O se Malosiaga Maoae mo le Lelei
E mafai ona avea i tatou uma o se malosiaga mo le lelei i le lalolagi, po o le a lava le tele po o le itiiti o lo tatou lio o aafiaga.
O le mamafa o le kiona i le ogatotonu o Aperila na amata uma ai lava. E le o se mea e le masani ona tupu i Iuta, ae o lea, sa ou manatu o tulipe ua pala susu i le kiona i le Temple Square e manaomia ona faamaumauina. O lea sa ou amataina ai sau itulau i le Instagram—lea e le faaalia ai ata o au pusi (e tusa lava lo latou tauagafau) ae o ata o le malumalu.
Ona amatalia ai lea o le tausaga o talasii i aso uma ( ma ni nai tausaga o talasii e le o aso uma). O le pueina o ata o le malumalu ma faapipii ma upusii e faatatau i le malumalu mai taitai o le Ekalesia na avea ma auala matagofie e atiiae ai taleni ma faaloloto ai lau faafetai mo le malumalu.
Ae o le tele o tagata sa ou pai atu i ai, o le tele foi lea o lou iloa o ou avanoa e fai ai ma aafiaga mo le lelei. E le o au o se tasi faaleagafesootai e “faaaafia” ai nisi, ae ou te manao e mafaufau o au taumafaiga e maua ai se suiga mo soo se tasi i soo se mea.
E ui i lo tatou olaga pisi ma le televave, e mafai uma ona tatou faaaoga a tatou taleni e faamanuia ai ini ma fai ma malosiaga mo le lelei. I le iuga, “matou te talitonu … i le faamaoni” (Mataupu Faavae o le Faatuatua 1:13).
Sa ou mataituina nisi o talavou matutua o lo o taumafai e avea ma malosiaga mo le lelei. O le auala lenei o lo o latou faia ai se eseesega.
Aapa Atu ma le Agaalofa
O Graziely Moreira, 25, sa tausia lava ina ia faia le lelei. Afai e vaai e tagata i lona aai o Fortaleza, Ceará, Pasili, se tasi o manaomia le fesoasoani, latou te fesoasoani i ai. “O se tulaga faaleaganuu,” na ia faimai ai. Ma mo tagata o le Ekalesia, “o le i ai foi ona ua tatou mafaufau lava e pei ona sa fetalai Iesu Keriso, alofa atu i isi e pei ona e alofa ia te oe lava. Tau lava o le fai. Tatou te faia ona tatou te fiafia e fai.
Mai lana faataitaiga filemu o le vaai atu ma alu atu i lona lava malie e fesoasoani ai ia i latou o manaomia— e pei ona sa ia vaai i se tama matua o taumafai e avatu ni ato mamafa ma sopoia le auala e fesoasoani ia te ia e avatu i le fale— o Graziely o se malosiaga mo le lelei. Ua ia iloa foi e mafai ona tatou fai lelei sili pe a iloa e tagata ua tatou auauna atu ona o le alofa, ae le o se noataga. “E i ai se mea na ou aoao mai lou tina: Fai i isi mea e te manao i tagata e fai ia te oe. O le fuafuaga a le Tama Faalelagi— E finagalo o Ia ina ia tatou fesoasoani i tagata.”
E le mafai foi ona tatou tuua mea e pei o le tekinolosi (ETF o a tatou telefoni) e fai ma faalavefau o lo tatou aapa atu i fafo atu o i tatou lava e faia le lelei, ua faimai ai Graziely. “O le mea lena— e tatau ona tatou iloa o le tasi ma le isi, e ao ona tatou malamalama i manaoga o isi aua o o tatou olaga e le faalagolago i apps. O lo tatou olaga e faalagolago i tagata. E faalagolago i mea tatou te fai e faaleleia ai ma mulimuli ia Iesu Keriso.” Ma o se vaega tele o le mulimuli ia Iesu o le uiga o le faia o le lelei.
Ia lototetele
Normandie Luscher, 29, o se Matai o tamaiti Tusi Ata i Maryland, ISA, e faaaoga ana atatusi mo le lelei. “Sa ou taulai pea i le lua tausaga ua mavae i le poloaiga silisili ona taua, o le alofa i le Atua ma le alofa i o tatou tuaoi,” na ia faamatala mai. “I lau galuega tusiata sa ou taulai atu i le faamatalaina o tala. E mafai ona tatou aoao tonu i auala e alofa ai i o tatou tuaoi atili e ala i le faalogo ia i latou ma le faalogo atu ia latou tala.”
O se “tagata o manatu” e folafola e ia ia lava, o Normandie na te aumaia faatasi tagata mo le lelei i le tele o auala. O se poloketi a le aoga na taitaiina atu o ia i se suegatupe mo se fale e mapu i ai tina o le lotoifale: o se fale e faaali ai atavali sa ia foafoaina e faamatala ai tala o Iopu mai se manatu o se fafine. “O isi tina na o mai ma fefaasoaai a latou tala ma o latou aafiaga,” na ia faamatala mai ai. “Ma sa ou mafaufau o se mea malosi tonu lena.”
O le isi manatu na tuliloaina e Normandie e mo se tusiga tuufaatasia (o se mekasini lolomia lava e ia pe i luga o le initoneti). Sa ia aapa atu i isi tusiata, ma e sa latou faamatala faatasi tala o le Tusi a Mamona e ala i le faata o tusiata o onapo nei.
I le tulaga patino, sa maua e Normandie e mafai ona avea o ia ma se aafiaga mo le lelei e ala i le tatala atu i isi. “Sa ou galue i le atiinaaeina o le lototele e ono lamatia ai ma faaali atu lou lava aafiaga ma le lagona. O le tusiata e faatatau i le faamaoni ma le fefaasoaai o manatu. O lea o le fai e avea ma malosiaga mo le lelei, ou te taumafai e opogi na manatu o le faamaoni ma le lototele ma aapa atu i isi tagata ma fesootai e ala i tusigaata.”
Na ia timai mai i isi talavou matutua e atiae le lototele e faia ai foi le lelei. “Aua le fefe i le le mafaia ona faia o mea uma,“ ua ia faimai ai. “Ou te manatu o le toatele o tagata ua lagona lofituina i le, ‘E leai se mea ou te mafai ona fai,’ ma pau ifo ai i le lagona sese e punitia ai mea lelei e tele mai le faataunuuina. Aua le fefe. Ia lototele e agai atu i luma ma galue.”
Saili Lau Faapogai
Ua lagona e Matt James, 26 o Iuta, ISA, o se vaega o lana misiona i le lalolagi le fesoasoani ia i latou e le i fananau mai i faamanuiaga ua ia fiafia ai. O se tasi o vaega o le taunuuga o le tausia e ni matua e foai, ma se tasi o vaega o le agaga o tiute o lo o faamatalaina sili mai e upu o le “Ona ua tele mea ua ou maua” (Viiga, nu. 219). Ina ua maea ona faia e Matt se galuega faamisiona talai i Aealani ma Sikotilani, sa uunai atu lona loto i tagata sosolaese mai Aferika sa ia aoaoina ma papatisoina iina, o lea ina ua maua le avanoa e alu atu ai i Uganda, na alu o ia.
E ui ina sa alu muamua o ia e Ethiopia, Peru, ma Initia, “o Uganda na sui ai lou olaga,” ua faimai ai Matt. “Ou te iloa sa taitaiina atu au e le Atua i lena vaega faapitoa o le lalolagi mo se faamoemoega atamai.” O se vaega o lena faamoemoe o le faauo atu ma mulimuli ane papatiso se tamaitai e igoa ia Carolyn. Ma o se isi vaega o le talia lea e lona loto ona o tamaiti ua maliliu o latou matua sa ia galue ai. Ina ua oo mai le taimi e tuua ai, sa le manao Matt e motusia le fesootaiga ma nei tagata ua ia ola ae e tausi i ai. O lea na talanoa ai o ia ma ona matua, o le na ofoina atu e fesoasoani ia te ia i tupe e fausia ai se fale o tamaiti ua maliliu o latou matua ma Carolyn i se aai laitiiti e igoa ia Mbale.
O Carolyn, o ia lava foi na ola ae o se tasi ua maliliu ona matua, ua faaauau ona pulea faagaoioiga o nofoaga mo tamaiti ua maliliu o latou matua, Na toe foi atu Matt i Uganda i taumafanafana uma ma sa galulue faatasi ma isi e fausia se fale tele mo tamaiti ua maliliu o latou matua, ma tuuina atu se nofoaga e nonofo ai ma aoaoga mo le sili atu i le 200 tamaiti. Ma o lea ua ia pulea se pisinisi e fai ai mea taua e fesoasoani e tausia ai le fale mo tamaiti ua maliliu o latou matua.
E pei ona faimai Matt, e i ai ia i tatou ni mea faapitoa i le olaga ua faamanuiaina ai i tatou e le Atua e tausia. Ou te talitonu maumaututu afai e faamaoni tagata uma ia i latou lava ma faia le galuega, mulimuli i le ala ua faataatia i o latou luma ma fai le avanoa ua tuuina atu ia i latou, o le a maua ai e tagata uma lo latou mafuaaga. Ma afai e saili e tagata uma lo latou mafuaaga ma filifiliga, o le a avea le lalolagi ma nofoaga silisili ona lelei.
O le sailia o lou “mafuaaga” e le faapea e faigata. “Tatalo i le Atua ma taumafai e saili mea e te fiafia i ai,” ua fautua mai ai Matt. “Tatalo ina ia maua o na mea e te popole i ai, e pai atu i ai lou lio o aafiaga, ma fai loa.”
Tatalo mo le Alofa Tunoa
Kaveria ei jätetä. I Finilani, o lona uiga “e leai se tasi o tuua i tua,” o se faaupuga o i ai aa i taimi o taua ae o se mea e tumau pea i o latou loto e oo mai i le taimi nei Mo Rolle Rantaniemi, 23, o Uusimaa, Finland, ua faaosofia ai o ia e faia le mea lelei.
“E i ai lau tulafono mo au lava. Afai ou te vaai i se tasi ua na o ia lava, o le a ou alu atu i ai, poo le a lava le aafiaga. E leai se tasi e tatau ona na o ia lava. A o ou talavou, sa ou i ai toatasi lava na o au i le aoga ma le lotu—Sa le i ai ni a’u uo, ma ua iloa le lagona o le nofo toatasi. O se mea lena na ou maua mai le mafaufauga mai Finisi, e leai ma se tasi e tuua i tua.”
O se tasi o ana uunaiga malosi o le iloa lea o lena mafutaga e mafai ona faaauau i tua atu o le olaga nei. “O le mea lea ou te manatu ai o le mea e sili ona taua mo i tatou e taulai ai o le faaleleia lea o i latou lava. Ia avea ma se faataitaiga lelei, o se tagata lelei, e avea ma se filifiliga ma uiga uma na o Keriso. O le isi mea o le atiae lea o mafutaga, e avea ma ni uo ma tagata, ia i ai le alofa mama ma le alofa ma auauna i isi tagata.”
E talitonu Rolle o le atiina aeina o le alofa mama faaKeriso o la tatou meafaigaluega sili lea i le faia o le lelei. “Ua faapea mai i le Moronae 7:48 e ao ona tatou tatalo mo le alofa tunoa. Ma ua ou vaai i ai ona ou te faia o lea i aso uma, ma ou te fesili i le Tama Faalelagi e tuuina mai ia te au ni tulaga e mafai ai ona ou auauna atu, ou te iloa sili atu i latou. Afai e tatala tonu o tatou mata, o lo o i ai avanoa e auauna ai sa tatou le i mafaufauina muamua lava.”
“E oo lava i mea laiti e taua,” ua fai mai ai Rolle. “Afai e tau ina ia e vaai mo na mea laiti ma faia loa, e mafai lava ona e faia se eseesega tele.“
Faaosofia Isi ia Maualuga o Latou Faamoemoega
Ua faasusulu atu e Daniel Godoy, 23, le malamalama ma le lelei, ma o ana filifiliga e faalagolago tele i lena. O Ia o se aafiaga mo le lelei tau lava o lana faataitaiga.
I le na o le pau lea o le tamaitiiti mai se aai laitiiti i fafo atu o Santiago, Chile, sa ola ae o ia ma iloa ona matua ua tuuto atu i le auaunaga ma le talalelei. O Tanielu o se tasi muamua mai lana siteki e auauna atu o se faifeautalai i le 18 o ona tausaga ina ua faaitiitia tausaga, ua faaosofia ai le toatele o alii talavou e saunia e vave foi ona auauna atu. Ina ua maea lana misiona i Columbia, o ia foi na muamua o lona aai e tuua le atunuu e faaauau lana aoaoga maualuga. O lona tauivi sa faaosofia ai isi ina ia maua le aoaoina. “I nisi o auala sa ou faaosofia i latou ina ia maualuga o latou faamoemoe,” sa ia fai mai ai. “Sa matagofie le iloa o na sitepu laiti sa ou faia sa fesoasoani e faaosofia ai isi tagata.”
Maua o se aoaoga i le I.S. o se ki foi lea mo fuafuaga a Tanielu e fesoasoani ai i isi ma faia le lelei i le lumanai. “O lou faamoemoega mamao o le toe foi atu lea i Chile ma fesoasoani i tagata iina—e auauna ia i latou. Na ou sau iinei aua ou te iloa ou te maua ai avanoa o le a taitaiina au e fesoasoani ai foi i tagata o Chile.”
A o lea foi, ua tautino mai e Tanielu: “Ou te le atoatoa. Ae o lo o ou taumafai e faia le mea sili, ma ou te lagona e faapei o le a faaosofia ai isi ma tuuina atu ai ia i latou le uunaiga e faaauau pea lava pea.”
Faasoa atu le alofa o le Atua
Ina ua maua se faailoga i galuega e fesoasoani ai i tagata, sa le i pupu Katelyn Rae, 27, mai Kalefonia, ISA, i se galuega ae sa ia lagona le tosina atu i galuega alofa fesoasoani. Ua ia vaai i le aao o le Atua o faatonutonu o ia “i sitepu uma o le ala,” ua taitaiina atu o ia ma avea ai nei ma faatonu o le polokalama mo se faalapotopotoga tumaoti e galulue mo le mativa i le lalolagi.
Sa galue Katelyn ma tagata sosolaese mai Eleni ma i latou ua aafia i le faatautala i Nepal, o se, e pei ona ia faamatala mai, ua “oo i tulaga sili ona faigata o o latou olaga. Ua na o le i ai lava iina ma i latou, e leai se mea e mafai ona ou fai. E le mafai ona ou suia malo po o tulafono, ae o le tasi le mea e mafai ona ou fai o le alofa ia i latou.” Ma e poo ai lava e i ai faatasi ma ia, ua ia iloa le taua i isi ona lagona le alofa o le Atua. “Afai e mafai ona fai au ma aualla mo lena, o le a ou lagona e pei ua ou faia se mea lelei, ma o lo o fiafia le Atua mo au.”
Ua fesoasoani ona aafiaga ia te ia e iloa ai faafitauli a isi tagata ma se malamalama lautele. “I le avea ai ma autalavou laiti, e faigofie ona aafia ai i a tatou lava faafitauli,” sa ia fai mai ai. “Ua tatou taulai tele i, ‘O le a la’u galuega?’ ma ‘O le a lau mea e fai mo le aoga?’ ma ‘E faapefea ona ou maua sau soa e faavavau?’ O mea lelei uma lava na mea, ae a faapea tatou te vaai i fafo atu o i tatou lava ou te manatu o le a tatou maua mea o lo o tatou saili tonu i ai.”
“Afai tatou te tumau ona faalatalata pea i le Agaga, o le a taitaiina ma faatonutonuina e le Atua i tatou, ma o le a tatou mafai ona fai o mea lelei uma tatou te mananao e fai,” na fai mai ai Katelyn. “Ou te manatu e mananao tagata uma ina ia faia le lelei, e tusa lava pe na o lou lava nuu pe i totonu o lou aiga. O mea laiti uma, pe o le siitia ae o se uo po o le i ai mo se tasi o le aiga, o le i ai o na mea laiti o le iloa o e faia le finagalo o le Atua i lena taini o le a maua ai se aafiaga malosi i lou olaga ma isi.”
O lou Aafiaga
E le manaomia ona e alu atu ma amata ona fausia fale mo tamaiti ua maliliu o latou matua ina ia faia ai se lelei i le lalolagi. E le manaomia ona e amata se instagram o ata o le malumalu po o le avea o se faatonu o se faalapotopotoga tumaoti. Ae mafai ona e mafaufau i nisi o auala e faaaoga ai au taleni faapitoa o se aafiaga mo le lelei.
Ou te talitonu lava o nei saunoaga mai ia Peresitene Thomas S. Monson (1927–2018), mo tamaitai o le Ekalesia, e aoga lelei foi mo talavou matutua: “O outou o se malosiaga maoae mo le lelei, o se tasi o malosiaga sili i le lalolagi atoa. O lou aafiaga e oo atu i tua atu o oe lava ma lou aiga ma pai atu i isi i le lalolagi atoa” (“Tolu Sini e Taitaiina Oe,” Liahona, Nov. 2007, 120). O lea faaauau ona faia o le lelei— lelei uma e te mafai. O lou aafiaga o le a salalau mamao atu nai lo lou iloa. Ma o le tuufaatasiga o le a fai ai i tatou ma lena malosiaga maoae mo le lelei.