1 ’E i muri a’era ’ua tāmau noa atu ra Enoha i tāna mau parau, i te nā-’ō-ra’a : Inaha, ’ua ha’api’i mai tō tātou metua ’o Adamu i teie mau mea, ’e e rave rahi ho’i tei ti’aturi ’e ’ua riro ’ei mau tamari’i tamāroa nā te Atua, ’e e rave rahi ato’a tei ’ore i ti’aturi, ’e ’ua pohe ana’e ïa i roto i tā rātou mau hara, ’e te tīa’i ra ma te mata’u ’e te mamae, i tō te Atua riri ’ū’ana o te pohe rahi, ’o tē nīni’ihia i ni’a ia rātou.

2 ’E mai taua taime atu ra ’ua ha’amata Enoha i te tohu, ma te parau atu i taua feiā ra ē : I tō’u haerera’a atu, ’e ’a ti’a ai au i ni’a iho i te vāhi ra ’o Mahuta, ’e ’a ti’aoro atu ai i te Fatu ra, ’ua tae mai ra te hō’ē reo nō roto mai i te ra’i, i te nā-’ō-ra’a mai ē : ’A fāriu, ’e ’a haere i ni’a i te mou’a ra ’o Simeona.

3 ’E i muri a’era ’ua fāriu a’era vau ’e haere atu ra i ni’a i te mou’a ; ’e ’a ti’a ai au i ni’a i te mou’a, ’ua ’ite atu ra vau i te mau ra’i i te vēteara’a, ’e ’ua fa’a’ahuhia vau i te hanahana ;

4 ’E ’ua ’ite au i te Fatu ; ’e ’ua ti’a mai ’oia i mua i tō’u aro, ’e ’ua paraparau mai ’oia iā’u, mai te ta’ata ho’i e paraparau te tahi i te tahi ra, te mata ’e te mata ; ’e ’ua nā ’ō mai ra ’oia iā’u : ’A hi’o na, ’e e fa’a’ite atu vau ia ’oe i te ao nei i roto i te mau u’i e rave rahi.

5 ’E i muri a’era ’ua ’ite atu ra vau i roto i te peho ra nō Suma, ’e inaha, e nūna’a rahi tē pārahi ra i roto i te mau ti’ahapa, ’oia te feiā nō Suma ra.

6 ’E ’ua parau fa’ahou mai ra te Fatu iā’u : ’A hi’o na ; ’e ’ua hi’o atu ra vau i te pae apato’erau, ’e ’ua ’ite atu ra vau i te feiā nō Kanaana, ’o tē pārahi ra i roto i te mau ti’ahapa.

7 ’E ’ua parau mai ra te Fatu iā’u : ’A tohu ; ’e ’ua tohu ihora vau, i te nā-’ō-ra’a ē : Inaha, e haere atu te feiā nō Kanaana, e rave rahi ho’i rātou, nō te ’aro atu i te feiā nō Suma, ’e e taparahi ia rātou ’e ’ia ha’amou-roa-hia ; ’e e vāhi te feiā nō Kanaana ia rātou iho i ni’a i te fenua, ’e e vai ano noa te fenua ma te fa’ahotu ’ore, ’e ’aore e feiā ’ē atu e pārahi i reira, maori rā te feiā nō Kanaana ;

8 Inaha ho’i, e ’anatema te Fatu i te fenua i te ve’ave’a rahi, ’e e vai ano noa te fenua ē a muri noa atu ; ’e ’ua tae mai te ’ere’ere i ni’a i te ’iri o te mau tamari’i ato’a o Kanaana, ’e ’ua vahavahahia rātou i rotopū i te ta’ata ato’a ra.

9 ’E i muri a’era ’ua parau mai ra te Fatu iā’u : ’A hi’o na ; ’e ’ua hi’o atu ra vau, ’e ’ua ’ite atu ra vau i te fenua ra nō Sarona, ’e te fenua ra nō Enoha, ’e te fenua ra nō Omonera, ’e te fenua ra nō Heni, ’e te fenua ra nō Sema, ’e te fenua ra nō Hanera, ’e te fenua ra nō Hananiha, ’e te mau ta’ata ato’a i ni’a iho ;

10 ’E ’ua parau mai ra te Fatu iā’u : ’A haere atu i teie nei feiā, ’e ’a parau atu ia rātou—’A tātarahapa, ’o te haere mai au e tā’iri ia rātou i te ’anatema, ’e ’a pohe atu ai rātou ra.

11 ’E ’ua hōro’a mai ra ’oia i te hō’ē fa’auera’a iā’u ’ia bāpetizo vau nā roto i te i’oa nō te Metua, ’e nō te Tamaiti, ’o tei ’ī i te aroha ’e te parau mau, ’e nō te Vārua Maita’i, ’o tei riro ’ei fa’a’ite pāpū nō te Metua ’e te Tamaiti.

12 ’E i muri a’era ’ua tāmau noa atu ra Enoha i te ti’aoro atu i te mau ta’ata ato’a ’ia tātarahapa, maori rā i te mau ta’ata nō Kanaana ;

13 ’E nō te rahi o te fa’aro’o o Enoha ’ua arata’i atu ra ’oia i te mau ta’ata o te Atua, ’e ’ua haere mai ra tō rātou mau ’enemi e ’aro ia rātou ; ’e ’ua parau atu ra ’oia i te parau a te Fatu, ’e ’ua rurutaina ihora te fenua, ’e ’ua reva ’ē atu ra te mau mou’a, mai te au i tāna ra parau ; ’e ’ua tīpu’u ’ē atu ra te mau ’ānāvai pape i tō rātou tahera’a, ’e ’ua fa’aro’ohia te ’ū’uru o te mau liona nā te mēdēbara mai ; ’e ’ua mata’u rahi roa a’era tō te mau nūna’a ato’a, i te pūai rahi o te parau a Enoha, ’e i te mana rahi o te reo tā te Atua i hōro’a iāna ra.

14 ’E ’ua mara’a ato’a mai ra te hō’ē fenua i ni’a nō raro mai i te hōhonura’a o te moana, ’e nō te rahi o te mata’u o te mau ’enemi o te feiā o te Atua, ’ua horo ’ē atu ra rātou e ti’a ana’e atu ra i te ātea ’ē ra e haere atu ra i ni’a i te fenua ’o tei mara’a mai i ni’a nō raro mai i te hōhonura’a o te moana ra.

15 E ti’a ato’a atu ra te mau ta’ata tino rarahi o te fenua i te ātea ’ē ; ’e ’ua tae atu ra te ’anatema i ni’a i te mau ta’ata ato’a ’o tei ’aro i te Atua.

16 ’E mai taua taime mai ra ’ua vai noa te tama’i ’e te ha’amani’ira’a toto i rotopū ia rātou ; ’ua haere mai rā te Fatu ’e ’ua pārahi i pīha’i iho i tōna ra feiā, ’e ’ua ora noa ihora rātou ma te parauti’a.

17 ’Ua tae mai te mata’u o te Fatu i ni’a i te mau nūna’a ato’a, ’e ’ua rahi roa te hanahana o te Fatu, ’o tei tae mai i ni’a i tōna ra feiā. ’E ’ua ha’amaita’i ihora te Fatu i te fenua, ’e ’ua ha’amaita’ihia rātou i ni’a i te mau mou’a, ’e i ni’a i te mau vāhi teitei, ’e ruperupe ihora.

18 ’E ’ua ma’iri ihora te Fatu i te i’oa o tōna ra feiā, ’o Ziona, nō te mea hō’ē ā tō rātou ’ā’au ’e hō’ē ā tō rātou ferurira’a, ’e ’ua ora noa ihora rātou ma te parauti’a ; ’e ’aore e ta’ata veve i rotopū ia rātou.

19 ’E ’ua tāmau noa atu ra Enoha i tāna a’ora’a ma te parauti’a i te feiā o te Atua. ’E i muri a’era, i tōna ihora mau mahana, ’ua patu ’oia i te hō’ē ’oire ’e ’ua ma’irihia te i’oa, te ’Oire Mo’a, ’oia ho’i ’o Ziona.

20 ’E i muri a’era ’ua paraparau atu ra Enoha i te Fatu, ’e ’ua nā ’ō atu ra ’oia i te Fatu : E mea pāpū e pārahi Ziona ma te hau ē a muri noa atu. ’Āre’a rā ’ua nā ’ō mai ra te Fatu ia Enoha : ’Ua ha’amaita’i au ia Ziona, ’āre’a te toe’a o te ta’ata ra ’ua ’anatema ïa vau.

21 ’E i muri a’era ’ua fa’a’ite mai ra te Fatu ia Enoha i te mau ta’ata ato’a o te fenua nei ; ’e ’ua ’ite ’oia, ’e inaha, i te tau i ha’apa’ohia ra, ’ua hōpoihia atu Ziona i ni’a i te ra’i. ’E ’ua parau mai ra te Fatu ia Enoha : ’A hi’o na i tō’u pārahira’a ē a muri noa atu.

22 ’E ’ua ’ite ato’a atu ra Enoha i te toe’a o te mau ta’ata ’oia te mau tamaiti a Adamu ; ’e e feiā ’āno’i-noa-hia rātou pā’āto’a i te hua’ai o Adamu, ’eiaha rā te hua’ai o Kaina, nō te mea e mea ’ere’ere te hua’ai o Kaina, e ’aore tō rātou e vāhi pārahira’a i rotopū ia rātou.

23 ’E i muri a’e i tō Ziona hōpoira’ahia i ni’a i te ra’i, ’ua hi’o atu ra Enoha, e inaha, tei mua iāna te mau nūna’a atoa o te fenua nei ;

24 ’E ’ua ’itehia terā u’i ’e terā u’i ; ’e ’ua teitei roa Enoha ’e ’ua ’āfa’ihia ’oia i ni’a roa, ’oia i te ’ōuma o te Metua, ’e o te Tamaiti a te Ta’ata ; ’e inaha, tei ni’a mai ra te mana o Sātane i te fenua ato’a.

25 ’E ’ua ’ite atu ra ’oia i te mau melahi i te poura’a mai mai te ra’i mai ; ’e ’ua fa’aro’o ihora ’oia i te hō’ē reo pūai i te nā-’ō-ra’a mai ē : ’Atae, ’atae ho’i te feiā e pārahi nei i ni’a i te fenua nei.

26 ’E ’ua ’ite atu ra ’oia ia Sātane ; ’e e fifi rahi tei roto i tōna rima, ’e ’ua tāpo’i te reira i te fenua tā’āto’a i te pōiri ; ’e ’ua hi’o ’oia i ni’a ’e ’ua ’ata, ’e ’ua ’oa’oa tāna ra mau melahi.

27 ’E ’ua ’ite atu ra Enoha i te mau melahi i te poura’a mai mai te ra’i mai, i te fa’a’ite-pāpū-ra’a mai nō ni’a i te Metua ’e te Tamaiti, ’e ’ua ma’iri mai ra te Vārua Maita’i i ni’a i te mau ta’ata e rave rahi, ’e ’ua hōpoihia atu ra rātou e te mau mana nō te ra’i mai i roto ia Ziona.

28 ’E i muri a’era ’ua hi’o mai ra te Atua o te ra’i i te toe’a o te mau ta’ata, ’e ’ua ’oto ihora ’oia ; ’e ’ua fa’a’ite pāpū mai ra Enoha i te reira, i te nā-’ō-ra’a ē : E aha ho’i te mau ra’i i ’oto ai, ’e i fa’atahe ai i tō rātou mau roimata mai te ua i ni’a iho i te mau mou’a ra ?

29 ’E ’ua parau atu ra Enoha i te Fatu : E aha ho’i e ti’a ai ia ’oe ’ia ’oto, nō te mea e mea mo’a ’oe, mai te tau mure ’ore ē tae noa atu i te tau mure ’ore

30 ’E ’āhiri e ti’a i te ta’ata ’ia tai’o i te mau mea hu’ahu’a o te fenua nei, ’oia ïa, i te mau fenua e rave rahi milioni mai teie, e ’ere ā ïa i te ha’amatara’a o tā ’oe ra mau mea i hāmanihia ; ’e tē vai-fa’atoro-noa-hia atu ra tā ’oe ra mau pāruru ; ’e tei reira ā ïa ’oe, ’e tei reira ato’a tō ’oe ’ōuma ; ’e ’ua ti’a mau ā ho’i ’oe ; ’e e mea aroha ho’i ’oe ’e te marū ē a muri noa atu ;

31 ’E ’ua rave atu ’oe ia Ziona i tō ’oe na ’ōuma, nō roto mai i te mau mea ato’a tā ’oe i hāmani, mai te tau mure ’ore ē tae noa atu i te tau mure ’ore ; ’e te fa’aeara’a o tō ’oe ra terōno, ’o te hau ïa, ’e te parauti’a, ’e te parau mau, ’e ’aore atu ā ; e nā mua atu te aroha i tō ’oe mata ’e ’aore tō te reira e hope’a ; e aha ïa e ti’a ai ia ’oe ’ia ’oto ?

32 ’Ua parau mai ra te Fatu ia Enoha : ’A hi’o na i tō ’oe mau taea’e ; ’o tā’u i hāmani i tō’u iho nei rima, ’e ’ua hōro’a vau ia rātou i tō rātou ’ite, i te mahana i hāmani ai au ia rātou ; ’e i roto i te ’Ō i Edene i hōro’a atu ai au i te ta’ata tōna ti’amāra’a ;

33 ’E ’ua parau atu vau i tō ’oe mau taea’e, ’e ’ua hōro’a ato’a atu i te fa’auera’a ia rātou, ’ia aroha rātou rātou iho, ’e ’ia mā’iti rātou iā’u, tō rātou Metua ; inaha rā, ’aore tō rātou e aroha, ’e ’ua au ’ore rātou i tō rātou iho toto ;

34 ’E ’ua ’ama te auahi o tō’u nei riri ia rātou ; ’e i roto i tō’u nei māuruuru ’ore e fa’atae atu ai au i te mau vai ha’ono i ni’a ia rātou, ’e ’ua rahi na ho’i tō’u riri ’ū’ana ia rātou ra.

35 Inaha, ’o te Atua vau ; te Ta’ata Mo’a ’o tō’u ïa i’oa ; te Ta’ata A’o ’o tō’u ïa i’oa ; ’e te Hope’a ’Ore ’e te Mure ’Ore ’o tō’u ato’a ïa i’oa.

36 Nō reira, e ti’a iā’u ’ia fa’atoro atu i tō’u nei rima ’e ’ia tāpe’a i te mau mea ato’a tā’u i hāmani ; ’e e ti’a ato’a i tō’u nei mata ’ia ’ite ia rātou ; ’e i roto i te mau mea ato’a i hāmanihia e tō’u nei rima ’aore ïa e ’ino i hau atu i te rahi mai teie i rotopū i tō ’oe ra mau taea’e.

37 Inaha rā, ’ei ni’a iho tā rātou mau hara i te upo’o o tō rātou mau metua ; e riro Sātane ’ei metua nō rātou, ’e ’o te māuiui ho’i tā rātou ra utu’a ; ’e e ’oto tō te mau ra’i ato’a ia rātou, ’oia ato’a te mau mea ato’a tā tō’u rima i hāmani ; nō reira e ’ere ānei ïa i te mea ti’a ’ia ’oto te mau ra’i, i te ’itera’a ē e māuiui rātou ?

38 Inaha rā, te feiā tā tō ’oe mata e hi’o atu nei, e pohe ïa i roto i te mau vai ha’ono ; ’e inaha, e tāpe’a vau ia rātou ; e fare tāpe’ara’a ho’i tā’u i fa’aineine nō rātou.

39 ’E ’o ’oia tā’u i mā’iti, ’ua ti’aoro mai ïa i mua i tō’u aro. Nō reira, e māuiui ’oia nō tā rātou mau hara ; mai te mea e tātarahapa rātou i te mahana roa e ho’i mai ai tā’u i Mā’iti iā’u nei, ’e e vai noa ïa rātou i roto i te pahipahi ē tae noa atu i taua mahana ra ;

40 Nō reira, nō teie tumu te mau ra’i e ’oto ai, ’oia ïa, ’e te mau mea ato’a i hāmanihia e tō’u nei rima.

41 ’E i muri a’era ’ua parau atu ra te Fatu ia Enoha, ’e ’ua fa’a’ite ia Enoha i te mau mea ato’a i ravehia e te mau tamari’i a te ta’ata ; nō reira ’ua ’ite Enoha, ’e ’ua hi’o i tā rātou mau ’ohipa ’ī’ino, ’e tō rātou māuiui, ’e ’ua ’oto ihora ’e ’ua fa’atoro atu ra i tōna nā rima, ’e ’ua rahi roa te māuiui o tōna māfatu ; ’e ’ua mihi ihora tōna ’ā’au ; ’e ’ua rurutaina a’era te mau mea mure ’ore ato’a.

42 ’E ’ua ’ite ato’a atu ra Enoha ia Noa ’e tōna ra ’utuāfare ; ’e e fa’aorahia te hua’ai o te mau tamaiti ato’a a Noa i te fa’aorara’a pae tino nei ;

43 Nō reira ’ua ’ite atu ra Enoha ē ’ua hāmani Noa i te pahī ; ’e ’ua māuruuru te Fatu i te reira, ’e ’ua tāpe’a i te reira i roto i tōna rima ; ’āre’a rā te toe’a o te feiā hara ra ’ua tae mai te mau vai ha’ono i ni’a iho ia rātou ’e ’ua horomi’i ia rātou.

44 ’E i tō Enoha ’itera’a i te reira, ’ua maramara roa a’era tōna vārua, ’e ’ua ’oto ihora nō tōna ra mau taea’e, ’e ’ua parau atu ra i te mau ra’i : Tē pāto’i nei au ’ia tāmāhanahanahia vau ; ’ua parau mai rā te Fatu ia Enoha : ’A fa’ateitei mai na i tō ’oe na ’ā’au i ni’a, ’e ’a ’oa’oa ; ’e ’a hi’o na.

45 ’E i muri a’era ’ua hi’o atu ra Enoha, ’e ’ua ’ite atu ra ’oia i te mau ’utuāfare ato’a o te fenua nei, mai ia Noa roa mai ; ’e ’ua ti’aoro atu ra ’oia i te Fatu, nā ’ō atu ra : Afea te mahana o te Fatu e tae mai ai ? Afea te toto o te Parauti’a e ha’amani’ihia ai, ’ia ha’amo’ahia rātou ato’a ’o tei ’oto ra ’e ’ia roa’a ia rātou te ora mure ’ore ?

46 ’E ’ua parau mai ra te Fatu : ’Ia tae i te ’āfa ti’a o te mau tau ra, i te mau mahana nō te mau ’ohipa ’ī’ino ’e te tāho’o ra.

47 ’E inaha, ’ua ’ite atu ra Enoha i te mahana nō te taera’a mai o te Tamaiti a te Ta’ata, ’oia ïa, i roto i te tino ; ’e ’ua ’oa’oa a’era tōna vārua, nā ’ō ihora : ’Ua fa’ateiteihia te Parauti’a i ni’a, ’e ’ua taparahihia te ’Ārenio mai te fa’atumura’ahia mai ā o te ao nei ; ’e nā roto i te fa’aro’o tei roto vau i te ’ōuma o te Metua, ’e inaha, tei iā’u nei Ziona.

48 ’E i muri a’era ’ua hi’o atu ra Enoha i ni’a i te fenua ; ’e ’ua fa’aro’o ihora ’oia i te hō’ē reo nō reira mai, i te nā-’ō-ra’a ē : ’Atae, ’atae ho’i au, te metua vahine o te ta’ata ; ’ua māuiui au, ’ua rohirohi au nō te mau ’ohipa ’ī’ino a tā’u mau tamari’i. Afea vau e fa’afa’aea ai, e tāmāhia ai i te vi’ivi’i tei haere nō roto atu iā’u ? Afea Tei Hamani iā’u e ha’amo’a mai ai iā’u, ’ia ti’a iā’u ’ia fa’afa’aea, ’ia vai te parauti’a i ni’a iā’u nō te hō’ē tau ?

49 ’E i tō Enoha fa’aro’ora’a i te fenua i te ’otora’a, ’ua ta’i ihora ’oia, ’e ’ua ti’aoro atu ra i te Fatu, nā ’ō atu ra : E te Fatu, ’aita ānei ’oe e aroha i te fenua ? ’Aita ānei ’oe e ha’amaita’i i te mau tamari’i a Noa ?

50 ’E i muri a’era ’ua tāmau noa atu ra Enoha i te ti’aoro i te Fatu, i te nā-’ō-ra’a atu : Tē ani atu nei au ia ’oe, e te Fatu, nā roto i te i’oa o tā ’oe ra Fānau tahi, ’oia ’o Iesu Mesia, ’ia aroha mai ’oe ia Noa ’e tōna ra hua’ai, ’ia ’ore te fenua ’ia tāpo’i-fa’ahou-hia ’e te mau vai ha’ono.

51 ’E ’aore i ti’a i te Fatu ’ia tāpe’a ; ’e ’ua fafau a’era ’oia ia Enoha, ’e tapu atu ra ho’i iāna i te tapu ē, e tāpe’a ’oia i te mau vai ha’ono ; ’e e ti’aoro atu ho’i ’oia i te mau tamari’i a Noa ;

52 ’E ’ua tu’u atu ra ’oia i te fa’auera’a mana ’o tē ’ore e ti’a ’ia tauihia, ’oia ho’i, e ’itea-noa-hia te toe’a o tōna ra hua’ai i rotopū i te mau nūna’a ato’a, ’a vai noa ai te fenua nei ;

53 ’E ’ua parau a’era te Fatu : E ao tōna e nā roto mai i tōna ra hua’ai te Mesia e tae mai ai ; tē nā ’ō mai ra ho’i ’oia ē—’O te Mesia vau, te Ari’i o Ziona, te Mato o te Ra’i ; e mea ’ā’ano ïa mai te tau mure ’ore ra ; ’o tē haere mai i roto nā te ’ūputa ’e ’o te pa’uma mai i ni’a i pīha’i iho iā’u e ’ore roa ïa e ma’iri ; nō reira, e ao tō rātou ’o tā’u i fa’ahiti, nō te mea e haere mai rātou ma te mau hīmene ’oa’oa mure ’ore ra.

54 ’E i muri a’era ’ua ti’aoro atu ra Enoha i te Fatu, nā ’ō atu ra : ’Ia tae mai te Tamaiti a te Ta’ata i roto i te tino, e fa’afa’aea ānei te fenua ? Tē pure atu nei au ia ’oe, ’a fa’a’ite mai na i teie mau mea iā’u nei.

55 ’E ’ua parau mai ra te Fatu ia Enoha : ’A hi’o na, ’e ’ua hi’o atu ra ’oia, ’e ’ua ’ite atu ra ’oia i te Tamaiti a te Ta’ata i te fa’ateiteira’ahia i ni’a i te sātauro, mai te peu a te ta’ata nei ;

56 ’E ’ua fa’aro’o a’era ’oia i te hō’ē reo pūai ; ’e ’ua vehihia a’era te mau ra’i ; ’e ’ua ’oto ihora te mau mea ato’a tā te Atua i hāmani ; ’e ’ū’uru ihora te fenua ; ’e ’ua ’amaha ihora te mau mato ; ’e ’ua ti’a mai ra te feiā mo’a, ’e ’ua fa’akoronahia rātou i te pae ’atau o te rima o te Tamaiti a te Ta’ata, i te mau korona nō te hanahana ;

57 ’E ’ua haere mai ra te mau vārua e rave rahi nō roto mai i te fare tāpe’ara’a, ’e ’ua ti’a i te pae ’atau o te rima o te Atua ; ’e te toe’a ra, ’ua tāpe’ahia ïa i te mau fifi o te pōiri, ē tae noa atu i te ha’avāra’a nō te mahana rahi ra.

58 ’E ’ua ’oto fa’ahou ihora Enoha ’e ’ua ti’aoro atu ra i te Fatu, i te nā-’ō-ra’a ē : Afea te fenua e fa’afa’aea ai ?

59 ’E ’ua ’ite atu ra Enoha i te Tamaiti a te Ta’ata i te haerera’a atu i ni’a i te Metua ra ; ’e ’ua ti’aoro atu ’oia i te Fatu, nā ’ō atu ra : ’Aita ānei ’oe e ho’i fa’ahou mai i ni’a i te fenua nei ? Nō te mea ’o te Atua ’oe, ’e ’ua ’ite au ia ’oe, ’e ’ua tapu mai ’oe iā’u, ’e ’ua fa’aue mai iā’u ’ia ani atu nā roto i te i’oa o tā ’oe ra Fānau tahi ; ’ua hāmani ’oe iā’u, ’e ’ua hōro’a mai iā’u i te ti’ara’a i tō ’oe na terōno, ’eiaha rā nō’u iho te hina’aro, nā roto rā i tō ’oe aroha ; nō reira, tē ani atu nei au ia ’oe ē ’aita ānei ’oe e ho’i fa’ahou mai i te fenua nei.

60 ’E ’ua parau mai ra te Fatu ia Enoha : Mai iā’u e ora nei, ’oia ato’a e ho’i fa’ahou mai au i te mau mahana hope’a, i te mau mahana nō te mau ’ohipa ’ī’ino ’e te tāho’o, ’ia fa’ati’a i te tapu tā’u i hōro’a atu ia ’oe nō ni’a i te mau tamari’i a Noa ;

61 ’E e tae mai te mahana e fa’afa’aea ai te ao nei ; nā mua rā i taua mahana ra e ha’apōirihia te mau ra’i, ’e e tāpo’ihia te fenua e te hō’ē pāruru nō te pōiri ; e ’āueue te mau ra’i, ’e te fenua ato’a ra, ’e e tupu te mau ’ati rahi i rotopū i te mau tamari’i a te ta’ata ; ’āre’a rā e fa’aherehere au i tō’u mau ta’ata ;

62 ’E ’o te parauti’a ’o tā’u e fa’atae atu i raro nō te ra’i mai ; ’e ’o te parau mau ’o tā’u e fa’atae atu nō roto mai i te fenua, nō te fa’a’ite i te ’itera’a pāpū nō ni’a i tā’u ra Fānau tahi ; tōna ti’afa’ahoura’a mai te pohe mai ; ’oia ïa, ’e te ti’afa’ahoura’a o te mau ta’ata ato’a ; ’e ’o te parauti’a ’e te parau mau ’o tā’u e ha’aparare i ni’a i te fenua ato’a mai te diluvi te huru, nō te ha’aputuputu mai i tā’u i mā’iti mai nā poro e maha o te fenua nei, i te hō’ē vāhi tā’u e fa’aineine, te hō’ē ’Oire Mo’a, ’ia ti’a i tō’u ra mau ta’ata ’ia tātua i tō rātou mau tau’upu, ma te hi’o i mua i te taime nō tō’u haerera’a mai ; ’e i reira ho’i tō’u ra sēkene, ’e e parauhia ïa ’o Ziona, te Ierusalema ’Āpī.

63 ’E ’ua parau mai ra te Fatu ia Enoha : ’Ei reira ’oe e tō ’oe ato’a ra ’oire e fārerei atu ai ia rātou, ’e e fāri’i tātou ia rātou i roto i tō tātou ’ōuma, ’e e ’ite rātou ia tātou ; ’e e ma’iri tātou i ni’a iho i tō rātou ’a’ī, ’e e ma’iri mai ho’i rātou i ni’a iho i tō tātou ’a’ī, ’e e ’āpā tātou te tahi i te tahi ;

64 ’E i reira tō’u pārahira’a, ’o Ziona ïa, ’o tē tae mai nō roto mai i te mau mea ato’a tā’u i hāmani ; ’e nō te tau e hō’ē tauatini matahiti e fa’afa’aea ai te fenua nei.

65 ’E i muri a’era ’ua ’ite atu ra Enoha i te mahana nō te taera’a mai o te Tamaiti a te Ta’ata, i te mau mahana hope’a, nō te pārahi i ni’a iho i te fenua i roto i te parauti’a nō te tau e hō’ē tauatini matahiti ;

66 Nā mua atu rā i taua mahana ra ’ua ’ite atu ra ’oia i te mau ’ati rahi i rotopū i te feiā hara ; ’e ’ua ’ite ato’a atu ’oia i te moana, i te ’ārepurepura’a, ’e ’ua paruparu te māfatu o te mau ta’ata, i te hi’ora’a i mua ma te mata’u i te ha’avāra’a a te Atua Manahope ’o tē tae mai i ni’a iho i te feiā hara.

67 ’E ’ua fa’a’ite mai ra te Fatu ia Enoha i te mau mea ato’a, ē tae noa atu i te hope’a o te ao nei, ’e ’ua ’ite atu ’oia i te mahana o te feiā parauti’a, te hora nō tō rātou ra fa’aorara’ahia ; ’e tō rātou fāri’ira’a i te ’īra’a o te ’oa’oa ;

68 E te mau mahana ato’a o Ziona i te mau mahana o Enoha ra, e toru ïa hānere ’e e ono ’ahuru ma pae matahiti.

69 ’E ’ua haere Enoha ’e tōna ato’a ra mau ta’ata nā muri i te Atua, ’e ’ua pārahi ’oia i rotopū ia Ziona ; ’e i muri a’era ’ua rave-’ē-hia atu ra Ziona, nō te mea ’ua fāri’i mai te Atua iāna i ni’a i roto i tōna ihora ’ōuma ; ’e mai taua taime mai ra ’ua fa’aro’ohia te parau, ’UA REVA ZIONA.