Stap Luksave Ol Giaman Kopi blong Setan
Man we i raet i stap long Yuta, YSA.
Taem yumi fesem ol giaman kopi long saed blong spirit, Buk blong Momon i save helpem yumi blong faenemaot wanem hem i tru mo wanem i no tru.
Mi stap putum sam Ameriken dola pepa mane long paos blong mi long stoa, taem wan long ol pepa mane ia i kasem ae blong mi. Mi luk se grin kala ia i laet moa bitim ol narawan, mekem se mi lukluk gud. Nao mi luk se pikja blong Presiden Joj Wasington i no luk stret tumas. Mo pepa ia tu, filing blong hem i no stret. !I wan giaman kopi! Man long stoa i jenisim, i givim wan tru pepa mane, mo i givim giaman kopi i go long maneja blong stoa.
Mi bin tingting plante long giaman kopi blong pepa mane ia stat long tetaem ia. Mi bin stap askem miwan se pepa mane ia i stap go raon blong hamas taem nao mo hamas pipol nao hem i trikim ova long ol yia. Yes, sapos mi no bin lukluk gud, bae i trikim mi tu. Be taem mi komperem wetem rilwan, mo luklukgud long ol samting we oli defren be i no ol samting we oli semmak, mi save talem se i wan giaman kopi.
Buk blong Momon i gat fulap eksampol blong giaman kopi long saed blong spirit, we oli bin folem ol wei blong Setan blong stap giaman, mo blong trikim ol narawan blong kasem samting. Taem yumi stadi long ol trik mo ol teknik blong olgeta, yumi stat blong luk ol mistek blong olgeta mo ol rong blong olgeta long semfala wei we wan ae we i kasem trening bae i stat blong luksave ol samting we i defren bitwin wan mane we i tru mo wan giaman mane. Moa yumi trenem ae blong yumi blong luksave ol samting we oli defren, bae yumi rere gud moa blong soemaot o talemaot klia huia ol giaman man blong tedei mo stanap agensem ol giaman blong olgeta.
Putum Tugeta Save abaot Ol Giaman Kopi blong Setan
Setan i lukaot blong lidim yumi longwe tru long mak blong hem blong giaman kopi long saed blong spirit, mo sapos yumi no lukaotgud, bae hem i trikim yumi. Presiden Josef F. Smit (1838–1918) i givim woning ia: “Setan i wan topman blong kopi, mo taem oli stap givim tru gospel long wol long wan wei we i kam antap bigwan, semmak, hem i stap serserem giaman koen o giaman doktrin. Lukaotgud long giaman mane blong hem, from se bae yu no save pem wan gud samting, be bae yu pem harem nogud nomo, pua laef, mo ded blong spirit.”1
Wanem we bae i difendem yu gud moa agensem ol trik blong ol giaman kopi blong Setan i blong save gud ol trutok blong gospel. Moa yumi save trutok we i dip, moa bae i isi blong kasem ol samting we oli defren taem Setan i presentem ol giaman kopi blong hem. So, taem hem i mekem olsem, yumi nidim blong lukluk long ol samting we oli defren, be i no ol samting we oli semsemmak; semmak olsem we mi bin mekem wetem ol pepa mane blong mi, from se ples ia nao ol giaman we oli stap bae oli kamaot long klia ples.
Presiden Esra Taf Benson (1899–1994) i bin tijim: “Buk blong Momon i soemaot klia ol enemi blong Kraes. … God, wetem save blong Hem we i no save finis mo i stret gud, i mekem Buk blong Momon blong yumi save luksave ol rong, mo save olsem wanem blong faet agensem ol giaman tingting long saed blong edukesen, politik, relijin, mo aedia blong man blong taem blong yumi tedei.2
Tedei yumi stap long wo wetem Setan. Yumi, olsem eni ami, i nid blong save wanem nao enemi blong yumi i stap rere blong mekem. Taem yumi save se wetaem mo weaples bae enemi bae i atak, eksampol, hemia bae i wan infomesen we i impoten tumas. Hemia nao, toktok blong yusum blong putum tugeta ol kaen infomesen ia, oli singaotem “putum tugeta save.” Blong save enemi blong yumi, i blong kam smat moa bitim enemi blong yumi. Buk blong Momon i save helpem yumi “putum tugeta save” long saed blong ol giaman fasin blong Setan.
Swit Toktok I Wan Giaman Kopi
Ova haf blong ol giaman man insaed long Buk blong Momon oli yusum ol toktok blong switim man mo wan isi fasin blong kasem wanem oli wantem. Eksampol. Serem “i bin gat plante save, mekem se hem i bin gat wan ful save long lanwis blong ol pipol; from samting ia, hem i bin save yusum plante swit tok, mo plante paoa blong toktok, folem paoa blong devel” (Jekob 7:4). Ol nogud pris blong King Noa oli bin talem “ol swit tok nating” (Mosaea 11:7), mo long wei ia, i mekem se ol pipol oli stap wosipim aedol mo mekem ol nara nogud fasin. Koriho i kasem ol semmak risal long taem blong hem, i “lidim ol hat blong plante i go longwe” (Alma 30:18). Amalakaea mo Gadianton, tufala i yusum fasin blong tufala blong yusum swit toktok blong pulum tugeta ol ami blong ol nogud man we i folem tufala (luk long Alma 46:10; Hileman 2:4).
Hemia i no wan aksiden. Swit toktok, i no dip, i no tru, i emti, mo i tokabot samting i bigwan. Nifae i givim woning abaot olgeta we “bae oli tij long fasin ia, ol giaman mo we oli blong nating mo ol krangke doktrin, mo bae oli solap long ol hat blong olgeta, mo bae oli traehad blong haedem plan blong olgeta long Lod; mo ol wok blong olgeta bae i stap long tudak.” (2 Nifae 28:9).
Fasin blong talem swit toktok, oli yusum fulap taem blong trikim man; plante taem hem i gat wan tingting i stap we i haedem wan plan. Swit toktok i abaot stael blong talem samting, be i no samting blong talem, mo i wantem tajem hae filing mo hae tingting we i stap insaed long man we i folem fasin blong wol. Be ol profet blong Lod oli talem long yumi ol simpol, be ol impoten trutok we yumi nidim blong harem.
Swit toktok i lanwis we Setan i toktok long hem. Presiden Jemes E. Faost (1920–2007), Seken Kaonsela long Fas Presidensi i eksplenem: “Voes blong Setan, plante taem i saon se i gud, mo mesej blong hem i isi blong faenem eskius from. Hem i wan voes we i pulum tingting, we i wantem mekem yu wantem save moa, mo i gat naes tiun. Hem i no strong, mo i naes blong harem. Bae i no gat man i wantem lisin long voes blong Setan sapos saon blong hem i strong o i mekem nogud long man.”3
Taem wol i presentem long yumi wan aedia, wan wei blong tingting, o wan tingting we yumi luk se i mekem yumi filim gud tumas, o yumi filim praod long hem, o i saon gud tumas blong i tru, hemia i mas stap olsem wan woning wantaem long yumi. Tritim ol aedia ia, olsem ol giamanwan. Komperem olgeta agensem ol trutok we ol profet blong Lod oli tijim. Luk wanem i defren, i no semmak, mo ol giaman aedia bae oli kamaot klia.
Niho—Wan Giaman Man we Oli Savegud
Niho i man we i stap yusum oltaem fasin blong Setan blong yusum swit toktok. Bae yumi stadi long kes blong hem olsem wan giaman man long saed blong spirit. Niho, we doktrin blong hem, bae i luk se i akseptem tingting ia blong gat wan ridima, i bin wan prija we man i save gud hem mo i winim tingting blong man long medel blong ol man blong Nifae. Niho i pulum tugeta plante man we oli folem hem, taem hem i stap tijim se “evri kaen man bae Lod i sevem olgeta long las dei mo … evri man oli mas kasem laef we i no save finis.” (Alma 1:4).
?Yumi save luksave from wanem mesej blong Niho i wan gud mesej blong pulum man? Hem i stap tijim abaot wan God we i isi nomo, mo i olbaot—wan God we, from se Hem i lavem evriwan, bae i sevem evriwan, i nomata wanem i hapen. Mekem se, i talem se man i gohed nomo, i mekem wanem oli wantem, from se evri samting i gud nomo. Hem i wan wei blong tingting we i swit tumas, we ol pipol long taem blong Niho oli akseptem plante (luk long Alma 1:5) semmak olsem we plante pipol oli stap akseptem tedei. Wan fri tikit i go long heven, i wan samting we ol pipol oli wantem.
?So wanem nao problem wetem mesej blong Niho? Bae yumi luk long ol stamba poen blong toktok blong hem bakegen:
-
God i krietem evri pipol—i tru.
-
God i lavem evri pipol—i tru.
-
Yumi no mas fraet long God—i tru.
-
Yumi mas glad long tingting ia se i gat fasin blong sevem man—i tru.
Kasem naoia i gat plante samting we i semsemmak bitwin wanem Niho i tijim mo ol trutok blong gospel. Be tingbaot—semmak wetem giaman pepa mane ia, yumi nidim blong lukaotem ol samting we oli defren, i no semmak. So bae yumi lukluk long las poen blong Niho:
-
God bae i givim laef we i no save finis i go long evriwan—!i giaman!
Nao, hemia nao samting we i defren mo i impoten, we i stap talem long yumi se Niho i wan giaman man long saed blong spirit. Fasin blong sevem man long ded blong bodi i kam long evriwan, be fasin blong sevem man long saed blong spirit, i gat kondisen long hem, we hem i blong yumi wantem blong sakem sin. Sapos yumi sakem sin, nao bae yumi kasem laef we i no save finis (luk long Jekob 6:11). Be i no gat wan fri tikit.
Gidion mo Alma, Tufala I Luksave Giaman Kopiman
Nogud fasin blong Niho i kamaot klia long dei ia we hem i mitim Gidion, wan tija we i stret mo gud, we i stap insaed long Jos blong God. Gidion i bin stanap agensem King Noa, sam yia bifo, mo long wei ia, i bin fesem finis ol giaman kopiman long saed blong spirit (luk long Mosaea 19:4–8). Niho “i stat blong rao wetem hem wetem ol strongfala toktok, blong man ia i save lidim i gowe ol man blong jos; be man ia i stanap strong agensem hem, hem i toktok strong long hem wetem ol toktok blong God” (Alma 1:7). Gidion i luksav Niho olsem wan giaman kopiman. Taem oli putum hem long klia ples, Niho i traem yusum ol nara fasin blong Setan—fasin blong kilimded man. Be ded blong Gidion i no blong nating. Ol pipol oli tekem giaman kopiman ia, Niho, i go long fored blong Alma, blong Alma i jajem hem.
Alma i bin luksave se, Niho i rong long fasin stap olsem wan giaman pris mo kilim man i ded, be tu, se sapos oli no karemaot, fasin blong giaman pris long medel blong ol pipol bae i mekem se “Lod i prapa spolem gud evri pipol” (Alma 1:12). Mekem se oli panisim Niho blong hem i mas ded, mo ded long wan “ded blong bigfala sem” (Alma 1:15).
Gidion mo Alma, tufala i ol eksampol long yumi. Taem yumi gat Spirit i stap wetem yumi, bae yumi luk mo harem “ol samting olsem we oli rili stap” (Jekob 4:13). Bae yumi luksave ol giaman plan mo fasin blong Setan wetem wan save we i stret gud, olsem deilaet i defren long dak naet” Moronae 7:15).
“Giaman” enemi blong yumi i wan smat man, be olsem Gidion mo Alma, yumi save kam moa smat. Semmak olsem we mi bin stat blong luksave ol samting we i defren bitwin tufala pepa mane blong mi, yumi tu, i save trenem ae blong yumi, wetem maen mo spirit blong yumi blong luksave ol samting we oli defren bitwin trutok mo giaman. Taem yumi mekem olsem, bae yumi luksave ol giaman kopiman, mo bae yumi stanap agensem ol giaman blong olgeta.