ʻUhinga ʻe 5 ʻOku Totonu Ke Kau Ai ʻa e Kau Tāutahá ʻi he Ngaahi Sila he Temipalé
ʻE lava ke tāupekina kitautolu ʻi heʻetau kau atu ki he ngaahi silá neongo ai pē kapau ʻoku teʻeki ai ke tau maʻu hoa!
Ko e taimi ʻoku poupouʻi mai ai kitautolu ʻe he kau palōfitá ke tau fakahoko ʻa e ngaahi ouau fakatemipalé maʻa hotau ngaahi kui kuo pekiá, ʻoku kau heni ʻa e kotoa ʻo e ngaahi ouau fakamoʻuí. Ka neongo iá, ʻoku ʻi ai ha kau taautaha ʻe niʻihi ʻoku nau fakaʻehiʻehi pea mei he ngaahi silá, ʻo nau pehē ʻoku kaunga pē ia kiate kinautolu kuo ʻosi maʻu hoá. Ka ʻoku ʻikai ke moʻoni ia! ʻOku ʻi ai ha ngaahi tāpuaki makehe ki he ouau silá te ne lava ʻo tāpuekina kitautolu ʻi he taimí ni kapau te tau kau atu ki ai.
ʻOku pehē ʻe he tokolahi ʻo e kau taautaha kei talavoú ʻe ngali faikehe ‘a e kau atu ki he sila fakafofongá. Ka ʻoku hangē pē ko e ngaahi ouau kehé, ʻe fakatatau pē ʻetau ngaahi aʻusiá pea mei heʻetau mateuteú. Kapau ko ʻetau ʻalu ki he ouau silá ko ha faingamālie ke ako, tokoni ke fakamoʻui ʻa e pekiá, pea mo ongoʻi ʻa e Laumālié, pea ʻe ʻikai leva ke taʻofi kitautolu ʻe he tuʻunga malí.
Ko e ʻuhinga leva ʻeni ʻe nima ʻoku totonu ke tau fiefia ʻi hono fakahoko ʻo e silá.
-
ʻE toe mahino ange mo tau houngaʻia ʻi he mahuʻinga ʻo e ouau silá.
Mahalo pē ʻoku teʻeki ai ke tau mali, ka ʻoku ʻikai ʻuhinga ia ʻoku teʻeki ai ke tau mateuteu ke maʻu ha ʻilo lahi ange ki he ouau taʻengata ʻo e malí. Ko hono moʻoní, ko e sīpinga kotoa ʻo e ongoongoleleí ʻo kau ki he ngaahi fuakavá ʻoku fie maʻu ke tau tomuʻa ako ʻo kau ki ai kimuʻa pea tau toki fakahoko ia. ʻOku ʻikai ha toe feituʻu kehe ʻi he temipalé te tau fanongo ai ki he lea mālohi ʻo e ouau silá, ʻa ia ʻoku hulu ai ha ngaahi fakahinohino lahi mo ha ngaahi talaʻofa fakasilesitiale. Te tau lava ʻo ako lahi fekauʻaki mo e “fuakava foʻou mo taʻengatá” (Tokāteline mo e Ngaahi Fuakava 132:19) mei he folofolá, kau taki ʻo e Siasí, mo e ngaahi nāunau kehe ʻo e Siasí. Pea kapau te tau maʻu ʻa e faingamālié, ʻe tokoni ʻetau kau tonu ʻi he sila ki hotau ngaahi kui kuo pekiá ke kamata ke mahino ʻa e kakato ʻo e ouaú, pea mo e tāpuaki fakaofo te tau maʻu ʻi he kahaʻú.
-
ʻE tokoni ʻa e sila fakafofongá ke teuteuʻi kitautolu ke tau hoko ko ha hoa ʻoku toe lelei angé.
Tatau ai pē pe ʻoku ofi mai pe mamaʻo ʻa hotau ʻaho silá, ka te tau toe mateuteu ange ki he mali taʻengatá ʻaki ʻa hono fakaloloto ʻetau ʻilo ki he ouau nāunauʻia ko ʻení. Ko e taha ʻo e ngaahi founga lelei taha ke tau feangai ai mo e ngaahi ouau ko ʻení ʻa ia te tau fakahoko “ki he nofo taimi pea mo e taʻengatá” (Tokāteline mo e Ngaahi Fuakava 132:7) ko ʻetau fakamoʻoniʻi tonu ʻa hono fakahoko ʻi he temipalé. Te tau lava ʻo fakafanongo ki he ngaahi talaʻofa te tau fakahoko ki hotau hoá pea ki he ʻEikí foki koʻeuhí ko e aʻu ki he taimi ʻoku tau mali aí, te tau ʻiloʻi ʻa e meʻa ʻoku fie maʻu meia kitautolú pea ke tau mateuteu ki he ngaahi meʻa ko iá. Kapau te tau tui faivelenga, ʻe ʻikai ke fakasītuʻaʻi meiate kitautolu ha faʻahinga tāpuaki ʻo e ongoongoleleí. ʻE lava ke ʻomi ʻe he fakafanongo ki he ngaahi tāpuaki ʻi he ouau ʻo e silá lolotonga ʻa e teʻeki ai ke tau maʻu hoá ʻo ʻomi ha meʻa fakaʻofoʻofa ke tau mateuteu atu ki ai ha ʻaho, ʻo tatau ai pē pe ko fē ʻa e ʻaho ko iá.
-
ʻOku tatali mai ʻetau ngaahi kuí ke tau fakahoko ʻa e silá maʻanautolu.
ʻOku toe lelei ange ʻa e ngāue fakatemipalé ʻi he taimi ʻoku fakahoko fakataha ai pea mo e hisitōlia fakafāmilí. Ne u aʻusia ʻeni ʻi heʻeku ʻomi ha hingoa fakafāmili, pea kuó u ʻosi fakakakato foki mo e ngaahi ouau kehé, pea teu ke sila ki heʻene ongomātuá. Ne u maʻu ha ongo fakalaumālie mālohi ʻoku mamata mai ʻeku kui ko ʻení pea kuó ne tali ʻa e ngāue naʻá ku fakahoko kiate iá. Ne ʻikai ke u mei malava ʻo maʻu ʻa e ongo ko ʻení kapau ne ʻikai ke u fakahoko ʻa e silá.
-
ʻOku ʻomi ʻe he ngaahi silá ha faingamālie makehe ke tau ako.
Ko e ouau temipale takitaha ʻoku fonu ʻi he ngaahi fakaʻilongá. ʻOku akoʻi kitautolu ʻe he sila ʻi he temipalé ha ngaahi moʻoni ʻoku ʻikai ke fakamahinoʻi mai ʻe he ngaahi ouau kehé ʻo fakafou ʻi he ngaahi fakaʻilonga hangē ko e ʻōlitá pea mo e sioʻatá ʻokú ne fakataipe mai ʻa e taʻengatá. Te tau lava ʻo fakafanongo ki he ngaahi lea toputapu ʻi he fuakava ʻo e silá. Ko e taimi ʻe niʻihi, ʻe ʻomi ʻe he taha faisilá ha ngaahi poupou fakalaumālie ʻo kau ki he mahuʻinga pea mo e ʻuhinga ʻo e ouaú.
-
ʻOku hanga ʻe he silá ʻo tataki ʻetau moʻuí.
ʻE ʻikai liliu ʻetau tuʻunga malí ʻi he taimi ʻoku tau kau atu ai ki ha sila fakafofonga, ka te ne ʻomi ha fakakaukau mahino ʻo e meʻa ʻoku malava ke tau aʻusiá. ʻE tokoni ʻetau tokoniʻi ʻetau ngaahi kuí ke nau fakahoko ʻa e ouau ko ʻení ke tau hanga ai ʻo fokotuʻutuʻu ha palani tatau maʻatautolu. Kapau ʻoku tau toki vakai pē ki he tāpuaki ʻo ʻitānití ko ha taumuʻa mamaʻo, ʻoku tau hanga leva ʻo fakatuaiʻi ʻa e kamata ke tau aʻusia ʻa e ngaahi meʻa ko iá ʻi he taimí ni. Ko e ongoongolelei ko ʻení ʻokú ne teuteuʻi kitautolu ke tau fakaʻapaʻapaʻi ʻa e ngaahi fuakavá, pea ko e founga lelei taha ki hono fakahoko ʻení ko ʻetau moʻui taau pea mo fakahoko ʻa e ngaahi ouau mahuʻinga ʻo e temipalé—kotoa kinautolu.