Mauaina o Lo’u Tulaga Paia
E alala le tusitala i Niu Ioka, ISA.
I le mavae ai o tausaga o tauiviga ina ia talia a’u lava, sa iu ina ou maua se vavega sa faapea ona fesoasoani ou te malamalama ai i lo’u tulaga e faavavau.
Ata mai le Getty Images
Mai lava i lo’u laitiiti, sa ou tauivi ai ma lo’u mamafa ma le taliaina o a’u lava. I le amataga, o igoa tauvalaau sa ou mauaina ona o lo’u mamafa sa foliga mai e le afaina, ae i le aluga o taimi, sa amata ona ou talitonu o faamatalaga le lelei sa faia e uiga i o’u foliga vaaia sa faauigaina foi i mea le lelei e faatatau i o’u uiga.
I le avea ai ma se tagata talavou, sa amata ona ou iloa e faapea, e ui lava sa ou fiafia i o’u vaaiga faaletino, ae sa lei fetaui lo’u ituaiga tino ma faamoemoega a le lalolagi. Ma sa ou fiafia i o’u uiga filemu, ae sa le o le mea lea sa faamoemoeina mai foi e tagata ia te au—sa mananao faiaoga ia ou tautala i le vasega, sa sili atu le fiafia o tama i teineiti tautalatala, ma sa faafia ona fai mai ia te a’u, sa manaomia ona faateleina lo’u fiafia e faamasani solo nai lo o le mea moni sa ou i ai. Sa faasolosolo malie lava ona amata faiifo lo’u taua faaletagata lava ia.
O o’u tausaga o se tagata talavou matua sa oo ai ina ou le fiafia, sa ou le maua ni lagona lelei i lo’u tino, ma fesiligia ai pe aisea na le mafai ai e le Alii ona fai a’u ia aulelei teisi atu ma sili atu ona agamalie. E tele atu ni faiga e tipi ai le ai sa ou faataitaia nai lo le mea sa tatau ona ou faia, ma o le mea sa le manuia ai, o le tele lava o lo’u taumafai e faapau o’u pauna, o le tele foi lena o o’u pauna na faaopoopo. O le avea o se tagata talavou matua nofofua, matamuli, ma putatele, sa lei foliga mai e moomia tele.
Sa ou lagonaina le toilalo ma tonu ai o le ituaiga tagata lava lea na ou i ai, o lena lava, e tusa lava pe le taitai lusi ia pauna sa ou manao ai, pe avea foi ma se tagata tiotio. E ui ua tuu lo’u soona ita tele ia te a’u lava, ae sa le’i taitai lava o’u vaai ia te a’u lava o se afafine aulelei, ma taua o le Atua. O le mea lava ia, sa tuu lo’u toe taumafai e sue lo’u taua.
O Se Malamalama sa Ou Manaomia
O se tasi o aso, sa tupu ai se vavega a’o o’u faitau i se tautalaga a Sister Mary G. Cook, le faletua o Elder Quentin L. Cook o le Korama a Aposetolo e Toasefululua, mai le faigalotu a le lalolagi atoa ia Setema 2016 mo talavou matutua na faaautuina “Find Joy in Everyday Life.” E faitauina faapea: “Ina ua tatou o mai i le lalolagi, sa tatou aumaia faatasi ma i tatou o tatou natura paia o ni fanau a le Atua. O o tatou taua faaletagata lava ia, na mai i le lagi.” Sa ou lagonaina le pei ua iu ina matala lo’u mafaufau i se malamalama lea sa matuai o’u manaomia ae sa faapea e le mafai lava ona ou mauaina. Sa ou iloa, o le taimi muamua, sa ou lagona ai e pei o se mea sese le fiafia ia te au lava, ona ou te lei fetaui ma ata faafoliga a le lalolagi e tatau ona i ai se tamaitai aulelei ma taua. O lea ua ou sauni e tautino e faapea, ou te fiafia i lo’u uiga matamuli ma atamai tele, lauulu minimini felefele, mata lanueena, isu e pei o se pateta, ataata lapoa, ma faapena foi i lou tino puta lea e faia mea tonu lava ou te manaomia ona ia faia. Sa amata ona ou faafetai mo le foafoaga a le Atua. Sa iu ina ou malamalama e le foafoaina e Ia ni measese.
I le tuanai ai o le tele o tausaga o tauiviga ma mafatiaga faalelagona ma faaletino, ua iu ina ou aoaoina se upumoni, mo le toatele atonu sa manino lava: o lo’u taua faaletagata lava ia, e le fesootai pe faatatau i le lalolagi lenei! Na mai le lagi. Sa i ai lava i taimi uma ia te au, e tusa lava pe sa ou tauaso i ai. E le filifilia e ala o faasalalauga, e la’u tupulaga, pe o soo se tasi lava, ae o le Tama Faalelagi ma Iesu Keriso, ma Laua te silasila mai ia te au, ua lava lo’u taua ua faapea ona maliu ai le Faaola mo a’u.
O Se Faavae ia Keriso
O le a’oa’o mai le Agaga e uiga i lo’u taua i le silafaga a le Atua, ua ou sui ai i le tele o itu. Ua ou toe alofa faamama’i i le olaga. Ua ou lagona le faafetai faateleina mo o’u faamanuiaga e le mafaitaulia. Ua ou lagona se manao tele e taumafai malosi atu e fai le mea sao ma faateleina le talitonu ia te a’u lava ma i a’u moemitiga. Ua ou manao ai e faateleina lo’u agalelei atu ma le onosai i tagata e siomia a’u ma ou latalata atili atu ai i le Faaola.
O loo faaauau pea ona valaau mai ma faamasino mai leo o le lalolagi, ae o le taimi nei, ua ou maua se malamalamaaga malosi e uiga i lo’u taua lea ou te le toe manao e faagalo. O lena malamalamaaga na aumaia ia te a’u le toafilemu ma le olioli lea ou te manao e faasoa atu i tagata uma ou te feiloai i ai. E ala mai i lena tautalaga i le faigalotu, ua ou aoaoina ai, e manaomia foi e lo’u taua faaletagata lava ia ma lo’u talitonu ia te a’u lava ona i ai se faavae mausali ia Keriso o lea, “pe a faaoo mai e le tiapolo ana matagi tetele, ioe, o ana u fanafana i le asiosio, ioe, pe a pesi mai ia te [au] lana uatoa uma lava ma ana afa, e le malo ai ia te [au], e toso ifo ai [au] i le vanu o le puapuaga ma le auega e le gata, ona o le papa ua atiina ae ai [au], o le faavae mau lea, o le faavae foi lea, afai e ati ae tagata i ona luga, e le mafai lava ona pauu i latou” (Helamana 5:12).
Ou te faafetai i le Alii ma le taua e faavavau o loo Ia vaaia i totonu o i tatou uma. Ou te faafetai mo tamaitai musuia e pei o Sister Cook o le o loo taumafai e ola i le talalelei ma faasoa mai lona atamai. Ou te faafetai mo lenei olaga, mo le vavega o o tatou tino ma mafaufau, ma mo le paia o loo i totonu o i tatou taitoatasi.