1 ’E ’ua ha’apa’o Adamu i te reo o te Atua, ’e ’ua parau atu ra i tāna mau tamari’i tamāroa ’ia tātarahapa.

2 ’E ’ua ’ite fa’ahou ihora Adamu i tāna vahine, ’e ’ua fānau mai ra tāna vahine e tamāroa, ’e ’ua ma’iri ihora Adamu i tōna i’oa ’o Seta. ’E ’ua fa’ahanahana atu ra Adamu i te i’oa o te Atua ; ’e ’ua parau ihora ’oia : ’Ua hōro’a mai te Atua i te tahi hua’ai nō’u, ’ei mono ia Abela, tā Kaina i taparahi a’enei.

3 ’E ’ua fa’a’ite mai ra te Atua iāna iho ia Seta, ’e ’aore ho’i ’oia i ’ōrure, ’ua pūpū rā ’oia i te hō’ē tusia tano maita’i, mai tā tōna taea’e ra ’o Abela. ’E ’ua fānau fa’ahou mai tāna e tamāroa, ’e ’ua ma’iri ihora ’oia i tōna i’oa ’o Enosa.

4 ’E ’ua ha’amata ihora teie mau ta’ata i te ti’aoro atu i te i’oa o te Fatu, ’e ’ua ha’amaita’i mai ra te Fatu ia rātou ;

5 ’E ’ua ha’apa’ohia te hō’ē buka ha’amana’ora’a, ’e ’ua pāpa’ihia ho’i te mau mea i roto i te reira nā roto i te reo o Adamu, ’e ’ua hōro’ahia atu ho’i ia rātou ato’a ’o tei ti’aoro atu i te Atua, ’ia pāpa’i nā roto i te vārua fa’aurura’a ;

6 ’E nā roto ia rātou tā rātou mau tamari’i i ha’api’ihia ai ’ia tai’o ’e ’ia pāpa’i, ma te reo mā ’e te vi’ivi’i ’ore.

7 I teienei teie iho Autahu’ara’a, tei vai na i te mātāmua ra, e vai ato’a ïa i te hope’a o teie nei ao.

8 I teienei ’ua parau mai ra Adamu i teie nei tohura’a ’a fa’auruhia ai ’oia e te Vārua Maita’i, ’e e tuatāpapara’a tupuna tei ha’apa’ohia nō te mau tamari’i a te Atua. ’E ’o te buka teie nō te mau u’i o Adamu, ’o tei nā ’ō mai ē : I te mahana ’a hāmani ai te Atua i te ta’ata nei, ’ua hāmani ’oia iāna mai tō te Atua huru ;

9 I te hōho’a o tōna iho tino, i hāmani ai ’oia ia rāua, te tāne ’e te vahine, ’e ’ua ha’amaita’i mai ra ia rāua, ’e ma’iri ihora i tō rāua i’oa ’o Adamu, i te mahana i hāmanihia ai rāua ’e i riro ai ’ei nā vārua ta’ata ora i ni’a i te fenua, ’oia ho’i te ta’ahira’a ’āvae o te Atua ra.

10 ’E ’ua ora ’o Adamu hō’ē hānere ’e toru ’ahuru matahiti, ’e ’ua fānau ihora tāna e tamāroa mai iāna iho te huru, mai te au ho’i i tōna iho hōho’a, ’e ’ua ma’iri ihora ’oia i tōna i’oa ’o Seta.

11 ’E tō Adamu pu’e mahana i muri a’e i tōna fānaura’a ia Seta, e va’u ïa hānere matahiti, ’e ’ua fānau ihora ho’i ’oia e rave rahi mau tamari’i tamāroa ’e mau tamari’i tamāhine ;

12 ’E tō Adamu pu’e mahana tā’āto’a i tōna orara’a, e iva hānere ïa ’e toru ’ahuru matahiti, ’e ’ua pohe ihora ’oia.

13 ’E ’ua ora Seta hō’ē hānere ’e pae matahiti, ’e ’ua fānau ihora tāna ’o Enosa, ’e ’ua tohu ’oia i tōna ra pu’e mahana tā’āto’a, ’e ’ua ha’api’i i tāna tamaiti ia Enosa i te mau haere’a o te Atua ; ’e nō reira ’ua tohu ato’a ’o Enosa.

14 ’E ’ua ora Seta, i muri a’e i tōna fānaura’a ia Enosa, e va’u hānere ’e hitu matahiti, ’e ’ua fānau ihora ho’i ’oia e rave rahi mau tamari’i tamāroa ’e mau tamari’i tamāhine.

15 ’E ’ua rahi roa atu ra te mau tamari’i a te ta’ata i ni’a i te fenua ē ’ati noa a’e. ’E i taua mau mahana ra ’ua rahi roa tō Sātane mana i rotopū i te ta’ata, ’e ’ua fa’a’ārepurepu ihora ’oia i tō rātou mau ’ā’au ; ’e mai reira mai ho’i te tupura’a te mau tama’i ’e te ha’amani’ira’a toto ; ’e ’aro atu ra tō te ta’ata rima i tōna ihora taea’e, nō te taparahi ha’apohe i te ta’ata, nā roto i te mau ’ohipa huna, nō te tītaura’a i te mana.

16 ’E tō Seta pu’e mahana tā’āto’a, e iva hānere ïa ’e hō’ē ’ahuru ’e ma piti matahiti, ’e ’ua pohe ihora ’oia.

17 ’E ’ua ora Enosa e iva ’ahuru matahiti, ’e ’ua fānau ihora tāna ’o Kainana. ’E ’ua haere mai ra ’o Enosa ’e te toe’a o te mau ta’ata o te Atua mai te fenua mai ra nō Sulona, ’e ’ua pārahi ihora i te fenua i fafauhia, ’o tāna i ma’iri i te i’oa o tāna iho tamaiti, ’o tāna i topa i te i’oa ’o Kainana.

18 ’E ’ua ora Enosa, i muri a’e i tōna fānaura’a ia Kainana, e va’u hānere ’e hō’ē ’ahuru ’e ma pae matahiti, ’e ’ua fānau ihora ’oia e rave rahi mau tamari’i tamāroa ’e mau tamari’i tamāhine. ’E tō Enosa pu’e mahana tā’āto’a, e iva hānere ïa ’e pae matahiti, ’e ’ua pohe ihora ’oia.

19 ’E ’ua ora Kainana e hitu ’ahuru matahiti, ’e ’ua fānau ihora tāna ’o Mahalaleela ; ’e ’ua ora noa Kainana i muri a’e i tōna fānaura’a ia Mahalaleela e va’u hānere ’e maha ’ahuru matahiti, ’e ’ua fānau ihora ’oia i te mau tamari’i tamāroa ’e te mau tamari’i tamāhine. ’E tō Kainana pu’e mahana tā’āto’a e iva hānere ïa ’e hō’ē ’ahuru matahiti, ’e ’ua pohe ihora ’oia.

20 ’E ’ua ora Mahalaleela e ono ’ahuru ma pae matahiti, ’e ’ua fānau ihora tāna ’o Iareda ; ’e ’ua ora noa Mahalaleela i muri a’e i tōna fānaura’a ia Iareda, e va’u hānere ’e toru ’ahuru matahiti, ’e ’ua fānau ihora ’oia i te mau tamari’i tamāroa ’e te mau tamari’i tamāhine. ’E tō Mahalaleela pu’e mahana tā’āto’a e va’u hānere ïa ’e iva ’ahuru ma pae matahiti, ’e ’ua pohe ihora ’oia.

21 ’E ’ua ora Iareda hō’ē hānere ’e ono ’ahuru ma piti matahiti, ’e ’ua fānau ihora tāna ’o Enoha ; ’e ’ua ora Iareda i muri a’e i tōna fānaura’a ia Enoha, e va’u hānere matahiti, ’e ’ua fānau ’oia i te mau tamari’i tamāroa ’e te mau tamari’i tamāhine. ’E ’ua ha’api’i Iareda ia Enoha i te mau haere’a ato’a o te Atua.

22 ’E ’o teie te tuatāpapara’a tupuna o te mau tamari’i tamāroa a Adamu, e tamaiti ho’i ’oia nā te Atua, ’o tā te Atua iho i paraparau atu.

23 ’E e mau ta’ata a’o ho’i rātou nō te parauti’a, ’e ’ua paraparau ’e ’ua tohu, ’e ’ua ti’aoro i te mau ta’ata ato’a, i te mau vāhi ato’a, ’ia tātarahapa ; ’e ’ua ha’api’ihia te parau nō te fa’aro’o i te mau tamari’i a te ta’ata.

24 ’E i muri a’era tō Iareda pu’e mahana tā’āto’a, e iva hānere ’e ono ’ahuru ma piti matahiti, ’e ’ua pohe ihora ’oia.

25 ’E ’ua ora noa Enoha e ono ’ahuru ma pae matahiti, ’e ’ua fānau ihora tāna ’o Metusela.

26 ’E i muri a’era ’ua haere atu ra Enoha nā te fenua, i rotopū i te mau ta’ata ; ’e ’a haere ai ’oia, ’ua pou mai ra te Vārua o te Atua mai te ra’i mai, ’e ’ua pārahi ihora i ni’a iāna.

27 ’E ’ua fa’aro’o a’era ’oia i te reo nō te ra’i mai, i te nā-’ō-ra’a mai ē : E Enoha, tā’u tamaiti, ’a tohu na i teie feiā, ’e ’a parau atu ia rātou—’A tātarahapa, tē nā reira mai ra te Fatu : ’Ua riri au i teie nei feiā, ’e ’ua tupu tō’u riri ’ū’ana ia rātou ; nō te mea ’ua fa’a’eta’eta rātou i tō rātou ’ā’au, ’e ’ua turi tō rātou tari’a ’ia fa’aro’o, ’e ’aore tō rātou mata e ’ite i te ātea ;

28 ’E nā roto i teie nei mau u’i e rave rahi, mai te mahana mai ā i hāmani ai au ia rātou, i haere ’ē atu ai rātou, ’e ’ua huna iā’u, ’e ’ua ’imi i tā rātou iho mau a’ora’a i roto i te pōiri ; ’e i roto i tā rātou iho mau ’ohipa ’ino rahi i fa’atupu ai rātou i te taparahi ta’ata, ’e ’aore i ha’apa’o i te mau fa’auera’a ’o tā’u i hōro’a atu i tō rātou ra metua tāne ia Adamu.

29 Nō reira, ’ua tapu ha’avare a’enei rātou rātou iho, ’e, nā tā rātou mau tapura’a ’ua fa’atae mai rātou i te pohe i ni’a ia rātou iho ; ’e ’ua fa’aineine ho’i au i te hade nō rātou, mai te mea ’aita rātou e tātarahapa ;

30 ’E e fa’auera’a mana teie, ’o tā’u i fa’atae atu i te ha’amatara’a o te ao nei, mai roto atu i tō’u iho nei vaha, mai te fa’atumura’ahia mai ā o te reira, ’e nā roto i te vaha o tō’u ra mau tāvini, tō ’outou mau metua, i tu’u atu ai au i te reira, ’e e fa’ataehia atu te reira i roto i te ao nei, ē tae noa atu i tōna ra mau hope’a.

31 ’E ’ia fa’aro’o a’era Enoha i teie mau parau, ’ua tīpapa ihora ’oia i raro i te fenua, i mua i te Fatu, ’e ’ua parau atu ra i mua i te Fatu, nā ’ō atu ra : Nō te aha ho’i i ’ite-au-hia mai ai au i mua ia ’oe na, ’e e tamaiti ’āpī ho’i au, ’e ’ua au ’ore mai ho’i te mau ta’ata iā’u ; e ta’ata reo maumau vau ; ’e nō te aha ho’i au i riro ai ’ei tāvini nō ’oe ?

32 ’E ’ua parau atu ra te Fatu ia Enoha : ’A haere atu ’e ’a rave i tā’u i fa’aue ia ’oe, ’e ’aita te hō’ē ta’ata e pātia noa atu ia ’oe. ’A hāmama i tō ’oe vaha, ’e e fa’a’īhia ïa, ’e nā’u e hōro’a atu i te parau i tō ’oe na vaha, tei roto ho’i i tō’u nei rima te mau ta’ata ora ato’a, ’e e rave au i tei au iā’u nei.

33 ’A parau atu i teie nei feiā : ’A mā’iti ’outou i teie nei mahana, ’ia tāvini i te Fatu te Atua ’o tei hāmani ia ’outou.

34 Inaha, tei ni’a iho tō’u Vārua ia ’oe, nō reira e fa’ati’a vau i tā ’oe ato’a mau parau ; ’e e haere ’ē atu te mau mou’a mai mua atu ia ’oe, ’e e tīpu’u ’ē atu te mau ’ānāvai pape i tō rātou ra tahera’a ; ’e ’ei roto ’oe iā’u nei e pārahi ai, ’e ’ei roto vau ia ’oe ; nō reira, ’a haere mai nā muri iho iā’u.

35 ’E ’ua parau atu ra te Fatu ia Enoha, nā ’ō atu ra iāna : ’A fa’atāvai na i tō ’oe mata i te repo ’araea, ’e ’a horoi ai, ’e e ’ite ’oe. ’E ’ua nā reira ihora ’oia.

36 ’E ’ua ’ite atu ra ’oia i te mau vārua tā te Atua i hāmani ; ’e ’ua ’ite ato’a ’oia i te mau mea tei ’ore ā i hi’ohia e te mata tāhuti nei ; ’e mai te reira mai taime ’ua parauhia teie parau nā roto i te fenua tā’āto’a : E hi’o tā te Fatu i fa’atupu nō tōna ra feiā.

37 ’E i muri a’era ’ua haere atu ra Enoha nā te fenua ato’a, i rotopū i te mau ta’ata, i te ti’ara’a i ni’a i te mau ’āivi ’e te mau vāhi teitei, ’e ’ua ti’aoro atu ra ma te reo ’ū’ana, i te fa’ahapara’a atu i tā rātou ra mau ’ohipa ; ’e ’ua ’ino’ino te mau ta’ata ato’a nōna.

38 ’E ’ua haere mai ra rātou e fa’aro’o iāna, i ni’a i te mau vāhi teitei, i te paraura’a atu i te mau tīa’i ti’ahapa : ’A pārahi ’outou i’ō nei ’e ’a tīa’i i te mau ti’ahapa, ’a haere atu ai mātou i ’ō ra ’ia hi’o i te hi’o, tē tohu mai ra ho’i ’oia, ’e tē vai nei te hō’ē mea huru ’ē mau i te fenua nei ; e ta’ata ’ōviri tei tae mai i rotopū ia tātou nei.

39 ’E i muri a’era ’ia fa’aro’o a’era rātou iāna, ’aore atu ra e ta’ata i fa’atoro noa atu i te rima i ni’a iāna ; mata’u a’era rātou ato’a ’o tei fa’aro’o iāna ; nō te mea i haere na ’oia nā muri i te Atua.

40 ’E ’ua haere mai ra te hō’ē ta’ata iāna, ’o Mahaita tōna i’oa, ’e ’ua nā ’ō mai ra iāna : ’A fa’a’ite pāpū mai ia mātou ē ’o vai ’oe, ’e nō hea mai ’oe ?

41 ’E ’ua parau atu ra ’oia ia rātou : I haere mai au nō te fenua mai nō Kainana, te fenua o tō’u ra mau metua, e fenua parauti’a ē tae roa mai i teie nei ā mahana. ’E ’ua ha’api’i mai tō’u metua tāne iā’u i te mau haere’a ato’a o te Atua.

42 ’E i muri a’era, ’a haere atu ai au mai te fenua ra nō Kainana, nā te pae miti i te hiti’a o te rā, ’ua ’ite au i te hō’ē ’ōrama ; ’e inaha, ’ua ’ite au i te mau ra’i, ’e ’ua paraparau mai te Fatu iā’u, ’e ’ua hōro’a mai ra i te fa’auera’a iā’u ; nō reira, nō teie tumu, nō te ha’apa’o i teie fa’auera’a, tē parau atu nei au i teie mau parau.

43 ’E ’ua tāmau noa Enoha i tāna parau, i te nā-’ō-ra’a : Te Fatu ’o tei parau mai iā’u ra, ’o te Atua ato’a ïa o te ra’i ra, ’e ’o ’oia ho’i tō’u Atua, ’e ’o tō ’outou Atua, ’e e taea’e ’outou nō’u, ’e nō te aha ho’i ’outou e a’o noa ai ia ’outou iho, ’e ’a huna ai i te Atua o te ra’i ra ?

44 Nāna i hāmani i te mau ra’i ; te fenua nei o tōna ïa ta’ahira’a ’āvae ; ’e te niu o te reira, nāna ïa. Inaha, nāna i ha’amau i te reira, ’e te mau tī’a’a ta’ata e rave rahi ra ’o tāna ïa i hōpoi mai i ni’a i te reira.

45 ’E ’ua tae mai te pohe i ni’a i tō tātou mau metua ; ’āre’a rā ’ua ’ite tātou ia rātou, ’e ’aore roa e ti’a ’ia huna, ’e ’oia ato’a ’ua ’ite tātou i te ta’ata mātāmua o te mau ta’ata ato’a, ’o Adamu ïa.

46 ’E e buka ha’amana’ora’a ho’i tā tātou i pāpa’i i rotopū ia tātou nei, mai te au i te hōho’a i hōro’ahia mai e te rima o te Atua ; ’e ’ua hōro’ahia mai ho’i te reira i roto i tō tātou iho reo.

47 ’E ’a parau atu ai Enoha i te mau parau a te Atua ra, ’ua rurutaina ihora te mau ta’ata, ’e ’aore atu ra i ti’a ia rātou ’ia ti’a i mua i tōna ra aro.

48 ’E ’ua parau atu ra ’oia ia rātou : Nō te mea ’ua hi’a Adamu, i vai ai tātou ; ’e nā roto i tōna ra hi’ara’a i tae mai ai te pohe ; ’e nō reira ’ua fāri’i tātou i te māuiui ’e te ’oto.

49 Inaha, ’ua tae mai Sātane i rotopū i te mau tamari’i a te ta’ata, ’e ’ua fa’ahema mai ra ia rātou ’ia ha’amori iāna ; ’e ’ua riro ihora te ta’ata ’ei feiā ha’apa’o i tā te tino, i tā te mea faufau, ’e tā te diabolo, ’e ’ua ’ōpanihia rātou mai mua atu i te aro o te Atua.

50 ’Āre’a rā ’ua fa’a’ite mai te Atua i tō tātou mau metua ē ’ia tātarahapa te mau ta’ata ato’a e ti’a ai.

51 ’E ’ua parau mai ’oia i tō tātou metua ia Adamu i tōna iho reo, nā ’ō mai ra : ’O te Atua vau ; nā’u i hāmani i te ao nei, ’e te mau ta’ata hou rātou i fāri’i ai i te tino ’i’o.

52 ’E ’ua parau ato’a mai ra ’oia iāna : Mai te mea e fāriu mai ’oe iā’u nei, ’e e ha’apa’o mai i tō’u nei reo, ’e e ti’aturi, ’e e tātarahapa i tā ’oe ra mau hapa ato’a nō te ’ōfatira’a i te ture, ’e e bāpetizohia i roto i te pape, i roto i te i’oa o tā’u ra Tamaiti fānau tahi, ’o tei ’ī i te aroha ’e te parau mau, ’oia ’o Iesu Mesia, ’o te i’oa hō’ē roa ra ’o tei hōro’ahia mai i raro a’e i te ra’i e tae mai ai te ora i te mau tamari’i a te ta’ata, e fāri’i ïa ’oe i te hōro’a nō te Vārua Maita’i, ma te ani atu i te mau mea ato’a i tōna ra i’oa, ’e te mau mea ato’a tā ’oe e ani ra, e hōro’ahia atu ïa ia ’oe.

53 ’E ’ua parau atu ra tō tātou metua ’o Adamu i te Fatu, nā ’ō atu ra : Nō te aha e mea ti’a i te ta’ata ’ia tātarahapa ’e ’ia bāpetizohia i roto i te pape ? ’E ’ua parau mai ra te Fatu ia Adamu : Inaha, ’ua fa’a’ore au i tā ’oe hapa nō te ’ōfatira’a i te ture i roto i te ’Ō i Edene ra.

54 Nō reira ho’i i tae mai ai te parau i rotopū i te mau ta’ata ē : ’Ua riro te Tamaiti a te Atua ’ei tāra’ehara nō te hape tumu mātāmua, e ’ore ai te mau hara a te mau metua e tae ai i ni’a iho i te upo’o o te mau tamari’i, e mea mā ho’i rātou mai te fa’atumura’ahia mai ā o te ao nei.

55 ’E ’ua parau mai ra te Fatu ia Adamu, i te nā-’ō-ra’a : Nō te mea ē ’ua fānauhia tā ’oe mau tamari’i i roto i te hara, ’e mai te reira ato’a ’ia ha’amata rātou i te tupu i te pa’ari, e tupu ato’a ïa te hara i roto i tō rātou ’ā’au, ’e e tāmata rātou i te maramara, ’ia ti’a ia rātou ’ia ’ite i te faufa’a rahi o te maita’i.

56 ’E ’ua hōro’ahia ia rātou te ’ite i te maita’i ’e te ’ino ; nō reira e ti’amāra’a tō rātou, ’e ’ua hōro’a atu vau ia ’outou te tahi atu ā ture ’e te fa’auera’a.

57 Nō reira ’a ha’api’i atu i te reira i tā ’outou mau tamari’i, ’ia tātarahapa te mau ta’ata ato’a, i te mau vāhi ato’a, e ti’a ai ; ’e ’ia ’ore rā, e ’ore ïa e noa’a ia rātou te bāsileia o te Atua, ’aore ho’i te mea vi’ivi’i e ti’a ’ia pārahi i reira, ’e ’aore ato’a e pārahi i mua i tōna aro ; ’e nā roto ho’i i te reo o Adamu, ’o Ta’ata Mo’a tōna i’oa ; ’e te i’oa o tāna Fānau tahi ’o te Tamaiti a te Ta’ata ïa ; ’oia ’o Iesu Mesia, te Ha’avā parauti’a, ’o tē tae mai i te ’āfa ti’a o te mau tau.

58 Nō reira tē hōro’a atu nei au i te hō’ē fa’auera’a ia ’oe, ’ia ha’api’i atu i teie mau mea i tā ’outou mau tamari’i ma te tāpe’apea ’ore, i te nā-’ō-ra’a ē :

59 Nō te ’ōfatira’ahia te ture i tae mai ai te hi’ara’a, ’e nō te hi’ara’a i tae mai ai te pohe, ’e nō te mea ’ua fānauhia ’outou i roto i te ao nei nā roto i te pape, ’e te toto, ’e te vārua, ’o tā’u ho’i i hāmani, ’e i riro mai nei te repo fenua ’ei vārua ta’ata ora, ’e nā reira ato’a ’ia fānau-fa’ahou-hia ’outou i roto i te bāsileia o te ao ra e ti’a ai, nā roto i te pape, ’e te Vārua, ’e ’ia tāmāhia e te toto, ’oia te toto o tā’u ra Fānau tahi ; ’ia ti’a ia ’outou ’ia ha’amo’ahia i te mau hara ato’a ra, ’e ’ia ’oa’oa i te mau parau o te ora mure ’ore i roto i teie nei ao, ’e te ora mure ’ore i te ao a muri atu, ’oia te hanahana tāhuti ’ore ;

60 Nā roto ho’i i te pape e ha’apa’o ai ’outou i te fa’auera’a ; nā roto i te Vārua e fa’ati’ahia ai ’outou, ’e nā roto i te toto e ha’amo’ahia ai ’outou ;

61 Nō reira ’ua hōro’ahia te reira ’ia vai i roto ia ’outou ; te ’itera’a pāpū nō te ao ra ; te Fa’aa’o ; te mau mea hau o te hanahana tāhuti ’ore ; te parau mau o te mau mea ato’a ; ’o tē hōro’a i te ora i te mau mea ato’a, ’o tē fa’aora ho’i i te mau mea ato’a ra ; ’o tei ’ite ho’i i te mau mea ato’a, ’e tei iāna pā’āto’a ra te mana mai te au i te pa’ari, te aroha, te parau mau, te ti’a, ’e te parau hapa ’ore.

62 ’E i teienei, inaha, tē parau atu nei au ia ’oe : ’O te ’ōpuara’a teie nō te fa’aorara’a o te mau ta’ata ato’a, nā roto i te toto o tā’u ra Fānau tahi, ’o tē tae mai i te ’āfa ti’a o te mau tau ra.

63 ’E inaha, tē vai ra tō te mau mea ato’a iho hōho’a, ’e ’ua hāmanihia te mau mea ato’a nō te fa’a’ite pāpū atu i te parau nō ni’a iā’u nei, te mau mea o te pae tino, ’e te mau mea o te pae vārua ; te mau mea i roto i te mau ra’i i ni’a, ’e te mau mea i ni’a i te fenua nei, ’e te mau mea i roto i te fenua, ’e te mau mea i raro a’e i te fenua, tō ni’a ’e tō raro ; ’o te mau mea ato’a ïa ’o tē fa’a’ite atu i te parau nō ni’a iā’u nei.

64 ’E i muri a’era, ’a parau mai ai te Fatu ia Adamu, tō tātou metua, ’ua ti’aoro atu ra Adamu i te Fatu, ’e ’ua rave-’ē-hia atu ra ’oia e te Vārua o te Fatu, ’e ’ua hōpoihia atu ra i raro i roto i te pape, ’e ’ua tu’uhia i raro a’e i te pape, ’e ’ua fa’ati’ahia mai mai raro mai i te pape ra.

65 ’E ’ua nā-reira-hia ’oia i te bāpetizora’ahia, ’e ’ua pou mai ra te Vārua o te Atua i ni’a iho iāna, ’e ’ua nā-reira-hia ’oia i te fānaura’ahia e te Vārua, ’e ’ua riro ’oia ’ei ta’ata ora ’o roto.

66 ’E ’ua fa’aro’o a’era ’oia i te hō’ē reo mai te ra’i mai, i te nā-’ō-ra’a mai ē : ’Ua bāpetizohia ’oe i te auahi, ’e i te Vārua Maita’i. ’O te parau fa’a’ite teie a te Metua, ’e te Tamaiti, mai teie nei ē a muri noa atu ;

67 ’E tei roto ’oe i tāna fa’aterera’a, ’aore ho’i tōna e mau mahana ha’amatara’a ’e ’aore ho’i e mau matahiti fa’ahope’ara’a, mai te tau mure ’ore ē tae noa atu i te tau mure ’ore.

68 Inaha, hō’ē ’oe i roto iā’u nei, e tamaiti nā te Atua ; ’e mai te reira ho’i e ti’a ai ia rātou ato’a ’ia riro ’ei mau tamaiti nā’u. ’Āmene.