O se Fesootaiga Patino ma lo tatou Tama Faalelagi e ala i le Tatalo

Saunia e Elder Juan A. Uceda

O Le Fitugafulu

Mai le lauga o le faigalotu a Brigham Young University—Idaho, “O se Fesootaiga Patino ma lo Tatou Tama Faalelagi e pei ona Aoaoina e le Alii o Iesu Keriso,” na tuuina mai i le aso 28 o Novema, 2017.

O le a le taimi mulimuli na e lagona ai se mea a o e tatalo?

Mamanu pito i tua mai le Getty Images

A o ou faaaoga le telefoni feaveai e valaau atu ai i lou tina ma tama i New Jersey, ISA, ou te lagona manino atu o laua leo. Ou te le iloa pe mafai faapefea, e aunoa ma se uaea poo fesootaiga vaaia, ua mafai ai ona ou talanoa ia i laua i lea mamao naua. Ae ou te iloa e mafai!

O lenei, faamolemole e aua le fesili mai ia te au pe faapefea ona mafai e le miliona o tagata ona tatalo i le taimi e tasi, ma i gagana eseese, ma e ua sauni lo tatou Tama oi le Lagi e faafofoga ma tali mai i le taimi lava e tasi. E le mafai ona ou malamalama pe faapefea ona tupu lena mea. Ae ou te iloa e mafai!

E pei lava o telefoni feaveai, e faapena ona mafai e le tatalo, e ui lava tatou te le mafai ona malamalama auiliili pe faapefea ona tupu. Ae e i ai nisi o mea e uiga i le tatalo tatou te malamalama i ai.

Tatalo mai le Loto

Tatou te faitau i tusitusiga paia, “O lea ina ua papatisoina tagata uma, ona papatisoina ai lea o Iesu, ua tatalo ia, ona faaavanoaina ai lea o le lagi” (Luka 3:21). Ua aoao mai i tatou e Iesu o le tatalo mai le loto e tatalaina le lagi. Ua Ia fetalai mai, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou” (Mataio 7:7).

I aso nei, tatou te masani ona faaaoga le upu ole ina ia talosaga ai se mea. Ae i Eleni o anamua, o le upu o le aiteo, o lona uiga e le na o le ole ae faapea foi ona tagi, galala, po o le aioi atu. O le a le tatalaina mai le lagi pe afai ua na ona tatou fai o tatalo. O le a tatalaina le lagi pe afai tatou te tagi, pe a tatou galala, pe a tatou aioi, pe a tatou tatalo mai le loto.

Pe a e tatalo, mata e te lagonaina e pei o loo tatala mai le lagi? O le a le taimi mulimuli ao e tatalo, na e lagonaina ai se mea?

Saunia e Tatalo

Ina ia aloese mai le tatalo masani e tautu ai ia outou upu (tagai Mataio 6:7; 3 Nifae 13:7), e ao ona saunia i tatou lava e tatalo. Ou te fautua atu a faitau se mau pe mafaufau loloto puupuu i o tatou faamanuiaga. E mafai e i tatou taitasi ona saili auala e saunia ai mo tatalo patino.

Tatalo E Ui Lava Ina Faigata

E mai lea taimi i lea taimi, tatou te faatopetope ai a tatou tatalo pe ua tatalo ua na o se mea masani O nisi o taimi ua tatou le tatalo ma le faatuatua ia Iesu Keriso, ma o nisi o taimi ua tatou le tatalo lava. Ae o taimi faapena ua faaitiitia ai lo tatou faatuatua pe ua le lagona le fia tatalo ua sili ai ona manaomia ona tatou tatalo.

Na saunoa Peresitene Brigham Young (1801–77): “Pe a pogisa e pei o le vaeluaga o le po, pe a aunoa ma se lagona i lou loto e tatalo, pe ou te faapea ifo ea, o le a ou le tatalo? Leai, ae (ou te fai atu) … tulivae, tootuli ifo outou lava i le fola, ma gutu, tatala; laulaufaiva, tautala; ona tatou iloa ai lea o le mea o le a oo mai, ma ua e tapuai atu i le Alii le Atua o Isaraelu, e ui ina ua e lagona e faapea e le mafai ona e tautala i se upu i Lona suafa. O le manumalo lena tatou te maua. … E i le va o le agaga ma le tino; ua fesootai lava i latou” (i le Journal of Discourses, 3:207).

E le manao Satani e te tatalo aua ua ia iloa o le taimi lava e amata ai ona e tatalo mai le loto, o le a e maua ai le mana faaleagaga ma ua leai sona aafiaga ia te oe. O se tatalo malosi e mafai ai ona e faafetauia luitau e pei o le popole, atuatuvale, ma le masalosalo e uiga i lou lava faatuatua.

Afai e te le manatua le taimi mulimuli sa e lagonaina ai se mea a o e tatalo, e ao ona fai i ai se faiga. E ala i le tatalo, e mafai ona e faavaeina ma faatumauina se fesootaiga patino ma lou Tama oi le Lagi.

Faaalu Sina Taimi i le Lagi

A o e atuatuvale i le fia maua o se fesoasoani mai le lagi, e mafai e le tatalo ona tuuina atu ia te oe le mana e faia ai faaiuga tonu. O le tatalo mai le loto o le taimi lava lea i le lagi, e ui lava ina e le oo mai tali i se taimi vave, o le taimi i le lagi e mafai ona fesoasoani ia te oe e faaulaga ai lou alafua i le olaga faaletino.

I le lalolagi ua fai mai tagata “ua lelei le mea leaga, ae leaga le mea lelei; o e fai ma pouliuli le malamalama, ma le malamalama mo le pouliuli; o e fai ma mea oona le mea suamalie, ma le suamalie mo le oona” (Isaia 5:20), e ao ona e iloa o loo tatala le lagi ia te oe.

O tatalo e tuuina atu mai le loto, tatalo maoae, e mafai ona tuuina atu ia te oe le mana faaleagaga e faafetaiai ai ia mea. Pe a tatalaina le lagi, tatou te lagona le filemu, mafanafana, olioli, ma le alofa, e ui ina tatou te le i vave maua le malamalamaaga atoa.

Mulimuli i le Faataitaiga a le Faaola

E tele mea e mafai ona tatou aoaoina mai le suesueina o le auala sa tatalo ai le Faaola.

“O le taeao ua ala po o ia, ona ulufafo lea o ia ma maliu atu i le mea tuufua, ma tatalo ai” (Mareko 1:35).

Sa tatalo Iesu o le mea muamua i le taeao ma saili se nofoaga tuufua e tatalo ai. E te tatalo o se mea muamua i le taeao? E te aloese mai mea faalavefau? E te taofia lau fesootaiga mai le lalolagi ma taumafai e faavaeina se fesootaiga ma le lagi?

Ua faamauina foi e Luka e faapea o Iesu na “maliu ese o ia i le mea tuufua, ma tatalo ai” (Luka 5:16). E i ai sou nofoaga tatalo e te alu iai pe a e manao e faatoga atu i lou Tama i le Lagi?

Ia Tumau i le Lotomaulalo.

Ua tau mai e Mataio ia i tatou e faapea o le Togiola, ao Ia tatalo, sa ia faaalia le lotomaulalo. Sa oo ina “maliu faaitiiti atu” Iesu “i luma, ona faapa’ū faō ai lea o Ia ma tatalo, ua faapea atu, Lo’u Tama e, afai e mafai, ia ave ese lenei ipu ia te a’u: ae ‘aua le faia lo’u loto, ao Lou finagalo” (Mataio 26:39).

O le a le uiga o le “ua faapau fao i ona fofoga”? O le upu mo le “pau” i le Eleni o anamua o le pipto, o le veape o lona uiga “o le faapau ifo mai le tulaga tusao.” A oo i le taimi o tatalo patino, manatua o le a e taua le e sili ona atamai ma malosi i le lalolagi o “le Tama e ona le alofa mutimutivale, ma le Atua foi e ana le faamafanafanaga uma” (2 Korinito 1:3). A o lei i ai lea tagata, e le mafai ona ou faasamasamanoa. Ou te lagona le malosi e tootuli.

Na faia foi e Iesu se faataitaiga ina ua Ia fetalai atu i Lona Tama, “Aua le faia lo’u loto, a o lou finagalo.” A e faapea mai, “Ae Aua Le Faia Lo’u Loto, a o Lou Finagalo,” e te faamaoni lava iai? O a ni suiga e te manaomia ona faia i lou mafaufau, loto, ma faatinoga ina ia moni ma faamaoni?

Saili ma le Filifiliga.

A o e taumafai ina ia lotomaulalo, faamaoni, ma moni i au tatalo, o le a faigofie ona e talia le finagalo o le Tama Faalelagi, e tusa pe le o gatasi ma le mea sa e manatu iai. O lea foi, tatou te liliu atu i le faataitaiga a Iesu Keriso: “Ua puapuaga o Ia ua atili ai Lana tatalo” (Luka 22:44).

Pe a feagai ma se faafitauli, e te faaaluina se taimi e fesiligia ai oe lava, “Aisea ai o au?” Pe e te tatalo faatauanau? O le fasi fuaitau o le “faatauanau pea” e sau mai le upu Eleni e uiga e faapea “e aunoa ma le taofia, ma le loto i ai.” O lea ua aoao mai ai e Iesu i tatou i taimi o tofotofoga, e tatau ona tatou tatalo ma le faatauanau, e aunoa ma le taofia Ou te valaau atu ia outou uma o e o loo maua i taimi o le faanoanoa ma le tiga e liliu atu i le Atua soifua.

O taimi o le faanoanoa ma le tiga e maua ai se avanoa sili e aoaoina ai i tatou e lo tatou Tama Faalelagi. E faamaluluina o tatou loto a o sailia e o tatou mafaufau ni tali. Afai tatou te sailia o Ia, o loo i ai o Ia iina.

Talitonu o le A Ia Faafofoga Mai

Na fetalai atu le Faaola i le pule o le sunako, “Aua e te matau, tau lava ina e faatuatua” i le (Mareko 5:36). Talitonu o le a faafofoga mai le Atua le Tama ia te oe. Talitonu o le a Ia “tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto” (MF&F 8:2). Talitonu o le a e—ioe, o le a—mafai ona e lagona le filemu ma le mafanafana. Talitonu o le a mafai ona e maua le mana faaleagaga e foia ai.

E mafai e tatalo maoae ona oo atu i le lagi. I le tusi a Salamo, ua faapea mai le Tupu o Tavita, “O le afiafi, ma le taeao, ma le tutonu o le la, ou te tatalo, ma tagi uio, ma o le a ia fafofoga mai i lou leo” (Salamo 55:17). O se tasi o uiga o le upu tatalo i le gagana Eperu o le “tautala.” Ma o le mea lena tatou te fai pe a tatou tatalo i lo tatou Tama Faalelagi: tatou te talanoa ma Ia.

Pe a tatou ofoina atu se tatalo maoae, o le a ua’i mai ia i tatou le finagalo o le silisili lona mana, alofa mutimutivale ma le alofa i le lalolagi. Tatou faaalu sina taimi i le lagi. Ma e tatou te manaomia uma lava se taimi i le lagi, aemaise lava pe a tatou feagai ma taimi faigata.

Ou te iloa e aunoa ma sou masalosalo o loo iai se Atua i le lagi. O Ia o lou Tama ma loʼu Tamā. O loo soifua o Ia. O Lona suafa o Alofa. O Lona suafa o Alofa Mutimutivale. E ui ina o se mea le aoga i Ona luma, e mafai ona ou tootuli i luma o le na faia a’u, ma e ou te talanoa ia te Ia. Ma o Ia, i Lona alofa mutimutivale faavavau, e tali mai, lava pea lava pea.