Ua Aumaia ia i Tatou e le Malumalu SE Vaaiga Maualuga Atu
Saunia e Jean B. Bingham
Peresitene Aoao o le Aualofa
E pei o se mea vāai e taulai atu i fetu i talaatu o lo tatou vaaiga, e tatalaina e le malumalu o tatou mafaufau ina ia maua se vaaiga e sili atu ona siitiaina ma faalauteleina.
O nisi o a ma manatuaga manino ma taua o le aumau ai i Sisifotutotonu Iunaite Setete ao avea i maua ma ni matua talavou o ni asiasiga faaletausaga i le malumalu i Uosigitone, D.C. I lena taimi, e na o le pau lea o le malumalu sa faagaoioia i sasae o le Vaitafe o Misisipi. I le iloaina e taua sauniga o le malumalu mo fanau uma a le Tama Faalelagi na tuuina mai ai se lagona o le naunautaiga i a ma taumafaiga.
E pei o le toatele o outou, sa ma fuafuaina mo ni uo e tausia la ma fanau laiti, sa malaga atu i le po i se pasi e tumu i tagata o le au paia, faaaluina ni nai aso taua e faia ai le tele o galuega faalemalumalu sa ma mafai ona faia, ma ona toe tietie atu ai lea i le pasi i le aiga i le po ina ia ma auai i sauniga Lotu i le Aso Sa. O na malaga sa lei foliga mai o ni osigataulaga; sa taua ona o le siitiaga faaleagaga sa fafaga ai o matou agaga mo masina na mulimuli mai.
I nai tausaga mulimuli ane, sa matou fiafia e faafeiloai le Malumalu o Chicago Ilinoi, le uluai malumalu ua fausia i le Eria Tutotonu o Amerika Matu talu mai le Malumalu o Cardston Alberta Kanata i le 62 tausaga na muamua atu. Faatasi ai ma se malumalu e na o le 45 minute mai lo matou fale, sa o se fiafia mo i maua le faatele le auai e le aunoa nai lo le faa-tasi i se tausaga ma maua lena meaai faaleagaga i tulaga masani.
Peitai o aso nei, e ui o nisi o i tatou e nonofo latalata i le malumalu, e faigata lava le auai soo. Atonu o le faigofie o le i ai o se malumalu e faaoleole ai i tatou e mafaufau, “Ou te alu taeao, pe a tele sou taimi.” E faigofie le faalavelaveina e mamafatu o i ai nei ma lē amanaiaina ai le tele o avanoa taua. Na saunoa mai Elder Richard G. Scott (1928–2015) o le Korama a Aposetolo e Toasefululua, “Ou te fautuaina outou e faatu sau lava sini pe o le a faafia ona e avanoa atu i sauniga o loo ofoina mai i totonu o o tatou malumalu o loo faagaoioia.”1
A tatou lē amanaia le avanoa e auai ai e le aunoa ao faatagaina e o tatou tulaga, a tatou manatu mama i le avanoa e o atu ai i le malumalu pe a matua latalata mai ia i tatou, tatou te ono toilalo e maua faamanuiaga ma avanoa o le lumanai ua faapolopolo mai e lo tatou Tama ma Lona Alo mo i tatou. “O Aʼu, o le Alii, e noatia aʼu pe a outou faia mea Ou te fai atu ai; ae a outou lē faia mea Ou te fai atu ai, e leai se folafolaga mo outou” (MF&F 82:10).
Pe a foliga mai o loo galulue faatasi mea e tutupu e taofia i tatou mai le o atu i le malumalu, e mafai ona tatou manatua le faamautinoaga a Iesu Keriso: “E maua foi outou e le puapuaga i le lalolagi: a ia outou loto tetele, ua ou manumalo i le lalolagi” (Ioane 16:33). Ao tatou tumau ai ma auai atu i le malumalu e ui i ma’a tu’ia, o le a tatou maua le fesoasoani a le Faaola e faatoilalo ai le lalolagi lea tatou te nonofo ai. I se tasi o taimi a o ma sauni ma lou toalua e tuua le aiga mo le malumalu, sa oo mai se faafitauli e tasi ma le isi faafitauli. Mulimuli ane, a o ma tulalata atu i fafo o le faitotoa, sa i ai se ma “taimi faigata i le ma va.” A o ma savavali atu ma le filemu i le taavale, sa mafai ona ma faalogoina le ma afafine matua o faamautinoa lona uso, “Aua le popole; la te o mai fiafia lava i le fale mai le malumalu.” Ma sa sa’o o ia!
E Faamanatu Mai e Malumalu ia i Tatou e uiga i le Fuatiaina o le Faavavau
Pe tatou te o mai i le malumalu ma loto ua tumu i le olioli pe ua mamafatu i le faanoanoa, o le malumalu o le nofoaga mo tagata agavaa uma o i ai se loto matala ina ia siitiaina ma faamalosia.
Ou te sau i le malumalu e toetoe lava a faatumulia i le agaga faafetai mo se faamanuiaga ua auina mai i se tasi e pele o loo tauivi; sa ou faamaligiina foi ma le lemu loimata o le faanoanoa tele mo a’u lava toilalo. Sa ou maua musumusuga ma faatonuga ma aoaiina foi mai le Agaga a o auauna atu o se sui mo se tasi e mauaina ia sauniga lea e faataga ai o ia e alualu i luma i le faavavau. O na aafiaga uma sa siitiaina ma faamalosia ai a’u. Ma ioe, sa ou nofo ai i le tele o itula i le malumalu o se vaega o le “tiute,” tau lava o le faataunuuina o lau matafaioi, ma ou maua ai foi au o o’u moe i taimi o sauniga o le malumalu a o ou avea ma faiaoga o le seminare i taeao po! Ae o taimi uma ou te alu ai i le malumalu, e faamanuiaina lava au. Pe auina mai se faamanuiaga i le taimi lava lena po o o tatou taumafaiga e fausia e agai i faamanuiaga e mulimuli mai, o taimi laiti uma tatou te faaaluina i le malumalu e taunuu lava i ni faateleina patino.
O le i ai i totonu o le malumalu e faamanatu mai ia i tatou le fuatiaina o le faavavau, i le vaai i tua i o tatou tuaa ma i luma i a tatou fanau. E faamalosia foi a tatou fanau e tusa ai ma lo latou vaaiga e faavavau pe a latou taulai atu i le malumalu. E mafai faapefea ona sili atu ona tatou saunia mo le malumalu—o se laasaga taua i lo latou agai i luma i le faavavau? Na fautua mai Peresitene Russell M. Nelson, Peresitene o le Korama a Aposetolo e Toasefululua, “E ao i matua ona aoao atu le taua o le malumalu ao laiti a latou fanau.”2 Sa fautuaina e Peresitene Spencer W. Kimball (1895–1985) ia matua e tuu se ata o le malumalu i totonu o le potumoe a o latou fanau ina ia latou vaai i ai i lena faamanatu paia i aso uma seia oo ina avea ma se vaega o i latou.3 E mafai foi ona e tau atu i lau fanau ia faamanuiaga e te maua mai le auai i le malumalu e faapena foi lau molimau i le olioli e te faamoemoeina i sootaga e faavavau ma i latou. Ma e mafai ona e lagolagoina au talavou i o latou naunautaiga e faia papatisoga mo e ua maliliu. Manatua i au lesona o le afiafi faaleaiga ma taimi e aoao atu ai o “le malumalu o le faamoemoega o gaoioiga uma, lesona uma, laasaga uma e agai i luma i le Ekalesia.”4
Ao outou usuina ma lau fanau le, “Ou te fia vaai i le malumalu. Ou te ulu i ai i se aso. E osi feagaiga, o le a ou usitai,”5 o le a e fesoasoani ia i latou e lagona se manao e ulu atu i le maota paia o le Alii. Ma o le a tumu foi lou lava loto i le agaga faafetai mo le Tama Faalelagi, mo Lana fuafuaga o le faaolataga, mo le Faaola ma Lana Togiola, lea ua mafai ai e oe ona faatasi ma e pele ia te oe e faavavau. O le “ala [a le Faaola] e tau atu i le fiafia i lenei olaga ma le ola e faavavau i le lalolagi a sau.”6 O lena ala e taitai atu i ma e ala i le malumalu!
O Malumalu O Se Malutaga mai le Lalolagi
E mafai e faatosinaga faalelalolagi ona toso ese i tatou mai le malumalu. Sa le mautonu se uo pele i manatu ma tala e uiga i le Ekalesia sa ia faitau i ai i le initoneti. Sa ia filifili e taofi le auai atu i le malumalu seia foia ana fesili. Ma lou loto atoa, ou te augani atu ia te outou o i ai ni fesili e aafia ai a outou molimau ia faaauau pea le auai i tatalo patino ma le suesueina o tusitusiga paia ma ia faaauau pea ona auai i le malumalu a o e galue e saili tali o le a aumaia ia te oe le filemu. Tumau le taulai atu i le talalelei e aloese ai mai le faalavelaveina e manatu sese. E le saili e se tasi e faamalolo se gasegase faaletino i le fai atu i se tagata taalo polofesa mo fautuaga faafomai e sili atu i lo fesili taua faaleagaga e mafai ona foia sao e se tasi o i ai se malamalama itiiti o le talalelei toefuataiga o Iesu Keriso. O le Agaga Paia, e molimau i “le moni o mea uma lava” (Moronae 10:5), “tau atu ia te oe i lou mafaufau ma lou loto” (MF&F 8:2) upumoni e faavavau.
O se tasi o nofoaga e sili ai ona faateleina le mauaina o lena Agaga o totonu o le malumalu. Afai o e agavaa e ulu atu i le maota o le Alii (pei ona iloiloina e oe ma lou epikopo), faamolemole sau i le malumalu ma au fesili ma maua le faamautinoaga e ui e te le malamalama i mea uma i le taimi nei, e malamalama ai le Alii. Manatua mea uma e te faia iloa ma malamalama ai. O mea e te faia iloa ma ua maua ai se molimau faaleagaga e taitai oe i “le manuia foi mai le Atua, o loo silisili lava i mea uma e, [ma o le a] leoleoina ai outou loto atoa ma o outou mafaufau ia Keriso Iesu” (Filipi 4:7). Ou te molimau atu o le malamalama ma le filemu e te sailia e oo mai a o e faaauau pea ona maua le faatuatua e taitai oe e lou Tama oi le Lagi ma taita oe i le upumoni.
Ua faamanatu mai e Isaia i tatou o le malumalu o “le fale apitaga … mai [le] uaga” (Isaia 4:6). E tutusa lava ma upu faamautinoa a Peresitene Thomas S. Monson: “A o tatou ulu atu i faitotoa o le malumalu, tatou te tuu ese mea faalavelave ma fenumiaiga o le lalolagi. O totonu o lenei maota paia, tatou te maua ai le matagofie ma le faatulagaina lelei. E i ai le malologa mo o tatou agaga ma se mapusaga mai mea e naunau i ai o tatou olaga.”7
A o faateleina faafitauli i le lalolagi ma faatupulaia mamafatu o aso uma, e tatau ona tatou tausia lo tatou taulaiga i mea e taua moni. E faigofie ona taulai i mea e le lelei ma i faafitauli faalelalolagi, e pei o loo tatou vaavaai i a tatou lava toilalo ma faafitauli e ala i se mea vaai. O le i ai i le malumalu e faamanatu mai ia i tatou ia tausia se vaaiga e faavavau. E pei o se mea vaai lapoa e taulai i fetu i talaatu o la tatou vaaiga, e tatala e le malumalu o tatou mafaufau i se vaaiga mamao e sili atu ona siitiaina ma faalauaiteleina. E mafai ai ona tatou vaai, faamoemoe mo, ma galulue agai i le avea ma mea uma ua mamanuina i tatou e le Tama Faalelagi ia avea ai. E fesoasoani ia i tatou e taulai i upumoni e faavavau—i Matua Faalelagi o e alolofa ia i tatou ma finagalo e fesoasoani mai ia i tatou, i lo tatou taua moni o ni a La fanau, ma mea ua tatou gafatia e avea ai o “suli lava o le Atua, o suli faatasi ma Keriso” (Roma 8:17). I le malumalu, ua faamatala mai ai le ata o le faaolataga, ma feagaiga e faavavau e osia ai. I le malumalu, ua tuu mai ia i tatou faauigaga e avea ai ma o tatou lava tagata sili ma maualuga e faavavau.
“A o tatou auai atu i le malumalu,” na apoapoai mai ai Peresitene Monson, “e mafai ona oo mai ia te i tatou se maualuga o le faaleagaga ma se lagona o le filemu lea e sili mamao atu nai lo se isi lava lagona e mafai ona oo mai i le loto o le tagata. O le a tatou pueina ai le uiga moni o upu a le Faaola ina ua Ia fetalai: “Ou te tuuina atu ia te outou le manuia; o lo’u manuia ou te avatu ai ia te outou. … Aua le atuatuvale o outou loto aua foi tou te matatau’ [Ioane 14:27].”8
O Lau Auaunaga Faalemalumalu o Le A Uunaia ai Isi
O le agaga e te aumaia mai i lau auaunaga i le malumalu o le a uunaia ai tagata tou te fegalegaleai faatasi—o nisi atonu e te lei mafaufauina. A o agai atu i le fale mai i se tasi o asiasiga i le malumalu i Uosigitone, D.C, sa faasoa e le vaega o tagata o le ekalesia molimau a o agai atu le pasi i kilomita agai i le aiga. Sa auauai ona faasoaina e tagata auai lo latou olioli ma le agaga faafetai mo faamanuiaga i le taimi lena ma faavavau o le malumalu. Sa le mafai e lo matou ave pasi e le auai i le ekalesia ona toe taofiofi. Sa ia tago atu i le mea faaleotele leo ma faailoa mai le agaga faafetai mo le i ai faatasi mai matou. Ona ia fai mai lea, “Ou te le iloa le mea o loo ia te outou, ae ua ou lagona se mea e ese mai iinei.” O se taitai misiona a le uarota sa i luga o le pasi, sa aumai moni lava lana faamatalaga fesootai ma tuuina atu mulimuli ane i faifeautalai.
Tau lava ou te valaaulia outou ia faaaoga soo le avanoa o le i ai o se malumalu e latalata ane ia te outou i o outou tulaga e mafai ai. O le a faamalolosia outou ma maua le filemu i le maota o le Alii o Iesu Keriso, aua o Ia o le malamalama ma le ola ma le faamoemoe o le lalolagi. A o agai i luma aso nei e gata ai i Lona toe afio mai folafolaina, tau ina ia outou maua Lona malamalama ma lagona le faamoemoe lea e ofoina mai i Ona malumalu paia.