Ang Atong Tawag sa Pagserbisyo ug Maserbisyuhan
Usa ka ting-init, gitakbuyan og sakit nga flu ang tibuok nakong pamilya. Ang akong mga ginikanan ug ang tulo sa akong igsoon nagligid na lang sa ilang higdaanan, sakit ang lawas ug taas kaayong hilanat nga lisud ang paglihok. Bugtong ako ra ang wala matakdi. Mao nga ako ang tigluto, tiglimpyo, ug tig-atiman sa miserabling hitabo sa mga sakop sa akong pamilya.
Hangtud, sa pipila ka adlaw, gitakbuyan pud ko.
Sa ingon niana, nahibaloan sa uban nga wala nay bisan usa sa among pamilya ang may kalagsik nga magluto o mangumpra. Sa kalit ang among balay napuno sa pagkaon gikan sa daghang sister sa Relief Society sa among ward.
Si Sister Thompson tinuoray nga madasigon sa iyang pagserbisyo. Nagdala siya og pamahaw sa Lunes, paniudto sa Martes, ug panihapon sa Miyerkules ug Huwebes. Pagka-huwebes sa gabii, igo lang human gibilin ni Sister Thompson sa kusina ang iyang chicken noodle soup ug mga pinutos nga panihapon, nakadungog ko og laing tuktok sa pultahan. Didto nagbarug si Sister Williams, nga dunay dalang chilli sulod sa kaldero ug usa ka basket nga bibingka.
Nangutana siya kon nakakaon na ba mi samtang iyang gisusi ang pagkaon sa lamesa sa akong kilid. Miingon ko, wala pa mi makakaon, apan bag-o lang ming gidad-an ni Sister Thompson og panihapon.
“Sige siyag hatud ninyo og pagkaon sa tibuok semana, di ba?” Nangutana sa Sister Williams.
“Oo”, mitubag ko. “Daghan gyud mi og pagkaon.”
Nagmug-ot si Sister Williams ug nanighawak. “Ah, sa sunod nga makita nimo si Sister Thompson, ingna siya nga mopahulay una siya ug itugot nga kami makapaambit usab og mga panalangin!”
Ang iyang kasinsero naghimo nako sa pagpahiyom. Napainubsanon kaayo ko sa manggiloy-ong paningkamot nga gihimo para sa among pamilya, ug sukad niadto tinuoray na nakong napasalamatan ang duha ka kahulugan sa mga pulong nga “mopaambit sa mga panalangin.”
Kon moserbisyo kita sa uban, gipaambit nato ang mga panalangin nga gihatag kanato sa atong Langitnong Amahan. Kon mapailubon ug mapasalamaton kitang motugot sa uban aron makaserbsiyo kanato, mapaambit nila ang mga panalangin nga gisaad sa Ginoo niadtong nahigugma ug moserbisyo sa usag usa.
Naghatag man kamo og gugma (ug pagkaon!) o nakadawat niini, kini nga dili katuohang mga panalangin—ug daghan pa—maatoa aron ikapaambit.