O Lau Meaalofa i le Faaola
E alala le tusitala i Idaho, ISA.
Na ou lagona le le agavaa o se faifeautalai. O le a se mea e mafai ona ou faia e taofi ai le taulai ia te au lava ia ae amata ona taulai atu i le Faaola?
Ata na tusia e Dinara Mirtalipova
E matuai malulu lava Rusia i le taumalulu ma e masani lava ona puaoa, ma pogisa aso ma e pei e faanoanoa. O le taufaaiuga o Novema ma e faaopoopo atu i le leaga o le tau, na ou lagonaina le tuuatoatasi, le le agavaa, ma le le mafaia ona avea ma se faifeautalai lelei. Sa faatoa tofia lava au e aoaoina se soa fou, ma ao avea Sister Hart o se tagata lelei, ua pau nei i ou luga le mamafa o le aoaoina ia sili atu ona lelei le gagana, avea o se faataitaiga, ma sailia se tasi—soo se tasi—e aoao.
Faatoa ma maua lava le tala e faapea o le a faia e la ma peresitene fou o le misiona se konafesi a le sone i Yekaterinburg, e lima itula mai la ma eria o Perm. I le taeao po lava o se taeao malulu o Tesema, na ma o atu ai ma Sister Hart i le nofoaga o nofoaafi.
Ao ma faatalitali na ou mafaufau loloto i lagona sa ou mauaina. Na ou mafaufau i aso malolo o le a oo mai ma lou naunau e fia faatasi ma lou aiga. O le fiafia ia i ai i se misiona ua mou atu ma o lenei ua foliga mai e lei tele ni mea na ou ausia o se faifeautalai i lou iva masina i le galuega. Mulimuli ane na tatagi mai le valaau o le taunuu mai o la ma nofoafi, o lea na ma ulufale atu ai loa ma nonofo i o ma nofoa. Na ou mafaufau au lava i le Faaola. Na moeiini ou mata ma tatalo ina ia mafai ona ou iloaina pe faapefea ona ou aveesea nei lagona ma taulai atili atu ia te Ia.
I le konafesi a le sone i le aso na sosoo ai, na matagofie le saunoaga a Peresitene Rust ma na lagonaina e le loto. Ina ua tulai Sister Rust e saunoa, na ia faasoa mai se tala faigofie lava e uiga i le ala e avea ai le Faaola ma leoleo mamoe lea o le a alu atu ma saili le mamoe e tasi lea na se ese ma toe aumaia lena mamoe i le lafu. Na ia talanoa e uiga i taulaga na faia e le Faaola mo i tatou, ma faaiu i lona tuuina mai o se molimau mamana lava i le avanoa ua matou maua o ni faifeautalai e auauna atu ai ia te Ia e ala i le aumaia o Ana mamoe ua se i le lafu. Na luiina i matou e Sister Rust e mafaufau po o le a le meaalofa e mafai ona matou tuuina atu i le Faaola mo le Kerisimasi.
Ina ua ia tuuina mai lena luitau, na ou lagonaina le uunaiga e sili ona malosi o le meaalofa e tatau ona ou tuuina atu i le Faaola o le tau lava o le talanoa atu i ni tagata ia sili atu le toatele. E oo mai i le taimi tonu lava lena, sa ou fefe tele e amata ni talanoaga ma ni tagata e matuai le masani ai lava—ae maise lava i le faaRusia! Ou te lei manao ia latou manatu ou te valea mo le le malamalama ia i latou, o lea na faigofie atu ai le aua le fai atua se tala lava e tasi. E ui i lea, na ou iloaina, i le taimi lava lena, le mea tonu lava ou te manaomia e fai. Na ou manaomia le taofi o le mafaufau ia te au lava ia ae amata ona mafaufau i ou tuagane ma uso. Na ou setiina se sini e talanoa atu i se tasi e uiga i le talalelei i taavale taitasi ou te alu ai mo le taimi o totoe o le masina ma ia tuuto atu lena mea o lau meaalofa o le Kerisimasi i le Faaola.
Ina ua ma ulu atu ma Sister Hart i le isi nofoaafi e toe foi i Perm i le taeao na sosoo ai, na ou amata i lau sini e ala i le talanoa atu i tagata na ou nofo ai i tafatafa. Latou te lei fiafia tele mai i le mea na ou tau faasoa atu, ae o le mea sili na ou taumafai!
Na ou tauivi i aso taitasi ao ou galue e tuuina atu lau meaalofa i le Faaola, ae na faifailemu lava ona ou lagonaina e au lava ia le sili atu ona fiafia ma sili atu le mautinoa—na ou lagonaina ua sili atu lou faataunuuina o lou valaauga o se faifeautalai. Na oo mai ma alu ese atu le Kerisimasi, ae na ou filifili e faapea o le a ou faaauau pea ona talanoa i tagata. Na ou amata ona talanoa ia i latou e le gata pe a ma o i taavale laupasese ae faapena foi i auala, i faleoloa, i le faletusi, ma soo se mea lava ma te o i ai.
Ma te lei mauaina se tasi e aoao e ala mai i lou talanoa atu i le tele atu o tagata; ae ui i lea, ou te lagonaina sa ou totoina ni fatu o le talalelei. Na ma faia ni uo fou ma ave pasi, tagata i la matou faleoloa meaai i le lotoifale, ma isi. O le vaega e sili o le taimi pe a matou toe vaai i se tasi, ma te masani lava ona vaaia i latou o ataata mai, ma o i latou o le a muamua ona fai mai ia i maua talofa. E i ai lou faatuatua e faapea o na fatu na ma totoina o le a i ai se aso e fua mai ai pe a oo mai ni avanoa fou mo na tagata e aoao ai e uiga i le talalelei. E galue le Tama Faalelagi i auala laiti ma faigofie, ma o nisi taimi e na ona amata lava i se “talofa” faigofie.
I le mafaufau atu i tua i lena taimi i luga o le nofoaafi i Yekaterinburg, ua ou iloaina ai na tali mai e le Tama Faalelagi lau tatalo. Na ia fesoasoani ia te au ia vaai e faapea o le galuega faafaifeautalai e le faatatau ia te au—e faatatau i isi, ma pe a tatou tuuina isi e faamuamua ia i tatou lava ma o tatou popolega ma faanoanoaga, tatou te mauaina le fiafia o loo tatou sailia uma lava. E ofoofogia ia te au le ala e tuuina atu ai i le Faaola, aua e tusa lava pe tatou te taumafai e tuuina atu ia te Ia mea uma tatou te mafaia, e faamanuiaina i tatou e Ia ma toe tuuina mai ia i tatou e sautuaselau.