O Le Talalelei: O Se Tomai o le Ola e Faavavau
O Lori Fuller o se faatonu mo le mekasini o le Uo . E fiafia lava o ia e sue ia faaili fou, faalogologo i talafou i luga o le leitio, ma kuka meaai mai le lalolagi atoa. O nisi o taimi na te tusitusia ai ni mea.
Pe na outou manatunatu ea i le matuai faigofie lava o le olaga ona o le tausia o poloaiga?
O le masina ua tuanai atu, sa matou feiloai ai ma nisi o uo e talatalanoa i le aluga o a matou vaiaso. Sa faasoa mai e se tasi o uo e faapea, ua ia tauaveina le avega o le toe manuia o lona tina mai le tagofia o le ava malosi. E laitiiti teisi o ia ia te a’u, ma o lena mea sa pei o le galuega aupito leaga lava lea.
Mulimuli ane i lena afiafi, sa see atu le talanoaga i le taugata o le ulaula ma le ala sa ulaina ai e se tasi na matou iloaina se pepa sikaleti i le aso. (Fai le matematika; o se matuai tupe tele lava!) Sa taumafai o ia e tuu, ma sa oo ina faamaamulu o ia. Ae sa matuai fiafia lana tama tama i lona tuu [o le ulaula]. Na maliu lona tama ona o le soona faaaoga o fualaau oona, lea na mafua ai ona fefe tele lenei tamaitiiti e faaaoga soo se fualaau.
Mulimuli ane, sa faaiu le matou talanoa i le kofe—pe fia le tele e inu e tagata i taeao uma (ma aoauli ma i nisi taimi i le po) ma lo latou misia o a latou kofe i le taimi lenei ona ua latou le gafatiaina i aso taitasi.
A o ou tietie atu i le fale, ma mafaufau i nei talanoaga uma, sa oo mai sou manatu, “O le Upu o le Poto o le mea moni lava o le tomai aupito tele lea o le olaga.” (Afai e te le iloa, o le “tomai o le olaga” o se auala e faaleleia ai lou olaga, ola faatulaga lelei atili ai, ma isi mea faapena. E pei ona faamatalaina e se tagata i luga o le initoneti, o se tomai o le olaga o le mea lea sa ta’ua muamua “o se manatu lelei.”) E pei ua fetalai mai le Atua, “O le auala lenei e sefe ai au tupe, fesoasoani e tumau ai lou ola maloloina, puipui ai lau fanau, ma aloese ai mai avega e matuai mamafa faalelagona, e aofia ai a oe lava vaisu ma vaisu o isi.” E toetoe lava a pei na iloa ma sauniuni lelei e le Atua ia faafitauli uma o le a tatou feagai ma tuu mai ia i tatou se auala e aloese ai mai le afa o ia mea. …
Faatasi ai ma soo se poloaiga a le Atua, ua ia i tatou le filifiliga e mulimuli i ai pe le amanaiaina. Ae a o ou mafaufau i le Upu o le Poto o se seti o taiala mai le Atua lea e iloa ma sauniuni lelei ma puipuia ai i tatou mai le tele o luitau, sa ou mafaufau, “Ae faafefea pe afai o le auala lena e galulue uma ai poloaiga a le Atua?” Ae faapefea pe afai ua tuuina mai e le Tama Faalelagi agaalofa, o le sa oo foi i lenei olaga ma ona luitau, ia se tusitaiala e fesoasoani tatou te folau ai i le lalolagi i le leai o se tiga e mafai ona oo i ai? Ae a pe a fai na Ia tuuina mai lena mea ia i tatou ona e alofa o Ia ia i tatou ma finagalo e puipui i tatou?
E te manao ia lotomalie i mea ua e maua, ia fiafia ma loto faafetai? “Aua e te manao i le fale o le lua te tuaoi” (Esoto 20:17).
E te manao e aloese mai le ta’usalaina, faafalepuipuia, taugata o le totogi o le tatalaina mai i tua ma pili o le faamasinoga? E te manao e tausisia le talitonuina ma le faaaloalogia e tagata—ma lau galuega? “Aua e te gaoi” (Esoto 20:15).
E te fia tumau i le latalata atu i le Atua ina ia mafai ona Ia taiala ma taitaia oe ma fesoasoani e tauave au avega? “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” (Mataio 22:37).
E alu pea lava pea le lisi. O poloaiga taitasi uma lava e mafai ona puipuia i tatou mai le lototiga, faafaigofie atili ai o tatou olaga, aveese ai i tatou mai faalavelave, pe na o le fesoasoani lava ia tatou maua ai le filemu. Ma e matuai itiiti lava se taumafaiga patino po o le faafitauli. (Ma e leai ni mea e totogi o faalafi ai!)
E mautinoa lava ou te le manao e tuuitiitia poloaiga a le Atua e faapea ua na’o ni taiala po o ni tomai aoga o le olaga. E sili atu le taua nai lo o lena. Ae e faapena foi ona matuai faigofie lava. E le mafai e le Tama Faalelagi ona puipui i tatou mai mea uma. Ae i le avea ai o se matua agalelei, o le a Ia finagalo e saunia i tatou ma puipui i tatou mai le tau o a tatou filifiliga—e ala i le taialaina o i tatou e fai filifiliga sili atu.
O lea lava, e mafai ona tatou tausia poloaiga ae tutupu lava mea leaga [ia i tatou]. Ia aisea la e popole ai?
Aua o le a tatou le iloa lava po o le a le mea ua puipuia mai ai i tatou e ala mai i lo tatou usiusitai. Aua e fesoasoani e faasaoloto ai i tatou mai se olaga o manuaga e faia e le tagata lava ia. Aua o le usiusitai e fesoasoani tatou te latalata ai i le Atua. Aua e tuu ai i tatou i se tulaga ia salamo ai pe a tatou filifilia le sese. Aua tatou te talitonuina le Atua e silafia le ala e faamanuia ma puipui ai i tatou.
E alu pea lava pea le lisi. E sili atu le umi nai lo o le lisi o mafuaaga e le tausia ai poloaiga.
Mo le lelei po o le leaga, e faataga a’u e le Atua e filifili po o le a le usitai ou te manao ia ou i ai. Ou te filifil po o le a le tele o lo’u nofouta i faamanuiaga o loo ia te Ia mo a’u. Aisea la e tausi ai poloaiga? Ona ou te manao ia matuai matala atu lo’u olaga i le fesoasoani o loo taumafai le Atua e tuuina mai.