2019
Kining 7 ka mga Pangutana Makaluwas sa Inyong Kaminyoon (Bisan sa dili pa Kini Magsugod)
Mayo 2019

Kining 7 ka mga Pangutana Makaluwas sa Inyong Kaminyoon (Bisan sa dili pa Kini Magsugod)

Ni Faith Sutherlin Blackhurst

couple dancing

“Naghigugmaay kami, mao nga parison gyud kami!” Dili nimo kana madungog sa kadaghanan nga isulti og kusog—apan ang daghan naghunahuna niini, nga wala lang kaayo nila isulod sa hunahuna.

Kon naa ka na sa relasyon nga mosangput sa kaminyoon, sayon ra ang pagbana-bana (o pagpanghinaot nga walay basihan) nga ang inyong mga sumbanan ug mga tumong magkauyon ra sa hingpit aron mamugna ang malipayong pamilya. Apan usahay dili ingon niana kasayon. Makabenipisyo ka sa usa ka maayo nga Pangutana ug Tubag (Q&A) nga sesyon sa imong kaugalingon, sa imong hinigugma, o sa bag-ong nakasal nga magtiayon kon unsa gayud ang imong gusto ug unsay imong panglantaw para sa imong umaabut nga pamilya.

Para sa umaabut (o bag-ohay lang) nga naminyo: Tubaga ang mga pangutana sa ubos uban sa tawo nga imong karelasyon aron madiskubrihan kon magkaparehas ba mo og opinyon ug hisguti kon unsaon nga mas mahiusa ang inyong mga tumong.

Kon sa kasamtangan dili pa kaayo mo seryuso sa usag usa nga magtambayayong sa paghimo niini, ayaw kabalaka; magamit gihapon ang mga pangutana diha nimo! Pinaagi sa pagpalambo og kaugalingon nimong panglantaw, dali ra nimong mahibaloan kon ang imong mga plano nagkatumong ba sa umaabut nimong potensyal nga kapikas.

Ikonsiderar dayon ang paghisgot sa mosunod nga mga pangutana:

  1. Unsa ang kinatibuk-an natong panglantaw para sa kinabuhing pamilya ug mahangturon natong pamilya? Unsa man ang pinakaimportante sa matag usa kanato?

  2. Unsa ang pwede natong itakda nga mga tumong aron makatabang sa pagkab-ot niini nga panglantaw?

  3. Duna bay nagsungi sa duha nato ka panglantaw para sa kinabuhing pamilya? Nganong anaa man kini? Duna ba natong duha ang andam nga mosabut?

  4. Unsaon nato sa pagsinuportahay aron molampus sa atong akademik, propesyunal, ug sa kinabuhing pamilya?

  5. Unsaon man nato sa pagbahin ang atong mga buluhaton sa panimalay?

  6. Unsa man ang andam natong isakripisyo para sa atong mga pamilya?

  7. Unsaon nato sa paghimo sa managlahing mga tahas, apan sa gihapon mamintenar ang pareho ra nga panag-uban?

Ang imong panglantaw dili kinahanglang tukma gayud sa imong kapares, apan gahini og panahon nga maistoryahan ang mga kalahian nga inyong nakita. Pinaagi sa pagtambayong sa parehas nga panglantaw, mas mahiusa kamo sa inyong relasyon.