Stap Andastanem Petriakel Blesing blong Yu
Tufala we i raet oli stap laef long Ilinoa, YSA, mo Niu Yok.
Taem yu faenem ol defren pat insaed long blesing blong yu i save helpem yu blong faenem rod we bae yu folem long laef blong yu.
Man in maze © Digital Vision Vections/Getty Images
Laef i fulap long fulap defren kaen rod: ?Bae mi go skul wea? ?Bae mi stadi wanem? ?Bae mi go long misin wea? ?Bae mi maredem hu? Sapos oli givim yu wan map blong yuwan blong folem mo mekem ol desisen long laef, ?bambae yu folem map ia?
Papa long Heven mo Jisas Kraes oli givim yumi wan kaen map olsem—ol petriakel blesing—blong soem rod long yumi long laef. Nomata yumi kasem presen blong fridom blong jus blong save mekem ol desisen blong yumi folem tingting blong yumi, ol petriakel blesing oli save saenem ol rod we bae oli tekem bigfala hapines i kam.
Be blong gat wan map nomo, hem i no inaf. Yumi mas stadi, andastanem mo praktisim mining we i kamaot long map ia. Semmak, taem yu kam blong andastanem lanwis we i stap long petriakel blesing blong yu—we i gaed blong yuwan blong laef blong yu—yu save faenemaot huia yu long ae blong God, mo wanem yu save kam.
Faenemaot Laen blong Yu
Faswan long evri samting, petriakel blesing i talemaot laen blong yu, o stret traeb aot long olgeta twelef traeb blong Jekob (we afta, oli singaotem Isrel) we yu yu kamaot long hem. Nomata we i no evriwan long yumi we i stret laen blong Jekob, ol skripja oli tijim yumi se ol memba blong Jos, oli adoptem olgeta insaed long haos blong Isrel: “from se hamas long olgeta we bae oli akseptem Gospel ia, bae mi singaotem olgeta folem nem blong mi, mo bae mi kaontem olgeta olsem laen blong yu, mo bambae oli girap mo blesem yu, olsem papa blong olgeta” (luk long Abraham 2:10).
Shelisa Schroeppel blong Yuta, i talem se: “Taem mi save se mi mi blong haos blong Jekob i stap helpem mi blong andastanem stamba tingting blong mi long laef ia mo from wanem mi stap kasem samfala koling long Jos.”
Petriakel blesing blong yu bae i tokbaot tu ol blesing we oli kam wetem traeb blong yu. Eksampol, plante memba blong Jos oli kamaot long laen blong Ifrem, wan traeb we i gat spesel responsabiliti ia blong serem mesej blong gospel we i kambak long wol (luk long Dutronome 33:13–17; D&C 133:26–34).
Faenem Kaonsel blong Yuwan
Taem yu yusum long stret fasin, wan map i save helpem yu blong yu no lus. Semmak, long wokbaot blong laef ia, petriakel blesing blong yu i save givim kaonsel mo daereksen long laef blong yu. Petriakel blesing blong yu i no talem nomo wanem blong mekem, be i save givim sam niu tingting long wanem rod—sapos yu folem wetem fet—bae i save helpem yu blong save wetaem blong stretem laef blong yu wetem tingting blong Papa long Heven. Taem yu stap stadi long petriakel blesing blong yu mo lukaot blong laef long wan wei we i stap invaetem Spirit blong Lod, bae yu save faenem sefti, glad, mo daereksen.
Gabriel Paredes blong Lima, Peru, i talem se: “Sam long ol kaonsel we oli bin givim long mi long blesing blong mi, mi bin save mekem fulwan nomo wetem famli blong mi afta we mi bin sil long waef blong mi.
“I no longtaem i pas, mi bin stap askem miwan wanem mifala i save mekem blong mekem niufala famli blong mifala i kam strong moa. Ansa blong kwestin blong mifala i kam tru long petriakel blesing blong mi. Insaed long hem, mi kasem advaes blong putum faswan olgeta samting ia, respek, fasin blong akseptem samting, mo lav insaed long famli blong mi, from se olgeta samting ia, oli sam long ol impoten fandesen blong gospel blong Jisas Kraes.
“Taem mifala i lukluk long hemia, waef blong mi mo mi i bin save winim ol problem. Mifala i gat samfala jalenj olsem wan famli, be mifala i hapi i stap. Mi filim olsem se Lod i stap talem bakegen long mi olsem wanem mi save gat famli ia we Hem i bin promesem mi. Mi save se Lod i toktok tru long ol petriakel blesing mo se kaonsel we i stap insaed long hem i blong yumi yusum insaed long laef blong yumi.
Mekem Folem Ol Strong Toktok
Wan map i no makem evri samting we i blokem rod, be laki tumas, ol petriakel blesing oli givim ol woning blong protektem yumi folem rod ia. Sam long ol toktok ia, oli helpem yumi blong protektem yumi long fos blong Setan; ol narawan oli blong givim laet long wei we yumi save winim man, we i stap insaed long yumi, we i stap folem fasin blong wol.
Long Caitlin Carr long Yuta, sam long ol strong toktok long petriakel blesing blong hem oli bin klia kwik long hem, be taem hem i bin stadi blesing blong hem afta, i givim hem wan niu lukluk.
“Taem mi kasem petriakel blesing blong mi, mi kasem woning abaot ol pipol we bae oli traem mo bae oli pulumaot mi long trutok wetem ol swit toktok. Mi no tingting tumas long hemia; mi bin gat strong bilif long ol doktrin we oli bin tijim mi long olgeta.
“Be, long yia afta, mi bin fesem ol aedia mo ol tingting blong ol man we, antap i luk se oli gat rus long stret fasin mo lav, be i no tru. Olgeta mesej ia, oli stap kam long evri ples: media, skul, mo iven ol gudfala fren. Nomata we mi bin save se ol tingting ia oli agensem plan blong God, mi bin go kasem we mi bin wantem sapotem ol niufala tingting blong wol ia mo semtaem hemia blong Jos. Sot taem afta, mi luksave se ‘i no gat man i save wok blong tu masta’ (Matiu 6:24) mo mi no sapos blong dipen long waes blong ol man. Papa long Heven i stretem ol tu tingting blong mi tru long ol skripja mo i bin talem pis long maen mo hat blong mi. Olsem wan risal, testemoni blong mi i kam strong moa mo mi bin kam moa strong blong difendem wanem we mi save se i tru.”
Developem Ol Presen mo Ol Talen
Petriakel blesing blong yu i save tokbaot tu ol presen mo ol talen long saed blong spirit we Lod i bin givim long yu blong bildimap kingdom blong Hem. Sapos blesing blong yu i tokbaot wan talen we yu yu no save gud long hem, ating hem i from yu no gat janis yet blong faenem o developem talen ia. Tru long fasin blong stap strong blong lukaotem samting mo wetem help blong Lod, yu save gro blong save gud talen ia mo plante moa.
Taem yu stap developem talen blong yu, hem i helpem yu blong luksave ol samting we i blong yu nomo we i givhan long wok blong Lod. Johanna Blackwell blong Kalifonia, YSA, i tingting hevi long ol presen mo ol talen long blesing blong hem taem hem i filim temtesen ia blong komperem hem wetem ol narawan: “Taem mi lukluk i go long ol toktok long petriakel blesing blong mi, Lod i stap talem bakegen long mi se Hem i blesem mi wetem ol presen we miwan mi nidim blong winim ol tes mo blong mi tekpat blong muvum wok blong Lod i go hariap.
“Blesing blong mi i stap talem long mi abaot paoa blong mi blong lavem man, fogivim man, mo gat strong paoa long tingting blong toktok wetem olgeta we oli stap raon long mi. Taem mi bin praktisim ol presen ia, Lod i bin blesem mi wetem wan filing blong wantem mitim mo save ol niufala pipol mo kalja. From hemia, testemoni blong mi i bin gro, se yumi evriwan i ol pikinini blong Papa long Heven we i gat lav, mo mi bin save givim seves long ol narawan taem mifala i bin lukaotem blong kam moa olsem Kraes.”
Stap Kasem Ol Blesing blong Promes
Laswan, petriakel blesing blong yumi i soemaot ol blesing we Papa long Heven i promesem yumi sapos yumi stap fetful long Hem. I no talem stret se ol promes ia bae oli kam wetaem, be yumi save save se, sapos yumi stap obei blong laef folem gospel, bae oli kamtru, long laef ia o long nekis laef.
Sergio Gutierrez blong Nevada, YSA, i stap dipen long wan promes long petriakel blesing blong hem eni taem we hem i stap wari abaot ol fiuja plan long saed blong wok: “Long sam taem, mi filim wari abaot fiuja blong mi se bae i gud o nogud; be i gat wan promes long petriakel blesing blong mi we, oltaem, i mekem tingting blong mi i stap kwaet. Promes ia i helpem mi blong save se sapos mi wok had mo stap fetful, bambae mi gat ol risos we mi nidim blong save kea long famli blong mi mo blong bildimap Jos. Mi no save stret wanem rod mi wantem folem long saed blong wok, be from mi gat promes ia, i stap givim fet mo tras.”
Sapos yu stap askem yuwan wanem nao tingting we Papa long Heven i gat long yu, yu no stap yuwan. Lod i bin andastanem se bae yu fesem plante defren rod we yu save folem long laef blong yu, mekem se Hem i givim yu wan map blong yuwan blong mekem se laef blong yu i stret long gospel blong Hem. Ol petriakel blesing oli no save mekem desisen long bihaf blong yumi, be oli save lidim yumi blong kasem revelesen blong yumiwan. Tru long petriakel blesing blong yumi, oli soem yumi olsem wanem yumi fit insaed long plan blong Lod blong karem tugeta Isrel, taem yumi lanem traeb we yumi kamaot long hem; yumi kasem ol kaonsel we i blong yumiwan, ol strong tok, mo ol promes; mo oli tijim yumi abaot ol presen mo talen blong yumiwan we Papa long Heven i bin givim long yumi blong wok blong Hem. Sapos yu stap traem blong gohed blong laef folem evriwan long olgeta samting ia long stret petriakel blesing blong yu, bae yu save kam blong save se ol desisen blong yu oli folem tingting we Lod i gat long laef blong yu.