1 ’E te mau mahana ato’a o Enoha e maha ïa hānere e toru ’ahuru matahiti.

2 ’E i muri a’era ’aita ’o Metusela, te tamaiti a Enoha, i rave-’ē-hia atu, ’ia fa’ati’ahia te mau fafaura’a a te Fatu, ’o tāna i fafau atu ia Enoha ; i fafau atu na ho’i ’oia ia Enoha ē e fānau mai Noa nō roto mai i te hua’ai o tōna ra tau’upu.

3 ’E i muri a’era ’ua tohu ihora Metusela ē nā roto mai i tōna ra tau’upu (nā roto ia Noa) e tupu mai ai te mau bāsileia ato’a o te fenua, ’e ’ua rave ’oia i te hanahana i ni’a iāna iho.

4 ’E ’ua tupu ihora te o’e rahi i ni’a i te fenua, ’e ’ua ’anatema ihora te Fatu i te fenua i te ’anatema māuiui, i pohe ai tō reira mau ta’ata e rave rahi.

5 ’E i muri a’era ’ua ora Metusela hō’ē hānere ’e e va’u ’ahuru ma hitu matahiti, ’e ’ua fānau ihora tāna ’o Lameha ;

6 ’E ’ua ora noa Metusela, i muri a’e i tōna fānaura’a ia Lameha, e hitu hānere ’e va’u ’ahuru ma piti matahiti, ’e ’ua fānau ihora ’oia i te mau tamari’i tamāroa ’e te mau tamari’i tamāhine ;

7 ’E tō Metusela pu’e mahana ato’a e iva hānere ïa ’e ono ’ahuru ma iva matahiti, ’e ’ua pohe ihora ’oia.

8 ’E ’ua ora Lameha hō’ē hānere ’e va’u ’ahuru ma piti matahiti, ’e ’ua fānau ihora tāna e tamaiti,

9 ’E ’ua ma’iri ihora ’oia i tōna i’oa ’o Noa, ’e ’ua nā ’ō a’era : E riro teie nei tamaiti ’ei tauturu rahi ia tāua i ni’a i tā tāua ’ohipa, i te ’ohipa a tō tāua nei rima, nō te fenua i ’anatemahia e te Fatu.

10 ’E ’ua ora Lameha, i muri a’e i tōna fānaura’a ia Noa, e pae hānere ’e iva ’ahuru ma pae matahiti, ’e ’ua fānau ihora ’oia i te mau tamari’i tamāroa ’e te mau tamari’i tamāhine ;

11 ’E tō Lameha pu’e mahana e hitu hānere ïa ’e hitu ’ahuru ma hitu matahiti, ’e ’ua pohe ihora ’oia.

12 ’E maha hānere ’e pae ’ahuru matahiti tō Noa, ’e ’ua fānau ihora tāna ’o Iapheta ; ’e e maha ’ahuru ma piti matahiti i muri a’e, ’ua fānau ihora tāna ’o Sema nā roto mai i te metua vahine ’o tei fānau mai ia Iapheta, ’e i te pae hānere o tōna ra matahiti, ’ua fānau ihora tāna ’o Hama.

13 ’E ’ua fa’aro’o Noa ’e tāna ra mau tamari’i tamāroa i te Fatu, ’e ’ua ha’apa’o, ’e ’ua parauhia rātou te mau tamaiti a te Atua.

14 ’E ’ia ha’amata teie mau ta’ata i te fānau rahi i ni’a i te fenua, ’e ’ia fānau mai tā rātou e mau tamari’i tamāhine, ’ua ’ite atu ra te mau tamari’i tamāroa a te ta’ata e mea purotu taua mau tamāhine ra, ’ua rave ihora ia rātou ’ei mau vahine nā rātou, mai te au i tō rātou hina’aro.

15 ’E ’ua parau atu ra te Fatu ia Noa : ’Ua ho’o te mau tamari’i tamāhine a tā ’oe mau tamari’i tamāroa ia rātou iho ; inaha ho’i ’ua rahi tō’u riri i te mau tamari’i tamāroa a te ta’ata, ’aore ho’i rātou e ha’apa’o i tō’u nei reo.

16 ’E i muri a’era ’ua tohu ihora Noa, ’e ’ua ha’api’i atu ra i te mau mea a te Atua, mai te au i te mātāmua ra.

17 ’E ’ua parau atu ra te Fatu ia Noa : E ’ore roa tō’u nei Vārua e mārō noa i te ta’ata, e ’ite ho’i ’oia e pohe te mau ta’ata ato’a ; ’āre’a tōna ra mau mahana hō’ē ïa hānere e piti ’ahuru matahiti ; ’e ’ia ’ore te ta’ata ’ia tātarahapa, e tu’u atu ïa vau i te mau vai ha’ono i ni’a iho ia rātou.

18 ’E i taua mau mahana ra tē vai ra te mau ta’ata tino rarahi i ni’a iho i te fenua, ’e ’ua tītau rātou ’ia taparahi ia Noa ; tei pīha’i iho rā te Fatu ia Noa, ’e tei ni’a iho iāna te mana o te Fatu.

19 ’E ’ua fa’atōro’a te Fatu ia Noa ’ia au i tāna ra ha’apa’ora’a, ’e ’ua fa’aue atu ra iāna ’ia haere e poro i tāna ’Evanelia i te mau tamari’i a te ta’ata, mai tei hōro’ahia atu ho’i ia Enoha ra.

20 ’E i muri a’era ’ua ti’aoro atu ra Noa i te mau tamari’i a te ta’ata ’ia tātarahapa ; ’aore rā rātou i ha’apa’o i tāna mau parau ;

21 ’E ’oia ato’a, i muri a’e i tō rātou fa’aro’ora’a iāna, ’ua haere mai rātou i mua iāna, nā ’ō mai ra : Inaha, e mau tamari’i tamāroa mātou nā te Atua ; ’aore ānei mātou i rave i te mau tamāhine a te ta’ata nā mātou ? ’E ’aore ānei mātou e ’amu nei, ’e e inu nei, ’e e fa’aipoipo nei, ’e e hōro’a nei ’ia fa’aipoipohia ? ’E ’ua fānau mai tā mātou mau vahine i te mau tamari’i nā mātou, e feiā pūai ana’e rātou, mai te feiā i tahito ra, e feiā tu’iro’o ho’i. ’E ’aore roa rātou i ha’apa’o noa atu i te parau a Noa.

22 ’E ’ua ’ite a’era te Atua i te ’ino rahi o te ta’ata i ni’a i te fenua ; ’e ’ua fa’ateitei ia rātou i te ferurira’a o te mau mana’o ato’a o tō rātou ra ’ā’au, i te tāmau-noa-ra’a i te ’ohipa ’ī’ino.

23 ’E i muri a’era ’ua tāmau noa Noa i tāna a’ora’a i te mau ta’ata, i te nā-’ō-ra’a atu ē : ’A fa’aro’o mai na, ’e ’a ha’apa’o i tā’u nei mau parau ;

24 ’A ti’aturi ’e ’a tātarahapa i tā ’outou ra mau hara ’e ’ia bāpetizohia nā roto i te i’oa o Iesu Mesia, te Tamaiti a te Atua, mai tō tātou ra ho’i mau metua, ’e e fāri’i ’outou i te Vārua Maita’i, nō te fa’a’ite mai i te mau mea ato’a ia ’outou ; ’e ’ia ’ore ’outou ’ia nā reira, e tae mai te mau vai ha’ono i ni’a iho ia ’outou ; ’āre’a rā ’aore roa rātou i ha’apa’o.

25 ’E ’ua tupu roa a’era tō Noa aruā ’e ’ua māuiui roa a’era tōna māfatu i te mea ē ’ua hāmani te Fatu i te ta’ata i ni’a i te fenua, ’e ’ua ’oto roa ihora tōna ’ā’au.

26 ’E ’ua parau ihora te Fatu : E ha’amou vau i te ta’ata tā’u i hāmani, mai ni’a atu i te fenua nei, te ta’ata ’e te mau ’ānimara ’āvae maha, ’e te mau mea e ne’e haere ra, ’e te mau manu o te reva ; e aruā ho’i tō Noa ’ua hāmani au ia rātou ra ; ’e ’ua ti’aoro mai ra ’oia iā’u ; nō te mea ’ua tītau rātou ’ia taparahi iāna.

27 ’E nō reira ’ua aroha te Fatu ia Noa ; nō te mea e ta’ata parauti’a Noa, ’e te maita’i roa i roto i tōna ra u’i ; ’e ’ua haere ’oia nā muri i te Atua, mai tāna ato’a ra mau tamari’i tamāroa e toru, ’o Sema, Hama, ’e Iapheta.

28 ’Ua vi’ivi’i roa te fenua i mua i te Atua, ’e ’ua ’ī i te ’ohipa hāmani ’ino.

29 ’E ’ua hi’o ihora ho’i te Atua i te fenua nei, ’e, inaha, ’ua vi’ivi’i roa ; nō te mea ’ua ha’avi’ivi’i te mau ta’ata ato’a i tō rātou ra mau haere’a i ni’a i te fenua.

30 ’E ’ua parau atu ra te Atua ia Noa : ’Ua fātata roa te hope’a o te mau ta’ata ato’a i mua iā’u nei ; ’ua ’ī ho’i te fenua i te ’ohipa hāmani ’ino, ’e inaha, e ha’amou vau i te mau ta’ata ato’a mai ni’a atu i te fenua nei.