1 Naʻe pehē ʻa hono ngaohi ʻo ʻosi ʻa e langí pea mo e māmaní, pea mo e ngaahi meʻa kotoa pē.

2 Pea ʻi hono fitu ʻo e ʻahó ko au, ko e ʻOtuá, naʻá ku fakaʻosi ʻa ʻeku ngāué, pea mo e ngaahi meʻa kotoa pē kuó u ngaohí; peá u mālōlō ʻi he ʻaho hono fitú mei heʻeku ngāue kotoa pē, pea kuo ʻosi ʻa e ngaahi meʻa kotoa pē ʻa ia kuó u ngaohí, pea ko au, ko e ʻOtuá, naʻá ku vakai kuo nau lelei;

3 Pea ko au, ko e ʻOtuá, naʻá ku tāpuakiʻi ʻa e ʻaho hono fitú, mo fakamāʻoniʻoniʻi ia; koeʻuhí he naʻá ku mālōlō ai mei heʻeku ngāue kotoa pē ʻa ia ko au, ko e ʻOtuá, naʻá ku fakatupu mo ngaohí.

4 Pea ko ʻeni, vakai, ʻoku ou pehē kiate koe, ko e ngaahi tala fakahohoko ʻeni ki he langí pea mo e māmaní, ʻi he taimi naʻe fakatupu ai iá, ʻi he ʻaho ʻa ia ko au, ko e ʻEiki ko e ʻOtuá, naʻá ku ngaohi ai ʻa e langí pea mo e māmaní,

5 Pea mo e ʻakau kotoa pē ʻo e ngoué kimuʻa ʻi he teʻeki ai ke tuʻu ia ʻi he kelekelé, pea mo e ʻakau iiki kotoa pē ʻo e fonuá ʻi he teʻeki ai ke tupu iá. He ko au, ko e ʻEiki ko e ʻOtuá, naʻá ku fakatupu fakalaumālie ʻa e ngaahi meʻa kotoa pē ʻa ia kuó u lau ki aí, ʻi he teʻeki ai ke tuʻu ia ʻi he anga-fakanatulá ʻi he funga ʻo e māmaní. He ko au, ko e ʻEiki ko e ʻOtuá, naʻe teʻeki ai ke u pule ke tō ha ʻuha ki he funga ʻo e māmaní. Pea ko au, ko e ʻEiki ko e ʻOtuá, naʻá ku ʻosi fakatupu ʻa e fānau kotoa pē ʻa e tangatá; ka naʻe teʻeki ai ke ʻi ai ha tangata ke ngoueʻi ʻa e kelekelé; he naʻá ku fakatupu ʻa kinautolu ʻi he langí; pea naʻe teʻeki ke ʻi ai ha kakano ʻi he māmaní, pe ʻi he vaí, pe ʻi he ʻataá;

6 Ka ko au, ko e ʻEiki ko e ʻOtuá, naʻá ku lea, pea naʻe ʻalu hake ha hahau mei he māmaní, ʻo fakaviviku ʻa e funga hono kotoa ʻo e kelekelé.

7 Pea ko au, ko e ʻEiki ko e ʻOtuá, naʻá ku ngaohi ʻa e tangatá mei he efu ʻo e kelekelé, peá u mānava ʻaki ki hono avaʻi ihú ʻa e mānava ʻo e moʻuí, pea naʻe hoko ʻa e tangatá ko e moʻoniʻi laumālie moʻui, ko e ʻuluaki kakano ʻi he māmaní, pea ko e ʻuluaki tangatá foki; ka neongo iá, naʻe tomuʻa fakatupu ʻa e ngaahi meʻa kotoa pē; ka naʻe fakatupu mo ngaohi fakalaumālie ʻa kinautolu ʻo fakatatau ki heʻeku leá.

8 Pea ko au, ko e ʻEiki ko e ʻOtuá, naʻá ku tō ha ngoue ʻi he feituʻu fakahahake ʻi ʻĪteni, pea naʻá ku tuku ki ai ʻa e tangata ʻa ia naʻá ku fakatupú.

9 Pea naʻe ngaohi ke tupu mei he kelekelé ʻe au, ko e ʻEiki ko e ʻOtuá, ʻa e ʻakau kotoa pē, ʻi he anga-fakakakanó, ʻa ia ʻoku matamatalelei ki he vakai ʻa e tangatá; pea lava ʻo vakai ki ai ʻa e tangatá. Pea naʻe hoko ia foki ko e moʻoniʻi laumālie moʻui. He naʻe fakalaumālie ia ʻi he ʻaho ʻa ia naʻá ku fakatupu ai iá; he naʻe nofo ia ʻi he feituʻu ʻa ia ko au, ko e ʻOtuá, naʻá ku fakatupu ai iá, ʻio, naʻa mo e ngaahi meʻa kotoa pē naʻá ku teuteu ke ngāue ʻaki ʻe he tangatá; pea naʻe vakai ʻa e tangatá ʻoku lelei ia ki he kai. Pea ko au, ko e ʻEiki ko e ʻOtuá, naʻá ku tō ʻa e ʻakau ʻo e moʻuí foki ʻi he lotolotonga ʻo e ngoué, kae ʻumaʻā ʻa e ʻakau ʻo e ʻilo ʻo e leleí mo e koví.

10 Pea ko au, ko e ʻEiki ko e ʻOtuá, naʻá ku pule ke tafe atu ʻa e vaitafe mei ʻĪteni ke fakaviviku ʻa e ngoué; pea mei ai naʻe mavahevahe ia, ʻo hoko ki ha mangaʻi vai ʻe fā.

11 Pea ko au, ko e ʻEiki ko e ʻOtuá, naʻá ku ui ʻa e ʻuluakí ko Pisoni, pea naʻe takatakai ʻe ia ʻa e fonua kotoa ko Havilá, ʻa ia ko au, ko e ʻEiki ko e ʻOtuá, naʻá ku fakatupu ai ʻa e koula lahi;

12 Pea naʻe lelei ʻa e koula ʻo e fonua ko iá, pea naʻe ʻi ai ʻa e mataʻi tofé mo e maka ko e ʻoniké.

13 Pea ko e hingoa ʻo hono ua ʻo e vaitafé naʻe ui ko Kīhoni; ko ia ʻoku takatakai ʻa e fonua kotoa ko ʻItiopeá.

14 Pea ko e hingoa ʻo e vaitafe hono tolú ko Hitikeli; ko ia ia ʻoku tafe atu ki he hahake ʻo ʻAsiliá. Pea ko hono fā ʻo e vaitafé ko ʻIufaletesi.

15 Pea ko au, ko e ʻEiki ko e ʻOtuá, naʻá ku ʻave ʻa e tangatá ʻo tuku ia ki he Ngoue ko ʻĪtení, ke ngoueʻi mo tauhi ia.

16 Pea ko au, ko e ʻEiki ko e ʻOtuá, naʻá ku fekau ki he tangatá ʻo pehē: ʻE ngofua ʻa hoʻo kai faʻiteliha mei he ʻakau kotoa pē ʻo e ngoué,

17 Ka ko e ʻakau ʻo e ʻilo ʻo e leleí mo e koví, ʻe ʻikai te ke kai mei ai, ka neongo iá, ʻoku ngofua ke ke fili maʻau, he ʻoku foaki ia kiate koe; kae manatu ʻoku ou fakatapui ia, he ko e ʻaho te ke kai aí ko e moʻoni te ke mate.

18 Pea ko au, ko e ʻEiki ko e ʻOtuá, naʻá ku pehē ki hoku ʻAlo pē Taha naʻe Fakatupú, ʻoku ʻikai lelei ke toko taha pē ʻa e tangatá; ko ia, te u ngaohi kiate ia ha tokoni ʻoku taau mo iá.

19 Pea ko au, ko e ʻEiki ko e ʻOtuá, naʻá ku ngaohi mei he kelekelé ʻa e fanga manu kotoa pē ʻo e vaó, mo e manupuna kotoa pē ʻo e ʻataá; peá u fekau ke nau haʻu kia ʻĀtama, ke vakai pe ko e hā te ne ui ʻaki ʻa kinautolú; pea ko e ngaahi laumālie moʻui foki mo kinautolu; he ko au ko e ʻOtuá, naʻá ku mānava ʻaki ʻa e mānava ʻo e moʻuí kiate kinautolu, peá u fekau ke ʻilonga ʻa e hingoa ʻe ui ʻaki ʻe ʻĀtama ʻa e meʻa moʻui kotoa peé, ke hoko ia ko hono hingoá.

20 Pea naʻe foaki ʻe ʻĀtama ʻa e hingoa ki he fanga pulu kotoa pē, pea ki he fanga manupuna ʻo e ʻataá, pea ki he fanga manu kotoa pē ʻo e vaó; ka ko e meʻa kia ʻĀtama, naʻe ʻikai ke ne ʻilo ha tokoni naʻe taau mo ia.

21 Pea ko au, ko e ʻEiki ko e ʻOtuá, naʻá ku tuku ʻa e mohe maʻu kia ʻĀtama; pea naʻá ne mohe, peá u toʻo ha taha ʻo hono ngaahi hui vakavaká, peá u toe fakafoki ʻa e kakanó ki he meʻa naʻe ʻi aí;

22 Pea ko au, ko e ʻEiki ko e ʻOtuá, ko e hui vakavaka naʻá ku toʻo mei he tangatá, naʻá ku ngaohi mei ai ʻa e fefiné, peá u ʻomi ia ki he tangatá.

23 Pea naʻe pehē ʻe ʻĀtama: ʻOku ou ʻilo ʻeni ko e hui ʻeni ʻo hoku ngaahi huí, mo e kakano ʻo hoku kakanó; ʻe ui ia ko e Fefine, koeʻuhí he naʻe toʻo ia mei he tangatá.

24 Ko ia ʻe tukuange ai ʻe ha tangata ʻa ʻene tamaí mo ʻene faʻeé, pea te ne pīkitai ki hono uaifí; pea te na kakano taha pē.

25 Pea naʻá na fakatou telefua, ʻa e tangatá mo hono uaifí, pea naʻe ʻikai te na mā.