O Se Leo Malu, Itiiti i le lotolotoi o Faaiuga Tetele

Saunia e M. Joseph Brough

Fesoasoani Lua i le Au Peresitene Aoao o Alii Talavou

Mai se saunoaga i le faigalotu, “Heeding the Voice of the Lord,” na tuuina atu i le Brigham Young University–Idaho ia 17 Oketopa, 2017.

Afai o e agavaa, o le a le tuua oe e le Tama Faalelagi e te faia ni measese tetele e aunoa ma le tuuina atu o se lapataiga ia te oe.

I le avea ai o se peresitene fou o se misiona i le tautoulu o le 2011, sa ou fiafia lava i le i ai faatasi ma a matou faifeautalai. Sa tonu ia i ma’ua ma lo’u toalua o Emeli, e fai ni asiasiga i falemautotogi ma asiasi i soa uma o faifeautalai i le misiona.

A o ma malaga atu mai le Aai o Kuatemala i se tasi o a matou sone e sili ona maotua, e ta’u o Sololá, sa ma iloa ai, sa poloka le auala i o ma’ua luma atu ona o se solo tetee. O le solo tetee i Kuatemala e mafai ona umi ni itula o fai, ma e masani lava e leai se isi auala e pasia ai. Ae ina ua ma fesili atu e uiga i se auala ‘alo e ono maua, sa ma iloa ai e uiga i se isi auala. Peitai ane o lena auala, sa sau faatasi ai ma lapataiga nei:

E le o se auala lelei.•
Ia mautinoa e te le pogia i luga o le auala.
E masani ona faaaoga e le au faomea lea auala.

I le naunau e faapei o soo se peresitene fou o se misiona ma lona toalua, sa ma o ai loa ma Emeli. Ina ua mavae se taimi o ave atu le ma taavale, sa ma tau atu i se vaega o se auala pefu lea sa foliga mai o se tifato i o ma’ua luma atu. Sa talasua mai Emeli e tatau ona aumai i fafo le ma meapueata e tapue ai ni ata a o ma o atu i le taufaasiusiuga.

O tausaga na muamua atu, a o avea a’u ma se faifeautalai talavou i Kuatemala, sa ou aoaoina ai o se tama’i lala e toso i luga o le auala o lona uiga “ia faaauau ma le faaeteete.” E ono faauigaina foi “taofi.” Sa ou vaaia se lala ae ou te le’i iloa lona uiga.

O se taimi e le’i mamao ane, ae o ma taupeupe ane loa i se patupatu e 20 futu (6 m) lea sa i ai se auala laupapa ua faaleagaina i tafega. Sa mafai ona ou a’e i fafo i la’u itu, ae sa le mafai e Emeli ona tatala lana faitotoa. Ina ua taumafai o ia e a’e i luga o le nofoa e sau i fafo i la’u faitotoa, sa amata ona maluelue le taavale. E manino lava, o se taimi matuai faapopoleina lea.

Sa tele le mau manatu sa vave faasolo i lo’u mafaufau. Sa mafai ona ou vaaifaalemafaufau i faaulutala: “Oso le Peresitene Fou o se Misiona i luga o se Faaputuga Lea Sa Leai se Auala Laupapa, Ua Iu Ai ina Manu’a Tigaina le Faletua” po o le “Ua Leiloloa le Peresitene Fou o le Misiona ma Lona Toalua ina ua Osofaia e Faomea i luga o se Auala sa Le Tatau ona Ui Ai.”

O le le iloa ai o se mea e fai, sa ou tu ai i fafo o le taavale ma augani atu i le Tama Faalelagi, “Faamolemole fesoasoani mai ia te a’u i taimi o lo’u faatamala.” Tou te talitonu sa faafuasei lava ona tu mai i o ma tua se loli fa’i tele lava? Sa iloa mai ma’ua e le avetaavale ma le pasese ma o ai mai e talie ma fiafia i le tulaga lamatia o le palagi faavasivasi. Sa latou faasino mai le lala o loo i luga o le auala. O le mea moni, sa na’o se fasilaau.

O lea, i lo ma faamanuiaga faavavega, sa latou aumaia mai le latou loli le iliafi muamua lava na ou vaaia iai i le tolu tausaga o le auaunaga i Kuatemala. Ae latou te le’i o ese atu sa latou tipiina i lalo se laau ma toso mai faataatia i le auala. Ou te manatu sa latou mananao ia mautinoa e le faia e le isi tagata Amerika i Matu e ui mai ai lea lava measese e tasi.

Faalogo ma Usitai i Uunaiga ma Lapataiga

Ua ou faamatala atu ia te outou lenei tala e faailoa ai se manatu e faapea, e tatau ona tatou faalogo ma usitai i lapataiga, uunaiga, ma taitaiga e tuuina mai ia i tatou e le siufofoga o le Alii—e le afaina po o le a le malosi po o le feoloolo. O lenei siufofoga e oo mai i le tele o auala: tusitusiga paia, poloaiga, musumusuga mai le Agaga Paia, tuleiga a perofeta soifua, ma fautuaga mai matua, taitai o le Ekalesia, ma uo lelei. Pe o tatou faalogo mo ma usitai i nei uunaiga ma lapataiga? Aisea e taua ai le faia o lea mea?

Tatou te faitau i le Faataoto:

“Ia e faatuatua ia Ieova ma lou loto atoa; a e aua le faalagolago i lou lava atamai.

“Ia e manatua o ia i ou ala uma, ona faatonuina ai lea e ia lava ou ala.

“Aua e te faafiapoto; ia e mata’u ia Ieova, ia alo ese i le leaga” (Faataoto 3:5–7).

E ao ona tatou faatuatua i le Alii ma o tatou loto atoa. E ao ona tatou malamalama e le lava lo tatou iloa o mea e sili ona lelei mo i tatou ma sili ona lelei mo isi. Afai tatou te faatuatua ia te Ia, o se folafolaga ina a matagofie ua Ia tuuina mai: o le a Ia faatonutonuina o tatou ala.

I totonu o le matou aiga, e i ai se matou faaupuga na faapea ona avea ma se vaega taua o le ma misiona. Sa fai si umi o aoao mai e Peresitene Russell M. Nelson lea manatu. Sa ia faaupuina faapenei: “O le usiusitai e aumaia ai le manuia; o le usiusitai a’ia’i e aumaia ai vavega.”¹

O le faaupuga a le matou aiga ma le misiona o le “O le usiusitai e aumai ai faamanuiaga, ae o le usiusitai a’ia’i e aumaia ai vavega.”

Ou te le malamalama atoatoa po o le a le uiga o le usiusitai a’ia’i, ae o le mea lenei ua ou malamalama i ai. E le faapea ua tatou usitai atoatoa i le taimi nei i mea uma lava, e ui e mafai ona tatou atoatoa i le usitaia o le tele o poloaiga a le Alii. O le mea lea, e ao ai ona avea le salamo ma se vaega autu taua o le usiusitai a’ia’i. O le usiusitai a’ia’i e manaomia ai se tautino i lapataiga ma uunaiga uma ma poloaiga e tuuina mai e le Tama Faalelagi ia i tatou.

O nisi taimi, o le a tatou le malamalama ai i le pogai e fesili mai ai le Tama Faalelagi i nisi o mea faapitoa mai ia i tatou. O na taimi e mafai ona avea o ni taimi sili ona faigata ona usiusitai a’ia’i ai. Manatua le taimi na fesiligia ai Atamu, o se tasi o tagata aupito maoae o tagata uma, pe aisea na ia faia ai taulaga, “Ma ina ua mavae aso e tele, sa oo mai se agelu a le Alii ia Atamu, ua fetalai mai: Aisea ua e osi atu ai taulaga i le Alii? Ma sa fai atu Atamu ia te ia: Ou te lē iloa, ae na poloaiina ai a’u e le Alii” (Mose 5:6).

Mulimuli i Perofeta

O Emeli o se faataitaiga matagofie lea o le usiusitai a’ia’i e ui lava na sa le’i malamalama o ia. I le taimi o le konafesi aoao o Oketopa 2000, sa faalogo ai o ia i le fautuaga mai ia Peresitene Gordon B. Hinckley (1910–2008): “Tatou te le fautuaina le taina o ni pea ma e faapena foi le faapupuina o le tino e ese mai nai lo faamoemoega o tulaga o gasegase. Peitai, tatou te le, faia se folafolaga ‘i le faaitiitia o le tatuiina o taliga o tina mo le nao le tasi le pea tautaliga’—tasi le pea.”²

Ina ua taunuu lo’u toalua i le fale, sa ia faamalamalama atu i le ma tama teine lona lua le taua o le mulimuli i perofeta tusa lava po o le a. A o tautala atu, sa usitai foi lo’u toalua. Sa ia aveeseina lana pea tautaliga lona lua mo le taimi mulimuli lava. Ou te talitonu e le o malamalama lava o ia pe aisea, ae ou te iloa e le afaina lena aisea ia te ia.

I nisi o i tatou, atonu e le taua tele lena mea aua o se mea laitiiti lava. E moni o lea. Ae peitai, ou te le manatua se fetalaiga a le Faaola e faapea, “Afai tou te alolofa mai ia te au, ia outou tausi mai i au poloaiga na e foliga e taua” (tagai Ioane 14:15).

O’u uso e ma tuafafine pele, o le tasi o leo manino o le lapataiga e ao ona tatou faalogo ma usitai i ai i taimi uma, e sau lea mai aposetolo ma perofeta filifilia a le Alii. Atonu e le lauiloa i tulaga a le lalolagi, e pei lava o lena talosaga laitiiti a Peresitene Hinckley. Ae e te mafai—e ao ona e—talitonu e sau mai i le Tama Faalelagi. Atonu e na’o si lala laau laitiiti, pe atonu foi o se laau atoa na tosoina atu i le auala tele. Ou te apoapoai atu ia te outou ia faitau pe faalogo i le konafesi aoao ma le manatu lenei i lou mafaufau: O a ni lala laau po o ni laau sa tuu e le Alii i lo’u ala?

Faalagolago i le Alii

Atonu o mafaufau nisi o outou: “Ia, e manaia tele lena. Ae o le a se mea e te faia pe afai o e sailia ni uunaiga, fautuaga mai le Alii, lapataiga, ma le taitaiga, ae foliga mai e te le maua lava se tali?”

Atonu o loo ia te oe le popolega lenei e faatatau i faaiuga taua i lou olaga. Manatua le folafolaga ia faalagolago i le Alii ma lou loto atoa, ma o le a Ia taitaia ou ala.

E faatatau i mea taua e tutupu i o tatou olaga, tatou te mananao i ni taitaiga manino, ma atonu e faigata ona maua na mea. Ae ua ou faapea ona ou malamalama, afai ou te salamo, ma usitai a’ia’i, mulimuli i o’u taitai, ma fai isi filifiliga lelei—i se isi faaupuga, afai ou te agavaa—o le a le faatagaina a’u e le Tama Faalelagi e faia ni mea sese tetele e aunoa ma ni lapataiga e tatau ai. Pe Na te faatagaina foi oe.

A’u uo talavou e, o loo iinei le Tama Faalelagi e puipui i tatou mai le faia o measese ogaoga pe afai tatou te saili mo Ana lapataiga, uunaiga, ma faaaliga mai punavai avanoa uma—ma pe afai tatou te faalogo ma usitai ma galue i ai. Ua ia i tatou le aia tatau e maua ai le Agaga Paia e faatasi ma i tatou e le aunoa, aemaise lava i taimi sili ona taua o o tatou olaga.

Ou te faamoemoe, o le a faapea ona e iloaina lelei lala laau ma laau o lapataiga e tuu mai e le Tama Faalelagi i lou auala.

Ou te molimau atu a tatou faalogo ma usitai i le siufofoga o le Alii, a o tatou maua mai i le tele o ona punavai ma taumafai ia usiusitai a’ia’i, e mafai ona tatou maua se olaga e faaiuina i le “ma sa latou ola fiafia ai e oo i le faavavau.” Na pau le ala e mafai ona tupu ai lena mea, o le ola lea i le aoaoga faavae o Keriso ma le osia ma le tausiga o feagaiga paia.