Vave ona Taunuu i le Aiga nai lo le Fuafuaina
E alala le tusitala i Arisona, ISA.
E tele auala e faaauau ai ona auauna atu i le Alii ma iloa le uiga i le mavae ai o le toe foi vave mai i le fale mai se misiona.
Sa auauna atu ou matua uma i ni misiona. Sa ou faalogo i o la tala o le misiona i lou laitiiti ma moemiti ai i le aso e mafai ai ona ou auauna atu i le Alii o se faifeautalai faamisiona.
O le saunia mo lou misiona sa avea o se tasi o taimi aupito sili ona pele i lou olaga. Sa sili atu lou latalata i le Alii nai lo se isi lava taimi muamua. Sa ou maua lou valaauga o le misiona i le Misiona o Budapest Hanikeri ma ulufale ai i le Nofoaga Autu e Aoao Ai Faifeautalai i Provo (NAF), ma naunau e tuu atu mea uma o ia te au i lou Tama Faalelagi.
O le i ai i le NAF sa avea o se aafiaga faaleagaga matagofie mo au. Ao ou latalata atili i le Alii, sa ou tatalo faamaoni sa ou naunau e faia soo se mea Na te finagalo ma folafola atu ou te alofa ma lou loto atoa i tagata Hanikeri.
I le latalata i le faaiuga o lau aafiaga i le NAF, sa amata ona ou mai. I le mavae ai o se taimi puupuu i le aiga ina ia toe malosi, sa ou maua le avanoa e faaauau ai lau misiona i Hanikeri. Sa ave au i se faiaoga lelei, o Sister Sunshine Nestor, o le sa aoao au i auala e iloa ai le alofa mutimutivale agalelei o aso uma ma vavega a le Alii.
I le mavae ai o ni nai masina, sa toe amata ona ou mai. E ui lava sa ma galulue ma Sister Nestor i le mea sili ma te mafaia, sa tatau lava ona ou toe foi mai i le fale.
I lou mafaufau sa ou faatoilaloina le Alii ona sa ou le auauna atu i se misiona “atoa”. Sa uunaia au sa i ai lava ni tagata Hanikeri sa “ao ona [ou]” aoaoina pe ana ou le toe mai. Sa ou mafaufau pe na ia te au le lava o le faatuatua e malolo ai aua, pe a mavae uma, e puipuia e le Alii Ana faifeautalai. Ou te lei mafaufauina lava o lau taulaga i le Alii e le o le avatu o se tausaga ma le afa o lou olaga, ae nai lo le ositaulaga o le ituaiga o misiona na ou mafaufauina.
O Lau Sailiga mo le Uiga i le Aiga
A o ou savali ese mai le vaalele i le foi mai i le fale, sa le mafai ona ou mafaufau ua ou tuua le galuega sili ona taua o lou olaga i le misiona. Sa alu ai le taimi, ae sa ou aoaoina o loo i ai galuega i le aiga e aumaia ai foi le uiga i lou olaga.
E ui i ou mafuaaga mo le toe foi vave mai mai lau misiona nai lo le mea na mafaufauina, filifili i le aso lenei e faia lenei aafiaga o se laa i luma i lou alualu i luma, ae le o se laa i tua. Sa ou sau i le fale mo mafuaaga o le soifua maloloina, ae o isi na o mai i le fale mo le tele o mafuaaga, e aofia ai solitulafono. O le taunuuga, o nisi o manatu o loo i lalo atonu e le faatatau i lou tulaga. Tatalo i le Alii ia maua ni auala e auauna atu ai ia te Ia mai le fale. Mo se faataitaiga, afai na sau i le fale mo le solitulafono ma e le o agavaa lava e auai i le malumalu, e mafai lava ona e sailia le uiga a o e savali e le aunoa i autafa o le lotoa o le malumalu ma tautino atu e i ai se aso e toe foi ai i Lona maota paia.
E ese mai le faitauina o au tusitusiga paia, tatalo, ma le auai i le lotu, o laasaga taitasi nei i lau malaga sa taua i lou faamaloloina.
1. Tumau Ai i le Fesootai Atu
O lou laasaga muamua i le sailia o le uiga i lou olaga o le tumau ai i le fesootai atu i le Au Paia ma faifeautalai i Hanikeri Mo se taimi umi, sa ou naunau e faatalitali mo aso faasauniuni pe a ou mauaina imeli mai ia Sister Nestor ma au soa o le NAF. Ou te tautino atu; sa le faigofie i nisi taimi le faitau e uiga i misiona a au soa pe talanoa ma tagata Hanikeri sa ou matuai misia lava. Ae a o ou toe vaai i tua, ua ou iloa sa taua i lou faamalologa le faalogo e uiga i vavega na tutupu ai iina.
2. Faatulagaga o Igoa i le Initoneti
O lou uso laitiiti, sa uunaia lemu e lou tina atamai, sa tauanau au ia amata ona faavasega ia igoa. Sa ou faia muamua lisi o igoa e faamalie ai o ia, ae i se tasi aso sa oso ae ai i luga se pepa lesitala o igoa Hanikeri i luga o lau lau. Sa oo mai le Agaga i luga ia te au ma aoao au e mafai lava ona ou fesoasoani e aumai agaga Hanikeri ia Keriso—i na o tagata i leisi itu o le veli!
3. Faatuina o Sini
I le maea ai o le misiona, sa foliga mai o au sini uma o le olaga ae lei faia le misiona sa le mafai ona ausia i lou tulaga fou o le soifua maloloina. Ae i le aluga o le taimi sa ou iloa ai sa i ai sini e mafai ona ou ausia a o taotooto i lalo. Sa ou taua sini e pei o le faitauina Iesu le Keriso o “sini e ausia a o taotooto i lalo” ma galue ia i latou i aso uma.
4. Toe Foi i le Aoga
O se tasi o au sini ae lei alu i le misiona o le faauu mai le kolisi. A o avea ai le auai i vasega ma faigata i lou mai ma taimi faatulagaina o le fomai e le aunoa, sa uunaia au e lou tama e ave ni vasega i le initoneti mai le Suesuega o le Tagata Lava Ia a le Iunivesite o Polika Iaga. E le gata o lenei mea o se sini e ausia gofie ao taotooto i lalo, ae sa ou iloa atonu sa mafai ona ou faia nisi sini a o lei faia le misiona nai lo lou mafaufau ai i mea sa mafai ona faia i le taimi ua tuanai.
5. Auauna Atu i se Misiona i le Initoneti
I se tasi aso i le lotu, sa savali mai ai se tamaitai i lou tina ma fai mai, “E te iloaina e mafai e Destiny ona auauna atu i se misiona i le initoneti o le faatulagaina o igoa?” O lenei fesili e lei mafaufauina sa o se tasi i au tatalo. Sa mafai ona ou auauna atu i le Alii mo le iva masina o se faifeautalai tautua o le Ekalesia e fesoasoani e faatulaga igoa. O se misiona lenei sa mafai ona ou faia!*
6. Aoao Atu o le Sauniuniga mo le Misiona
A o mafai ai ona ou taulima lelei lou tulaga o le soifua maloloina, sa ou amata ona suesue i se kolisi i le nuu a o faia lau misiona i le initoneti. Sa talosagaina au e aoao atu le sauniuniga mo le misiona i le inisitituti e lata ane. O le aoao atu sa fesoasoani ia te au e iloa ai o lou naunautai mo le galuega faafaifeautalai sa le faaitiitia ma e oo lava i lau misiona puupuu sa tuuina mai ia te au le tele o aafiaga e mafai ona aoga mo au tamaiti aoga.
7. Volenitia i le NAF
I le maea ai o le faamanuiaina e auai i se semesa i le kolisi e lata ane i le aiga, sa ou masii atu i Iuta, ISA, e auai i le BYU. I le taimi muamua, sa tau le mafai ona ou savali i autafa o le NAF i Provo e aunoa ma se lagona faafuasei o lagona feteenai. Ae sa ou amata volenitia i vaiaso taitasi i le NAF ma iloa ai sa fesoasoani ou te malolo ai i le feiloai i faifeautalai matagofie ua auina atu i lou Hanikeri pele.
8. Faatinoina o Galuega Faalemalumalu
O se uso Hanikeri, o Edit, sa saunia le toeitiiti 150,000 igoa mo le malumalu na talosagaina au e ave nisi o ona igoa i le malumalu. Sa avea o se olioli le faia o sauniga faaola mo nei tagata Hanikeri!
Maloloina Faifai Pea e Ala i Lana Galuega
O le auauna atu i se misiona sa avea ma se mea na sili ona ou manao e ausia i lou olaga ma, i le malamalama ai, sa ou lagona ai se toilalo ina ua ou vave sau i le fale nai lo mea sa mafaufauina. Mo se taimi, sa ou tauivi ai e talanoa e uiga i lau misiona. Sa tatau ona ou faatoilaloina lagona o le toilalo. Sa tatau ona ou aoao i le auala e faamasino ai le taua o lau misiona e ala i lou manao e auauna atu nai lo le umi o lou auanaga. E ui ou te lei iloaina i lea taimi, o nei laasaga taitasi e agai atu i le uiga o lou olaga sa aumaia foi le malologa.
Sa ou popole mo le tele o tausaga o le toe foi atu i Hanikeri o le a faigata faalelagona mo au. Ina ua ou malaga mulimuli ane iina, sa ou lagona ai i le aso lona lua e le gata ou te lei lagonaina le tiga, ae sa ou lagona foi le olioli maoae i le toe foi mai ai. Sa ou iloa ai i lena taimi sa tuuina mai e le Tama Faalelagi ia te au le avanoa e oo ai i le mana faamalolo o le Togiola a le Faaola. Ua ou iloa nei e faapea e ala i le Togiola a Iesu Keriso, o le a faasaoina mea uma i le taimi mulimuli.