1 ’E i muri a’era, ’ua parau atu ra te Fatu ia Mose, nā ’ō atu ra : Inaha, e heheu atu vau ia ’oe i te mau mea nō ni’a i teie nei ra’i ’e teie nei fenua ; ’a pāpa’i i te mau parau tā’u e parau. ’O vau te Mātāmeha’i ’e te Fa’ahope’a, te Atua Manahope ; nā roto i tā’u ra Fānau tahi i hāmani ai au i teie mau mea ; ’oia ïa, i te mātāmua ra i hāmani ai au i te ra’i, ’e te fenua tā ’oe e ti’a na.

2 ’E tē vai āno noa ra te fenua ’aore e faufa’a ; ’e ’ua fa’atupu vau i te pōiri i ni’a iho i te ’iriātai ; ’e ’ua fa’a’ārepurepu ihora tō’u Vārua i ni’a iho i te moana ; ’o vau ho’i te Atua.

3 ’E ’ua parau ihora vau, ’o te Atua : ’Ei māramarama ; e māramarama ihora.

4 ’E ’ua hi’o a’era vau, ’o te Atua, i te māramarama ; e mea maita’i taua māramarama ra. ’E ’ua fa’ata’a ’ē ihora vau ’o te Atua i te māramarama ’e te pōiri.

5 ’E ’ua ma’iri ihora vau, ’o te Atua, i tō te māramarama i’oa, e Ao ; ’e te pōiri, ’ua ma’iri ihora vau, e Ru’i ; ’ua nā reira vau nā roto i te parau o tō’u mana, ’e ’ua nā-reira-hia ’a parau ai au ra ; ’e ahiahi ihora, ’e po’ipo’i a’era, ’o te mahana mātāmua ïa.

6 ’E ’ua parau fa’ahou ihora vau, ’o te Atua : ’Ei reva i rotopū i te pape, ’e ’ua tupu mai tā’u i parau ra ; ’e ’ua parau atu ra vau : Nā te reira e vehe i te pape ’e te moana ra ; ’e ’oia mau atu ra.

7 ’E ’ua hāmani au, ’o te Atua, i taua reva ra, vehe atu ra te mau pape ra, ’oia ïa, te mau pape rarahi i raro a’e i taua reva ra, ’e te mau pape i ni’a a’e i taua reva ra, ’e ’oia mau atu ra mai tā’u i parau ra.

8 ’E ’ua ma’iri ihora vau, ’o te Atua, i tō te reva i’oa, e Ra’i ; ’e ahiahi ihora ’e po’ipo’i a’era, ’o te piti ïa o te mahana.

9 ’E ’ua parau ihora vau, ’o te Atua : ’Ia pu’e ’ē te mau pape i raro a’e i te ra’i i te vāhi ’ōtahi, ’e ’oia mau atu ra ; ’e ’ua parau ihora vau, ’o te Atua : ’Ei repo marō ; ’e ’oia mau atu ra.

10 ’E ’ua ma’iri ihora vau, ’o te Atua, i tō te repo marō ra i’oa, e Fenua ; ’e taua moana i pu’e ’ē ra, ’ua ma’iri ihora vau i tō te reira i’oa, e Tai ; ’e ’ua hi’o a’era vau, ’o te Atua, i taua mau mea ato’a tā’u i hāmani ra, ’e e mea maita’i.

11 ’E ’ua parau ihora vau, ’o te Atua : ’Ia fa’atupu mai te fenua i te matie, ’e te mau rā’au ri’i huero, ’e te mau rā’au rarahi e hotu ra, mai te au ho’i i tō rātou ra huru, ’e te mau rā’au fa’ahotu mā’a, tei ia rātou iho tō rātou huero i ni’a i te fenua nei, ’e ’oia mau atu ra mai tā’u i parau ra.

12 ’E ’ua fa’atupu a’era ho’i te fenua i te matie, ’e te mau rā’au ri’i huero mai te au i tō rātou huru, ’e te mau rā’au fa’ahotu mā’a, tei ia rātou iho tō rātou huero, mai te au i tō rātou iho huru ; ’e ’ua hi’o a’era vau, ’o te Atua, i taua mau mea ato’a tā’u i hāmani ra, ’e e mea maita’i ;

13 ’E ahiahi ihora, ’e po’ipo’i a’era, ’o te toru ïa o te mahana.

14 ’E ’ua parau ihora vau, ’o te Atua : ’Ei mau ti’arama tō roto i te reva i te ra’i ra, nō te fa’ata’a i te ao ’e te ru’i, ’e ’ia riro rātou ’ei mau tāpa’o nō te fa’ata’a i te mau tau, ’e te mau mahana, ’e te mau matahiti ;

15 ’E ’ei mau ti’arama ïa i roto i te reva i te mau ra’i nei nō te ha’amāramarama i te fenua ; ’e ’oia mau atu ra.

16 ’E ’ua hāmani ihora vau, ’o te Atua, i nā ti’arama rarahi e piti ra ; ’o te ti’arama rahi ra nō te fa’atere ïa i te ao, ’e te ti’arama iti ra nō te fa’atere ïa i te ru’i, ’e te ti’arama rahi ra ’o te mahana ïa, ’e te ti’arama iti ra ’o te marama ïa ; ’e ’ua hāmani-ato’a-hia te mau feti’a mai te au i tā’u ra parau.

17 ’E ’ua tu’u ihora vau, ’o te Atua, i te reira i roto i te reva i te ra’i ra, ’ei ha’amāramarama i te fenua nei,

18 ’E te mahana ra nō te fa’atere ïa i te ao, ’e te marama ra nō te fa’atere ïa i te ru’i, ’e nō te fa’ata’a i te māramarama ’e te pōiri ; ’e ’ua hi’o a’era vau, ’o te Atua, i taua mau mea ato’a tā’u i hāmani ra, ’e e mea maita’i.

19 ’E ahiahi ihora ’e po’ipo’i a’era, ’o te maha ïa o te mahana.

20 ’E ’ua parau ihora vau, ’o te Atua : ’Ia rahi te mau mea ora hā’uti’uti i roto i te mau pape, ’e te mau manu e ma’ue i ni’a a’e i te fenua i roto i te reva ateatea o te ra’i ra.

21 ’E ’ua hāmani ihora vau, ’o te Atua, i te mau tohorā rarahi, ’e te mau mea ora hā’uti’uti o te moana e rave rahi ra, ma tō rātou iho huru, ’e te mau manu pererau ato’a ma tō rātou iho huru ; ’e ’ua hi’o a’era vau, ’o te Atua, i taua mau mea ato’a tā’u i hāmani ra, ’e e mea maita’i.

22 ’E ’ua ha’amaita’i atu ra vau, ’o te Atua, ’ia rātou, nā ’ō atu ra : ’Ia fānau, ’e ’ia rahi, ’e ’ia ’ī te moana ia ’outou ; ’e ’ia rahi ho’i te mau manu pererau i ni’a iho i te fenua nei ;

23 ’E ahiahi ihora ’e po’ipo’i a’era, ’o te pae ïa o te mahana.

24 ’E ’ua parau ihora vau, ’o te Atua : ’Ia hōro’a mai te fenua i te mau mea ora ma tō rātou iho huru, te mau ’ānimara rata ’āvae maha, te mau mea e ne’e haere, ’e te mau ’ānimara ’āvae maha o te fenua ma tō rātou iho huru, ’e ’oia mau atu ra ;

25 ’E ’ua hāmani ihora vau, ’o te Atua, i te mau ’ānimara ’āvae maha o te fenua ma tō rātou iho huru, ’e te mau ’ānimara rata ’āvae maha ma tō rātou iho huru, ’e te mau mea o te repo e ne’e nei ma tō rātou iho huru ; ’e ’ua hi’o a’era vau, ’o te Atua, i taua mau mea ato’a ra, ’e e mea maita’i.

26 ’E ’ua parau atu ra vau, ’o te Atua, i tā’u Fānau tahi, iā’u ra ho’i ’oia mai te mātāmua mai ā : E hāmani tāua i te ta’ata ma tō taua iho hōho’a, ’ia au i tō taua iho huru ; ’e ’oia mau atu ra. ’E ’ua parau a’era vau, ’o te Atua : ’E ’ei ni’a iho rātou i te mau i’a o te tai, ’e i ni’a iho i te mau manu o te reva, ’e i ni’a iho i te mau ’ānimara rata ’āvae maha, ’e i ni’a iho i te fenua ato’a, ’e i ni’a iho i te mau mea e ne’e haere i te fenua nei ra.

27 ’E ’ua hāmani ihora vau, ’o te Atua, i te ta’ata i tō’u iho hōho’a, i te hōho’a ’o tō’u ra Fānau tahi i hāmani ai au iāna ; i hāmani ai au ia rāua, te tāne ’e te vahine.

28 ’E ’ua ha’amaita’i ihora vau, ’o te Atua, ’ia rāua, ’e nā ’ō atu ra ia rāua : ’A fānau fa’arahi ’e ’a fa’a’ī i te fenua nei, ’e ’ia ha’avī i te reira, ’e ’ia mana ’ōrua i ni’a iho i te i’a o te tai, ’e i ni’a iho i te mau manu o te reva, ’e i ni’a iho i te mau mea ora ato’a e ne’e haere i ni’a iho i te fenua nei.

29 ’E ’ua parau atu ra vau, ’o te Atua, i te ta’ata : Inaha, tē hōro’a atu nei au i te mau rā’au ri’i huero ato’a o te fenua nei ia ’outou, ’e te mau tumu rā’au rarahi ato’a e hotu ra, nōna iho tōna ra huero ; ia ’outou, e riro te reira ’ei mā’a.

30 ’E i te mau ’ānimara ’āvae maha ato’a o te fenua nei, ’e i te mau manu ato’a o te reva, ’e i te mau mea ora ato’a e ne’e haere i ni’a i te fenua nei, ’o tā’u e hōro’a i te ora ; e hōro’ahia atu ïa nā rātou te mau rā’au ri’i ato’a ’ei mā’a ; ’e ’oia mau atu ra, mai tā’u ho’i i parau ra.

31 ’E ’ua hi’o a’era vau, ’o te Atua, i te mau mea ato’a tā’u i hāmani, ē, inaha, te mau mea ato’a tā’u i hāmani ra, e mea maita’i roa ïa ; ’e ahiahi ihora ’e po’ipo’i a’era ’o te ono ïa o te mahana.