Faia o se Pepa o Faamatalaga Otooto [Résumé] e aunoa ma le Tele o se Poto Masani

Saunia e Heather White Claridge

Mekasini a le Ekalesia

E le tele se mea e tuu i lau pepa o faamatalaga otooto [résumé]? Tagai atu i ou valaauga i le Ekalesia!

O nisi o vaega autu e masani ona faaali mai i luga o pepa o faamatalaga otooto o le “Poto Masani i Galuega,” “Poto Masani Faavolenitia,” “Aotauina po o Aoaoga,” ma “Tomai.” E ui o se lisi puupuu, ae o le lagona e pei e le tele sou poto masani i nei eria e mafai ona faafefe tagata. Ae peitai aua le faanoanoa! Atonu e tele atu lou poto masani nai lo o e mafaufauina—aemaise talu ai e mafai e ou valaauga i le Ekalesia ona saunia oe i ni poto masani taua. E mafai ona tatou faataunuuina ma taumafai e faalauaitele o tatou valaauga i le Ekalesia i le alofa mo le Alii ma se naunau e fesoasoani i Ana fanau, ae o tomai tatou te maua mai le faataunuuina e mafai ona fesoasoani e iloga ai i tatou i le sailiga foi o se galuega.

Lisiina o Galuega ma le Faifaisoo

Po o le a lava ni valaauga po o ni tofiga o le Ekalesia o ia oe, atonu o i ai iina ni mea na e ausia ma ni tomai na e aoaoina e mafai ona e faaaofia i lau pepa o faamatalaga otooto. Fai se lisi o ni galuega sa e faatinoina i valaauga taitasi ma tusi i lalo pe na faafia ona e faatinoina nei galuega ma pe toafia ni tagata na aofia ai.

Faamatalaga o ni Mea na Ausia

O le mea e sosoo ai, fatu ni “faamatalaga o ni mea na ausia.” O nei faamatalaga e pupuu ae auiliili e uiga i mea na e faataunuuina i le taimi o lou valaauga. E faaali mai i latou i luga o i lau pepa o faamatalaga otooto i se lisi e togitogi i lalo ifo o poto masani taitasi.

Amata ia faamatalaga taitasi ma se “veape faatino”—veape malosi e pei o le vaavaaia, faaleleia, aoaoina, ma nisi mea faapena.

Faataitaiga

O nei faamatalaga o mea na faataunuuina e fua i ni nai ituaiga o valaauga ma e aofia ai ni galuega, faifaisoo, ma le aofaiga e masani ona fesootai ma valaauga:

Afai o le faiaoga:
- Na saunia se lesona faalevaiaso e ala i le suesue i tusi lesona ma tusitusiga paia ma ao mai ni punaoa ma ni aafiaga faaletagata lava ia
  - Mo le faifaisoo, lisi pe faafia na e faatinoina ai le galuega—faalevaiaso, faalua i le masina, ma faaauau pea.
- Aoao atu se vasega o ni tai 14 i le 16 tausaga le matutua e toaono faalevaiaso mo le 50 minute.
  - O le toatele o le vasega ma tagata auai o le a fuafua lea i lou valaauga.
Afai o le au peresitene:
- Na faia ma ausia ni sini faalemasina ma mamao mo le vaega.
- Tausia le manuia o ni tagata e toa 30 i le faalapotopotoga.
- Aoaoina ni taitai ma ni faiaoga i o latou tiute.
- Fuafuaina ma faatulagaina ni gaoioiga faalemasina mo ni tagata se toa 26.
- Faia ma mulimulitai i se paketi faalemasina.
Afai o se taitai musika:
- Na faatulagaina se polokalama faamusika faalevaiaso.
- Faatulagaina se musika faapitoa e tuuina atu e tagata o le faapotopotoga.
- Fuafuaina ni polokalama faamusika i vaitaimi o aso malolo ma gaoioiga.
Afai sa e auauna atu i se misiona:
- Faatulaga ma faataunuuina ni sini faalevaiaso ma mamao faaleaoaoga ma le faaleleia patino.
- Aoao atu se averesi o ni tagata taitoatasi e toa 16 ma ni vaega i vaiaso taitasi i le auala e faaoa ai o latou olaga e ala i le faaaogaina ma suesuega faaletagata lava ia.
- Afai o se tagata e faia aoaoga: Aoaoina ma fautuaina faifeautalai fou i le aoao atu ma le fetuunai i faasologa faigata.
- Afai o se faifeautalai tamaitai e faia aoaoga, taitai itu po o le taitai sone: E nafa mo le uunaia, iloiloina, lipoti atu o le alualu i luma o, ma le tausiga mo faifeautalai e toa 14.
- Afai o i ai i se atunuu ese: Nofo i se [atunuu ese] mo le [umi o le taimi] ma faalautele lo’u malamalama i le latou aganuu.
- Afai e te tautala i se isi gagana ese, tusi se faamatalaga sa e gauai atu i le tautala i lena gagana ma le umi.
- O nei faataitaiga e masani ai, ae e sili atu ona patino i mea na e ausia ma sili ona fetuunaia i le galuega, e sili atu.

Fatuina o Sou Pepa o Faamatalaga Otooto

Faaopoopo lau lisi o valaauga ma faamatalaga ausia faatusatusa i lau faamatalaga otooto. Ina ia fesoasoani ia lagona e ou valaauga le fesootai i lau pepa o faamatalaga otooto, e manaomia lou fetuunaia o lou faamatalaga otooto i le faamatalaga e uiga i le galuega o loo e apalai i ai.

E toetoe lava o taimi uma e i ai lava ni upu autu i faamatalaga o le galuega. O nei upu autu e patino i mea o loo sailia e le kamupani i le tagata latou te faafaigaluegaina, ma e te manao ia mautinoa e te faaaogaina nei upu autu i lau pepa o faamatalaga otooto. O le a e manao foi ia faailoa atu ou valaauga ia e sili ona vavalalata ma fetaui ma faamatalaga o le galuega. Afai o loo e apalai e avea ma fesoasoani a se tasi, faamamafa atu valaauga ia e aofia ai tomai faalapotopotoga, pe afai o loo e apalai e avea ma faiaoga suitalaga, lisi ia valaauga e aofia ai le aoao atu.

Motugaafa Faaopoopo

Lisi ou valaauga i lalo o lau vaega o “Aafiaga Faavolenitia”.
Lisi le faalapotopotoga o “Le Ekalesia a Iesu Keriso o le Au Paia o Aso e Gata Ai.”
Lisi le igoa o le valaauga o le faalagiga o lau galuega.
Faaaoga atili ia upu ma fuaitau lautele e pei o le faapotopotoga nai lo le uarota po o le paranesi ma gaoioiga faalevaiaso a le autalavou nai lo le Mutuale.
Faamatala faalapotopotoga ia e ono le masani ai tagata.
- Mo se faataitaiga, faamatala atu o le Aualofa o se faalapotopotoga a tamaitai faavaomalo. E mafai ona e faasino i le Aualofa o lau uarota po o paranesi o se vaega po o se iunite i le lotoifale o le faalapotopotoga.

E mafai foi ona e faaaogaina mataupu faavae o i luga e faailoa atu ai tomai ma poto masani mai isi galuega faavolenitia, galuega, ma gaoioiga na e faia. E taua tele le faaali atu o se vaega eseese o poto masani lea e faatatau i le galuega o loo e manao ia mauaina. O lea la, faatasi ai ma ou valaauga o le Ekalesia, taumafai e faaaofia ai le tele o potomasani talafeagai e mafai ona e faia i lau pepa o faamatalaga otooto. E tusa lava pe e te le o iloaina vave, e tele naua mea e te ofaina atu, o lea la tago e faafoliga aulelei oe lava i le mea e te mafaia.