1 Nō reira ’ua oti a’era te ra’i ’e te fenua, ’e tō rātou mau nu’u ato’a ra.

2 ’E i te hitu o te mahana, ’ua fa’aoti ihora vau, ’o te Atua, i tā’u ’ohipa ’e te mau mea ato’a tā’u i hāmani ra ; ’e ’ua fa’afa’aea ihora vau i te hitu o te mahana i tā’u ato’a ra mau ’ohipa, ’e te mau mea ato’a tā’u i hāmani ra, ’ua oti ïa, ’e ’ua hi’o a’era vau, ’o te Atua, i te reira, ’e e mea maita’i.

3 ’E ’ua ha’amaita’i ihora vau, ’o te Atua, i te hitu o te mahana, e ha’amo’a atu ra i te reira ; nō te mea, i reira tō’u fa’aeara’a i tā’u ato’a ra mau ’ohipa ta’u, ’o te Atua, i hāmani ’e i rave ra.

4 ’E i teienei, inaha, tē parau atu nei au ia ’oe, ’o te mau u’i teie o te ra’i ’e te fenua, i tō rātou hāmanira’ahia, i te mahana i hāmani ai au, ’o te Fatu te Atua, i te ra’i ’e te fenua,

5 ’E te mau rā’au ato’a o te fenua nei hou i vai ai te reira i te fenua nei, ’e te mau rā’au ri’i ato’a o te fenua nei hou te reira i tupu mai ai. ’Ua hāmani ho’i au, ’o te Fatu te Atua, i te mau mea ato’a tā’u i parau ra, i te pae vārua, hou te reira i vai mai ai i te pae tino i ni’a iho i te fenua nei. ’Aore ho’i au, ’o te Fatu te Atua, i ha’ama’iri mai i te ua i ni’a i te fenua i reira. ’E ’ua hāmani au, ’o te Fatu te Atua, i te mau tamari’i ato’a a te ta’ata ; ’aore ā ho’i e ta’ata nō te fa’a’apu i te fenua ; i te ra’i ho’i au i hāmani ai ia rātou ; ’e ’aore ïa e mea ora i ni’a iho i te fenua ; ’e ’aore ato’a i roto i te pape, ’aore ato’a i roto i te reva ra ;

6 ’Ua parau ihora rā vau, ’o te Fatu te Atua, e pe’e atu ra te māhu i ni’a nō te fenua mai, ’e ’ua fa’ararirari ihora i te fenua tā’āto’a.

7 ’E ’ua hāmani ihora vau, ’o te Fatu te Atua, i te ta’ata i te repo fenua, ’e ’ua puhipuhi atu ra i te aho nō te ora i roto i tōna nā ’āpo’o ihu ; e riro a’era te ta’ata ’ei vārua ta’ata ora, ’o te ta’ata mātāmua ïa i ni’a i te fenua nei, ’o te mātāmua ato’a ïa o te ta’ata nei ; ’āre’a rā, ’ua hāmani-’ē-hia na te mau mea ato’a i te mātāmua ; i te pae vārua rātou i hāmani-’ē-hia ai ’e mai te au i tā’u ra parau.

8 ’E ’ua tanu ihora vau, ’o te Fatu te Atua, i te ’ō i te pae i te hiti’a o te rā i Edene ra, ’e ’ua tu’u ihora vau i te ta’ata tā’u i hāmani i reira.

9 ’E mai roto mai i te repo fenua ’ua fa’atupu ihora vau, ’o te Fatu te Atua, i te tumu rā’au tāta’itahi, i te pae tino nei, tei au ’ia hi’ohia e te ta’ata ; ’e ’ua ’ite te ta’ata i te reira. ’E ’ua riro ato’a te reira ’ei vārua ta’ata ora. ’E i vai vārua na ïa i te mahana vau i hāmani ai i te reira ; ’e i vai noa na ho’i te reira i te vāhi i hāmani ai au, ’o te Atua, i te reira, ’oia ïa, ’oia ato’a te mau mea ato’a tā’u i fa’aineine ’ei maita’i nō te ta’ata ; ’e ’ua hi’o a’era te ta’ata i te reira e mea maita’i ïa ’ei mā’a. ’E ’ua tanu ato’a ihora vau, ’o te Fatu te Atua, i te tumu rā’au nō te ora i rōpū i te ’ō, ’e ’oia ato’a te tumu rā’au nō te ’ite i te maita’i ’e te ’ino.

10 ’E ’ua fa’atahe au, ’o te Fatu te Atua, i te ’ānāvai pape mai roto mai i Edene nō te fa’ararirari i taua ’ō ra ; ’e i reira te ma’ara’a taua pape ra, e maha atu ra ’ānāvai pape rarahi.

11 ’E ’ua topa ihora vau, ’o te Fatu te Atua, i tō te mātāmua ra i’oa ’o Pisona, ’e ’ua ha’a’ati te reira i te fenua tā’āto’a nō Havila, te vāhi i hāmani rahi ai au, ’o te Fatu te Atua, i te ’auro ;

12 E ’auro maita’i tō te reira fenua, ’e tei reira ho’i te bedeliuma ’e te ’ōfa’i sema.

13 ’E te i’oa o te piti o te ’ānāvai pape ’o Gihona ïa ; ’o te reira ho’i tei ha’a’ati i te fenua tā’āto’a ra nō Etiopia.

14 ’E te i’oa o te toru o te ’ānāvai pape ’o Hidekela ïa ; ’o tei tahe ti’a atu i te pae i te hiti’a o te rā i Asura. ’E te maha o te ’ānāvai pape ’o Eupharate ïa.

15 ’E ’ua rave ihora vau, ’o te Fatu te Atua, i te ta’ata, ’e ’ua tu’u atu ra iāna i roto i te ’Ō i Edene ra, ’ia fa’a’apu ’e ’ia tīa’i i te reira.

16 ’E ’ua fa’aue au, ’o te Fatu te Atua, i te ta’ata, nā ’ō atu ra : E ’amu noa ’oe i tō te mau tumu rā’au ato’a ’o tē ō nei,

17 ’Āre’a i tō te tumu rā’au e ’ite ai i te maita’i ’e te ’ino, ’eiaha ’oe e ’amu i te reira, ’āre’a rā, tei ia ’oe iho te mā’iti, ’e ’ua hōro’ahia atu te reira ia ’oe ; terā rā, ’a ha’amana’o ē ’ua rāhui au i te reira, nō te mea i te mahana ’oe e ’amu ai i te reira, e pohe mau ā ’oe.

18 ’E ’ua parau atu ra vau, ’o te Fatu te Atua, i tā’u ra Fānau tahi, e ’ere ïa i te mea maita’i ’ia pārahi noa te ta’ata ’o ’oia ana’e ra ; nō reira, e hāmani au i te tahi tauturu au nōna ra.

19 ’E mai roto mai i te repo fenua, ’ua hāmani ihora vau, ’o te Fatu te Atua, i te mau ’ānimara ’āvae maha o te fenua nei, ’e te mau manu ato’a o te reva ; ’e ’ua fa’aue ’ia haere mai rātou ia Adamu, ’ia ’itea te i’oa tāna e ma’iri i ni’a ia rātou ; e mau vārua ora ato’a ho’i rātou ; nō te mea ’ua puhipuhi au, ’o te Atua, i roto ia rātou i te aho ora, ’e ’ua fa’aue atu ra ē ’o tā Adamu i’oa e ma’iri i te mau mea ora ato’a ra, ’o te reira ïa tō rātou i’oa.

20 ’E ’ua topa atu ra Adamu i te i’oa o te mau ’ānimara rata ’āvae maha ato’a ra, ’e tō te mau manu ato’a o te reva, ’e tō te mau ’ānimara ’āvae maha ato’a o te fenua ; ’āre’a rā ia Adamu, ’aore ïa e tauturu au i ’itea nōna ra.

21 ’E ’ua ha’ama’iri ihora vau, ’o te Fatu te Atua, i te vare’a ta’oto rahi i ni’a ia Adamu ; ’e ’ua ta’oto ihora ’oia, ’e ’ua rave ihora vau i te hō’ē ivi ’ao’ao nōna, e tā’ati ihora i te ’i’o i taua vāhi ra ;

22 ’E te ivi ’ao’ao ta’u, tā te Fatu te Atua, i rave mai te ta’ata ra, ’ua hāmani ihora vau i te vahine, ’e ’ua arata’i mai ra iāna i te ta’ata ra.

23 ’E ’ua nā ’ō ihora Adamu : ’Ua ’ite au i teienei, e ivi teie nō tō’u nei mau ivi, e ’i’o ho’i nō tō’u nei ’i’o ; e parauhia ’oia e Vahine, nō te mea nō roto mai ’oia i te ta’ata i te noa’ara’a mai.

24 Nō reira e fa’aru’e ai te ta’ata i tōna metua tāne ’e tōna metua vahine, ’e ’a ’ati atu ai i tāna vahine ; ’e e riro ho’i rāua ’ei hō’ē.

25 ’E tē vai taha’a noa ra rāua, te tāne ’e tāna vahine, ’e ’aita rāua i ha’amā.