Lagolagoina o Faifeautalai ua Vave Foi Mai i le Fale

Saunia e Kevin Theriot, PhD

Tautua a le AAG mo Aiga

O motugaafa mo le lagolagosua i le faamalologa o faifeautalai o e vave foi mai i le fale nai lo le taimi faamoemoeina.

O se tasi o tala e sili ona mataina mai le Tusi a Mamona o le autau totoa e toa 200 a Helamana lea na manunu’a i le taua (tagai i le Alema 57:25). E le mafai ona taofia lo’u vaai atu i le tutusa o le va o na autau totoa e toa 200 ma faifeautalai i aso nei o e, mo soo se mafuaaga lava, ua toe vave foi mai nai lo le taimi na faamoemoeina.

E ui lava na tuua e le toa 200 o latou fale ma faamoemoega aupito totoa, na latou maua lava le siiina mai i fafo o i latou mai le malae o le taua [po o le tafa]. Ou te faamoemoe sa latou vaaia ia i latou lava o ni tagata totoa, ua latou tuuina atu mea uma latou te mafaia, ae ou te matea na latou maua ni masalosaloga faapea foi ma le fesiligia pe aisea ua latou lē puipuia ai e pei o latou uo [faifeautalai].

E pei o autau totoa a Helamana, o faifeautalai o e vave foi mai mai a latou misiona e masani lava ona lē amanaiaina le tulaga sa latou ofo atu ma o atu i le “taua,” ma tuuina atu ma le lototoa a latou mea uma. Sa latou sauniuni mo a latou misiona ma sa faatumulia i latou i le faatuatua maoae ma se manao e auauna atu i le Alii. Pe a latou “manunua” (feagai ai, mo se faataitaiga, faafitauli o le soifua maloloina o le tino ma le mafaufau po o se solitulafono foi), e masani ona latou taulai atu i mea latou te lei ausia ma lagonaina le faanoanoa, maasiasi, po o le lotovaivai. Atonu latou te fesiligia le musumusuga lea na taitaia ai i latou e auauna atu. Atonu e popole nei faifeautalai ua toe taliu mai i auala o le a manatu ai isi tagata ia i latou po o se finagalo foi o le Alii ia i latou. Atonu latou te lagonaina le pei ua latou toilalo pe ua lē taliaina ma atonu e le lelei ai ona latou faamasinoina i latou lava.

O faifeautalai o e toe foi vave mai i le fale nai lo taimi na fuafuaina e manaomia ia taumafaiga faifaatasi a aiga, uo, taitai, ma tagata o le uarota e fesoasoani ai ia i latou ia “faamaloloina.” O nisi nei o motugaafa mo faifeautalai ua toe foi mai i le fale ma tagata o o latou aiga, taitai o le Ekalesia, uo, ma tagata o le uarota.

Mo E Pele ia i Latou: Mea e 6 e Mafai Ona E Faia e Fesoasoani Atu ai i Faifeautalai ua Toe Foi Mai ia Faamaloloina

Aapa atu i le alofa e faamafanafana, faamautinoa, ma tausia faifeautalai taitasi ua toe foi mai ma lona aiga e pei o e faia o se fitafita na manu’a i le taua. Faafetai atu ia i latou mo le auaunaga sa latou faatinoina, uunaia i latou e taulai atu i mea na latou faia, ae le o mea latou te lei faia.
Faasino ia te ia o se “faifeautalai ua toe foi mai” ae le o se “faifeautalai ua vave toe foi mai” po o se “faifeautalai ua vave-faamaloloina.” O upu alofa e mafai ona fesoasoani i le faamalologa ma le toe malosi mai o loo manaomia.
Faalogo ia i latou e iloa ai le auala sili e mafai ona e fesoasoani atu ai.
Lagolago o latou matua. Ina ia latou avea ma se tasi o mea taua e faatosinaina le faagasologa o le faamalologa o le faifeautalai. Ia faaeteete e aua le faatalalē i manaoga faalelagona o matua o se faifeautalai ua toe foi mai.
Saili ni fautuaga faapolofesa pe a manaomia. O foma’i faapitoa o le soifua maloloina o le mafaufau e mafai ona fesoasoani i faifeautalai ua toe vave foi mai e toe fetuunai i le olaga i le fale ma toe faafoi i latou i luga o le ala. Pe a avanoa, e ofo atu e le Tautua a le AAG mo Aiga ni vasega faufautua e le totogiina e ono i se talosaga mo faifeautalai ua toe vave foi mai [i le fale].
Saili le taitaiga faaleagaga. Aua le manatu mamā i le mana o le tatalo. Tatalo mo le taitaiga e faatatau i le auala sili e mafai ai ona e lagolagoina ai latou ma faataunuuina o latou manaoga.

Mo Faifeautalai ua Toe Foi Mai: E Lima Upumoni ia Manatua ao Faamalolo Oe

E alofa le Atua ia te oe. Tatou te oo uma lava i faigata i taimi eseese i la tatou faigamalaga faaletino. O le faatuatua ia Iesu Keriso e le o se tui e puipuia mai faigata—o se mataupu faavae lea e mafai ona fesosaosani ia te oe e foia ai. Ona o Lana taulaga togiola, ua i ai ia Keriso le mana e le gata ina faamama ai i tatou mai le agasala ae ia maua ai foi le mafanafana, malamalama, faamalologa, ma le lagolago. (Tagai i le saunoaga o le konafesi aoao a Elder Jeffrey R. Holland, “Peiseai o se Ipu ua Nutililii.”)
Ua faamatala mai e tusitusiga paia e uiga i le faamalologa. E fetalai mai le Atua e ala i le Agaga Paia, lea e maua e ala i le, faatasi ma isi mea, suesuega faamaoni ma le faaaogaina o tusitusiga paia. Faitau e uiga i le autau totoa a Helamana, ma isi o e na manunu’a i la latou malaga i le olaga, e maua ai le malamalamaaga. Vaavaai mo nisi faataitaiga i le ala o auauna atu ai le Tama Faalelagi ma fesoasoani e faamalolo i latou o e na saili e mulimuli ia te Ia i taimi ua tuanai.
E fesoasoani le auaunaga e faamalolo oe. E finagalo le Atua ia te oe ia “auai ma le naunautai” i mea lelei (tagai i le Mataupu Faavae ma Feagaiga 58:27) aua o le mea lena o le a fesoasoani e faamaloloina oe. Tagai atu i fafo ma tatalo mo avanoa e auauna atu ai i isi.
O le tatalo e mafai ona tatalaina ou mata. Faaali le agaga faafetai i le Tama Faalelagi. E finagalo o Ia e fesoasoani e faamalolo oe. Aioi atu ia te Ia e faamalosia oe ma tatala ou mata i mea ua uma ona Ia faia e faamanuia ai ma faamalolo ai oe faapea foi mo le malosi e tagai atu ai i fafo atu o oe lava ia e faamanuiaina ai isi.
Atonu e le malamalama isi. E le o tagata uma o le a malamalama i lou tulaga, ma atonu latou te fai atu ni tala i le le malamalama. Peitai aua e te tuu atu i lenei mea e aumaia oe i lalo! Taulai atu i le faaali atu o le agaga faafetai mo i latou o e na faamalosiau mai ia te oe, ma tatalo mo le fesoasoani e faamagalo ai isi pe afai latou te matuai le malamalama lava i lou tulaga.