Fakatomalá: Konga ʻo Hoku Hala ki he Haohaoá
“Ko e fakatomalá ʻoku ʻikai ko ha meʻa fakamā, ʻokú ne tokoniʻi kitautolu ke tau hoko ʻo anga faka-Kalaisi ange.”
Naʻá ku hū ki he ʻōfisi ʻo e pīsopé ʻoku ou ongoʻi mātuʻaki taʻe-mahuʻinga.
Naʻe malimali pē ʻa e pīsopé mo ʻomi haʻaku nofoʻanga. Ne u fakamatala kiate ia e meʻa naʻe hokó, mo ongoʻi mā lahi ange ʻi he foʻi lea kotoa pē. Naʻá ku fehuʻi loʻimataʻia, “Ko e hā ʻoku fie maʻu ke u faí? ʻE founga fēfē haʻaku toe maʻa kakato?”
Naʻe kiʻi fakalongolongo ʻa e pīsopé, pea toki pehē mai, “Te ke lava ke maʻa moʻoni mei he meʻá ni. Ka ʻoku ʻikai ke u tui ʻoku mahino kiate koe ha konga mahuʻiga ʻo e fakatomalá.”
“Ko e hā hoʻo ʻuhingá?” Ko ʻeku fehuʻí ia, mo e kiʻi ʻohovalé.
Naʻá ne pehē, “ʻOkú ke fakakaukau ko e fakatomalá ʻoku hangē ha meʻa kamosí mei he fakapoʻulí ki he māmá. “ʻO hangē naʻá ke maaka haohaoa ko e 10, pea koeʻuhi ko hoʻo fai angahalá, ʻokú ke 8 pe 7 he taimí ni.”
Naʻá ku kamokamo māmālie.
Ne hoko atu e pīsopé ʻo pehē, “ʻOku ʻikai ha taha ia ʻiate kitautolu ʻe maaka 10 pe haohaoa, ko hono moʻoní, ʻoku ngalingali ʻoku tau ofi ange ki he 1 mo e 2. ʻOku ʻikai ke tau haohaoa. ʻE lava ke hanga ʻe he fakatomalá ʻo fakamaʻa kitautolu mei he angahalá, ka ʻokú ne toe tokoniʻi foki kitautolu ke tau fakalakalaka mei he 2 ki he 3 mo e 3 ki he 4 pea fai pehē ai pē kae ʻoua ke tau aʻu ki he maaka 10 haohaoá ʻi ha ʻaho. ʻOku tokoni ʻa e fakatomalá ke tau hoko ʻo anga faka-Kalaisi ange.
Naʻe lotu e pīsopé mo au mo faleʻi mai ke u ako ʻa e meʻafoaki ʻo e fakatomalá.
Ko e taimi ne u mavahe ai mei hono ʻōfisí, ne u tangutu ʻi heʻeku kaá ʻi ha taimi lōloa, ʻo fakakaukau ki he meʻa naʻá ne lea ʻakí.
Naʻá ku fakatokangaʻi naʻá ne moʻoni. Ne u fakakaukau pē au ko e fakatomalá ko ha founga pē ia ke toe foki ki he tuʻunga naʻá ku ʻi aí, ʻo toe hoko ko ha maaka “10.” Koeʻuhí naʻá ku fakakaukau au ne u maʻa kakato ki muʻa, ne ngaohi leva au ʻe he mafatukituki ʻo e “haohaoa” ko iá ke u ongoʻi taʻeʻaonga mo ʻikai toe lava ke fakahaofi—ʻo hangē pē ko ia ne u ongoʻi maʻu pē ʻi he taimi naʻá ku fie maʻu ai ke fakatomalá.
Ka ko e fie maʻu ko ia ke fakatomalá, naʻe ʻikai ko ha meʻa kovi pe fakamā—ko e uho ia ʻo e hoko ʻo anga faka-Kalaisí. Naʻá ne ʻai ke u lava ʻo siʻaki ʻeku ngaahi angahalá mo fakafaingamālieʻi au ke u hoko ʻo lelei ange. ʻOku ʻikai ko ha tangata monomono ʻa e Fakamoʻuí, ke Ne fakafonufonu ʻa e ngaahi mafahifahi ʻi hoku laumālié, ka ko ha tokotaha tā palani ia, ke langa hake au ki ha ngaahi tuʻunga māʻolunga naʻe ʻikai te u mei lava ʻo aʻusiá.
Ne toʻo atu ʻe he ʻilo ko ʻení ʻeku ongoʻi halaiá. Naʻe ʻikai ke u haohaoa pea naʻe ʻikai fie maʻu ke pehē—ʻo teʻeki ai. Naʻe hoko ʻa e fakatomalá ko e konga ia ʻo hoku hala ki he haohaoá. Naʻá ku foki ki ʻapi mo ha fakakaukau kuo liliu pea mo ha loto fakatōkilalo.
Talu mei ai mo ʻetau fakatomala mo siʻaki ʻa e angahala ne ʻuhinga ai ʻeku ʻalu ki he ʻōfisi e pīsopé ʻi he ʻaho ko iá, pea ʻi he ʻaho ní ʻoku ou ongoʻi maʻa moʻoni. ʻOku ou kei mamaʻo pē mei he haohaoá, kae fakamālō pē ʻoku feʻunga e ʻaloʻofa ʻa Kalaisí ke fai e fakahaofí. Tuʻunga ʻiate Ia, ʻe lava ke fakamolemoleʻi au, fakamoʻui, mo foaki mai ʻa e mālohi ke ikunaʻi hoku ngaahi vaivaí. Pea ʻi Heʻene meʻafoaki ʻo e fakatomalá, ʻe lava ai ke oʻi au ke u hoko ko e tokotaha ʻoku fakataumuʻa au ki aí.