e ’ua ’ite ’oia ia rātou nā roto i te Vārua o te Atua ; ’e ’ua rahi roa ho’i rātou ’ia tai’o, ’e ’aita roa ho’i e hope ’ia tai’ohia mai te one i te pae tahatai ra.

29 ’E ’ua ’ite ’oia i te mau fenua e rave rahi ; ’e ’ua parauhia te fenua tāta’itahi e ao, ’e tē vai ra te mau ta’ata i ni’a iho i te reira.

30 ’E i muri a’era ’ua ti’aoro atu ra Mose i te Atua, nā ’ō atu ra : ’A fa’a’ite mai na iā’u, tē ani atu nei au ia ’oe, nō te aha ho’i teie mau mea ato’a, ’e nā roto i te aha ’oe i hāmani ai i te reira ?

31 ’E inaha, tei ni’a iho ia Mose te hanahana o te Fatu, i ti’a ai ia Mose ’ia ti’a i mua i te aro o te Atua, ’e ’ua paraparau iāna i te mata ’e te mata. ’E ’ua parau mai ra te Fatu ra te Atua ia Mose : Nō tā’u iho ’ōpuara’a i hāmani ai au i teie mau mea. Teie nei te pa’ari ’e e vai te reira i roto iā’u nei.

32 ’E nā roto i te parau o tō’u ra mana i hāmani ai au i te reira, ’oia ho’i nā roto ïa i tā’u ra Tamaiti fānau tahi, ’o tei ’ī i te aroha ’e te parau mau.

33 ’E nā’u i hāmani i te mau ao ’aore e hope ’ia tai’ohia ; ’e ’ua hāmani ato’a vau i te reira nō tā’u iho ’ōpuara’a ; ’e nā roto i te Tamaiti i hāmani ai au i te reira, ’oia ho’i nā tā’u Fānau tahi.

34 ’E te ta’ata mātāmua o te mau ta’ata ato’a ’o tā’u ïa i parau ’o Adamu, ’oia ho’i, e rave rahi.

35 Terā rā te tuatāpapara’a ana’e nō te fenua nei, ’e tō reira ra mau ta’ata, ’o tā’u e hōro’a atu nei ia ’oe. Inaha ho’i, e rave rahi te mau ao tei mou nā roto i te parau nō tō’u ra mana. E rave rahi ho’i tē vai nei, ’aita ho’i e hope ’ia tai’ohia e te ta’ata nei ; ’ua tai’ohia rā te mau mea ato’a e au nei, nā’u ho’i te reira, ’e ’ua ’ite au i te reira.

36 ’E i muri a’era ’ua parau atu ra Mose i te Fatu, nā ’ō atu ra : ’A aroha mai i tō tāvini, e te Atua, ’e ’a fa’a’ite mai iā’u i te huru o teie nei fenua, ’e te mau ta’ata ho’i e pārahi i ni’a i te reira, ’e ’oia ato’a te mau ra’i ra, ’e ’ei reira tō tāvini nei e māuruuru ai.

37 ’E ’ua parau atu ra te Fatu ra te Atua ia Mose, nā ’ō atu ra : E rave rahi te mau ra’i, e ’ore te reira e hope ’ia tai’ohia e te ta’ata nei ; ’ua tai’ohia rā te reira e au nei, nā’u ho’i te reira.

38 ’E ’ia mou te hō’ē fenua ’e tōna ra mau ra’i, mai te reira ato’a ïa e tae mai te tahi iho ; ’e ’aita e hope’a tō tā’u ra mau ’ohipa, ’e ’aore rā tō tā’u ra mau parau.

39 Inaha ho’i, ’o teie ho’i tā’u ’ohipa ’e tō’u hanahana, ’ia fa’atupu i te tāhuti ’ore ’e te ora mure ’ore o te ta’ata nei.

40 ’E i teienei, e Mose, tā’u tamaiti, e parau ā vau ia ’oe nō ni’a i teie fenua tā ’oe e ti’a na ; ’e e pāpa’i ’oe i te mau mea tā’u e parau atu.

41 ’E i te mahana e fa’ariro ai te mau tamari’i a te ta’ata nei i tā’u mau parau ’ei mea faufa’a ’ore ’e e ’īriti ’ē atu ai i te mau parau e rave rahi nō roto mai i te buka tā ’oe e pāpa’i, inaha, e fa’ati’a fa’ahou mai au i te hō’ē mai ia ’oe te huru ; ’e e vai fa’ahou ā te reira mau parau i rotopū i te mau tamari’i a te ta’ata nei—i rotopū ia rātou e rave rahi ’o tē ti’aturi.

42 (’Ua parauhia teie mau parau ia Mose i ni’a i te mou’a, ’e e’ita roa tōna i’oa e ’itehia i rotopū i te mau tamari’i a te ta’ata nei. ’E i teienei ’ua parauhia atu te reira ia ’oe. ’Eiaha e fa’a’ite atu i te reira i te hō’ē noa atu ta’ata, maori rā ia rātou ’o tei ti’aturi. ’Oia ïa. ’Āmene.)