O Le Pogai Ua Ou Le Toe Fefe ai i Fonotaga a le Soifua Maloloina Faalemafaufau

Saunia e David Clarke

E alala le tusitala i Virgina, ISA.

O le mauaina o le fesoasoaniga sa ou manaomia sa le o se faailoga o le vaivai po o le toilalo.

“E tatau ona e alu e talanoa i se faufautua o le soifua maloloina faalemafaufau.”

O lenei fautuaga sa le o se mea sa ou faamoemoeina. Na faatoa ou talanoa i se uo mamae e uiga i lou popole tele e uiga i le i ai i se polokalama iloga o le tausitusi, faatumauina o sootaga, ma le tafao faamasani o se faifeautalai faatoa foi mai. Ou te lei mafaufauina lava le manatu o le togafitiga, ma sa ou lagona o le talanoa i se faufautua sa mo na o tagata sa i ai faafitauli tetele pe sa vaivai tele e taulimaina e i latou lava luitau. Sa na o mea lelei lava sa tau mai e lau uo e uiga i lona aafiaga i le talanoa ai i se faufautua, o lea sa ou amata mafaufau i ai.

E lei umi ae faateteleina lou atuatuavale. I le mavae ai o le tele o po o le popole, sa tonu loa ia te au e faatulaga se taimi faatulagaina. Sa ou popole e uiga i mea e ono fai mai pe mafaufau i ai isi tagata pe latou iloa sa ou alu e vaai se faufautua, ae i lena taimi sa aafia lou tomai e faagaoioia ai i lou atuatuvale, lea sa ou alu ai.

Faatoilaloina o le Atuatuvale

I le taimi faatulagaina, sa faia ai e le faufautua le tele o fesili lea na fesoasoani ia te au ia iloa mo au lava ia tali. E lei tuuina maia e le faufautua ia te au se vaifofo faamaneta i ou tauiviga. Na te lei taulimaina foi au e pei ou te valea—sa ia vaai le tele o tagata sa i ai tauiviga e talitutusa ma au. I nisi auala, sa pei o le alu i se fomai. Sa avea o ia o se polofesa i poto masani i le iloaina o le faafitauli ma sa atamai e aoao au i le auala e taofia ai ma togafitia le atuatuvale.

Faatasi ai ma isi fautuaga, na fautua mai le faufuatua ia ou tusia ou lagona ma mafaufauga i lou api o talaaga. O lenei mea sa o se fesoasoani tele i le faatoilaloina o lou atuatuvale. Sa ou faamalositino foi, faaalu le taimi ma uo ma aiga, taumafa paleni (pe soifua maloloina e pei o se alii i le kolisi o le sa mafai ona faia ana lava meaai), suesueina o tusitusiga paia, auai i le lotu, ma le tatalo.

I le maea ai ona feiloai ma le faufautua mo ni nai taimi, e lua mea sa suia mo au: Muamua, sa ia au ni vaaiga manuia atu i ou atuatuvale, ia te au lava, ma isi tagata; ma le lona lua, sa ou lagona e pei sa ia te au meafaigaluega aoga sa mafai ona ou faaaogaina i vaifofo o le faaosofia o le atuatuvale i le lumanai. Ou te lei maloloina atoa i le atuatuvale, ae sa ou lagona sa mafai ona ou taulimaina i le mea sili pe a toe tulai mai. Talu mai lena taimi, ou te lei toe manaomia ona alu i le faufautua, ae a faapea ou te manaomia, ou te le popole i le mauaina o le fesoasoani—ua ou aoaoina e leai se mafuaaga e mafatia ai le leoa pe maasiasi i le sailia o fesoasoaniga faapolofesa mo se faafitauli o le soifua maloloina faalemafaufau.

Taofi Uiga Le Lelei

O le mea e leaga ai, o loo tele uiga le lelei o siomia ai togafitiga o le soifua maloloina faalemafaufau, ae atonu o lena mea ona e le malamalama isi o le feiloai ma se polofesa o le soifua maloloina faalemafaufau e tutusa lona taua ma le mauaina o se togafitiga mo seisi lava gasegase faaletino. Na saunoa mai Elder Jeffrey R. Holland o le Korama a Aposetolo e Toasefululua: “Afai e afaina lou pitogaau, o le a faamoemoeina oe e le Atua e te saili atu i se faamanuiaga faaleperisitua ma ia maua se togafitiga sili faafomai. E faapena foi ni faaletonu faalelagona. Ua faamoemoeina i tatou e lo tatou Tama i le Lagi ia faaaoga ia meaalofa ofoofogia uma ua Ia saunia i lenei tisipenisione mamalu.”¹

O manaoga o le soifua maloloina faalemafaufau o faafitauli foi e le iloa e le toatele o tagata. E le faigofie ona talanoa e uiga i ai e pei o le mauaina o le fulu po o le gau o se ponaivi. Ae e o gasegase masani foi. Ua fuafuaina e le Faalapotopotoga o le Soifua Maloloina i le Lalolagi e faapea e toatele tagata o i ai faafitauli ogaoga o le soifua maloloina faalemafaufau e le maua ni togafitiga: i le va o le 35 ma le 50 pasene i atunuu atiae ma le 76 i le 85 pasene i atunuu o loo atiae.²

O le mauaina o le fesoasoaniga e manaomia sa le o se faailoga o le vaivai po o le toilalo. E finagalo le Tama Faalelagi ina ia tatou soifua maloloina, faalemafaufau ma faaletino, ma ua tuuina mai le tele o “meaalofa ofoofogia” e fesoasoani ia i tatou e taulimaina luitau faalemafaufau ma faalelagona o le olaga, e aofia ai:

Soifua Maloloina Faalemafaufau

Faamalositino

Uo ma aiga

Ola ai i le talalelei

Mauaina o le lava o le moe

Taitai o le Ekalesia

Auauna Atu i Isi

O se polofesa o le soifua maloloina faalemafaufau

Lelei le taumafa

Tatou te le mafai ona faatoilaloina atoatoa luitau o le soifua maloloina faalemafaufau i taimi uma i lenei olaga, ma e le faigofie, e tasi le aofaiga e fetaui mo vaifofo uma. Ae a o tatou faia le mea silisili e fesoasoani ai ia i tatou lava e faaaoga meafaigaluega na tuuina mai e le Tama Faalelagi ia i tatou, o le a fesoasoani mai le Faaola e tauave ma le faigofie a tatou avega (tagai Mosaea 24:15), ma o le a faamanuiaina i tatou i le malosi ma le faamoemoe mo a tatou taumafaiga.

Faamatalaga

1. Jeffrey R. Holland, “Peiseai o se Ipu ua Nutililii,” Liahona, Nov. 2013, 40.

2. K. Demyttenaere and others, “Prevalence, Severity, and Unmet Need for Treatment of Mental Disorders in the World Health Organization World Mental Health Surveys,” The Journal of the American Medical Association, vol. 291, no. 21 [June 2004], 2581–2590.

O Le A se Mea e Mafai Ona Ou Faia?

Afai o oe poo se tasi e te iloa e mafai ona manuia mai le vaaia o se polofesa o le soifua maloloina faalemafaufau, mafaufau e uunaia i latou e faia lea mea. E mafai foi ona e faia le tele o mea e aveese ai uiga le lelei o siomia le togafitiga o le soifua maloloina faalemafaufau e ala i le malamalama ma lagolago i latou o e saili le togafitiga.

Suesue Atili

Suesue le “Aoao A’u ia Lelei: Ausiaina o le Ola Tutoatasi Faalelagona i le Ala a le Alii” ma isi tusiga e uiga i le taulimaina o manaoga faalelagona o le ola i le vaega o talavou matutua o le Liahona Ianuari 2019.

ODave Clarke e fiafia tele e faaalu lona taimi i lona toalua ma lona afafine. Pe a ia le lotea ia fuainumera o se tausitusi, e mafai ona maua o ia o faaalu lona taimi i fafo, tamoe, tietie uila, pe matamata i pasitketipolo.