1 Ao e koro bukina bwa te Uea e taetae nakon Mote, ni kangai: Nooria, I kaotia nakoim ni kaineti ma karawa aio, ao te aonaba aio; korei taeka ake I taekini. Ngai te Moan ao te Toki, te Atua ae Moan te Mwaaka; mai iroun au Rikitemanna I kariki bwaai aikai; eng, n te moan tai I karika karawa, ao te aonaba are ko tei i aona.

2 Ao te aonaba e tuai riki ni bwai, ao akea kanoana; ao I karika te ro bwa e na roko nako aon marawa; ao tamneiu e kakamwakuri i aon te ran, bwa boni Ngai te Atua.

3 Ao Ngai, te Atua, I taku: Ke riki te oota; ao e a oota naba.

4 Ao Ngai, te Atua, I noora te oota, ao te oota anne e raoiroi. Ao Ngai, te Atua, I karaurea te oota man te roo.

5 Ao Ngai, te Atua, I arana te oota bwa te Ngaina; ao te ro, I aranna bwa te Tairiki; ao aio I karaoia n te taeka ni mwaakau, ao e karaoaki n aron are I taekinna; ao te tairiki ao te ingabong bon te moani bong.

6 Ao, Ngai, te Atua, I a manga taku: Ke riki annang i marenan te ran, ao e bon riki, ngke I taetae naba; ao I taku: Ke e kamaenakoi raan man raan; ao e bon karaoaki.

7 Ao Ngai, te Atua, I karaoa annang ao I kamaenakoi raan, eng, raan aika korakora i aan annang man raan ake i etan annang, ao e bon riki naba ngke I taetae.

8 Ao Ngai, te Atua, I arana annang bwa Karawa; ao te tairiki ao te ingabong bon te kauoua ni bong.

9 Ao Ngai, te Atua, I taku: Ke a uaia ni ikotaki raan ake i aan karawa nakon teuana te tabo, ao e bon riki; ao Ngai, te Atua, I taku: Ke riki te aba ae mwau; ao e bon riki.

10 Ao Ngai, te Atua, I arana te aba ae mwau bwa te Aonaba; ao ikotakiia ran, I aranna bwa Marawa; ao Ngai, te Atua, I nooria bwa bwaai ni kabane ake I a tia ni karaoi a bon raoiroi.

11 Ao Ngai, te Atua, I taku: Ke e karika te uteute te aonaba, te aroka ae karika te koraa, te kai ae karika te uaa, n aroia nako, ao te kai ae karika te uaa, are koraana e riai ni mena i nanona i aon te aonaba, ao e bon riki naba ngke I taetae.

12 Ao te aonaba e karika te uteute, aroka ni kabane a karika te koraa n aroia nako, te kai e karika te uaa, are korana e riai ni mena i nanona, n aroia nako; ao Ngai, te Atua, I nooria bwa bwaai ni kabane are I tia ni karaoi a bon raoiroi;

13 Ao te tairiki ao te ingabong bon te kateniua ni bong.

14 Ao Ngai, te Atua, I taku: Ke riki taian oota i annang i karawa, bwa e na kaokoroa te ngaina ma te tairiki, ao e a riki bwa taian kanikina, ao ibukin taian tai, ao ibukin taian bong, ao ibukin taian ririki.

15 Ao ke a riki bwa taian oota i annang i karawa bwa a na anga te oota nako aon te aonaba; ao e bon riki.

16 Ao Ngai, te Atua, I karikii uoua oota aika korakora; te oota are korakora riki bwa e na tautaekana te ngaina, ao te oota are karako riki bwa e na tautaekana te tairiki, ao te oota are korakora riki bon taai, ao te oota are karako riki bon namwakaina; ao taian itoi naba a karaoaki ni kaineti ma au taeka.

17 Ao Ngai, te Atua, I katikui i annang i karawa bwa a na anga te oota nako aon te aonaba,

18 Ao taai e na taua taekan te ngaina, ao namwakaina bwa e na taua taekan te tairiki, ao ni kaokoroa te oota man te ro; ao Ngai, te Atua, I nooria bwa bwaai ni kabane ake I tia ni karaoi a bon raoiroi;

19 Ao te tairiki ao te ingabong bon te kaaua ni bong.

20 Ao Ngai, te Atua, I taku: Raan ke a karikiia maan ni kamwaitiia aika mwamwae aika a maiu, ao mannikiba ake a kona ni kiba i etan te aonaba i annang i karawa.

21 Ao Ngai, te Atua, I karikiia kuua aika bubura, ao ni kabane maan aika maiu aika mwamwae, ake raan a karikiia ni kamwaitiia, n aroia nako, ao mannikiba nako ake iai baia ni kiba n aroia nako, ao Ngai, te Atua, I nooria bwa bwaai ni kabane ake I a tia ni karikiia a bon raoiroi.

22 Ao Ngai, te Atua, I kakabwaiaia, ni kangai: Kabatiaia ami kariki, ao kamwaiti ngkami, ao kaoni raan i marawa; ao ke a kamwaitiia mannikiba i aon te aonaba;

23 Ao te tairiki ao te ingabong bon te kanimaua ni bong.

24 Ao Ngai, te Atua, I taku: Ke te aonaba e karikiia maan aika maiu n aroia nako, maan aika manana, ao maan aika kawakawa, ao manin aon te aba n aroia nako, ao e bon riki;

25 Ao Ngai, te Atua, I kariki manin aon te aba n aroia nako, ao maan aika manana n aroia nako, ao bwaai ni kabane ake a kawakawa i aon te aba n aroia nako, ao Ngai, te Atua, I nooria bwa ni kabane bwaai aikai a bon raoiroi.

26 Ao Ngai, te Atua, I taku nakon au Rikitemanna, are e bon mena ma ngai man te moan tai: Ti na karaoa te aomata n ai arora, ni katootongara, ao e bon riki. Ao Ngai, te Atua, I taku: A na anganaki te tautaeka i aoia ikan marawa, ao i aoia mannikiba i annang, ao i aoia maan aika manana, ao i aon te aonaba ni kabuta, ao i aon bwaai ni kabane aika kawakawa i aon te aba.

27 Ao Ngai, te Atua, I karika te aomata ni katootongau, ni katootongan au Rikitemanna are I karikiia iai; te mwaane ao te aine I karikiia.

28 Ao Ngai, te Atua, I kakabwaiaia, ao I taku nakoia: Kabatiaia ami kariki, ao kamwaiti ngkami, ao kaona te aonaba, ao taua arona, ao tautaeka i aoia ika i marawa, ao i aoia mannikiba i annang, ao i aon bwaai ni kabane aika maiu aika mwamwae i aon te aonaba.

29 Ao Ngai, te Atua, I taku nakon te aomata: Nooria, I a tia n anganiko aroka nako aika kariki koraa, ake i aon te aonaba ni kabuta, ao kaai ni kabane are bon uaan te kai ae karika te koraa; a na riki bwa kanam.

30 Ao nakoia manin te aonaba ni kabane, ao nakoia ni kabane mannikiba i annang, ao nakoia ni kabane maan ake a kawakawa i aon te aba, ake I anganiia te maiu, a na anganaki aroka ni kabane aika itiaki ibukin kanaia, ao e bon riki, ngke I taetae.

31 Ao Ngai, te Atua, I noori bwaai ni kabane ake I tia ni karaoi, ao nooria, bwaai ni kabane ake I a tia ni karaoi a rangi n raoiroi; ao te tairiki ao te ingabong bon te kaonoua ni bong.