Ina Ua Faavaivaia Lo’u Faatuatua e ni Mea e Tetee i Mamona
Sa ou taumafai e tafiese atu o’u atugaluga, ae sa faatuputeleina lo’u popole a o ou mafaufau pea i ai. Mata e mafai ona ou auauna atu i se misiona pe afai e i ai pea ia te a’u ni fesili e uiga i le talalelei?
I ni nai masina ae ou te le’i tuua mo la’u misiona, sa ou tau ai i ni tusiga e tetee i Mamona. O nei tusiga sa aumaia ai ni faamatalaga malamalama sese e uiga i le talafaasolopito o le Ekalesia ma Iosefa Samita lea na faavaivaia ai la’u molimau. Sa ou taumafai e tafiese atu o’u atugaluga, ae sa faatuputeleina lo’u popole a o ou mafaufau pea i ai. Sa tupu a’e ni fesili i lo’u mafaufau. Mata e mafai ona ou auauna atu i se misiona pe afai e i ai pea ia te a’u ni fesili e uiga i le talalelei? Mata o le a lelei atu pe afai ou te nofo i le fale? Sa ou tatalo ma le faatauanau atu i le Alii, ma ōle atu ia te Ia e fesoasoani ma ia te a’u e tali a’u fesili ma faamalosia lo’u faatuatua, ae sa le’i vave oo mai ni tali.
I se tasi aso sa ou manatua ai le tala a Iosefa Samita i le mauaina o le Perisitua Arona—o se tala sa faagaeetia ai lava a’u i taimi uma. A o faaliliuina e Iosefa le Tusi a Mamona, sa ia matauina na ta’ua ai le papatisoga. I le fiailoaina o le mataupu, sa ia alu atu ai i le togavao faatasi ma lana tusiupu, o Oliva Kaotui, ma fesili atu i le Tama Faalelagi e uiga i le papatisoga. Sa tali mai le Tama Faalelagi i a la tatalo e ala i le auina mai o se avefeau faalelagi, o Ioane le Papatiso, e tuu atu ia i la’ua le Perisitua Arona ina ia mafai ai ona papatisoina i laua ma maua le pule e papatiso ai isi.
O lenei tala ua aoao mai ai se mataupu faavae taua, o se mataupu ua tele ina ta’ua soo i tusitusiga paia ma le talafaasolopito o le Ekalesia: o le faitauina ma le mafaufau loloto i mau e mafai ona fesoasoani ia i tatou i luga o le ala o faaaliga faifai pea ma le toefuataiga. Ua faamalosia e tusitusiga paia a tatou molimau ma aoao i tatou i mataupu faavae taua o le talalelei i “lea fuaitau i luga o lea fuaitau” (2 Nifae 28:30), ina ia tatou saunia e mauaina pea.
Sa ou iloa afai e ao ona toefuatai lo’u faatuatua, e manaomia la ona ou liliu atu i tusitusiga paia mo ni tali. Sa amata ona ou faitauina le Tusi a Mamona, ma saili mo ni mau na mafai ona taitai atu a’u i faaaliga sa ou matua manaomia tele. Ona ou tau lea i se fuaiupu i le 1 Nifae, lea na tali atu ai Nifae i se fesili a le agelu, e faapea: “Ua ou iloa e alofa [le Atua] i ana fanau; e ui i lea, ou te le iloa le uiga o mea uma.” (1 Nifae 11:17).
A o ou faitauina lenei fuaiupu, sa ou iloa ai e le ao ona ou iloaina “le uiga o mea uma”—ma o le a ou le mauaina tali uma i lenei olaga. Ae e pei ona faalagolago atu Nifae i lana molimau ina ua feagai ma se mataupu sa ia le malamalama i ai, e mafai foi ona ou faalagolago atu i mea sa ou iloaina, ma agai i luma i le faatuatua.
Talu mai lena aafiaga, sa tele ai lava ina ou mulimuli i le mea sa aoao mai e Peresitene Henry B. Eyring, Fesoasoani Lua i le Au Peresitene Sili, e faapea, “O le a tatou maua tali i tusitusiga paia” (“O Se Talanoaga i le Suesueina o Tusitusiga Paia,” Liahona, Iulai 2005, 8). Ou te faalagolago i taimi uma i lenei upumoni pe a ou le maua se malamalamaaga. E pei lava ona sauniaina e tusitusiga paia ia Iosefa ma Oliva e maua le uluai sauniga i le Ekalesia toefuataiina, ua faaauau pea foi ona taitai a’u e tusitusiga paia i luga o le ala i faaaliga faifai pea ma le malamalama.